Diosmi paita sirvijcunata cacharichin

1, 2. a) ¿Huaquin llajtacunapica imatataj rurancuna? b) ¿Cacharirina huataca imataj carca? (“¿Cacharirina huataca imataj carca?” nishca recuadrota ricui). c) ¿Lucas 4:16 al 18-pica Jesusca imatataj nirca?

HUAQUIN llajtacunapica 50 huatacunata shuj rey mandajpimi fiestata rurancuna. Chai fiestaca shuj punlla, shuj semana o ashtahuan punllacunapimi tucurin. Ña tucurijpica gentecunaca imamanta chai fiestata rurashcataca ratomi cungarincuna.

² Ñaupa punllacunapi israelitacunaca cada 50 huatacuna tucujpimi shuj fiestata rurajcuna carca. Chai fiestataca cacharirina huata nishpami rijsijcuna carca. Chai fiestamanta yachashpaca ñucanchijta Jehová Dios huiñaicama cacharichingapaj imata rurashcatami yuyarishun. Jehová Dios ñucanchijta cacharichishcamantaca ñami beneficiari tucunchij. Jesuspish chai cacharichinamantami parlarca (Lucas 4:16-18-ta liyipai).

3. Levítico 25:8 al 12-pi nishca shinaca ¿cacharirina huataca imamantataj israelitacunapajca alli carca?

³ Lucas 4:16 al 18-pi Jesús nishcacunata alli intindingapajca Jehová Dios cacharirina huatapi israelitacunaman imata mandashcatami yachana canchij. Jehová Diosca israelitacunataca: “Pichca chunga huatapica chai huatataca chashna Diospajlla chꞌicanyachinguichij. Israel llajtapi tucui causajcunapajca, tucui imamantapish cacharirina huatami nishpa huillanguichij. Chai huataca imamantapish cacharirina huata cashcamanta tucuicuna quiquin allpaman, quiquin familiapajman tigrachun” nircami (Levítico 25:8-12-ta liyipai). Pasaj yachaipica israelitacuna sábado punllapi samarishpa ima beneficiocunata charishcatami yacharcanchij. Cunanca israelitacuna cacharirina huatata yuyarishcamanta ima beneficiocunata charishcatami yachashun. Por ejemplo, tal vez shuj israelita piman dibiyashpaca allpata cꞌatushpami pagana carca. Pero cacharirina huata chayamujpica chai cꞌatushca allpataca paillamantajmi tigrachina carca. Chaimantami chai allpataca paipaj huahuacunaman herenciata shina saquij carca. Shinallataj shuj israelitaca shuj dibita pagangapajchari paipaj churita cashpa o paipaj ushushita cashpa esclavo shina sirvichun cꞌatuj carca. Mana cashpaca paillatajmi cꞌaturij carca. Shinapish cacharirina huata chayamujpica esclavo canata saquishpami paipaj familiapajman tigrajcuna carca. Chashnami Jehová Diosca paita sirvijcunamanta preocuparishcata ricuchirca.

4, 5. ¿Imamantataj cacharirina huatamanta yachana canchij?

⁴ ¿Israelitacunaca cacharirina huata tiyashcamantaca ima shujtaj beneficiocunatataj charirca? Jehová Diosca israelitacunataca: “Chashna rurajpimi cancunapurapica, huajchacunaca mana tiyanga. Mandaj Dios cancunapaj Taita Diosmi cancunapaj cachun cugricun llajtapica cancunamanca jahuanpi jahuanpi allicunata cunga” nircami (Deuteronomio 15:4). Pero cunan punllacunapica mana chashnachu can. Charijcunaca ashtahuanmi charijyancuna. Cutin pobrecunaca ashtahuanmi pobreyancuna.

⁵ Cacharirina huatapica amoca esclavocunatami cacharij carca. Allpacunatapish dueñomanmi tigrachij carca. Chashnami mana dibiyashca saquirijcuna carca. Cunan punllacunaca Moisesman cushca ley ucupica ña mana canchijchu (Romanos 7:4; 10:4; Efesios 2:15). Pero cacharirina huatamantami yachana canchij. Chaimi Jehová Dios ñucanchij juchacunamanta cacharichingapaj imata rurashcata yuyarishun.

JESUSCA CACHARICHINAMANTAMI HUILLARCA

6. ¿Imamantataj cacharichichun minishtinchij?

⁶ Tucuicunami juchamanta cacharichichun minishtinchij. Juchayuj cashcamantami ungunchij, yuyajyanchij, huañunchij. Por ejemplo, espejopi ricurishpaca yuyajyacushcatami ricunchij. Mana cashpaca ungushca cashcamantami doctorpajman rina canchij. Shinallataj mana allicunata rurashpaca llaquillami sintirinchij. Chaipimi juchaca llaqui causaita cuj cashcata cuentata cunchij. Apóstol Pabloca: ‘Ñuca cuerpo ucupi tiyaj mana alli munaicunami juchata rurachun huatashpa apacun. ¡Aij, ñuca huajchalla! ¿Pitaj ñucataca, cai huañuj cuerpomantaca cacharichingari?’ nircami (Romanos 7:23, 24).

