¿Canpishchu chashna sintirishcangui? Tal vez quiquinpish Bibliata liyinatachari munashcangui. Pero ñajaman parlashca gentecuna shinachari sintirishcangui. Huaquin gentecunaca Bibliata liyinatami manchancuna. Pero Bibliata liyishpami cushilla causai tucungui. Shinallataj Bibliata liyina munaita charingapajmi huaquin cosascunata rurai tucungui. ¿Bibliapi imallata yachai tucushcata ricunata munanguimanchu?

Shujtajcuna Bibliata liyishpa ima shina beneficiarishcata ricushun.

Ezekiel shuti shuj jovenca: “Ñaupaca maiman chayanata mana yachashpa shuj ñanta ricuj shinami carcani. Pero cunanca Bibliata liyishpami ñuca causaihuan imata ruranata yachani. Bibliapica sumaj consejocunami tiyan” ninmi.

Frieda shuti shuj joven huarmica: “Ñaupaca imamantapish ratomi colerajlla carcani. Pero Bibliata liyishcamantami ñuca mal geniota jarcarinata yachashcani. Chaimantami ashtahuan amigocunatapish charini” ninmi.

Eunice shuti shuj huarmica: “Bibliata liyinaca alli persona cachunmi ayudacun. Shinallataj mana alli ruraicunata saquichunpishmi ayudacun” ninmi.

Ñajaman parlashca gentecuna shinami millones gentecunapish Bibliata liyishpa cushilla causacuncuna. Canpishmi chashna causai tucungui (Isaías 48:17, 18). Bibliata liyishpami alli decisioncunata japishun, alli amigocunatapish tari tucushun. Shinallataj mana yallitaj sustarishpami causashun. Ashtahuantajca Yaya Diosmantami ashtahuan yachai tucushun. Bibliapi tiyaj consejocunaca Yaya Diosmantami shamun. Paica alli consejocunallatami cun. Chaimantami Bibliapi tiyaj consejocunata catishpaca mana nunca pandarishun.

Bibliata liyishpa callarinallami cangui. Catij yachaicunapica Bibliata liyishpa callaringapaj imata ruranata, Bibliata cushicushpa liyingapaj imata ruranatami yachangui.

¿Bibliata liyishpa cushilla cangapaj, Bibliata liyishpa beneficiaringapajca imatataj rurai tucungui? Cai yachaipimi pichca yuyaicuna tiyan. Cai yuyaicunami achca gentecunata ayudashca.

Shuj alli lugarta mashcai. Shuj tranquilo puestota mashcai. Por ejemplo, bulla mana tanto tiyan lugarta, luz alli achijyachin lugarta, huaira normal tiyan lugartami mashcana cangui. Chashnami Bibliata alli liyi tucungui.

Bibliata liyina munaita chari. Bibliaca Yaya Dios cushca shuj regalomi can. Bibliata liyishpa beneficiaringapajca ima shinami shuj huahua paipaj yaya yachachichun munan, chashnallataj munaitami canpish charina cangui. Bibliamanta panda yuyaicunata charishpaca ladoman saqui. Chashnami Yaya Dios yachachichun saquingui (Salmo 25:​4).

Bibliata manaraj liyi callarishpa Diosta mañai. Bibliapica Diospaj yuyaicunami tiyan. Chaimantami Bibliata intindingapajca pai ayudachun mañana cangui. Yaya Diosca paita mañajpica espíritu santota cushpami ayudanga (Lucas 11:13). Diospaj espíritu santo ayudajpimi Dios ima shina yuyashcata intindingui. Tiempohuancarin Diosmanta sinchi yachaicunatami intindi tucungui (1 Corintios 2:​10).

Bibliata intindina munaihuan liyi. Ama liyina cashcallamanta liyichu. Bibliata liyicushpaca imata liyicushcata alli intindingapajmi esforzarina cangui. Shinallataj tapuri: “¿Caipi parlashca personamantaca imatataj yachai tucuni? ¿Caipi yachashcacunataca ima shinataj ñuca causaipi pajtachi tucuni?” nishpa.

