Bibliata estudianaca achcatami ayudan. Pero maipica Bibliata estudiashpa catinaca mana jahuallachu can. Huaquinpica Bibliata yachanata valishachu manachu valisha nishpachari yuyanchij. ¿Bibliata yachashpa catingapajca imamantataj esfuerzota rurana cangui? ¿Jarcaicuna tiyajpipish Bibliata estudiashpa catingapajca imatataj rurana cangui?

1. ¿Bibliata estudianaca imamantataj valishca can?

“Diospaj Shimica causajmi, tucuita rurai tucujmi” can (Hebreos 4:​12). Bibliapica Yaya Dios ñucanchijmanta imata yuyashcata, imata sintishcatami parlan. Bibliata yachashpami Yaya Diostaca ashtahuan rijsingui, alli decisioncunatapish agllangui, esperanzatapish charingui. Ashtahuancarin Diospaj alli amigo tucushpami cushilla causangui.

2. ¿Bibliapi yachachishcacuna valishca cashcataca imamantataj cuentata cuna canchij?

Bibliapi yachachishcacunaca orotapish yalli valishcami can. Chaimantami Bibliapica: ‘Mana llullaj shimitaca randishpa ama tigra cꞌatungui’ nin (Proverbios 23:23). Bibliapi yachachishcacuna achca valishca cashcata intindishpaca ima jarcaicuna tiyajpipish chai yachachishcacunata estudiashpa catingapajmi esfuerzota rurana canchij (Proverbios 2:​4, 5-ta liyipai).

3. ¿Bibliata yachashpa catichunca Jehová Diosca imatataj ruranga?

Tucui poderta charij Jehová Diosca cambaj amigo cashcamantami can ima shina cashcata alli rijsin. Chaimantami paimanta ashtahuan yachachun ayudasha nin. Yaya Diosca “allita ruranatapish, allita munanatapish” cushami nin (Filipenses 2:​13-ta liyipai). Chaimanta estudiana munaita charichun o imalla yachashcata causaipi pajtachichunpish paimi ayudanga. Shinallataj Yaya Diosca jarcaicunata mishachun, shujtajcuna catirashpa llaquichijpipish fuerzata cushpami ayudanga. Bibliata yachashpa catingapajca Diosta mañai (1 Tesalonicenses 5:​17).

ASHTAHUAN YACHAI

4. Bibliata estudianaca valishcami cana can

Maipica achca cosascunata rurana cashcamantami Bibliata estudiangapaj tiempota mana charinchij. Pero ¿imatataj rurai tucungui? Filipenses 1:​10-ta liyipai. Qꞌuipaca cai catij tapuicunatami yachashun:

• ¿Cambajca imataj alli cajcuna o valishcacuna can?

• ¿Bibliata estudiana importante cashcataca ima shinataj ricuchi tucungui?

1. Shuj baldepi allpata churashpa qꞌuipaman rumicunata churajpica rumicunaca ña mana yaicunchu.

2. Pero rumicunataraj churajpica allpaca casi tucuimi yaicun. Chashnallataj ñucanchij causaipi imacuna ashtahuan valishca cashcata puntapi churashpaca shujtaj ruraicunapajpish tiempotami charishun.

Tucuicunami Diosta rijsinata, paita adoranata minishtinchij. Bibliata yachashpaca Yaya Diostami rijsinchij. Mateo 5:​3-ta liyipai. Qꞌuipaca cai catij tapuitami yachashun:

• ¿Bibliata estudianata puntapi churashpaca ima shinataj causashun?

5. Shujtajcuna jarcajpipish yachashpa cati

VIDEO: Ahuantashcamantami bendicioncunata chasquircani (5:​22)

• ¿Francesco paipaj familiaman, paipaj amigocunaman Bibliata yachacushcata huillajpica imatataj rurarcacuna?

• ¿Paipajca Bibliamanta yachashpa catinaca imamantataj alli carca?

2 Timoteo 2:​24, 25-ta liyipai. Qꞌuipaca cai catij tapuicunatami yachashun:

• ¿Bibliata yachacushcamantaca cambaj familia, cambaj amigocunaca imatataj yuyancuna?

• ¿Cai versocunapi nishca shinaca, Bibliata yachachun pi jarcajpica imatataj rurana cangui? ¿Imamantataj chaita rurana cangui?

6. Jehová Dios canta ayudanapi cri

VIDEO: Jehová Diosmi ñucanchij causaita cambiachun ayudan (3:​56)

• ¿Jim runaca Dios munashca shina causangapajca imatataj rurana carca?

• ¿Pai rurashca cambiocunamantaca imatataj ashtahuan munarcangui?

Hebreos 11:​6-ta liyipai. Qꞌuipaca cai catij tapuicunatami yachashun:

• ¿Jehová Diosca ‘paita mashcajcunaman’ o paita rijsingapaj tucuita rurajcunamanca imatataj cunga?

