-
¿Yaya Diosca ima shinataj causachun munan?Huiñai huiñaita cushilla causai Bibliamanta yachai
-
-
YACHAI 25
¿Yaya Diosca ima shinataj causachun munan?
Job 14:1-pica gentecunaca “asha punllacunallata causana cashca jahua, llaquihuan shaicushcallami causan” ninmi. Shinapish ¿chashna causachunchu Diosca munan? ¿Imapajtaj ñucanchijtaca rurarca? ¿Chaica pajtaringachu? Biblia cai tapuicunata ima shina cutichishcata ricui.
1. ¿Ima laya causachuntaj Diosca munan?
Jehová Diosca cushilla causachunmi munan. Chaimantami Adanta, Evata rurashpaca Edén huertapi churarca. Chai huertaca sumajmi carca. Chaipimi “Taita Diosca paicunata alli cashca cachun nishpaca: ‘Huahuacunayuj tucushpa, alli huiñachishpa achcata mirarishpa cai pachapi jundarishpa cai pachata mandanguichij’” nirca (Génesis 1:28). Gentecuna huahuacunata charishpa, cai Allpata paraisota rurashpa, animalitocunata cuidashpa causachunmi Jehová Diosca munarca. Shinallataj mana ungushpa, huiñai huiñaita causachunmi munarca.
Diospaj munai mana pajtarishca cajpipisha paipaj munaica mana cambiashcachu (Isaías 46:10, 11). Tucui paita cazujcuna huiñai huiñaita sumajta causachunmi Yayitu Diosca munan (Apocalipsis 21:3 y 4-ta liyipai).
2. ¿Cunan punllacunapipish ima shinataj cushilla causai pudinchij?
Jehová Diosca ñucanchijtaca paita rijsina, paita adorana munaihuanmi rurarca (Mateo 5:3-6-ta liyipai). Diosca paihuan alli apanacuchun, ‘paipaj ñanpi purichun’, paita tucui shunguhuan cꞌuyashpa sirvichunmi munan (Deuteronomio 10:12; Salmo 25:14). Caicunata rurashpaca mashna llaquicunata charishpapish cushillami causashun. Jehová munashca shina paita adorashpaca allimi sintirishun.
ASHTAHUAN YACHAI
Jehová cai Allpata ima shina rurashcata ricushpami ñucanchijta achcata cꞌuyashcata yachashun. Shinallataj ñucanchijta imapaj rurashcatami Bibliapi yachashun.
3. Jehová Diosca gentecuna cushilla causachunmi munan
VIDEOTA ricui. Qꞌuipaca cai catij tapuitami yachashun:
¿Diosca imapajtaj cai Allpata rurarca?
Eclesiastés 3:11-ta liyipai. Qꞌuipaca cai catij tapuitami yachashun:
¿Cai versopica Jehová Diosmantaca imatataj yachanchij?
4. Jehovapaj munaica mana cambiashcachu
Salmo 37:11 y 29; Isaías 55:11-ta liyipai. Qꞌuipaca cai catij tapuitami yachashun:
¿Jehová Diospaj munai mana cambiashcataca ima shinataj yachanchij?
Dañarishca huasitaca allichi tucunchijmi. Chashnallatajmi Jehová Diosca cai Allpapi gentecuna rurashca dañota allichinga. Qꞌuipaca cai Allpataca paita cꞌuyaj gentecunamanmi cunga.
5. Jehová Diosta sirvishpami cushilla causashun
Imapaj causashcata yachashpami cushilla sintirinchij. VIDEOTA ricui. Qꞌuipaca cai catij tapuitami yachashun:
¿Videopi ricurij panica ñucanchij imapaj causashcataca ima shinataj intindirca?
Eclesiastés 12:13-ta liyipai. Qꞌuipaca cai catij tapuitami yachashun:
¿Jehová Dios ñucanchijmanta imalla rurashcata yachashpaca ima shinataj agradicishun?
HUAQUINCUNACA: “¿Imapajtaj causanchij? ¿Diosca ñucanchijtaca imapajtaj rurarca?” nishpami tapuncuna.
¿Quiquinca imatataj cutichinguiman?
YUYARISHUNCHIJ
Jehová Diosca cai Allpapi huiñai huiñaita cushilla causachunmi munan. Cunan punllacunapipish paita tucui shunguhuan sirvishpaca cushillami causanchij.