Bibliata imamanta liyisha nishcata yuyari. Bibliata liyishpa beneficiaringapajca cambaj causaipi ima ayudai tucushcata ricui. Por ejemplo, ¿Yaya Diosta ashtahuan rijsingapaj, alli persona cangapaj, alli cusa o huarmi cangapajca imatataj rurai tucungui? Qꞌuipaca can yachasha nishca yuyaicunata Bibliapi mai partepi tari tucushcata ricui.a

Cai pichca yuyaicunaca Bibliata liyishpa callarichunmi ayudanga. Pero ¿ima shinataj Bibliata cushilla liyishpa cati tucungui? Catij yachaipimi shujtaj yuyaicunata ricushun.

¿Bibliata liyicushpaca aburridochu sintiringui o cushillachu sintiringui? Bibliata liyicushpa cushilla sintiringapajca canllatajmi imata ruranata ricui tucungui. Bibliata cushilla liyingapaj huaquin yuyaicunata ricushun.

Alli traducishca, cunan punllacunapi parlashca shimicunapi traducishca Bibliata agllai. Can liyicushca Bibliapi sinchi palabracuna tiyajpica mana cushilla liyinguichu. Chaimantami intindirinalla shimicunahuan traducishca Bibliata liyina cangui. Chashnami cambaj shunguman chayanga. Shinallataj can liyicushca Bibliaca exactomi cana can.a

Bibliata liyingapaj tecnologiata utilizai. Cunan punllacunapica mana imprimishca Bibliacunallachu tiyan, sino Internetpipishmi tiyan. Mana cashpaca computadorapi, tabletpi o celularpimi shuj Bibliata descargai tucungui. Maijan Bibliacunaca shuj versota shujtaj Bibliacunahuan chꞌimbapurangapaj, shuj yuyaimanta shujtaj versocunapi imata nishcata chꞌimbapurangapajmi huaquin herramientacunata charin. Shinallataj liyinata mana tanto munashpaca Bibliataca audiopimi uyai tucungui. Achcacunami trabajoman carropi viajacushpa, ropata tajshacushpa o imata ruracushpapish Bibliata uyanata munancuna. ¿Canca ima shinataj Bibliata liyinata munangui?

Bibliamanta ashtahuan informacionta mashcai. Bibliamanta ashtahuan yachangapaj llujshishca informacionca Bibliata liyicushpa beneficiarichunmi ayudanga. Por ejemplo, Bibliapi parlashca llajtacuna, lugarcuna maipi saquirij cashcata ricuchij mapacuna nishcami tiyan. Chaicunata ricushpami maipi imalla pasashcata intindi tucunchij. Shinallataj cai revistapi tiyaj shujtaj yachaicuna, jw.org paginapi “Bibliamanta yachaicuna” nishca partepi llujshishca informacioncunami Bibliata alli intindichun ayudanga.

Can munashca yuyaicunamanta yachai. Bibliata callarimanta tucuringacama liyishpa tucuchina sinchi ricurijpica, can munashca yuyaicunatami liyishpa callari tucungui. Por ejemplo, Bibliapi parlashca shuj rijsishca personamanta yachasha nishpaca chaimantami liyishpa callari tucungui. Chaipajca “Bibliapi parlashca personamanta yachashpa Bibliata ashtahuan yachai” nishca recuadrota ricui. Chashnami maijan versocunata mashcanata yachangui. Shinallataj Bibliataca temacunamanta o ima tiempopi escribishcata catishpami liyi tucungui. ¿Bibliata chashna liyinata munanguimanchu?

Bibliaca mana shujtaj librocuna shinachu can. Bibliapica ñucanchijta Ruraj Dios cushca consejocunatami liyi tucunchij (2 Timoteo 3:​16). Bibliapi yachachishcacunata liyishpami alli causai tucunchij. Bibliapica: “Diospaj Shimica causajmi, tucuita rurai tucujmi” ninmi (Hebreos 4:12). Bibliata estudiashpami ñucanchij causaita mejorashun. ¿Ima shina? Bibliata liyishpami ñucanchij causaipaj alli consejocunata tari tucunchij. Shinallataj Yaya Diostami alli rijsi tucunchij. Pai imalla cusha nishcacunamantami yachai tucunchij (1 Timoteo 4:​8; Santiago 4:​8).

