TAPUI 3
¿Ñuca yaya mamahuan alli parlanacungapajca imatataj rurasha?
¿IMATATAJ RURANGUIMAN?
Caipi yuyai: Guillermoca 17 huatacunatami charin. Miércoles chishimi can. Debercunata ña tucuchishpami ashata samarisha nishpa televisionta ricui callarin.
Televisionta ricucujpimi yayaca pꞌinarishca huasiman chayashpaca:
“¡Guillermo! ¿Televisiontachu ricushpa siricungui? ¿Cambaj uchilla huauquitami deberta rurachicuna cangui? ¡Ñucanchij mandashcataca nunca mana cazunguichu!”ninmi.
Guillermoca ashata pꞌiñarishpami “Nuncachu mana cazushcani” nin.
Yayaca ¿imatataj nicungui? ninmi.
Guillermoca: “Nimata mana nicunichu” ninmi.
Yayaca achcata pꞌiñarishpami “¡canca ñucataca mana cazunguichu!” nin.
Can Guillermo cashpaca ¿yayata ama ashtahuan pꞌiñachingapajca imatataj ruranguiman?
YUYAI
Carrota manejashpa ricujpi rumicunahuan ñan tapashca cajpica shujtaj ñantami mashcanguiman ¿nachu? Chashnallatajmi yaya mamahuan mana coleranacushpa parlanacungapajca ima shina paicunahuan parlanacunata mashcana cangui.
SHUJ EJEMPLOTA RICUSHUN:
Lidiaca ninmi:“Ñuca yayahuan parlanacunaca sinchimi can. Huaquinpica ñuca parlacujpica mana uyanchu. Tucuita nishca qꞌuipami ¿imatataj nicurcangui?” nin.
¿LIDIACA IMATATAJ RURAI TUCUN?
Lidiaca caparishpami: “¡Ñucata uyai! ¡Canhuanmi parlasha nini!” nin.
Lidiaca paipaj yayaman ima tucucushcata parlasha nishpapish upallami saquirin.
Lidiaca shujtaj punllami paipaj yayahuan parlanacun.
¿Maijantataj Lidiataca agllachun ninguiman?
CAIPI YUYAI: Lidiapaj yayaca shujtaj cosascunapi yuyacushcamantami paitaca mana uyarca. Yayata caparishca cajpica, yayaca imamanta caparishcata mana entendishpami Lidiata mana uyanman carca. Yayatapish mana respetashcatami ricuchinman carca (Efesios 6:2). Caita ruranaca ishquindijpajmi mana alli canman.
Ñan tapashca shina, cambaj yaya mamahuan parlanacuna sinchi cajpica ima shina parlanacunatami mashcana cangui.
Upalla saquirinaca, jahuallami can. Shinapish mana allichu can. ¿Imamanta? Paipaj llaquicunata allichingapajca yayahuanmi parlanacuna can. Yayaca ima tucucushcata yachashpami Lidiata ayudanga. Upalla saquirijpica mana ayudangachu.
Lidiaca yayahuanmi shujtaj punlla parlanacunata yuyan. Shujtaj punlla yaya mana tanto ocupado cajpimi paipaj llaquicunamanta parlan. Shuj cartatapishmi paipaj yayaman cungapaj quillcan. Caita rurashpaca Lidiaca allimi sintiringa.
Shuj cartata quillcanaca ima llaquicunallata charishcata yayaman huillangapajmi ayudanga. Cartata rezashpami Lidia ima tucucushcata yayaca alli entendinga. Yayahuan shujtaj punlla parlanacunaca ishquindijpajmi alli can. Ñahui ñahui parlanacushpa o cartata quillcashpaca “sumaj causaiman caishuj chaishuj shuj yuyailla catishunchij” nishcatami pajtachicun (Romanos 14:19).
¿Lidiaca imatataj ashtahuan rurai tucun?
¿Shujtaj yuyaita charinguichu? Chaita rurajpi Lidiata ima shina ayudanatapish quillcai.
IMATA MANA PACASHPA TUCUITA PARLAI
Huaquinpica, cambaj yaya mamaca can nishcataca mana tucuita alli entendingacunachu.
¿IMATATAJ RURANGUIMAN?
Cambaj yaya mama imamantataj pꞌiña puricungui nijpica: “Mana pꞌiñachu cani” nishpachari cutichingui.
Can chaita nijpica: “Ñucanchijhuan mana parlanacusha ninchu paipaj amigocunamanmi imatapish parlanata munan” nishpami yuyangacuna.
Yuyai. Cambaj yaya mamaca shuj llaquita charishcata ricushpami ayudasha nin, pero canca: “Ama preocuparichijchu, ñucallatajmi allichishalla” ninguichari.
¿Chaita nijpica cambaj yaya mamaca imatashi yuyanga?
¿Chashna ninapaj randica imatataj ni tucungui?