Jesús shina causashunchij huillashunchij tandanacuipi yachanapaj ayudacuna
1-7 DE MARZO
BIBLIAPI TIYAJ VALISHCA YUYAICUNA | NÚMEROS 7, 8
“¿Israelitacunamantaca imatataj yachacunchij?”
it-1 pág. 523 párr. 7
Congregación
Israel llajtapica mandajcunallami huaquinpica tucui israelitacunataca ricuchirca (Esdras 10:14). Diospaj carpa huasita ña shayachijpica israelitacunata mandajcunami shamurcacuna (Números 7:1-11). Nehemiaspaj punllacunapipish israelitacuna allita rurangapaj ari nishcata pajtachij quillcata saquinamanca tucui israelitacuna rinapaj randica llajtata mandajcuna, sacerdotecuna, levitacunami rirca (Nehemías 9:38–10:27). Israelitacuna chaquishca pambapi puricujpimi Coré, Datán, Abiram, On runacunaca israelcunapuramanta 250 runacunahuan tucushpami Moisespaj, Aaronpaj contra tucurcacuna. Chai runacunaca “israelcunata pushajcuna, cunajcunapuramanta cajcuna, tucuicuna alli nishcacunami carca” (Números 16:1-3). Dios mandashca shinami Moisesca israelcunata cunaj yuyajcunapuramanta 70-ta cꞌaricunata agllarca. Paicunami ‘israelitacuna llaquichishca cargata apashpa’ ayudarcacuna. Chashnami ña mana Moiseslla apana carca (Números 11:16, 17, 24, 25). Levítico 4:15-pica israelcunata cunaj yuyajcunamantami parlan. Shinaca israelcunata cunaj yuyajcuna, juezcuna, pushajcunami tucui israelitacunapaj randica tandanacurcacuna (Números 1:4, 16; Josué 23:2; 24: 1).
it-2 pág. 874 párr. 1
Rubén
Diospaj carpa huasi ura ladomanca rubenitacunami causarca. Paicunapaj caishuj ladopica Simeón, cutin caishuj ladomanca Gad familiacunami causarca. Tucui israelitacuna puri callarishpaca Judá, Isacar, Zabulón cai quimsa jatun familiacunami ñaupashpa ri callarircacuna. Chai huashaca Rubén, Simeón, Gad caiquimsa jatun familiacunami catirca (Números 2:10-16; 10:14-20). Diospaj carpa huasita Diosman mingacushpaca Israelpaj jatun familiacunami sacrificiocunata apamurcacuna. Israelitacuna ordenpi puri callarishca shinallatajmi sacrificiocunatapish ordenpi apamurcacuna (Números 7:1, 2, 10-47).
w04 1/8 pág. 25 párr. 1
Numerosmanta valishca yuyaicuna
8:25, 26. Ña 50 huatata charij levitacunaca ñaupaman imallata ruraj cashca shinaca ña mana ruranachu carca. Chashnami tucuicunallataj alli trabajai tucurcacuna, edad levitacunamanpish consideracionta ricuchirca. Pero cai edadlla levitacunaca caishuj levitacunata ayudasha nishpaca ayudanallami carca. Cunan punllacunapica ñaupa levitacuna shinaca ña mayoriyashpapish huauqui panicunaca Diospaj Reinomanta huillanataca mana saquinchu. Shinapish levitacunaman cushca leymi ñucanchijpajpish achca valishca can. Mayorlla huauqui panicunaca Diosta sirvinapi ñaupaman mingashcacunata shina mana rurai tucushpapish paicuna pudishcatami rurashpa caticuncuna.
Bibliapi curita mashcaj shina mashcashunchij
it-2 pág. 717 párr. 3
Punta huacharishca huahuacuna
Cada yayacunapaj huasi ucupuracunata pushajca israelitacunapaj punta huacharishca huahuacunami carca. Chaimantami paicunaca tucui Israel llajtata ricuchircacuna. Shinallataj Jehová Diosca Abrahamhuan ari ninacushcamantami tucui Israel llajtataca “ñuca punta churimi” nirca (Éxodo 4:22). Yayitu Diosca Egipto llajtapiraj cashpami israelitacunapaj punta huacharishca huahuacunataca quishpichirca. Chaimantami Jehová Diosca: “Israelcunapurapi punta huacharishcacunaca gentecuna cashpa, animalcuna cashpapish ñucapajmi” nishpa mandarca (Éxodo 13:2). Shinaca tucui israelitacunapaj punta huacharishca cꞌari huahuacunaca Diospajllami cana carca.
