¿Usia punllacuna tiyashcamantaca Bibliaca imatataj nin?

•  “Cai huatapi China llajtapica dimastij usiami tiyashcata. Shinami cai tucui huatacunamantaca caihuanca ña quimsa cutin dimastij usia tiyashca” (The Guardian, 7 de septiembre de 2022).

•  “África huaquin llajtacunapica ña pichca huatacunatami dimastij usia punllacuna tiyashca” (Noticias ONU, 26 de agosto de 2022).

•  “Europa achca llajtacunapimi dimastij usia tiyan. Pasashca 500 huatacunapica chashna usia punllacunaca mana tiyashcachu” (BBC News, 23 de agosto de 2022).

Climamanta yachaj runacunaca usia punllacuna tiyashpa catinata o mirarishpa catinatami yuyancuna. ¿Shamuj punllacunapica cashna problemacunaca tucuringachu? ¿Bibliaca imatataj yachachin?

¿Yallitaj usia tiyanamantaca Bibliaca imatataj huillan?

Cunan punllacunamantaca Bibliaca caitami huillan:

•  ‘Chꞌican chꞌican llajtacunapimi yaricaipish tiyanga’ (Lucas 21:11).

Dimastij usiashpa catishcamantami yaricaipish tiyan. Bibliapica yaricai tiyanamantami parlan. Shinallataj yaricaimanta achcacuna sufrina cashcata, huañuna cashcatapishmi parlan (Apocalipsis 6:6, 8).

¿Imamantataj dimastij usia punllacuna tiyashpa catin?

Bibliapimi cai llaqui imamanta tiyashcata intindichin. Chaipica cashnami nin:

•  “Pipish quiquin causaitaca mana mandai tucunchu” (Jeremías 10:23).

Caipica gentecunaca paicunapura mana mandai tucushcatami ricuchin. Paicuna mana alli decisioncunata japishcamantami usia punllacuna mirarishpa catishca, yacupish mana suficiente tiyashcachu.

•  Huaquin cientificocuna nishca shinaca gentecuna cai allpata mana cuidashcamantami calentamiento global tiyashca. Chaimi mundo enteropica ashtahuan usia punllacuna tiyashca.

•  Gentecunaca ashtahuan charinata munashpa o shamuj punllacunapi ima tucunata mana yuyashpami mana alli decisioncunata agllashcacuna. Chaimantami yuracunata tucuchishca, cai allpapi tiyashcacunatapish mana alli utilizashca. Shinallataj cai allpatapishmi yallitaj mapayachishca. Chai tucuita rurashcamantami yacupish illashpa catinga.

Shina cajpipish Bibliapica shuj esperanzatami cun.

¿Shamuj punllacunapica cai llaquicunaca tucuringachu?

Bibliapica Yaya Diosca yacu illashcamanta tiyaj problemacunata tucuchinatami huillan. ¿Chaitaca ima shinataj ruranga?

1. 1. Diosca ‘cai allpata llaquichicujcunatami tucuchinga’ (Apocalipsis 11:18). Diosca mana alli gentecunata, paicunalla ashtahuan charisha nijcunatami tucuchinga (2 Timoteo 3:1, 2). Paicuna cai allpata mana alli tratashcamantami yacupish chingaricun.

2. 2. ‘Chaquishca pambacunapipish yacu cuchacunami tucunga. Plantacunapishmi huiñanga’ (Isaías 35:1, 6, 7). Diosmi usiamanta tiyashca tucui problemacunata tucuchinga. Paica cai allpata shuj sumaj paraisotami ruranga. Chaipica yacuca mana faltangachu.

3. 3. “Allpataca ricuj shamunguimi. Allpapica tamyachinguimi. Yallitaj charijtami rurangui” (Salmo 65:9). Dios bendiciajpimi allpapica achca micuna, suficiente, limpio yacupish tiyanga.