-
¿Diospaj Gobiernoca imataj can?Huiñai huiñaita cushilla causai Bibliamanta yachai
-
-
Bibliapica Diospaj Mandanamantami ashtahuan parlan. Jehová Diosca gentecuna paraíso Allpapi causachunmi munarca. Caica Diospaj Mandana mandacujpimi pajtaringa. Pero ¿cai Mandanaca imataj can? ¿Ña mandacushcataca ima shinataj yachanchij? ¿Ñucanchijmantaca imatataj ruracun? ¿Shamuj punllacunapica imatataj ruranga? Cai tapuicunataca cai yachaipi, catij ishqui yachaicunapimi ricushun.
1. ¿Diospaj Mandanaca imataj can? ¿Chaipica pitaj mandanga?
Diospaj Mandanaca Jehová churashca shuj Gobiernomi can. Cai Gobiernopica Jesusmi Rey can. Paimi jahua pachamanta mandacun (Mateo 4:17; Juan 18:36). Jesusmanta parlashpaca Bibliapica: “Paimi huiñai huiñaita mandanga” ninmi (Apocalipsis 11:15). Jesusca Diospaj Gobiernopi Rey cashcamantami tucui cai Allpata mandanga.
2. ¿Jesushuanca picunataj mandanga?
Jesusca mana paillachu mandanga. ‘Tucui aillucunamanta, chꞌican chꞌican rimaicunamanta, tucui llajtacunamanta caj gentecunami cai pachataca mandanga’ (Apocalipsis 5:9, 10). ¿Jesushuanca mashnacunataj mandanga? Jesús cai Allpapi cajpica paitaca achca gentecunami catircacuna. Cunan punllacunapipish achcacunami Jesusta catincuna. Pero 144.000 gentecunallami Jesushuan mandangapaj jahua pachaman ringacuna (Apocalipsis 14:1-4-ta liyipai). Cutin caishujcunaca cai Allpapi saquirishpami Dios churashca mandashcacunata cazungacuna (Salmo 37:29, NWT).
3. ¿Cai Allpapi tiyaj gobiernocunamantaca Diospaj Gobiernoca imamantataj ashtahuan alli can?
Huaquin gobiernocunaca alli cosascunatami rurasha nishcacuna. Pero poderta mana charishcamanta, ashalla tiempota mandashcamantami chaitaca mana rurashcacuna. Shujtaj gobiernocunaca gentecunamantaca mana preocuparincunachu. Cutin Jesusca Diospaj Gobiernopi mandanataca mana saquingachu. Yaya Diosca ‘nunca pi mana chingachina mandanatami churashca’ (Daniel 2:44). Jesusca mana ñahuita ricushpallami tucui cai Allpataca mandanga. Paica pai shina cꞌuyaj, llaquij, tucuicunata alli tratachunmi yachachinga (Isaías 11:9-ta liyipai).
ASHTAHUAN YACHAI
Diospaj Gobierno cai Allpapi tiyaj gobiernocunamanta imamanta ashtahuan alli cashcata ricushun.
4. Diospaj Gobiernomi cai Allpataca mandanga
Cai tucui huatacunapi tiyaj gobiernocunamantaca Jesusmi ashtahuan poderta charin. Mateo 28:18-ta liyipai. Qꞌuipaca cai catij tapuitami yachashun:
¿Gobiernocuna charishca autoridadmantaca Jesuspaj autoridadca imamantataj yalli can?
Cai Allpapi tiyaj gobiernocunaca tucui Allpataca mana mandai tucunchu. Paicunaca asha tiempollatami mandancuna. Cai gobiernocunamanta Diospaj Gobierno imamanta diferente cashcata yachangapajca Daniel 7:14-ta liyipai. Qꞌuipaca cai catij tapuicunatami yachashun:
Diospaj Gobierno huiñai huiñaita mandachunca, ¿imamantataj alli can?
Diospaj Gobierno tucui cai Allpata mandachunca, ¿imamantataj alli can?
5. Cai Allpapi tiyaj gobiernocunaca ña mana mandangachu
¿Cai Allpapi tiyaj gobiernocunapaj randica imamantataj Diospaj Gobierno mandachun minishtinchij? VIDEOTA ricui. Qꞌuipaca cai catij tapuitami yachashun:
¿Cai Allpapi tiyaj gobiernocunaca imatataj rurashca?
Eclesiastés 8:9-ta liyipai. Qꞌuipaca cai catij tapuitami yachashun:
¿Gobiernocunapaj randica imamantataj Diospaj Gobiernoca mandana can?
6. Jesushuan mandajcunaca ñucanchijtaca allimi intindin
Jesús cai Allpapi cashpaca ñucanchij shinami causarca. Chaimantami “ñucanchij imapi pandarijpica paica llaquinga” (Hebreos 4:15, NWT). Jehová Diosca ‘tucui aillucunamanta, chꞌican chꞌican rimaicunamanta, tucui llajtacunamanta’ paita sirvij cꞌari huarmicunatami Jesushuan mandachun agllashca (Apocalipsis 5:9). Paicunaca 144.000 gentecunami can.