8-14 DE MARZO
BIBLIAPI TIYAJ VALISHCA YUYAICUNA | NÚMEROS 9, 10
“¿Jehová Diosca paipaj pueblotaca ima shinataj pushacun?”
it-1 pág. 403 párr. 6
Campamento
Números capítulo 33-pimi Moisesca israelitacuna Egiptomanta llujshimushpa 40-ta lugarcunapi carpa huasicunata shayachishcata nin. Israelitacunaca achcacuna cashpapish shuj ladomanta caishuj ladoman ringapajca ordenpimi rircacuna. Diospaj carpa huasimanta pꞌuyu rijpica tucui israelitacunami rij carca. Cutin Diospaj carpa huasimanta pꞌuyu mana rijpica paicunaca chaillapitaj saquirijllami carca. Jehová Dios mandashca shinami israelitacunaca pajtachircacuna (Números 9:15-23). Jehová Dios mandashcacunata tucui israelitacuna uyachunmi martillohuan rurashca ishqui cullqui trompetacunata tocana carca (Números 10:2, 5, 6). Sinchi tocashcata uyashpaca ña tucuicuna rina cashcatami yacharcacuna. 1512 huatapi Egiptomanta israelcuna llujshimushcaca ña ishqui huatacunami pasarca. Chai “huatapaj ishqui quilla, chai quillapaj ishqui chunga punllapimi” punta cutin puri callarircacuna. Puntaca Diospaj arcami ñaupashpa rirca. Chai huashaca quimsa jatun familiacunami catirca Judá, Isacar y Zabulón. Chaipaj huashaca gersonitacuna, meraritacunami catirca. Paicunaca Diospaj carpa huasita huasichingapaj imalla apana cashcatami aparcacuna. Cutin chai huashaca quimsa jatun familiacunami catirca Rubén, Simeón y Gad. Chai qꞌuipaca coatitacunami Diospajlla carpa huasi ucupi imalla tiyajcunata apashpa catircacuna. Cutin chai qꞌuipaca Efraín, Manasés, Benjamín cai quimsa jatun familiacunami catirca. Tucuripica Dan, Aser y Neftalí cai quimsa jatun familiacunami catirca. Shinaca puntata rij quimsa familiacunahuan, ultimota catij quimsa familiacunahuanmi ashtahuan achca, fuerzasapa carcacuna (Números 10:11-28).
w11 15/4 pág. 4 párrs. 4, 5
¿Pushajcunataca cazucunchijchu?
Apóstol Pabloca: “Cancunata michijcunata cazuichij. Paicuna mandashcatapish uyaichij” nircami (Hebreos 13:17). Cai mandashcacunata cazushpaca Jehová Dios ñucanchijta pushacushcamantami agradicishcata ricuchinchij. Pero chashna cazunaca huaquinpica mana facilchu can. Moisespaj punllacunapi cashcata yuyashun. Chaquishca pambapi pꞌuyu huashapimi achca punllacunata puricushcangui. Pero de repentemi chai pꞌuyuca shayarishpa saquirijpica: “¿Mashna tiempotashi caipi saquiringa shuj punlla, shuj semana o achca quillacunata?” nishpachari yuyangui. Mana yachashcamantami huaquin minishtirishca cosascunallata llujshichi callaringui. Pero achca punllacuna pasajpi huaquichishcacunamanta minishtirishca cosascunata mashcana sinchi ricurijpimi tucuita llujshichingui. Ña tucuita llujshichishca huasha pꞌuyu ri callarijpica, degana llujshichishcani nishpachari colerashpa cutin huaquichi callaringui. Más que colera cashpapish chai ratollatajmi caishuj israelitacunahuan ri callaringui (Números 9:17-22).
Cuna punllacunapica Yayitu Diospaj instruccioncunata ¿ima shinataj chasquinchij? ¿Chai instruccioncunata chasquishpaca enseguidachu cazunchij o ñucanchij munashca shina rurashpa catinchij? Por ejemplo, Bibliata yachachinamanta, shujtaj llajtamanta gentecunata yachachinamanta, familiahuan Diosta adorana tandanacuimanta, jatun tandanacuipi alli comportarinamanta, Comités de Enlace con los Hospitales nishcapi ayudanamanta Diospaj organizacionca mushuj instruccioncunatami cushca. ¿Chaicunataca tucuitachu cazucunchij? Shinallataj ima consejota chasquishpapish Jehová Dios ñucanchijta pushacushcamantami agradicishcata ricuchinchij. Chaimantami ima decisioncuna japingapajpish mana ñucanchij yuyaipi confianchij. Ashtahuanpish Jehová Dios, paipaj organización nishcapimi confianchij. Caipi yuyashun shuj huahuaca jatun acapanata ricushpaca paipaj yayapajmanmi cꞌuchuyan. Shinallataj ñucanchijpish llaquicunata chꞌimbapurangapajca huauqui panicunapajmanmi ashtahuan cꞌuchuyanchij.