7. ¿Profeta Isaiasca cacharichina tiempomantaca imatataj nirca?

⁷ Jehová Diosca ñucanchij juchacunamanta cacharichingapajca Jesustami cai Allpaman cacharca. Jesús shamunapaj 700 huatacuna illajpirajmi profeta Isaiasca shuj jatun cacharichina tiempomanta parlarca. Chai jatun cacharichina tiempoca israelitacunapaj punllacunatapish ashtahuan yalli allimi cana carca. Profeta Isaiasca: “Mandaj Jatun Diospaj Espiritumari ñuca jahuapi. Mandaj Diosmari ñucataca aceitehuan churarca. Ñucatamari alli huillaita huajchacunaman huillachun cacharca. Shungu pꞌaquicunata alliyachichun, prezu apashcacunaman ña llujshina tiyashcata huillachunmi cacharca. Prezucunata cacharichichunmi cacharca” nircami (Isaías 61:1). Profeta Isaiasca chashna nishpaca ¿pimantataj parlacurca? Chaita ricushun.

8. ¿Isaías quillcashcapica pimantataj parlacurca?

⁸ Jesús huillai callarishca qꞌuipami Isaías nishca shimicunaca pajtari callarirca. Shuj punllaca Jesusca pai huiñashca Nazaret pueblomanmi rirca. Chayashpaca tandanacuna huasiman yaicushpami judiocunapaj ñaupajpi Isaías quillcashcata liyirca. Chaipica: “Jatun Diospaj Espirituca, ñuca jahuapimi. Ñucataca huajchacunaman alli huillaita huillachun, shungupi llaquirishpa huañucujcunata alliyachichun, prezupi cajcunata cacharichichun, mana ricujcunata ricujta rurachun, llaquichishca causacujcunata cacharichichunmi cacharca. Shinallataj Jatun Dios quishpichina punlla chayamushcata huillachunmi cacharca” nircami. Jesús liyinata tucuchishpaca Isaías quillcashca shimicuna paipi pajtaricushcatami ricuchirca (Lucas 4:16-19). ¿Ima shinataj pajtachirca?

¿PUNTA CACHARICHISHCACUNACA PICUNATAJ CARCA?

9. ¿Achca gentecunaca Jesús imata rurachuntaj shuyacurcacuna?

⁹ Jesusca apostolcuna causashca punllacunapimi ña huaquin gentecunata cacharichi callarirca. Chaimantami paica: ‘Cai Quillcapi nishcaca cunan punllamari cancunapaj ñaupajpi pajtarin’ nircami (Lucas 4:21). Jesús nishcata uyajcunaca Roma llajtata Mandajpaj maquimanta cacharichichunmi shuyacurcacuna. Ishqui discipulocunapish Jesusmanta parlashpaca: ‘Ñucanchijca cai Israel llajtataca paimi quishpichinga nishpamari yuyacurcanchij’ nircacunami (Lucas 24:13, 21). Pero Jesusca paipaj catijcunataca Roma llajtata mandajta ama cazunguichij nishpaca mana mandarcachu. Chaipaj randica: “Cesarpajtaca paiman cuichij, Diospajtaca Diosman cuichij” nishpami mandarca (Mateo 22:21). Shinashpaca, ¿chai tiempopi causaj gentecunataca Jesusca ima shinataj cacharichirca?

10. ¿Jesusca imamantataj cacharichirca?

¹⁰ Religionta pushajcunaca achca judiocunataca panda yachachishcacunata, panda costumbrecunata catichunmi obligajcuna carca (Mateo 5:31-37; 15:1-11). Shinallataj religionta pushajcunaca gentecuna Diosta sirvichun mana ayudajcunachu carca. Paicunaca Jesús Mesías cashcata, paipaj yachachishcacunata mana chasquishcamantami ciegocuna shina carca. Chaimantami juchapi huatashca shina causashpa catircacuna (Juan 9:1, 14-16, 35-41). Pero Jesusca paipaj yachachishcacunahuan, paipaj ejemplohuanmi gentecunataca panda yachachishcacunamanta cacharichirca (Marcos 1:22; 2:23-3:5).

11. ¿Jesusca ima shinataj ñucanchijta cacharichirca?

¹¹ Jesusca ñucanchij juchacunamantapishmi cacharichirca. ¿Ima shinataj cacharichirca? Paipaj causaita cushpami cacharichirca. Chaimantami Jehová Diosca gentecunapaj juchacunata perdonan. Jehová Dios ñucanchijta perdonachunca Jesús ñucanchijmanta huañushcapimi feta churana canchij. Ñucanchij causaihuanpish Diosta cazushcatami ricuchina canchij (Hebreos 10:12-18). Jesusca: “Taita Diospaj Churi cacharichijpica ña cacharichishcatajmi canguichij” nircami (Juan 8:36). Israelitacunapaj punllacunapica cacharirina huata chayajpipish cutin tigra dibiyashpachari esclavo tucujcuna carca. Maipicarin huañungacamami esclavocuna carca. Pero Jesusca ñucanchij juchacunamantaca huiñaipajmi cacharichin.

