4 ¿Imallacunamantataj mañana canchij?

JESUSCA paita catijcunataca Diosta ima shina mañanatami yachachirca. Chai mañaitaca padrenuestro nishpami rijsinchij. Achca gentecunami chai mañaitaca cutin cutin repitishpa mañanata yachashcacuna. Pero chashna mañashpapish la mayoría gentecunami ima nicushcataca mana intindincuna. Pero Jesusca cutin cutin chashna repitishpa mañana cashcataca mana yachachircachu. ¿Imamantataj chaita ninchij?

Jesusca manaraj padrenuestro mañaimanta yachachishpami: “Mañacushpaca cutin cutin ama chaillatataj rimarishpa mañaichijchu” nishca carca (Mateo 6:7). Pero ¿imatataj Jesusca padrenuestro mañaihuan yachachisha nirca? Paica mana chai oracionta de memoria yachashpa repitichun yachachisha nircachu. Paica imacunallamanta mañana cashcata, imacunalla ashtahuan importante cashcatami intindichisha nirca. Padrenuestro nishca mañaimanta ashtahuan yachashun. Chai mañaica Mateo 6:9-manta 13-camami ricurin.

“Jahua pachapi caj ñucanchij Yaya, cambaj jucha illaj shutitaca, alli nishca cachun”.

Callaripica Jesusca paita catijcunataca Jehová Diosllata mañana cashcatami yuyachisha nirca. Pero ¿imamantataj qꞌuipaca cambaj jucha illaj shutitaca, alli nishca cachun o santificashca cachun nishpa mañanata yachachirca?

Gentecunaca cai Allpapi causai callarimantami Diosmantaca achca llullacunata nishcacuna. Chashnami paipaj shutita mapayachishcacuna. Satanás Diabloca Jehová Diosca llullajmi can, mana cꞌuyanchu, gentecunata mandana derechotaca mana charinchu nishpami yangamanta juchachishca (Génesis 3:1-6). Achca gentecunami Diablo shinallataj Diosmanta llullacunata nin. Paicunaca Diosca mana cꞌuyanchu, millaimi can, mana perdonanchu nishpa juchachishcacuna. Shujtajcunacarin Diosca mana tiyanchu nishcacunami. Shujtajcunaca Diospaj shutita Bibliamanta anchuchishpami Diospaj shutita ninatapish prohibishcacuna.

Bibliapi nishca shinaca Diosca chai tucui mana allicunatami tucuchinga (Ezequiel 39:7). Diosca chaita rurashpami tucui llaquicunatapish tucuchinga. ¿Ima shinataj chaita ruranga? Jesús ashtahuan ima nishcata ricushun.

“Can mandana punlla ña chayamuchun”.

Cunan punllacunapica religioncunata pushajcunaca Diospaj Gobiernomantaca chꞌican chꞌican yuyaicunatami yachachincuna. Pero Jesuspaj punllacunapica mana chashnachu carca. Judiocunaca ñaupa profeciacunapi Mesiasmanta parlashcataca allimi yacharcacuna. Chai Mesías Diospaj Gobiernopi mandashpa, alli causaita apamunatapish allimi yacharcacuna (Isaías 9:6, 7; Daniel 2:44). Diospaj Gobiernomi Diablo llullaj cashcata ricuchinga. Diablota tucuchishpa, tucui paipaj millai ruraicunata tucuchishpami Diospaj shutita jatunyachinga. Shinallataj Diospaj Gobiernoca macanacuicunata, ungüicunata, yaricaita, huañuitapishmi tucuchinga (Salmo 46:9; 72:12-16; Isaías 25:8; 33:24). Chaimantami Yaya Diosta can mandana punlla ña chayamuchun nishpaca, Diospaj Gobierno tucui caicunata pajtachichun mañacushcata intindinchij.

“Ima shinami jahua pachapi can munashcata ruracun, shinallataj cai pachapipish can munashcata rurachun”.

Jesús nishca shimicunaca Diospaj munai cai Allpapi pajtarina cashcatami ricuchin. Diospaj munaica ima shinami jahua pachapi ña pajtarirca, chashnallatajmi cai pachapipish pajtaringa. Jesucristoca Diablotapish, demoniocunatapish cai Allpaman shitajpimi Diospaj munaica jahua pachapi pajtari callarirca (Apocalipsis 12:9-12). Jesús can munashcata cai pachapipish rurapai nishpaca Diospaj munai tucuimanta yalli importante cashcatami ricuchirca. Yaya Diosca siempremi gentecunapaj allicunata munan. Chaimantami Jesuspish: ‘Ama ñuca munashcata rurapaichu. Ashtahuanpish can munashca shina rurapai’ nirca (Lucas 22:42).

“Cunan punlla micunata ñucanchijman cuhuai”.

Jesús nishca shimicunaca Yaya Diostaca ñucanchij imalla minishtishcacunamanta mañai tucushcatami ricuchin. Yaya Diostaca punllanta imalla minishtishcacunata cuchun ayudahuai nishpami mañai tucunchij. Chaita rurashpaca ‘Yaya Dios causaitapish, samaitapish, tucui imatapish cuj’ cashcatami reconocinchij (Hechos 17:25). Bibliapica Jehová Diostaca shuj cꞌuyaj Yayata shinami ricuchin. Shuj cꞌuyaj yaya cashcamantami paipaj huahuacuna imalla minishtishcacunata cun. Pero ñucanchij mañashcacuna, ñucanchijta dañota rurana cajpica paica mana cutichingachu.

“Ñucanchij juchacunata perdonapai”.

¿Imamantataj Dios ñucanchijta perdonachun minishtinchij? Achca gentecunami jucha ima cashcataca mana yachancuna. Pero Bibliapi nishca shinaca juchamantami achca llaquicunata charinchij, huañunchij. Juchayuj huacharishcamantami achca cutin pandarinchij. Chaimantami huiñai huiñaita causashun nishpaca Dios ñucanchij juchacunata perdonachun minishtinchij (Romanos 3:23; 5:12; 6:23). Bibliapica Jehová Diostaca: “Allimari cangui, perdonajmari cangui” ninmi. Chaita yachashpami tranquilo sintirinchij (Salmo 86:5).

“Millaimanta huaquichihuangui”.

¿De verdadchu Dios ñucanchijta cuidachun minishtinchij? Achcacunami millai Diablo tiyashcataca mana crincuna. Pero Jesusca Diablomanta parlashpaca ‘cai pachata mandajmi can’ nircami (Juan 12:31; 16:11). Chashnami Diablo tiyashcata ricuchirca. Diabloca achcacunatami pandachishca, paimi cai pachata mandacun. Shinallataj quiquintapish pandachinata, Jehová Diosmanta caruyachinatami munan (1 Pedro 5:8). Pero mana manchanachu canchij. Jehová Diosca paita sirvijcunataca manataj saquingachu.

Yaya Diostaca mana cai yachaipi ricushca yuyaicunallamantachu mañai tucunchij. 1 Juan 5:14-pica: “Pai munashca shina imatapish mañajpica, paica uyashpa cujlla cashcata yachashcamantami paipi shunguta churanchij” ninmi. Yaya Diosmanca tucui ñucanchij llaquicunatami parlai tucunchij. Ñucanchij problemacunaca paipajca mana importangachu nishpa mana yuyanachu canchij (1 Pedro 5:7).

¿Maipi, ima horas Diosta mañanamantaca Bibliapica imatataj yachachin? Catij yachaipimi cai tapuita contestashun.