Bibliapi curita mashcaj shina mashcashunchij
it-1 pág. 226 párr. 4
Jatun tandanacui
Tandanacuicunaca valishcami can. Tandanacuicunaca Jehová Diospajman cꞌuchuyangapajmi ayudan. Chaimantami alli aprovechana canchij. Por ejemplo ñaupa punllacunapi israelitacunataca Jehová Diosca huatanta Pascua micuita rurachunmi mandarca. Maijan cꞌari cashpapish mana mapayashca cashpa o mai viajeman mana rishca cashpa chaillapitaj cashca jahua Pascua micuita mana rurashpaca huañunami carca (Números 9:9-14). Rey Ezequiasca tucui Judapi, Israelpi causajcuna Jerusalenman rishpa Pascua micuita rurachunmi huillaj cacharca. Paica: “Israelcuna Taita Diosman cutirichij. Cancunapaj ñaupa yayacunapish Mandaj Diostaca cꞌariyarcacunami, ama cancunapish paicuna shinallataj caichijchu. Mandaj Diospajlla cachun huiñaipaj chꞌicanyachishca huasiman shamushpa, cancunata Mandaj Diospajta ruraichij. Chashna rurajpica, paica cancunahuan alli tucungami. Cancunata Mandaj Diosca cꞌuyaj, llaquij Diosmari. Cancuna paiman cutirijpica, mana huashata ricuchingachu” nirca (2 Crónicas 30:6-9). Shinaca ima jarcaicuna mana tiyajpi paipaj munaimanta Pascua micuita mana rurashpaca Jehová Diostaca cꞌuyashcataca mana ricuchinmanchu carca. Cunan punllacunapi Diosta sirvijcunaca Pascua fiestataca mana ruranchijchu. Pero apóstol Pablo nishca shinami pajtachicunchij. Paica: “Shinallataj caishujmanta chaishujmanta ayudanacushpa, allicunata rurangapaj cꞌuyaihuan yuyachinacushunchij. Ñucanchij tandanacuiman rina cashcallamanta puricujcuna, ña mana rij shinaca ama rurashunchijchu. Chaipaj randica, Jesucristo shamuna punlla ñalla chayamucushcata yachashcamantacarin, ashtahuan yuyachinacushunchij” nircami (Hebreos 10:24, 25; CONGREGACIÓN nishca temata ricui).
15-21 DE MARZO
BIBLIAPI TIYAJ VALISHCA YUYAICUNA | NÚMEROS 11, 12
“¿Imamantataj mana quejarina canchij?”
w01 15/6 pág. 17 párr. 20
Jehová Dios rurashcacunataca ama cungarishunchij
20 Diosta sirvijcunaca huainayana juchapi ama urmangapajmi achcata cuidarincuna. Shinallataj murmurana juchapipish ama urmangapajmi cuidarina canchij. Murmurana juchapi urmashpaca Diospaj aprobaciontami chingachishun. Apóstol Pabloca israelitacunamanta parlashpaca cashnami nirca: “Paicunamanta maijancuna Jatun Diosta rimashca shinapish ama rimashunchij. Chashnacunaca culebracuna canishcami huañurcacuna. Paicunamanta maijancuna shina ama huashalla rimajcuna caichijchu. Chashnacunataca tucuchijpaj maquimi huañuchirca” (1 Corintios 10:9, 10). Israelitacunaca Moisesmanta, Aaronmanta, Jehová Diosmantapishmi quejarircacuna. Shinallataj Jehová Diosmanta maná micunallata charishcamantapishmi paicunaca cutin quejarircacuna (Números 16:41; 21:5). Jehová Diospaj ñaupajpica murmuranapish huainayana jucha shinallatajmi can. Chaimantami achca murmurajcunaca culebracuna canishca huañurcacuna (Números 21:6). Shinallataj israelitacunaca quejarishcamantami 14.700 gentecuna ña huañushca carca (Números 16:49). Shinaca Jehová Dios cushcacunamantaca mana quejarinachu canchij. Chashnami Yayitu Diostaca cushichishun.
w06 15/7 pág. 15 párr. 7
Ama huashalla murmuranacushpa tucui imatapish alli ruraichij
7 Callaripica israelitacunaca Egiptomanta llujshimushpa Puca cuchata pasashpaca tucuita Jehová Dios paicunamanta rurashcata ricushpami cantashpa alabarcacuna (Éxodo 15:1-21). Pero cananeocunata manchashcamanta, Egiptopi shina mana tucuita charishcamantami israelitacunaca paicunapaj yuyaita rato cambiarcacuna. Jehová Dios tucuita paicunaman cushcata agradicinapaj randica ashtahuanpish juchachishpami rimarcacuna. Chashna murmuranacushpami malagradecidos cashcata ricuchircacuna. Chaimantami Jehová Diosca cashna nirca: “Yallitaj millaita rurana yuyailla caj cai tucui achcacuna ñucata juchachishpa rimashcataca ¿maicamataj uyacushalla?” (Números 14:27; 21:5).