• ¿Bibliata yachashpa catingapaj imallata ruracushcata ricushpaca Yaya Diosca ima shinashi sintiringa?

YUYARISHUNCHIJ

Bibliata estudiana mana fácil cajpipish yachanata mana saquishpaca cushillami causangui. Jehová Diospi shunguta churajpica paillatajmi bendicianga.

Yuyaringapaj tapuicuna

• ¿Biblia yachachishcacunataca imamantataj valorangui?

• ¿Imacuna ashtahuan valishca cashcata intindishpaca imatataj rurana cangui?

• ¿Bibliata estudiashpa catingapajca imamantataj Diosta ayudahuai nishpa mañana cangui?

CAICUNATAPISH RICUI

Huaquin gentecunaca alli yuyashpa paicunapaj tiempohuan imata rurashcata ricui.

“Ñucanchij tiempohuan imata ruranata alli yuyashun” (Rijchari, febrero de 2014)

Shuj huarmica Diostami cazusha nirca. Pero pai imallata ruracushcataca paipaj cusaca mana intindircachu. Jehová Dios ima shina ayudashcata ricui.

Jehovami llaquicuna chaupipica fuerzasta cun (5:​05)

Yaya Diosta cazunata mana saquishpa shuj huarmi paipaj cusata Diosta sirvichun ima shina ayudashcata ricui.

Testigo de Jehovacunaca pandarishca cashcatami yuyarcani (6:​30)

Huaquincunaca testigo de Jehovacunaca familiatami chꞌicanyachin nincunami. Pero ¿chaica ciertochu can?

“¿Testigo de Jehovacunaca familiata chꞌicanyachinchu?” (jw.org paginapi ricui)

Tucuicunami decisioncunata agllana canchij. Huaquinpica chai decisioncunaca ñucanchij causaitami cambian. Shinallataj chai decisioncunaca Diospaj amigo cangapaj o mana cangapajmi ayudanga. Por ejemplo, maipi causanata, imapi trabajanata, cazaranata o mana cazaranatami decidina canchij. Alli decidishpaca cushillami causashun, Jehová Diostapishmi cushichishun.

1. ¿Alli decidichunca Bibliaca ima shinataj ayudan?

Manaraj imata decidishpaca Jehová Diospaj ayudatami mashcana cangui. Chaipajca Dios ima yuyashcata yachangapajmi Bibliapi ricuna cangui (Proverbios 2:3-6-ta liyipai). Huaquinpica Jehová Diosca caita rurai ningami. ¿Chaipica imatataj rurana cangui? Jehová mandashcatami cazuna cangui.

Pero ¿Bibliapi caita o chaita rurai mana nijpica? Jehová Diosca ‘ima ñanta catina’ cashcatami ricuchinga (Isaías 48:17). Paica alli decisioncunata agllachunmi Bibliapi tiyaj yuyaicunahuan ayudanga. Chai yuyaicunaca Jehová Dios ima shina yuyashcata, ima shina sintirishcata intindichunmi ayudanga. Chaitaca Bibliata liyishpami intindinchij. Chashnami Jehová Dios munashca shina alli decisioncunata agllashun.

2. ¿Manaraj imata decidishpaca imatataj rurana cangui?

Bibliapica: “Yachajcunaca imata rurangapajpish, alli yuyarinrajmi” ninmi (Proverbios 14:15). Chaimantami alli decidingapajca alli yuyana canchij. Chaipajca: “¿caimantaca Bibliaca imatataj yachachin?, ¿caita agllashpaca tranquilochu sintirisha?, ¿cashna decidishcamantaca shujtajcunaca allichu sintiringa?, ¿ñuca decisioncunahuan Jehová Diosca cushillachu sintiringa?” nishpami tapurina cangui (Deuteronomio 32:29).

Diosca ima alli cashcata, ima mana alli cashcata ningapajmi derechota charin. Chaimantami pai churashca leycunata, Bibliapi tiyaj yuyaicunata rijsishpa, chaicunata cazushpaca alli concienciata charishun. Ñucanchij concienciaca allita o mana allita ruracushcatami huillan (Romanos 2:14, 15, NWT). Alli concienciata charishpaca alli decisioncunatami japishun.

ASHTAHUAN YACHAI

3. Biblia yachachichun saqui

VIDEO: Bibliapi tiyashca yuyaicunata cazushunchij (5:54)

• ¿Jehová Diosca cada unotaca imata rurachuntaj saquin?

• ¿Imamantataj cada unotaca decidichun saquin?

• ¿Alli decidichunca Jehová Diosca ima shinataj ayudan?

