Jehová Diosca paipaj Gobiernohuanmi gentecunapaj llaquicunata tucuchinga. Cai alli huillaicunataca tucui gentecunamanmi huillasha ninchij. Jesusca paita catijcunamanca mundo enteropi huillachunmi mandarca (Mateo 28:19, 20). ¿Testigo de Jehovacunaca Jesús mandashcata cazungapajca imatataj rurashcanchij?

1. ¿Mateo 24:14-pi nishcaca ima shinataj pajtaricun?

Jesusca: ‘Alli huillaicunataca, tucui cai pachapi causajcunamanmi huillashpa yachaj chayachishca canga’ nircami (Mateo 24:14). Testigo de Jehovacunaca gentecunaman huillanatami munanchij. Cai alli huillaicunataca mundo enteropimi mil yalli shimicunapi huillacunchij. Cai obrata pajtachingapajca achca esfuerzo, alli organizashca canami minishtirin. Chaimantami Diospaj ayudata minishtinchij.

2. ¿Huillangapajca imatataj ruranchij?

Alli organizados cashcamantami cada huata achca gentecunaman huillanchij. Ima shinami Jesusta punta catijcuna rurarca, chashnallatajmi ‘huasin huasin’ rishpa huillanchij (Hechos 5:42). Pero gentecuna mana huasipi cajpica gentecuna tiyashca ladocunapimi huillanchij. Ñucanchijca maipi cashpapish Jehová Diosmanta, pai imalla ruragrishcamantapishmi huillangapaj tucuita ruranchij.

3. ¿Alli huillaicunataca picunataj huillana can?

Jesusta alli catijcunami alli huillaicunataca huillana can. Testigo de Jehovacunapajca shujtajcunaman huillanaca valishcami can. Gentecuna quishpirichunca huillanami canchij. Chaimantami huillangapajca cada uno imata rurai pudishcata ruranchij (1 Timoteo 4:16-ta liyipai). Ñucanchijca mana imata cobranchijchu. Bibliapica: “Cancunaca gratismi chasquircanguichij, shujtajcunamanpish gratis cuichij” ninmi (Mateo 10:7, 8, NWT). Huaquin gentecuna mana uyasha nijpipish Jehová Diosta alli sirvingapaj, paita cushichingapajmi huillashpa catinchij.

ASHTAHUAN YACHAI

4. Huillangapajca tucuitami ruranchij

VIDEO: ‘Cai pachapi tiyaj tucui llajtacunapimi huillanchij’ (7:33)

• ¿Testigo de Jehovacuna huillangapaj imallata ruracushcamantaca imatataj ashtahuan munangui?

Mateo 22:39-ta liyipai; Romanos 10:13-15-ta liyipai, NWT. Qꞌuipaca cai catij tapuicunatami yachashun:

• ¿Huillashpaca gentecunata cꞌuyashcataca ima shinataj ricuchinchij?

• ¿Diosca paimanta huillajcunataca ima shinataj ricun? (Romanos 10:15-ta ricui).

5. Yaya Dioshuanmi trabajanchij

Jehová Diosmi cai obrataca ñaupajman pushacun. Shuj ejemplota ricushun. Nueva Zelanda llajtapica Paul shuti shuj Testigoca huasin huasin rishpami shuj huarmihuan parlarca. Chai huarmica tutamanta ladomanmi Jehová Diostaca, “canmanta ashtahuan rijsichichun pitapish cachahuai” nishpa mañacushca carca. Quimsa horas qꞌuipallami Paulca paita visitanaman chayarca.

1 Corintios 3:9-ta liyipai. Qꞌuipaca cai catij tapuitami yachashun:

• ¿Cai experienciaca Jehová Dios huillana obrata ñaupajman pushacushcataca ima shinataj ricuchin?

Hechos 1:8-ta liyipai. Qꞌuipaca cai catij tapuitami yachashun:

• ¿Huillangapajca imamantataj Jehová Diospaj ayudata minishtinchij?

¿Caita yacharcanguichu?

Entre semana tandanacuipica gentecunaman alli huillachunmi yachachin. Chai tandanacuipi ima shina huillanata yachachishcamantaca, ¿imatataj yuyangui?