it-2 pág. 855 párr. 2
Pꞌiñanacuna
Murmurana. Murmurashpaca shujtajcunatami llaquichi tucunchij. Egiptomanta llujshimushca huashallami israelitacunaca Jehová Diosmanta, Moisesmanta, Aaromantapish murmurashpa quejarircacuna (Éxodo 16:2, 7). Paicunapaj chashna yallitaj quejacunata uyashpami Moisesca huañungapaj munarca (Números 11:13-15). Shujtajcunamanta murmuranaca mana allichu can. Chashna murmurajcunaca huañui tucunmi. Israelitacunaca Moisesmantami quejarircacuna pero Jehová Diospaj ñaupajpica paipaj mandanallamantataj quejarircacuna (Números 14:26-30). Shinaca quejarishcamantami achcacunaca causaita chingachircacuna.
Bibliapi curita mashcaj shina mashcashunchij
it-2 pág. 288
Maná
¿Ima shinataj carca? Maná shuti micunaca “culantro muyu shina yurajlla”, shinallataj yuracunapaj cera shinami carca. Mishquihuan rurashca tortilla shinami sabortaca charirca. Molinopi cutashpa o rumipi tacashca huashaca yanurcacuna o mana cashpaca tortillata rurashpami cusarcacuna (Éxodo 16:23, 31; Números 11:7, 8).
22-28 DE MARZO
BIBLIAPI TIYAJ VALISHCA YUYAICUNA | NÚMEROS 13, 14
“Sinchi feta charishpaca mana manchajmi cashun”
w06 1/10 pág. 17 párrs. 5, 6
Jehová Diospi feta charishpaca mana manchashunchu
5 Cutin Josué, Caleb runacunaca Dios cusha nishca allpaman yaicunataca achcatami munarcacuna. Chaimantami cashna nircacuna: “Cananeocunataca ñucanchijca tandata micuj shinallami chingachishun. Paicunata ayudajca paicunamanta anchurishcami. Ashtahuanpish Mandaj Diosmari ñucanchijhuanca. Chaimanta ama manchaichijchu” (Números 14:9). ¿Paicunaca deganallachu chashna nircacuna? Mana. Jehová Diosca Egipto llajtapi tiyaj yanga dioscunata 10 llaquicunahuan ima shina llaquichijta, shinallataj faraonta paipaj soldadocunatapish Puca cuchapi ima shina pambajtaca tucui israelitacuna shinallatajmi paicunapish ricurcacuna (Salmo 136:15). Shinaca cai allpata ricugrij 10 cꞌaricunahuan, paicuna nishcata uyajcunapish yangamantami manchaita charircacuna. Chaimantami Jehová Diosca achcata llaquirishpa cashna nirca: “Cai israelcunaca ¿maicamataj ñucataca pꞌiñachicungallari? Paicunapaj chaupipi cai tucui señalcunata rurajpipish ¿maicamataj ñucataca mana cringacunari?” (Números 14:11).
6 Jehová Diosca israelitacuna mana sinchi feta charishcamanta manchaita charishcatami Moisesmanca nirca. Shinaca mana manchaj cangapajca fetami minishtinchij. Chaimantami apóstol Juanca punta Jesusta catijcuna cai pachata mishangapaj feta minishtishcata nirca (1 Juan 5:4). Cunan punllacunapi testigo de Jehovacunaca Josué, Caleb shina sinchi feta charishpami jovencuna cashpa, mayorcuna cashpapish Diospaj Reinomanta huillashpa caticuncuna. Ni pi contracuna upayachisha nishpapish mana pudishcacunachu (Romanos 8:31).
Bibliapi curita mashcaj shina mashcashunchij
it-1 pág. 740
Israelitacunaman Dios cusha nishca allpaca sumajmi carca
Yaya Dios israelitacunaman cushca allpaca alli grano pꞌucuj allpami carca. Moisesca Dios cusha nishca allpata ricunaman huaquin cꞌaricunata cachacushpaca chaipi pꞌucushca huaquin granocunatapish apamunguichij nircami. Chaimi paicunaca higocunata, granadacunata, jatun racimo uvatapish shuj caspipi churashpa ishqui runacuna tucushpa apamurcacuna. Chai allpata ricugrijcunamanta huaquin cꞌaricunaca mana sinchi feta charishcamantami manchaita charircacuna. Pero chashna cashpapish chai allpapica lechepish sacha chuspipaj mishquipish yacu shinami llujshicun nishpami huillarcacuna (Números 13:23, 27).