Tiempota alli aprovechangapaj ¿imata rurai tucunchij? Efesios 5:15, 16-ta liyipai, NWT. Qꞌuipaca cai catij tapuicunatami yachashun:

• Bibliata cada punlla liyingapajca, ¿ima shinataj ‘tiempota alli aprovechai’ tucunchij?

• Alli cusa, alli yaya mama, alli huahuacuna cangapajca, ¿ima shinataj ‘tiempota alli aprovechai’ tucunchij?

• Tandanacuiman ringapajca, ¿ima shinataj ‘tiempota alli aprovechai’ tucunchij?

4. Alli decidingapajca alli concienciatami charina cangui

VIDEO: Alli yuyashpa decidishunchij (5:13)

• ¿Videopi ricurij panica alli concienciata charingapaj, Jehová munashca shina alli decidingapajca imatataj rurarca?

¿Ñucanchijpaj randi shujtajcuna decidichunca imamantataj mana saquina canchij? Hebreos 5:14-ta liyipai. Qꞌuipaca cai catij tapuicunatami yachashun:

• Shujtajcuna ñucanchijpaj randi decidichun saquinaca jahuallami can. Pero ¿imamantataj cada uno ima alli cashcata, ima mana alli cashcata decidina can?

• ¿Alli concienciata charingapaj, alli decisioncunata agllangapajca imacunallataj ayudanga?

5. Shujtajcunapaj concienciata respetashunchij

Mana tucuicunachu igual yuyanchij. Chaimantami chꞌican chꞌican decisioncunata agllanchij. ¿Shujtajcunapaj concienciata respetashcataca ima shinataj ricuchinchij? Ishqui ejemplocunata ricushun:

Ejemplo 1: Shuj panica ñahuita maquillarinata o pintarinatami munan. Pero pai rishca mushuj congregacionpica pai maquillarishcata ricushpaca panicunaca mana alli sintirincunachu.

Romanos 15:1 y 1 Corintios 10:23, 24-ta liyipai. Qꞌuipaca cai catij tapuicunatami yachashun:

• Cai versocunapi nishca shinaca ¿cai panica imata ruranatataj decidi tucun? ¿Cambaj conciencia huaquin ruraicunata rurachun saquijpipish shujtajcunapaj concienciata ama llaquichingapajca imatataj ruranguiman?

Ejemplo 2: Shuj huauquica asha tragota ubyanaca mana jucha cashcatami yachan. Chaita yachashpapish paica mana ubyanatami decidin. Pero shuj punllaca shuj invitaciontami chasquin. Chai invitacionman rishpaca huauquicuna asha tragota ubyacushcatami ricun.

Eclesiastés 7:16-ta liyipai; Romanos 14:1, 10-ta liyipai, NWT. Qꞌuipaca cai catij tapuicunatami yachashun:

• Cai versocunapi nishca shinaca ¿cai huauquica imatataj rurana can? Huaquinpica ñucanchij concienciaca huaquin ruraicunata rurachunmi saquin. Pero shujtajcunapaj concienciaca chaita rurachunca mana saquinchu. Chaipica ¿imatataj ruranguiman?

¿Alli decidingapajca imatataj rurana cangui?

1. Alli decidingapajca Diospaj ayudata mañai (Santiago 1:5).

2. Alli decidingapajca Bibliapi, publicacioncunapi ima nishcata ricui. Shinallataj experienciata charij huauqui panicunapaj ayudata mashcai.

3. Cambaj decisionhuan canpish, shujtajcunapish ima shina sintirishcata yuyai.

YUYARISHUNCHIJ

Alli decidingapajca Jehová Dios imata yuyashcatami alli ricuna canchij. Shinallataj ñucanchij ruraicunahuan shujtajcunata ayudagrishcata o llaquichigrishcatami ricuna canchij.

Yuyaringapaj tapuicuna

• ¿Jehová Dios munashca shina decidingapajca imatataj rurana cangui?

• ¿Alli concienciata charingapajca imatataj rurana cangui?

• ¿Shujtajcunapaj concienciata respetashcataca ima shinataj ricuchinguiman?

CAICUNATAPISH RICUI

¿Diospaj alli amigo cangapajca ima shinataj alli decisioncunata agllai tucungui?

“Ñucanchij decisioncunahuan Jehová Diosta jatunyachishun” (Huillaj, 15 de abril de 2011)

Jehová Dios ñucanchijta ima shina consejashcata ricui.

Jehová Diosca paipaj pueblotami pushacun (9:50)

Sinchi cajpipish shuj runa alli decidingapaj imata rurashcata ricui.

Jehová Diosca allicunata cujmi (5:46)

Jehová Dios caita o chaita rurai mana nijpipish paita cushichingapaj imata rurana cashcata ricui.

“¿Tucuipajchu shuj ley tiyachun minishtinchij?” (Huillaj, 1 de diciembre de 2003)