Yuyaringapaj tapuicuna
¿Jehová Dios Adanta Evata rurashpaca ima laya causachuntaj munarca?
¿Jehová Dios paipaj munaita mana cambiashcataca ima shinataj yachanchij?
¿Cushilla causangapajca imataj ayudanga?
CAICUNATAPISH RICUI
Edén nishca huerta cierto tiyashcata ricui.
“¿Edén nishca huertaca yanga parlollachu can?” (Huillaj, 1 de enero de 2011)
Mana nunca cai Allpa tucurina cashcata ricui.
“¿Cai Allpaca tucuchishcachu canga?” (jw.org paginapi ricui)
Yaya Dios ñucanchijta imapaj rurashcata yachai.
Shuj runa paipaj causaipi tucuita charishpapish mana cushilla sintirishcata ricui.
a Catij yachaipimi imamanta Dios munashca shina mana causashcata yachashun.
-
-
¿Diospaj Gobiernoca imataj can?Huiñai huiñaita cushilla causai Bibliamanta yachai
-
-
2. ¿Jesushuanca picunataj mandanga?
Jesusca mana paillachu mandanga. ‘Tucui aillucunamanta, chꞌican chꞌican rimaicunamanta, tucui llajtacunamanta caj gentecunami cai pachataca mandanga’ (Apocalipsis 5:9, 10). ¿Jesushuanca mashnacunataj mandanga? Jesús cai Allpapi cajpica paitaca achca gentecunami catircacuna. Cunan punllacunapipish achcacunami Jesusta catincuna. Pero 144.000 gentecunallami Jesushuan mandangapaj jahua pachaman ringacuna (Apocalipsis 14:1-4-ta liyipai). Cutin caishujcunaca cai Allpapi saquirishpami Dios churashca mandashcacunata cazungacuna (Salmo 37:29, NWT).
-
-
¿Diospaj Gobiernoca imacunallatataj ruranga?Huiñai huiñaita cushilla causai Bibliamanta yachai
-
-
¿Diospaj Gobiernoca imacunallatataj ruranga?
Diospaj Gobiernoca ñami jahua pachapi mandacun. Ñallami cai Allpamanca alli causaita apamunga. Diospaj Gobierno ñucanchijmanta imallata ruragrishcata ricushun.
1. Gentecuna cashcata rurashpa, cutin tranquilo causachunca, ¿Jesusca imatataj ruranga?
Armagedón macanacuipica Rey Jesusca millai gentecunata, gobiernocunatapishmi tucuchinga (Apocalipsis 16:14, 16). Chaipica ‘millaicunaca ña mana tiyangachu’ (Salmo 37:10). Jesús cai Allpata mandacujpica tucuicunami tranquilo, cashcata rurashpa causashun (Isaías 11:4-ta liyipai).
2. ¿Diospaj munai cai Allpapi pajtarijpica ima shinataj causashun?
Diospaj Gobierno mandajpica “cashcata rurajcunallami cai Allpapica huiñai huiñaita causangacuna” (Salmo 37:29, NWT). ¿Chaipica ima shinataj causashun? Tucui gentecunami allita rurashun. Jehová Diostapish, shujtajcunatapishmi cꞌuyashun. Chashna causanaca maravillami canga. Tucuicunami mana ungushpa huiñai huiñaita causashun.
3. ¿Millaicunata tucuchishca qꞌuipaca Diospaj Gobiernoca imatataj ruranga?
Millaicunata tucuchishca qꞌuipaca Jesusca 1.000 huatacunatami mandanga. Chai huatacunapica Jesuspish, paihuan 144.000 mandagrijcunapishmi tucui gentecuna jucha illaj cachun ayudanga. 1.000 huatacuna tucurishca qꞌuipaca cai Allpaca shuj alaja paraisomi canga. Chaipica gentecunaca Jehová Dios mandashcacunata cazushpami cushilla causangacuna. Chai qꞌuipaca Jesusca paipaj Yayamanmi mandanata tigrachinga. Chashnami Jehová Diospaj shutica jatunyachishca canga (Mateo 6:9, 10). Tucuicunami Jehová Dios alli Mandaj cashcata, paita cazujcunata cuidaj cashcata yachangacuna. Shinallataj Jehová Diosca Diablotapish, demoniocunatapish, paipaj Gobiernota mana apoyajcunatapishmi tucuchinga (Apocalipsis 20:7-10). Diospaj Gobierno apamushca alli causaica manataj tucuringachu.