29 DE MARZO A 4 DE ABRIL
BIBLIAPI TIYAJ VALISHCA YUYAICUNA | NÚMEROS 15, 16
“Jatun tucushpa ñucanchijllapi ama confiashunchij”
w11 15/9 pág. 27 párr. 12
¿Jehová Diosca ñucanchijta alli rijsishpachu chasquin?
12 Dios cusha nishca allpata japinaman ricuj ñanpica ñapishmi Coré runapaj ñaupajpica Diospaj puebloca mana allita ruracuj shina ricurirca. Chaimantami Coré runahuan, Israel llajtamanta agllashca 250 cꞌaricunahuanca huaquin cambiocunata rurashun nircacuna. Ashtahuanpish paicunaca yuyarcami Diospaj aprobacionta charinchij nishpa. Chashnami Moisesta, Aarontapish mana respetashpa cashna nircacuna: “¡Cancunaca yallitajmi tucunguichij, ña chailla saquichij! Tucui israelcunami jucha illajcuna. Mandaj Diosca paicunapaj chaupipimi” nircacuna (Números 16:1-3). Shinaca Coré runaca orgullosomi carca. Cutin Moisesca: “Mandaj Diosllami maijanlla paipaj cashcataca ricuchinga” nircami (Números 16:5-ta liyipai). Shinaca cayandij punlla chishiyanapajca Coré y paita apoyaj runacunapish ñami huañushca carca (Números 16:31-35).
w11 15/9 pág. 27 párr. 11
¿Jehová Diosca ñucanchijta alli rijsishpachu chasquin?
11 Ashata Corepaj causaimanta parlashun: paica Coatpaj familiamanta levitami carca. Chaimantami paimanca Jehová Diosca valishca ruraicunata mingarca. Paica Puca cuchapi imalla tucushcatapishmi ricushcanga. Shinallataj Sinaí urcupi Diosta mana cazujcunata huañuchinapipish, Diospaj Arcata shujtaj ladoman apashpapishmi ayudashcanga (Éxodo 32:26-29; Números 3:30, 31). Coré runaca tucui shunguhuanmi Jehová Diostaca achca huatacunata sirvishca yuyachin. Chaimantami paitaca la mayoría israelitacuna alli rijsishpa respetajcuna carca. Pero chashna cashpapish Coreca mana Moisés shina Jehová Diospaj mandashcacunataca chasquircachu. Chaimantami paica Jehová Diospaj ñaupajpica mana alli ricurirca.
Bibliapi curita mashcaj shina mashcashunchij
w98 1/9 pág. 20 párrs. 1, 2
Diosta adoranata punta lugarpi churashun
Jehová Diospaj ñaupajpica chai runaca mana allitami ruracurca. Chaimantami Jehová Diosca Moisestaca: “Cai runaca huañunatajmi can” nirca (Números 15:35). ¿Imamantataj cai runaca yantata pallacushcallamantaca Diospaj ñaupajpica mana alli ricurirca?
Israelitacunaca seis punllacunatami huasipi imallata rurangapajca tiempota charirca. Por ejemplo, yantata pallangapaj, micunata, ropata allichingapajpish. Pero sábado punllaca Jehová Diosmanta yachana punllami carca. Yantata japinaca mana juchachu carca. Pero Jehová Diosllata adorana punllapi chashna shina trabajota ruranami mana alli carca. Cunan punllacunapica Moisesman cushca ley ucupica mana causacunchijchu. Pero cai ejemplopimi yachanchij Diosta sirvinataca punta lugarpi churana cashcata (Filipenses 1:10).
5-11 DE ABRIL
BIBLIAPI TIYAJ VALISHCA YUYAICUNA | NÚMEROS 17-19
“Ñucaca cambaj herenciami cani”
w11 15/9 pág. 13 párr. 9
¿Jehová Dios ñucanchijta cuidacushcapi crinchijchu?
