Diospaj Gobiernota cunanmanta apoyashunchij
Shuj jatun acapana can causan llajtaman chayacushcata yuyai. Autoridadcuna, “CHAIMANTA LLUJSHISHPA MAIPI MITICUNATA MASHCAICHIJ” nijpica ¿imatataj ruranguiman? ¿Nachu maipi alli miticunata mashcanguiman?
Chai “jatun acapana” shinami cunan punllacunapish ñalla shuj “jatun llaqui” shamugrin. Jesuspish shuj jatun llaqui o gran tribulacionmi shamunga nircami (Mateo 24:21). Chai jatun llaquimantaca ñucanchijca mana librari tucunchijchu. Pero ima shina miticunatami ricuna canchij. ¿Chaipajca imatataj rurana canchij?
Jesús urcupi yachachicushpaca: “Diospaj Gobiernotapish, Diosta cazunatapish puntapi churashpa causaichij” nircami (Mateo 6:33, NWT ). ¿Cai shimicunaca imatataj nisha nin?
Diospaj Gobiernota puntapi churashpa causaichij. Ñucanchij causaipica tucuimanta yallica Diospaj Gobiernotami puntapi churana canchij (Mateo 6:25, 32, 33 NWT ). ¿Imamanta chaita rurana canchij? Gentecunaca tucui tiyashca llaquicunataca mana tucuchi tucunchijchu. Yaya Diosllami chai llaquicunata tucuchi tucun.
Diosta cazunatapish puntapi churashpa causaichij. Chaipajca Diospaj mandashcacunata, Diospaj consejocunata cazungapajmi esforzarina canchij. ¿Imamanta? Ñucanchijllataj ima alli cashcata ima mana alli cashcata ruranata decidishpaca llaquicunapimi urmashun (Proverbios 16:25). Pero, Yaya Diospaj mandashcacunata cazushpaca paitami cushichishun. Shinallataj ñucanchij ima rurashcacunapish allimi llujshinga (Isaías 48:17, 18).
¿Imamantataj Jesusca Diospaj Gobiernotapish, Diosta cazunatapish puntapi churaichij nirca? Paica huaquincuna cullqui ganana solota yuyashpa, Diosta ladoman saqui tucushcatami advertirca. Shujtajcunapish, minishtirishcallahuan causana cashpapish achcata trabajana cashcamanta Diospaj munaita ña mana puntapi churai tucushcatami advertirca (Mateo 6:19-21, 25-32).
Shinapish, Jesusca Diospaj Gobiernota apoyajcunaca cunan punllacunapi causangapaj tucui minishtirishcacunatami charinga, shamuj punllacunapicarin ashtahuan bendicioncunatami charinga nircami (Mateo 6:33, NWT ).
Jesusta punta catijcunaca Diospaj Gobiernotapish, Diosta cazunatapish puntapi churashpa causashca cashpapish llaquicuna tucurijtaca mana ricurcacunachu. Pero chai llaquicunata ima shina chꞌimbapuranatami yacharcacuna. ¿Ima shinataj chaita rurarcacuna?
Chai tiempopica Diosta mana cazuj gentecunaca achca llaquicunatami charirca. Pero, Jesusta catijcunaca Diospaj mandashcacunata cazushcamantami chai llaquicunataca mana charircacuna. Diospaj Gobierno shamunata crishcamantami ima problemacuna ricurijpipish chaicunata chꞌimbapurarca. Yaya Diospish chai llaquicunata ahuantachunmi “tucuita rurai tucuna” poderta paicunaman curca (2 Corintios 4:7-9).
¿CANCA DIOSPAJ GOBIERNOTACA PUNTAPICHU CHURANGUI?
Punta siglopi Jesusta catijcunaca Diospaj Gobiernotaraj puntapi churanatami cazurcacuna. Paicuna causashca tucui ladocunapimi Diospaj Gobiernomanta alli huillaicunata huillarcacuna (Colosenses 1:23). ¿Cunan punllacunapipish picunataj Diospaj Gobiernomanta alli huillaicunata huillacuncuna?
Testigo de Jehovacunami Diospaj Gobierno ñalla tucui llaquicunata tucuchigrishcata yachashpa, Jesús mandashcata pajtachingapaj esforzaricuncuna. Jesusca: “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qꞌuipami cai shina causaica tucuringa” nircami (Mateo 24:14).
¿Diospaj Gobiernomanta alli huillaicunata canman huillajpica imatataj ruranguiman? Punta siglopi Berea pueblopi causajcunapaj ejemplota catichunmi animanchij. Paicunaca Apóstol Pablo Diospaj Gobiernomanta alli huillaicunata huillajpica, Dios Quillcachishcacuna chashna cashcata, mana chashna cashcata alli ricushpami imata huillashcataca paicunapaj causaipi pajtachircacuna (Hechos 17:11, 12).
Canpish chashnallatajmi rurai tucungui. Diospaj Gobiernotapish, Diosta cazunatapish puntapi churashpaca cunan punllacunapish, shamuj punllacunapish sumajtami causai tucungui.