¿Diosca cai Allpapi tucui laya causai tiyachunca evolucionmantachu rurashca?

Bibliaca caitami yachachin

Bibliapica Diosca gentecunata, cai Allpapi “tucui laya” tiyaj animalcunata, plantacunataca paicuna ima shina cana cashcallatatajmi chꞌican chꞌicanta rurarca ninmi (Génesis 1:12, 21, 25, 27; Apocalipsis 4:11).a Bibliapica tucui gentecuna ñucanchij punta yaya mama Adán Evamanta shamushcatami ricuchin (Génesis 3:20; 4:1). Bibliapica Yaya Dios gentecunata, animalcunata, plantacunata evolucionmanta rurashcataca mana ninchu. Cienciamanta estudiajcunaca animalcuna, plantacunaca asha cambiocunatami chari tucun nincunami. Bibliapish chai yuyai panda cashcataca mana ninchu.

¿Huaquin gentecunaca imatataj crin?

Diosca cai Allpapi tucui laya causai tiyachunca evolucionmantami rurashca nijcunaca chai ima shina tucushcata ningapajca chꞌican chꞌican yuyaicunatami charincuna. Huaquin gentecunaca, “maijan animalcuna, maijan plantacuna causashpa catichunca cai mama pachami agllan. Chashnami Diosca evolucionmanta animalcuna, plantacuna mirarishpa catichun rurashca” nincunami.

Diosca evolucionmantami tucui ima tiyashcatapish rurarca nijcunaca caitapishmi yuyancuna:

Gente cashpa, animal cashpa, planta cashpapish achca huatacuna huashamantami shujlla causaimanta shamuncuna nincunami.
Gente cashpa, animal cashpa o planta cashpapish shujtaj tucungacamami cambiarishpa cati tucun nincunami. Chai yuyaita catijcunaca, por ejemplo, monocunaca gentecuna tucungacamami cambiarishpa catishca nincunami.
Chai laya cambiocuna tiyachunca Diosmi controlan nincunami.

¿Evolucionmanta nishca yuyaicunaca Bibliapi tiyaj yuyaicuna shinallatajchu can?

Yaya Dios evolucionmanta tucui laya causai cai Allpapi tiyachun churashca cajpica Génesis libropi nishca yuyaicunaca mana ciertochu canman. Pero Jesusca Génesis libropi nishca yuyaicuna verdad cashcatami ricuchirca (Génesis 1:26, 27; 2:18-24; Mateo 19:4-6). Bibliapica Jesús manaraj cai Allpaman shamushpaca jahua cielopimi Yaya Dioshuan causarca. Chaipimi “tucui imalla tiyajcunata” Diosta ayudashpa huiñachirca ninmi (Juan 1:3). Chaimantami, Diosca evolucionmantami tucui laya causaita rurashca nishca yuyaitaca Bibliapica mana yachachin.

¿Animalcuna, plantacunaca paicuna tiyashca lugarpi catingapajca evolucionmantachu cambiarincuna?

Animalcuna, plantacuna maicama cambiai tucushcataca Bibliapica mana ninchu. Dios huiñachishca animalitocuna, plantacunaca paicuna tiyan lugarpi amañarishpa catingapajca ashatami cambiai tucuncuna. Shinallataj mirarishpapish ashatami cambiai tucuncuna. Chai yuyaicuna panda cashcataca Bibliapica mana ninchu. Chashna cambio tiyashcamantami huaquincunaca evolucionmantami chashna tucun nincuna. Pero plantacuna, animalcuna ashata cambiashpapish mana shujtaj planta o shujtaj animal tucunchu.

a Animalcuna, plantacunaca huaquinpica ashatami cambiai tucuncuna. Pero Génesis libropi parlashca shinaca chaillatajmi cashpa catincuna. Chaicunata ricushpami cientificocunaca huaquinpica evolucionmantami can nincuna.