9 Levipaj familiapi yuyashun paicunaca nima allpataca mana japinachu carca. Ashtahuanpish paicunaca Diospaj carpa huasi ucupimi trabajocunata rurana carca. Chai trabajocunata rurajpica Jehová Diosllatajmi cuidana carca. Chaimantami Bibliapica Jehová Diosca: “Can japina cashca allpa shinaca israelcunapaj chaupipi caj ñucami cani” nirca (Números 18:20). Cunan punllacunapi ñucanchijcunaca levitacuna shina o sacerdotecuna shina runacuna rurashca Carpa huasi ucupica Diostaca mana sirvicunchijchu. Pero paicuna shinami Dios tucuita minishtishcacunata cunapica confiana canchij. Tucurimui punllacunapi causashcamantami ñucanchij fetaca ashtahuan sinchiyachina canchij (Apocalipsis 13:17).
w11 15/9 pág. 7 párr. 4
Jehová Diosca ñucanchijpaj herenciami can
4 Levitacunaca nima herencia allpata mana japircacunachu. Ashtahuanpish paicunapajca sacerdotecuna shina Jehová Diosta sirvinami herencia shina carca (Josué 18:7). Chaimantami Jehová Diosca Aaronmanca cashna nirca: “Can japina cashca allpa shinaca israelcunapaj chaupipi caj ñucami cani” (Números 18:20). Shinaca ¿levitacunaca mana allpata charishcamanta pobrechu causana carca? Números capítulo 18-paj huaquin versocunata liyishpami paicuna mana pobre cashcata yachanchij (Números 18:19, 21, 24-ta liyipai). Levitacunaca Diospajta imallata ruracushcamantami tucui israelitacunaca herenciata shina cungapaj granomanta o animalcunamantapish chungamantaca shujtaj cujcuna carca. Cutin levitacunapish tucui paicuna chasquishcacunamantami ashtahuan yalli allicunata surcushpa chungamanta shujta tigra sacerdotecunaman cuna carca (Números 18:25-29). Shinallataj sacerdotecunapish tucui israelitacuna Diosman cushcacunatami chasquijcuna carca. Chashnami sacerdotecunaca tucui paicuna minishtishcacunata Jehová Dios cunapi confiajcuna carca.
Bibliapi curita mashcaj shina mashcashunchij
g02 8/6 pág. 14 párr. 2
Cachica valishcami can
Ñaupa punllacunapica imapish mana tucurijta, huiñaipaj cashcatami cachica ricuchij carca. Chaimantami Bibliapica pihuanpish huiñaipaj ari ninacushpaca “cachi shinami canga” nircacuna. Shinallataj chai ari nishcata valichingapajmi ishquindijpurallataj cachihuan churashcata micujcuna carca (Números 18:19). Moisesman cushca leypi nishca shinaca Diosman sacrificiocunata cucushpaca cachihuanmi churana carca. Chashnami chai sacrificioca jucha illaj, limpio cashcata ricuchirca.
12-18 DE ABRIL
BIBLIAPI TIYAJ VALISHCA YUYAICUNA | NÚMEROS 20, 21
“Llaquicunahuan cashpapish manso shungu cashunchij”
Diosta cushichingapajca manso shungucuna cashunchij
19 Mana tanto pandarishunchu. Moisesta cutin yuyarishun. Paica achca huatacunatami manso shungu runa carca. Jehová Diosta tucuipi cazushpami causarca. Pero shitashca pambapi israelitacunahuan casi cuarenta huatacunata puricushpaca mana manso cashcatami ricuchirca. Mariaca paipaj turi Moisesta Egiptopi ama huañuchichunmi ayudashca canga. Pero cunanca huañujpimi Qadés nishca pambapi Mariata pambarcacuna. Chai qꞌuipaca israelitacunaca yacuta mana charinchijchu nishpami Moisesta culpashpa cutin rimarcacuna. Paicunata cuidangapaj Jehová Dios tucui laya milagrocunata rurajpipish, achca huatacunata Moisés alli pushajpipish quejarishpami catircacuna (Números 20:1-5, 9-11).
Diosta cushichingapajca manso shungucuna cashunchij
20 ¿Israelitacuna chashna quejarijpica Moisesca imatataj rurarca? Jehová Diosca Moisestaca yacuta llujshichichunca rumita rimachunmi mandarca. Pero paica rumita rimanapaj randica israelitacunahuan pꞌiñarishpami ñucami yacuta llujshichisha nirca. Qꞌuipaca paipaj caspihuan rumita ishqui cutin huajtajpimi yacuca llujshirca. Moisesca shuj ratolla jatun tucushpa pꞌiñarishcamantami pandarirca (Salmo 106:32, 33). Chaimantami Diosca paitaca ‘ñuca cushca llajtamanca mana yaicunguichu’ nirca (Números 20:12).