Jesuspish, paihuan mandajcunapish ñucanchij shina cai Allpapi causashcamantami gentecunataca alli intindin. ¿Caita yachashpaca ima shinataj sintiringui?
Jehová Diosca chꞌican chꞌican tiempopi causashca gentecunata, chꞌican chꞌican llajtacunamanta caj gentecunatami Jesushuan mandachun agllashca.
7. Diospaj Gobiernopi tiyaj leycunaca ashtahuan valishcami can
Gobiernocunaca gentecunata ayudangapaj, cuidangapajmi leycunata churan. Diospaj Gobiernopish leycunatami churashca. Diospaj Gobiernota apoyasha nijcunaca chai leycunatami cazuna can. 1 Corintios 6:9-11-ta liyipai. Qꞌuipaca cai catij tapuicunatami yachashun:
¿Dios mandashcacunata cazushpaca ima shinataj causashun?a
¿Paipaj Gobiernopi Dios churashca leycunata cazunaca allichu can? ¿Imamantataj chashna ningui?
¿Chai leycunata cazushpaca gentecunaca cambiai tucunchu? ¿Imamantataj chashna ningui? (1 Corintios 6:11-ta ricui).
Gobiernocunaca gentecunata cuidangapaj, ayudangapajmi leycunata churan. Diospaj Gobiernopish chaillatataj rurangapajmi leycunata churan. Pero cai leycunaca ashtahuan allimi can.
HUAQUINCUNACA: “¿Diospaj Mandanaca imataj can?” nishpami tapuncuna.
¿Quiquinca imatataj ninguiman?
YUYARISHUNCHIJ
Diospaj Mandanaca shuj Gobiernomi can. Cai Gobiernoca jahua pachamantami tucui cai Allpata mandanga.
Yuyaringapaj tapuicuna
¿Diospaj Gobiernopica picunataj mandanga?
¿Cai Allpapi tiyaj gobiernocunamantaca Diospaj Gobiernoca imamantataj ashtahuan alli can?
¿Diospaj Gobiernota apoyajcunamantaca Jehová Diosca imatataj shuyan?
CAICUNATAPISH RICUI
Diospaj Gobiernomanta Jesús ima nishcata liyi.
“¿Diospaj Gobiernoca shungu ucupichu can?” (jw.org paginapi ricui)
¿Testigo de Jehovacunaca imamantataj Diospaj Gobiernotaca apoyancuna?
Jesushuan mandachun Dios agllashca 144.000 gentecunamanta Biblia ima nishcata yachai.
“¿Jahua pachamanca mashnacunallataj rincuna?” (jw.org paginapi ricui)
¿Carcelpi caj huarmica Dioslla problemacunata allichi tucushcataca ima shinataj yacharca?
“Dioslla problemacunata allichi tucushcatami yacharcani” (Rijchari, noviembre de 2011)
-
-
¿Diospaj Gobiernoca imacunallatataj ruranga?Huiñai huiñaita cushilla causai Bibliamanta yachai
-
-
Diospaj Gobiernoca ñami jahua pachapi mandacun. Ñallami cai Allpamanca alli causaita apamunga. Diospaj Gobierno ñucanchijmanta imallata ruragrishcata ricushun.
1. Gentecuna cashcata rurashpa, cutin tranquilo causachunca, ¿Jesusca imatataj ruranga?
Armagedón macanacuipica Rey Jesusca millai gentecunata, gobiernocunatapishmi tucuchinga (Apocalipsis 16:14, 16). Chaipica ‘millaicunaca ña mana tiyangachu’ (Salmo 37:10). Jesús cai Allpata mandacujpica tucuicunami tranquilo, cashcata rurashpa causashun (Isaías 11:4-ta liyipai).
2. ¿Diospaj munai cai Allpapi pajtarijpica ima shinataj causashun?
Diospaj Gobierno mandajpica “cashcata rurajcunallami cai Allpapica huiñai huiñaita causangacuna” (Salmo 37:29, NWT). ¿Chaipica ima shinataj causashun? Tucui gentecunami allita rurashun. Jehová Diostapish, shujtajcunatapishmi cꞌuyashun. Chashna causanaca maravillami canga. Tucuicunami mana ungushpa huiñai huiñaita causashun.
3. ¿Millaicunata tucuchishca qꞌuipaca Diospaj Gobiernoca imatataj ruranga?
