YACHAI 20
¿Jehová Diosca paita sirvijcunataca ima shinataj pushacun?
Jehová Diosca imatapish mana maipishcachun ruranchu (1 Corintios 14:33, NWT). Chaimantami Diosca paita sirvijcunaca alli organizado cachun munan. ¿Tandanacushca crijcunaca ima shinataj congregacionpi organizashca can? ¿Dios munashca shina tucui alli llujshichunca imatataj rurana canchij?
1. ¿Congregacionpica pitaj pushan?
Efesios 5:23-pica: ‘Tandanacushca crijcunapajca Cristomi uma’ can ninmi. Jesusca jahua pachamantami muyundij Allpapi Diosta sirvijcunapaj obrata pushacun. Paica ‘alli cazuj, alli yuyayuj sirvijtami’ nombrashca. Paicunaca experienciata charij ancianocunami can. Paicunataca Cuerpo Gobernante nishpami rijsinchij (Mateo 24:45-47-ta liyipai, NWT). Ima shinami Jesusta punta catijcunapaj punllacunapi Jerusalenpi caj apostolcunapish, ancianocunapish Diosta sirvijcunata pusharca, chashnallatajmi cunan punllacunapipish cuerpo gobernantepi caj huauquicunaca congregacioncunata pushacun (Hechos 15:2). Cai huauquicunaca congregacioncunata pushashpapish mana paicunapaj umachu can. Paicunaca Jesusta uma shina cazushpami Diospaj ayudata mashcan, paipaj Shimi ima nishcatapish ricuncuna.
2. ¿Ancianocunaca imatataj ruran?
Ancianocunaca Jesusta catij, experienciata charij huauquicunami can. Paicunaca Bibliamantami yachachincuna, huauqui panicunatapishmi ayudancuna. Chashna ayudashpaca mana cobrancunachu. Ashtahuanpish ‘Dios munashca shina cuidanata munashcamantami cuidancuna. Cullquita japina raicullaca mana rurancunachu. Paicunaca mana quillanayachishpami rurancuna’ (1 Pedro 5:1, 2). Ancianocunataca siervo ministerialcunami ayudan. Paicunapish Biblia imalla mandashcata pajtachishpaca ancianocunami cai tucun.
Cuerpo Gobernantepi sirvij huauquicunaca huaquin ancianocunataca superintendente de circuito cachunmi nombrancuna. Cai superintendente huauquicunaca chꞌican chꞌican congregacioncunatami visitancuna, animotapish cuncuna. Ashtahuanpish Biblia imalla nishcata pajtachij huaquin huauquicunata ancianocuna cachun, siervo ministerialcuna cachunmi nombrancuna (1 Timoteo 3:1-10, 12; Tito 1:5-9).
3. ¿Congregacionpica cada Testigoca imatataj ruran?
Congregacionpica tucuicunami tandanacuicunapi participashpa, huillangapajpish tucuita rurashpaca ‘Diospaj shutita alabanchij’ (Salmo 148:12, 13-ta liyipai).
ASHTAHUAN YACHAI
Jesusca ima laya pushaj cashcata, ancianocunapish Jesuspaj ejemplota ima shina cati tucushcatami ricushun. Jesustapish ancianocunatapish cazungapajca imata rurana cashcatami yachashun.
4. Jesusca alli pushajmi can
Jesusca shuj sumaj invitaciontami ruran. Mateo 11:28-30-ta liyipai. Qꞌuipaca cai catij tapuicunatami yachashun:
¿Jesusca ima laya pushajtaj can? ¿Paica gentecuna ima shina sintirichuntaj munan?
¿Ancianocunaca ima shinataj Jesuspaj ejemplota catincuna? VIDEOTA ricui.
Bibliapica congregacionpi ancianocuna ima shina ayudaj cashcatami intindichin.
Isaías 32:2 y 1 Pedro 5:1-3-ta liyipai. Qꞌuipaca cai catij tapuicunatami yachashun:
Ancianocunaca Jesús shinami shujtajcunata ayudangapaj esfuerzota rurancuna. ¿Caita yachashpaca ima shinataj sintiringui?
¿Ancianocunaca Jesús shina cangapajca imallatataj rurancuna?
5. Ancianocunaca paicunapaj ejemplohuanmi yachachin
¿Jesusca ancianocunaman mingashcataca ima shinataj rurachun munan? VIDEOTA ricui.
Jesusca congregacionpi ancianocuna ima shina canatami yachachirca. Mateo 23:8-12-ta liyipai. Qꞌuipaca cai catij tapuicunatami yachashun:
¿Bibliapica ancianocuna ima shina canatataj yachachin? ¿Shujtaj religioncunapica Dios mandashcacunata pajtachinchu?
Ancianocunaca Diospaj amigo cangapajmi esfuerzota rurancuna. Paicunapaj familiapish chaillatataj rurachunmi ayudancuna.
Ancianocunaca congregacionpica tucuicunamantami preocuparin.
Ancianocunaca predicancunami.
Ancianocunaca alli yachachijcunami can. Congregacionpipish pꞌichashpa, shujtaj ruraicunapipishmi ayudancuna.
6. Ancianocunatami cazuna canchij
Bibliapica ancianocunata cazuna cashcatami yachachin. Hebreos 13:17-ta liyipai. Qꞌuipaca cai catij tapuicunatami yachashun:
¿Bibliapica imamantataj ancianocunata cazuna cashcata yachachin? ¿Ancianocunata cazunaca allichu can? ¿Imamantataj chashna ningui?
Lucas 16:10-ta liyipai. Qꞌuipaca cai catij tapuitami yachashun:
¿Imamantataj uchilla ruraicunapipish ancianocunata cazuna canchij?
HUAQUINCUNACA: “Yaya Diosta adorangapajca shujtajcunahuan tandanacunataca mana minishtinchijchu” nincunami.
¿Imamantataj congregacionpica Diosta adorana canchij?
YUYARISHUNCHIJ
Jesusca congregaciontami pushacun. Ancianocunaca Jesustami cazuncuna. Paicuna ñucanchijta cuidashcamanta, paicunapaj ejemplohuan yachachishcamantami shungumanta ancianocunata cazunchij.
Yuyaringapaj tapuicuna
¿Pitaj congregacionta pushacun?
¿Congregacionpica ancianocunaca ima shinataj ayudan?
¿Congregacionpica imatataj cada uno rurana can?
CAICUNATAPISH RICUI
Cuerpo Gobernantepi sirvij huauquicunapish ancianocunapish Diosta sirvijcunamanta achcata preocuparijta ricui.
Llaquichijpipish huauqui panicunatami sinchiyachircanchij (4:22)
Superintendente de circuito huauquicuna paicunaman mingashcata ima shina pajtachijta ricui.
Superintendente de circuito shina sirvinaca ¿ima shinataj can? (4:51)
Huarmicuna congregacionpi imata rurajcuna cashcata liyi.
Ancianocuna congregacionpi animangapaj imallata rurajcuna cashcata yachai.
“Ancianocunaca Diosta cushilla sirvichunmi ayudancuna” (Huillaj, 15 de enero de 2013)