12. ¿Punta cacharichishcacunaca picunataj carca?

¹² Puntaca apostolcuna, shujtaj discipulocunami cacharichishcacuna carca. Yaya Diosca huata 33-pimi paicunata espíritu santohuan agllarca. ¿Imapajtaj agllarca? Paicunapaj churicuna cachunmi agllarca. Chaimantami chai agllashcacunaca jahua pachapi Jesushuan mandangapaj causarina carcacuna (Romanos 8:2, 15-17). Shinallataj paicunaca religionta pushajcunapaj panda yachachishcacunamanta, panda costumbrecunamantami cacharichishca carca. Ashtahuancarin Diospaj ñaupajpimi huañuiman apaj juchamanta quishpirishca carcacuna. Shinami Nazaret tandanacuna huasipi Jesús huillashca cacharichinamanta ña beneficiarircacuna. Cacharichina tiempoca huata 33-pimi callarirca. Jesucristo mil huatacunata mandashpa tucuchijpimi cacharichina tiempoca tucuringa.

ACHCACUNAPISHMI CACHARICHISHCA CAN

13, 14. ¿Cunan punllacunapica picunataj cacharichishcacuna can?

¹³ Cunan punllacunapica tucui ladomanta caj alli shungu gentecunami ‘shujtaj ovejacuna’ can (Juan 10:16). Jehová Diosca shujtaj ovejacunataca Jesushuan jahua pachapi mandachunca mana agllashcachu. Ashtahuanpish paicunaca cai Allpapimi huiñai huiñaita causangacuna. ¿Ñucanchijpish chaitachu shuyanchij?

¹⁴ Jesushuan jahua pachapi mandagrijcuna shinami ñucanchijpish huaquin beneficiocunata chasquicunchij. Por ejemplo, Jesús huañushcapi feta churashpami Yaya Diostaca ñucanchijta perdonachun mañai tucunchij. Chashnami Diospaj ñaupajpica alli ricurinchij, concienciapipish alli sintirinchij (Efesios 1:7; Apocalipsis 7:14, 15). Shinallataj panda yachachishcacunamanta cacharichishca cashcamantami alli sintirinchij. Jesusca: “Chashna cashpami, mana llullataca rijsinguichij. Chai mana llullami huatashca shinamanta cacharichinga” nircami (Juan 8:32). Ñucanchijta Jesús cacharichishcamantami achcata cushicunchij.

15. a) ¿Ñucanchijta cacharichingapajca Jesusca imatataj ñalla tucuchinga? b) ¿Paraíso Allpapica ima bendiciocunatataj chasquishun?

¹⁵ Shamuj punllacunapicarin ashtahuanmi cacharichishca cashun. ¿Imamantataj chashna ninchij? Jesusca ñallami tucui panda religioncunata, gobiernocunatapish tucuchinga. Chaipimi Yaya Diosca paita sirvijcunataca cuidanga. Chai qꞌuipami paita sirvijcunamanca paraíso Allpapi achca bendicioncunata cunga (Apocalipsis 7:9, 14). Shinallataj Yaya Diosca achca gentecunatami causachinga. Chai causarishcacunaca Adanpaj juchamantami cacharichishca cangacuna (Hechos 24:15).

16. ¿Jesuspish paihuan mandagrijcunapish imatataj rurangacuna?

¹⁶ Israelitacunapaj punllacunapica cacharirina huataca cushicuimi carca. Chashnallatajmi Jesuspish paihuan mandagrijcunapish mil huatacunata mandacushpaca Diosta sirvijcunataca alli saludta charichun, Diospaj huahuacuna tucuchunpish ayudangacuna. Diosta tucuipi cazujcunapish juchamantami cacharichishca cangacuna.

17. Isaías 65:21 al 23-pi nishca shinaca ¿Diosta sirvijcunaca ima shinataj causangacuna?

¹⁷ Isaías 65:21 al 23-pica Diosta sirvijcunaca paraíso Allpapimi sumaj, cushicui trabajocunata charingacuna ninmi (Isaías 65:21-23-ta liyipai). Jesús mil huatacunata mandashca qꞌuipaca Bibliapica: ‘Dios rurashcacunapish, ismunapaj huatashcamantaca cacharichishcami canga. Diospaj huahuacunata cacharichishpa jatunyachishcapi cachunmi, Yayitu Diosca chashna ruranga’ ninmi (Romanos 8:21).

18. ¿Paraíso Allpapi cushilla causanataca imamantataj crinchij?

¹⁸ Jehová Diosca israelitacuna trabajachun, samarichunmi munarca. Chashnallatajmi Jesús mil huatacunata mandacujpipish trabajangapaj, samaringapajpish tiempota charishun. Ashtahuancarin Diosmanta yachangapaj, paita sirvingapajmi tiempota charishun. Diosta adoranallami cushi causaita cun. Chaimantami paraíso Allpapica Diosta sirvijcunaca sumajta trabajashpa, Diosta adorashpa cushilla causashun.