Tranquilo causaica manataj tucuringachu

Naciones Unidas nishca organizacionca tucuicuna respetanacushpa tandalla causachun, allpatapish alli cuidachunmi gentecunata animan. Shuj runaca Crónica ONU revistapica: “Cunan tiempopica climaca achcatami cambiashca. Shuhuangapajpish achca organizacioncunami mirashca. Gentecunapish shujtajcunataca mana alli tratancunachu. Cashna tratocunaca ashtahuanmi miraricun. Huaquin gentecunaca paicunapaj llajtamantapish shujtaj llajtacunamanmi llujshirishcacuna. Terroristacunapish paicunapaj munashcata rurachunmi politicocunata, gentecunata manchachincuna. Contagiaj ungüicunapishmi mirarishca. Gentecunaca tucui caicunahuanmi causacuncuna” nishpami escribirca.

Cutin shujtajcunaca, shuj solo gobierno tucui Allpata mandachunmi minishtinchij nincunami. Dante shuti y Albert Einstein estudiaj runacunapish paicuna shinallatajmi yuyarcacuna. Dante runaca: “Chꞌican chꞌican gobiernocuna cai Allpapi tiyashcamantami mana tranquilo causanchij” nircami. Shinallataj Jesús ima nishcata yuyarishpami Dante runaca, “maijan llajtapi mandajcunapurallataj pꞌiñanacushpa chaupirijpica, paicuna mandacushcaca chingarinmanllami” nirca (Lucas 11:17).

Segunda Guerra Mundialpica gentecunata huañuchingapajmi ishqui jatun bombacunata tujyachircacuna. Chai huashami Albert Einstein runaca Asamblea General de las Naciones Unidasman shuj cartata escribirca. Chai cartapica: “Naciones Unidas organizacionca muyundij Allpata mandachunmi shujlla gobiernota utca agllana can. Chashnami alli causaita charishun” nircami.

Pero, shujlla gobiernota agllajpipish gentecunata mana llaquichij, mana shuhuajcuna cashcataca ¿ima shinataj yachanchij? ¿Caishuj gobiernocuna laya manachu pandaringa? Cai tapuicunami Inglaterramanta Lord Acton escribij runa nishca shimicunata yuyarichin. Paica: “Runacunaca mandai callarishpaca shujtajcunatami llaquichincuna. Ashtahuan autoridadta charishpacarin ashtahuanmi shujtajcunata llaquichincuna” nircami.

Gentecuna alli causaita charingapajca tandalla canami minishtirin. Pero gentecuna agllashca shujlla gobiernoca alli causaitaca mana apamungachu. Bibliapica Diospaj gobiernollami cashna shina causaitaca apamunga ninmi. Cai gobiernomi Yaya Dioslla tucuita mandana derechota charishcata ricuchinga. Cai gobiernomanta parlashpaca Bibliapica “Diospaj gobierno” nishpami shutichin (Lucas 4:43, NM).

“CAMBAJ GOBIERNO ÑA SHAMUCHUN”

Jesusca padrenuestro oracionmanta yachachicushpaca chai gobiernomantami parlarca. Paica: ‘Cambaj gobierno ña shamuchun. Cai pachapipish can munashcata rurachun’ nircami (Mateo 6:9, 10, NM). Dios agllashca gobiernomi cai Allpapica paipaj munaita pajtachinga. Ñajaman ricushca shinaca cai Allpata mandaj gobiernocunaca paicunalla charijyanata, mandaj canatami munancuna.

Diospaj gobiernotaca “jahua pachapi caj Diospaj gobierno” nishpapishmi yachanchij (Mateo 5:3, NM). Diospaj gobiernoca jahua pachamantami cai Allpata mandanga. Cai gobiernoca ñucanchijta mandangapajca cullquita mana minishtingachu. Chaimantami tucuicuna tranquilo causashun.

Diospaj Reino o Diospaj mandana nishpaca shuj gobiernomantami parlacun. Chai gobiernopi mandachunmi Yayitu Diosca Jesusta agllashca. Bibliapica Jesusmantaca cashnami nin:

• ‘Paipaj maquipimari mandanataca churashca. Pai mandanaca ashtahuanmi mirashpa catinga. Pai mandacujpica sumaj causaimi tiyanga. Chai mandanaca manataj tucuringachu’ (Isaías 9:6, 7).

• “Paimanca mandai tucunata, jatun nishca canata, mandanatami curca. Tucui gentecuna, llajtacuna, chꞌican chꞌican rimaita rimajcuna paipajta rurachunmi chashna rurarca. Pai mandaj canaca huiñaita mandaj canami. Manataj tucuringachu” (Daniel 7:14).

• “Allpa pachapi mandanacunaca ñucanchij Jatun Diospaj, paipaj Churi Cristopajpishmi tucushca” (Apocalipsis 11:15).

Diospaj gobiernomi padrenuestropi mañashca shina cai Allpapica Diospaj munaita pajtachinga. Chaipica tucuicunami cai Allpata cuidanata yachashcamantaca alli causashun.

Diospaj gobierno mandacushpaca allita rurachunmi gentecunata ashtahuan yachachinga. Chai yachaicunataca tucuicunami pajtachinga. Chashnami shuj shinalla causashun. Isaías 11:9-pica cashnami nin: ‘Chai punllapica ima millaita mana rurangachu. Imata mana llaquichingachu. Mama cucha yacuhuan junda caj shinami tucui cai pachaca Mandaj Diosta rijsishcahuan junda canga’.

Cai Allpapica ñallami tranquilo, tandalla causashun. Caitaca Naciones Unidas nishca organizacionca mana rurai tucushcachu. Salmo 37:11-pica: ‘Alli shungucunami yallitaj sumaj causaipi cushicungacuna’ ninmi. Shuhuacunapish, cai Allpata mapayachijcunapish, pobrecunapish, guerracunapish ña mana tiyangachu. Pero, ¿chaica ima horataj pajtaringa? ¿Dios agllashca gobiernoca ima horataj cai Allpataca mandanga? ¿Ima shinataj mandanga? ¿Cai gobiernoca cambajca imatataj ruranga? Catij yachaipimi cai tapuicunata cutichin.