Bibliapica alli consejocunatami tari tucunchij. Ñucanchij llaquicunahuan ima shina chimbapuranata yachangapajmi huaquin consejocunata tari tucunchij. Shinallataj caicunapajpishmi ayudan:

• Shujtajcunahuan alli apanacungapajmi ayudan (Efesios 4:​31, 32; 5:​22, 25, 28, 33).

• Cuerpopipish, yuyaipipish alli cangapajmi ayudan (Salmo 37:​8; Proverbios 17:22).

• Ima alli cashcata, mana alli cashcata yachachunmi ayudan (1 Corintios 6:​9, 10).

• Cullquimantapish, charishca cosascunamantapish huaquinconsejocunatami cun (Proverbios 10:​4; 28:19; Efesios 4:​28).a

Asia ladopi causaj shuj cusa huarmica Bibliapi tiyaj consejocunata pajtachinaca alli cashcatami intindircacuna. Paicuna cunanlla cazarashca cashcamantami caishuj chaishuj mana tanto intindinacushpa, ima shina sintirishcatapish mana parlai tucurcacuna. Pero ishquindijmi Bibliapi yachachishcata pajtachi callarircacuna. Vicenteca: “Bibliata estudiashcamantami problemacuna ricurijpi cꞌuyaihuan chai problemacunata ima shina allichinata yacharcani. Chai consejocunata pajtachishcamantami cushilla canchij” ninmi. Paipaj huarmi Annalouca: “Bibliata estudianami ñucanchijtaca achcata ayudashca. Cunanca cushillami sintirini. Ñuca cusahuan ishquindij shamuj punllacunapi imata ruranata yachashcamantami contenta sintirini” ninmi.

Bibliata liyishpami Yaya Diosta rijsi tucunchij. Vicenteca: “Bibliata liyishcamantami Diospajman ashtahuan cꞌuchuyashcani” ninmi. Vicente nishca shinaca Bibliata estudiashpami Yaya Diostaca alli rijsi tucunchij. Shinallataj Dios cushca consejocunamantami beneficiari tucunchij. Diospaj amigopishmi cai tucunchij. Bibliapimi shamuj punllacunapi sumaj causai tiyanata, chaipi cushilla huiñai huiñaita causai tucushcata yachai tucunchij (1 Timoteo 6:​19). Chaitaca shujtaj librocunaca mana yachachinchu.

Bibliata liyi callarishpa, Bibliata liyina costumbreta japishpaca ashtahuan allimi causangui. Diostapishmi ashtahuan rijsingui. Pero tal vez Bibliata liyicushpaca achca tapuicunatachari ruranata munangui. Chashna tapuicunata charishpaca ñaupa tiempopi causaj Etiopía llajtamanta runapaj ejemplotami cati tucungui. Paimi Dios Quillcachishcacunata estudiashcamanta achca tapuicunata charirca. Jesusta catij Felipeca chai runataca: “¿Can imata liyicushcataca intindicunguichu?” nishpami tapurca. Chaimi paica: “¿Pi mana yachachijpica ima shinataj intindishari?” nishpa cutichirca. Chaimi Felipe paita ayudachun saquirca. Felipeca alli yachachijmi carca (Hechos 8:​30, 31, 34). Bibliata yachashpa ashtahuan intindisha nishpaca jw.org paginapi tiyaj formulariota jundachichunmi invitanchij. Mana cashpaca cai revistapi ricurij direccioncunamanmi escribi tucungui. Shinallataj cambaj cꞌuchullapi causaj testigo de Jehovacunahuanmi parlai tucungui. Mana cashpaca testigo de Jehovacunapaj Tandanacuna Huasimanmi ri tucungui. Quiquintaca cunanllataj shuj Bibliata conseguichunmi animanchij. Bibliata yachashpami alli causai tucungui.