ASHTAHUAN YACHAI
Bibliapi tucui ima nishcataca Diospaj Gobiernomi pajtachinga. ¿Imamantataj chashna ninchij? Chaita ricushun.
4. Diospaj Gobiernoca cai Allpapi tiyaj gobiernocunatami tucuchinga
“Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” (Eclesiastés 8:9). Pero Jehová Diosca paipaj Gobiernohuanmi tucui cai llaquicunataca tucuchinga.
Daniel 2:44 y 2 Tesalonicenses 1:6-8-ta liyipai. Qꞌuipaca cai catij tapuicunatami yachashun:
¿Jehová Diospish, Jesuspish gobiernocunata, chai gobiernocunata apoyajcunataca imatataj ruranga?
Jehová Diospish, Jesuspish cashcata rurashpa, mana ñahuillata ricushpa mandana cashcataca, ¿ima shinataj yachanchij?
5. Jesusca alli Reymi can
Jesusca Diospaj Gobiernopi Rey cashcamantami gentecunataca ayudanga. Paica gentecunata ayudanatami munarca. Shinallataj ayudangapajca Diospaj poderta charishcatami ricuchirca. Chaita yachangapajca VIDEOTA ricui.
Jesús cai Allpapi cashpa imacunallata rurashcaca Diospaj Gobiernopi imallata ruragrishcatami ricuchin. Cai catij bendicioncunamantaca, ¿maijantataj pajtarichun munangui? Cai bendicioncunamanta parlaj tucui versocunata liyipai.
JESÚS CAI ALLPAPI CASHPACA...
JESÚS JAHUA CIELOMANTACA...
... tamiata, huairata, acapanacunatami jarcarca (Marcos 4:36-41).
... gentecuna cai Allpapi rurashca dañotami allichinga (Isaías 35:1, 2).
... achcacunamanmi micunata cararca (Mateo 14:17-21).
... gentecuna yaricaihuan huañuchunca mana saquingachu (Salmo 72:16).
... achcacunatami jambirca (Lucas 18:35-43).
... tucuicunatami jambinga (Isaías 33:24).
... huaquin huañushcacunatami causachirca (Lucas 8:49-55).
... huañuitami tucuchinga (Apocalipsis 21:3, 4).
6. Jesús cai Allpata mandajpica allimi causashun
Jesús mandajpica Jehová munashcatami pajtachinga. Chashnami callaripi Dios munashca shina gentecunaca paraíso Allpapi huiñai huiñaita causangacuna. Jehová Dios paipaj munaita pajtachingapaj Jesús imata ruragrishcata ricui. VIDEOTA ricui.
Salmo 37:4-ta liyipai. Qꞌuipaca cai catij tapuitami yachashun:
Jehová Dios ‘cambaj shungupi yuyashcata’ cuj cashcata yachashpaca, ¿ima shinataj sintiringui?
HUAQUINCUNACA: “Tucuicuna tandalla trabajashpaca cai mundotaca allichi tucunchijmi” nincunami.
Gobiernocuna mana allichishca problemacunamantaca, ¿Diospaj Gobiernoca maijantataj allichinga?
YUYARISHUNCHIJ
Jesús mandacujpimi Dios munashca shina causashun. Chaipica Jehová Diosllata adoraj gentecunami huiñai huiñaita causangacuna.
Yuyaringapaj tapuicuna
Diospaj Gobiernoca Jehovapaj shutita jatunyachingapajca, ¿imatataj ruranga?
Bibliapi nishca shinaca Diospaj Gobierno sumaj causaita apamunataca, ¿imamantataj crinchij?
Diospaj Gobierno cugrishca bendicioncunamantaca, ¿maijantataj pajtarichun munangui?
CAICUNATAPISH RICUI
Armagedón ima cashcata ricui.
Jesús huillashca “jatun llaqui punllacunapi” imalla tucugrishcata yachai (Mateo 24:21).
“¿Jatun llaqui punllacunaca imataj can?” (jw.org paginapi ricui)
¿Familiacunaca Diospaj Gobierno ña mandacushcata yuyangapajca imatataj rurana can?
“Achca tapuicunatami charircani” nishcata liyishpa politicapi trabajaj runapaj tapuicunata ima shina cutichishcata yachai.
“Bibliata yachashpami cambiashcacuna” (Huillaj, 1 de enero de 2012)
-