21 ¿Moisesmantaca imatataj yachacunchij? Manso shungu cashpa catingapajmi achca esfuerzota rurana canchij. Mana chaita rurashpaca ñapishmi jatun tucushun. Chaimi mana alli yuyarishcahuan imatapish rimashun, imatapish rurashun. Shinallataj imamanta yallitaj sustarishca cashpaca pihuanpish ratomi pꞌiñarinchijlla. Ama chashna cangapajmi jarcarinata yachana canchij.
w09 1/9 pág. 19 párr. 5
Diosca cashcata rurajmi can
Puntapica tucui gentecunata tandachishpa “cꞌariyaj gentecuna” nishpa Moisés rimachunca Jehová Diosca mana mandarcachu. Ishquipica Moisés y Aaronpish Jehová Diosta mana jatunyachircacunachu. Ashtahuanpish Moisesca, “yacuta cugrinchij” nishpaca Jehová Diospaj randi paicuna yacuta llujshichishpa cugrishcatami tucui gentecunamanca nirca. Chaimantami verso 12-pica Jehová Diosca paicunata disciplinarca. Quimsapica Jehová Diosca ñaupamantami mana cazuj gentecunataca disciplinarca, Canaán allpamanpish mana yaicuchircachu. Shinallatajmi Moisesta, Aarontapish disciplinarca (Números 14:22, 23). Chuscupica paicunaca tucui pueblota pushajcuna cashcamantami Jehová Diosca tucuipi paita cazuchun munarca (Lucas 12:48).
Bibliapi curita mashcaj shina mashcashunchij
w14 15/6 pág. 26 párr. 12
¿Irquicunataca ima shinataj ricuna canchij?
12 Tucui chai mana alli ruraicunapica Jehová Diosca enseguidami Aarontaca castigai tucurca. Pero achcata pandarijpipish Jehová Diosca Aarón alli runa cashcatami yacharca. Shujtajcuna mana allita rurachun nijpimi Aaronpish mana allita rurashcanga. Pero mana allitachu ruracungui nijpica paipaj yuyaita cambiashpami arrepintirishpa Diospaj disciplinatapish chasquirca (Éxodo 32:26; Números 12:11; 20:23-27). Jehová Diosca Aaronpaj pandarishcata ricunapaj randica paipi feta charishcata, shungumanta arrepintirishcatami ricurca. Chaimantami Aaronta paipaj huahua huahuacunatapish achca huatacuna pasajpipish Diosta manchajcuna cashcata Bibliapi quillcashpa churarcacuna (Salmo 115:10-12; 135:19, 20).
19-25 DE ABRIL
BIBLIAPI TIYAJ VALISHCA YUYAICUNA | NÚMEROS 22-24
“Contracuna maldecijpipish Jehová Diosca paipaj pueblotami bendiciarca”
Jesusmantami huillashpa catirca
5 Punta siglopi shinami cunan punllacunapipish contracunaca alli huillaicunata ama huillachun nishpa jarcasha nishcacuna. Pero mana pudishcacunachu. Huaquinpica contracunaca Jesusta catijcunataca carcelpimi churashcacuna. Mana cashpaca shujtaj llajtacunamanmi cachashcacuna. Chashna rurashcamantami Diospaj Reinomanta alli huillaicunaca ashtahuan mirarishpa catishca. Por ejemplo, Segunda Guerra Mundial tiyajpimi ñucanchij huauqui panicunataca campos de concentración nishcaman nazi soldadocunaca aparcacuna. Chaipi cashpapish ñucanchij huauqui panicunaca mana manchashpami huillashpa catircacuna. Chaimanta shuj experienciata ricushun. Shuj judío runaca: “Testigo de Jehovacunaca carcelpi cashpapish paicunapaj crishcacunataca mana saquircacunachu. Shinami paicuna yachachishcapish Bibliamanta cashcata ricushpa ñucapish testigo de Jehová tucurcani” nircami.
it-2 pág. 250
Juicio illaj
Jehová Diospaj munaita jarcanaca yangallami can. Moab llajtata mandaj Balac cullquita cusha nijpimi chaita japingaraicu profeta Balaamca Israel llajtata maldicinaman rigrirca. Pero Jehová Diosca chaita rurachun mana saquircachu. Balaammantami apóstol Pedroca: “Chashna mana allita yuyashpa ricujpica, shuj upa burromi gente shina rimashpa jarcarca” nin. Cai versopi Balaam runa mana allita yuyashcata ningapajmi apóstol Pedroca griego shimipica pa·ra·fro·ní·a nishca shimita escribirca. Cai shimica “juicio illaj, muspa canatami” nisha nin (2 Pedro 2:15, 16; Números 22:26-31).