Millaicunata tucuchishca qꞌuipaca Jesusca 1.000 huatacunatami mandanga. Chai huatacunapica Jesuspish, paihuan 144.000 mandagrijcunapishmi tucui gentecuna jucha illaj cachun ayudanga. 1.000 huatacuna tucurishca qꞌuipaca cai Allpaca shuj alaja paraisomi canga. Chaipica gentecunaca Jehová Dios mandashcacunata cazushpami cushilla causangacuna. Chai qꞌuipaca Jesusca paipaj Yayamanmi mandanata tigrachinga. Chashnami Jehová Diospaj shutica jatunyachishca canga (Mateo 6:9, 10). Tucuicunami Jehová Dios alli Mandaj cashcata, paita cazujcunata cuidaj cashcata yachangacuna. Shinallataj Jehová Diosca Diablotapish, demoniocunatapish, paipaj Gobiernota mana apoyajcunatapishmi tucuchinga (Apocalipsis 20:7-10). Diospaj Gobierno apamushca alli causaica manataj tucuringachu.
ASHTAHUAN YACHAI
Bibliapi tucui ima nishcataca Diospaj Gobiernomi pajtachinga. ¿Imamantataj chashna ninchij? Chaita ricushun.
4. Diospaj Gobiernoca cai Allpapi tiyaj gobiernocunatami tucuchinga
“Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” (Eclesiastés 8:9). Pero Jehová Diosca paipaj Gobiernohuanmi tucui cai llaquicunataca tucuchinga.
Daniel 2:44 y 2 Tesalonicenses 1:6-8-ta liyipai. Qꞌuipaca cai catij tapuicunatami yachashun:
¿Jehová Diospish, Jesuspish gobiernocunata, chai gobiernocunata apoyajcunataca imatataj ruranga?
Jehová Diospish, Jesuspish cashcata rurashpa, mana ñahuillata ricushpa mandana cashcataca, ¿ima shinataj yachanchij?
5. Jesusca alli Reymi can
Jesusca Diospaj Gobiernopi Rey cashcamantami gentecunataca ayudanga. Paica gentecunata ayudanatami munarca. Shinallataj ayudangapajca Diospaj poderta charishcatami ricuchirca. Chaita yachangapajca VIDEOTA ricui.
Jesús cai Allpapi cashpa imacunallata rurashcaca Diospaj Gobiernopi imallata ruragrishcatami ricuchin. Cai catij bendicioncunamantaca, ¿maijantataj pajtarichun munangui? Cai bendicioncunamanta parlaj tucui versocunata liyipai.
JESÚS CAI ALLPAPI CASHPACA...
JESÚS JAHUA CIELOMANTACA...
... tamiata, huairata, acapanacunatami jarcarca (Marcos 4:36-41).
... gentecuna cai Allpapi rurashca dañotami allichinga (Isaías 35:1, 2).
... achcacunamanmi micunata cararca (Mateo 14:17-21).
... gentecuna yaricaihuan huañuchunca mana saquingachu (Salmo 72:16).
... achcacunatami jambirca (Lucas 18:35-43).
... tucuicunatami jambinga (Isaías 33:24).
... huaquin huañushcacunatami causachirca (Lucas 8:49-55).
... huañuitami tucuchinga (Apocalipsis 21:3, 4).
6. Jesús cai Allpata mandajpica allimi causashun
Jesús mandajpica Jehová munashcatami pajtachinga. Chashnami callaripi Dios munashca shina gentecunaca paraíso Allpapi huiñai huiñaita causangacuna. Jehová Dios paipaj munaita pajtachingapaj Jesús imata ruragrishcata ricui. VIDEOTA ricui.
Salmo 37:4-ta liyipai. Qꞌuipaca cai catij tapuitami yachashun:
Jehová Dios ‘cambaj shungupi yuyashcata’ cuj cashcata yachashpaca, ¿ima shinataj sintiringui?
HUAQUINCUNACA: “Tucuicuna tandalla trabajashpaca cai mundotaca allichi tucunchijmi” nincunami.
Gobiernocuna mana allichishca problemacunamantaca, ¿Diospaj Gobiernoca maijantataj allichinga?
YUYARISHUNCHIJ
Jesús mandacujpimi Dios munashca shina causashun. Chaipica Jehová Diosllata adoraj gentecunami huiñai huiñaita causangacuna.
Yuyaringapaj tapuicuna
Diospaj Gobiernoca Jehovapaj shutita jatunyachingapajca, ¿imatataj ruranga?
Bibliapi nishca shinaca Diospaj Gobierno sumaj causaita apamunataca, ¿imamantataj crinchij?
Diospaj Gobierno cugrishca bendicioncunamantaca, ¿maijantataj pajtarichun munangui?
CAICUNATAPISH RICUI
Armagedón ima cashcata ricui.
Jesús huillashca “jatun llaqui punllacunapi” imalla tucugrishcata yachai (Mateo 24:21).
“¿Jatun llaqui punllacunaca imataj can?” (jw.org paginapi ricui)
¿Familiacunaca Diospaj Gobierno ña mandacushcata yuyangapajca imatataj rurana can?
“Achca tapuicunatami charircani” nishcata liyishpa politicapi trabajaj runapaj tapuicunata ima shina cutichishcata yachai.
“Bibliata yachashpami cambiashcacuna” (Huillaj, 1 de enero de 2012)
-