6. Huillashpaca Dios mandashcatami cazunchij

Jesusta punta catijcunataca autoridadcunaca ama huillachunmi jarcasha nircacuna. Pero huillashpa catingapajmi paicunaca ‘autoridadcunapaj ñaupajpi difindircacuna’ (Filipenses 1:7, NWT). Cunan punllacunapipish testigo de Jehovacunaca chashnallatajmi ruranchij.a

VIDEO: Alli huillaicunatami difindinchij (2:28)

Hechos 5:27-42-ta liyipai. Qꞌuipaca cai catij tapuitami yachashun:

• ¿Huillanataca imamantataj mana saquina canchij? (Hechos 5:29, 38 y 39-ta ricui).

YUYARISHUNCHIJ

Jesusca paita catijcunamanca tucui llajtacunapi alli huillaicunata huillachunmi mandarca. Pai mandashcata pajtachichunca Jehová Diosmi ayudacun.

Yuyaringapaj tapuicuna

• ¿Mundo enteropi alli huillaicunata huillangapajca imatataj ruranchij?

• ¿Huillacushpaca ima shinataj shujtajcunata cꞌuyashcata ricuchinchij?

• ¿Diosmanta huillashpaca cushilla sintirinata cringuichu? ¿Imamantataj chashna cringui?

CAICUNATAPISH RICUI

Testigo de Jehovacuna jatun llajtacunapi ima shina huillacushcata ricui.

París llajtapimi carritocunahuan huillanchij (5:11)

¿Testigocunaca shujtaj llajtamanta cajcunamanca ima shinataj huillancuna?

Campo de refugiadospi causajcunamanmi huillanchij (5:59)

Shuj pani Diosmanta huillashpa cushilla sintirishcata ricui.

Diosta sirvinaca viajana layami can (6:29)

Huillashpa catingapajca Tribunalcunaman rishpami jarcaicunata mishashcanchij. Caimanta ashtahuan yachai.

“Diospaj Gobiernomanta huillajcunaca tribunalcunamanmi rincuna” (Diospaj Gobiernoca ñami mandacun, capítulo 13)

Jesusca paita catingapajca bautizarina cashcatami yachachirca (Mateo 28:19, 20-ta liyipai). ¿Pero bautizarinaca imatataj nisha nin? ¿Bautizaringapajca imatataj rurana can?

1. ¿Bautizarinaca imatataj nisha nin?

Griego shimipi “bautizarina” shimica yacupi tucui cuerpota “pambana” cashcatami nisha nin. Jesusca Jordán yacupimi bautizarirca. Yacupi paipaj cuerpota pambashca qꞌuipaca ‘yacumantami llujshirca’ (Marcos 1:9, 10). Jesusta catijcunapish pai rurashca shinallatajmi tucui cuerpota pambarishpa bautizarincuna.

2. ¿Bautizarishpaca imatataj ricuchinchij?

Bautizarishpaca Jehová Diosman ña mingarishcatami ricuchinchij. Pero ¿Jehová Diosman mingarinaca imatataj nisha nin? Manaraj bautizarishpaca Jehová Diostaca: “Cantaca tucui ñuca causaipimi sirvisha, canllatajmi adorasha, cunanmantaca cambaj munaita ruranami ñucapajca valishca canga” nishpa mañana cashcatami nisha nin. Shinallataj Jesús imata rurashcata, pai imata yachachishcata cazunata agllashcatami ricuchinchij. Jesusca: ‘Maijanpish ñucata catisha nijca, quiquin causaita ama llaquishpa ñucata catichun’ nishpami yachachirca (Mateo 16:24). Yaya Diosman mingarishpa, bautizarishpaca Jehová Diospaj alli amigomi tucunchij. Paita adorajcunahuanpishmi alli apanacunchij.

3. ¿Bautizaringapajca imatataj rurana can?