Bibliapi curita mashcaj shina mashcashunchij
w04 1/8 pág. 27 párr. 2
Numerosmanta valishca yuyaicuna
22:20-22. ¿Jehová Diosca imamantataj Balaamhuan pꞌiñarirca? Jehová Diosca nircami profeta Balaamtaca israelitacunataca ama maldicinguichu nishpa (Números 22:12). Shinapish cai profetaca Balacta sirvij runacunahuan rishpapish paipaj yuyaica Jehová Diospaj mandashcacunata mana pajtachina yuyaihuanmi rirca. Chashnami Moab llajtata mandajta cushichishpa paiman pagachunpish munarca (2 Pedro 2:15, 16; Judas 11). Paica israelitacunata maldicina yuyaihuan rijpipish Jehová Diosmi alli nina yuyaita curca. Shinapish Moab llajtata mandajpaj ñaupajpi alli ricurisha nishpami Baal diosta sirvij huarmicunata cachai israelita cꞌaricunata inquitachun nirca (Números 31:15, 16). Shinaca cai Balaam runaca ima layapish ashtahuan charingapaj munashcamantami Jehová Diosca paihuan jatunta pꞌiñarirca.
26 DE ABRIL A 2 DE MAYO
BIBLIAPI TIYAJ VALISHCA YUYAICUNA | NÚMEROS 25, 26
“Pi allita rurashpaca shujtajcunatami benefician”
Huainayanamanta caruyashunchij
SHUJ runaca pescadota japingapajca achca pescadocuna tiyan pushtumanmi rin. Chaipimi anzuelopi cꞌuruta churashpa yacuman shitan. Qꞌuipaca pescado cꞌuruta millpungacamami shuyan. Ña anzuelota aisajta sintishpami pescadota llujshichin.
2 Ñucanchijpish chai pescado layallatajmi trampacunapi urmai tucunchij. Por ejemplo, israelitacunaca Dios cusha nishca llajtaman ña yaicugrishpami Moab pambapi samacurcacuna. Moab llajtata mandajca israelitacuna llaquicunata charichunmi munarca. Chaipajca, Balaam runamanmi: ‘Israelitacunata maldicijpica achca cullquitami cusha’ nirca. Balaamca israelitacunata maldicinapaj randica, paicunallataj llaqui tucuchunmi imata ruranata ricurca. Chaipajca Israel cꞌaricunata inquitashpa huainayana juchapi urmachichunmi Moab solteracunata cacharca (Números 22:1-7; 31:15, 16; Apocalipsis 2:14).
Huainayanamanta caruyashunchij
4 Jehová Diosca israelitacunataca achcatami ayudarca. Por ejemplo, Egiptopi llaquilla causacushcamantami llujshichirca, chaquishca pambapi yaricaihuan huañuchunpish mana saquircachu. Dios cusha nishca llajtaman chayangapajca ashallami illarca. Chashnapish israelitacunaca aicha munaillapi yuyashcamantami Jehová Dios ima shina ayudashcataca cungarircacuna. Chaimantami achca israelitacunaca Balaam churashca trampapi urmarcacuna (Hebreos 3:12). Apóstol Pabloca: ‘Paicunamanta maijancuna shina ama huainayajcuna cashunchijchu. Paicunaca juchapi urmashcamantami huañurcacuna’ nircami (1 Corintios 10:8).
Bibliapi curita mashcaj shina mashcashunchij
it-2 pág. 238 párrs. 1, 2
Linderocuna
Allpacunata chaupingapajca ishqui cosascunatami rurana carcacuna. Puntapica sorteanami carca. Qꞌuipataca cada jatun familiacuna mashna cashcatami ricujcuna carca. Cada familia maijan ladoman causagrinata ricungapajca sorteanami carca. Chashnami ura ladoman, janaj ladoman, inti llujshin ladoman, inti huashicun ladoman herenciata shina allpataca japircacuna. Jehová Dios chaupishpa cushcamantami israelitacunapurapica pꞌiñanacuicuna mana tiyarca (Proverbios 16:33). Jacob ña huañugrishpa nishca shimicunaca cai Génesis 49 verso 1-manta 33-camami tiyacun. Chaita pajtachingapajmi Jehová Diosca allpacunata sorteashpa curca.
Allpacunata cada familiacunaman sorteashpa cushca huashaca linderocunatami ricuna carca. Linderocunata churangapajca cada familiacuna mashna cashcatami ricuna carca. Chaimi Bibliapica: “Chai llajtataca sorteashpa, cada familia ima shina cashca shinallataj japinguichij. Achca cajmanca achcata cunguichij. Ashalla cajmanca ashallata cunguichij. Sorteajpi maipimi urman, chaitataj cunguichij. Cancunapaj yayacunamanta mirarishca aillucuna ima shina cashca shinallataj japinguichij” nin (Números 33:54). Shinaca allpata sorteashpa cujpica maipi urmashcapi japishpaca mana cambianachu carca. Pero cada familiacunata ricushpami maichica allpata cuna cashcata curca. Por ejemplo, Judapaj familiaca ashallami carca. Pero allpaca achca cashcamantami Simeonpaj familiaman ashata chaupishpa curca (Josué 19:9).