Bautizarisha nishpaca puntapica Jehová Diosmantami yachana cangui. Shinallataj paipi feta charishcatami ricuchina cangui (Hebreos 11:6-ta liyipai). Diosmanta ashtahuan yachashpa, cambaj feta sinchiyachishpaca Jehová Diostaca ashtahuanmi cꞌuyangui. Shinallatajmi shujtajcunaman Diosmanta huillasha ningui. Diospaj mandashcacunatapish cazusha ningui (2 Timoteo 4:2; 1 Juan 5:3). ‘Jehová Dios munashca shina causashpa, paita cushichishpaca’ ñami paiman mingarishpa bautizari tucungui (Colosenses 1:9, 10, NWT).a

ASHTAHUAN YACHAI

4. Jesús bautizarishcamantaca achcatami yachai tucunchij

Jesús ima hora, ima shina bautizarishcata yachangapajca Mateo 3:13-17-ta liyipai. Qꞌuipaca cai catij tapuicunatami yachashun:

• ¿Jesús bautizarishpaca shuj llullu huahuachu carca?

• ¿Paipaj umallapichu yacuta churarcacuna? Shinashpaca ¿Jesusca ima shinataj bautizarirca?

Jesús bautizarishpaca Yaya Dios paiman ima mingashcatami pajtachi callarirca. Lucas 3:21-23 y Juan 6:38-ta liyipai. Qꞌuipaca cai catij tapuitami yachashun:

• ¿Bautizarishca qꞌuipaca Jesusca imatataj tucui shunguhuan rurai callarirca?

5. Canpishmi bautizari tucungui

Diosman mingarinapi, bautizarinapi yuyashpaca mancharinguichari. Pero Diosmanta ashtahuan yachashpa, paita alli rijsishpaca bautizarinatami munangui. Huaquincuna bautizaringapaj imata rurashcata ricui. VIDEOTA ricui.

VIDEO: Jehovata rijsishpa cati (1:11)

Juan 17:3 y Santiago 1:5-ta liyipai. Qꞌuipaca cai catij tapuitami yachashun:

• ¿Bautizaringapajca imatataj rurana cangui?

1. Jehová Diostaca, “cantaca tucui vidami sirvisha nini” nishpami mingarinchij.

2. Ña bautizarishpaca shujtajcunapaj ñaupajpi Diosman ña mingarishcatami ricuchinchij.

6. Bautizarishpaca Jehovapaj familiami tucunchij

Bautizarishpaca muyundij Allpapi tiyaj huauqui panicunahuanmi shuj familia shina tucunchij. Maimanta cashpapish tucuicunami chaillatataj crinchij. Biblia nishcacunatapishmi pajtachinchij. Salmo 25:14 y 1 Pedro 2:17-ta liyipai. Qꞌuipaca cai catij tapuitami yachashun:

• Cai versocunapi nishca shinaca ¿bautizarishpaca ima bendicioncunatataj charinchij?

YUYARISHUNCHIJ

Jesusca paita catisha nijcunataca bautizarinami canguichij nircami. Chaipajca Jehová Diospimi tucui shunguhuan crina canchij. Shinallataj paipaj mandashcacunata cazushpami paiman mingarina canchij.

Yuyaringapaj tapuicuna

• ¿Bautizarinaca imataj can? ¿Imamantataj bautizarina canchij?

• ¿Bautizaringapajca imamantataj Diosman mingarina canchij?

• ¿Manaraj Diosman mingarishpa, manaraj bautizarishpaca imatataj rurana can?

CAICUNATAPISH RICUI

Bautizarina ima cashcata, huaquin religioncuna bautizarinamanta ima yachachishcatapish ricui.

“¿Bautizarinaca imataj can?” (jw.org paginapi ricui)

Bautizaringapaj imata rurana cashcata yachai.

“Jehová Diosta cꞌuyashpami bautizarinata agllangui” (Huillaj, marzo de 2020)

Shuj runa imamanta bautizarina decisionta japishcata ricui.

“Ñucallataj Bibliata investigachunmi animarcacuna” (Huillaj, 1 de febrero de 2013)

Bautizarina imamanta importante cashcata, bautizaringapaj imata rurana cashcatapish ricui.

“¿Bautizaringapajca ñachu listo cani? (Jovencuna rurashca tapuicunapaj respuestacuna, parte 2, capítulo 37)