YACHAI 22
¿Shujtajcunamanca ima shinataj predicai tucungui?
Bibliamanta yachai callarishpaca, “caitaca tucuicunami yachana can” nishpachari yuyangui. Ari, tucuicunami Bibliamanta yachana can. Shinapish can imalla yachashcata shujtajcunaman huillanataca manchanguichari. Mana manchashpa huillangapaj, Bibliamanta cushilla yachachingapaj imata rurana cashcata ricushun.
1. ¿Cambaj rijsishcacunamanca can yachashcataca ima shinataj huillai tucungui?
Jesusta catijcunaca: “Ñucanchij imallata ricushcata, uyashcata huillanataca mana saqui tucunchijchu” nircacunami (Hechos 4:20). Paicunaca Diospaj Shimipi tiyaj yachachishcacunata achcata valorashcamantami tucuicunaman yachachisha nircacuna. ¿Canpish chaita rurasha ninguichu? Chaita rurasha nishpaca cambaj familiaman, cambaj amigocunamanmi respetohuan Bibliamanta yachachingapaj oportunidadcunata mashcana cangui (Colosenses 4:6-ta liyipai).
¿Bibliamanta yachachishpa callaringapajca imataj ayudanga?
Cambaj familiahuan Bibliamanta parlai callaringapajca “cai semanaca caitami yacharcani” ni tucungui.
Cambaj amigo ungushca cajpi o preocuparishca cajpica Bibliamanta animachij versota liyi.
Cambaj trabajopi, sabadota o domingota “¿imatataj rurarcangui?” nishpa tapujpica Bibliapi o tandanacuipi ima yachashcata parlai.
Cambaj amigocunaman Internetpi jw.org paginata ricuchi.
Can ima shina Bibliamanta yachacushcata ricuchun shujtajcunata invitai o jw.org paginapi Bibliamanta yachachichun ima shina mañana cashcata ricuchi.
2. ¿Huauqui panicunahuanca imamantataj predicana canchij?
Jesusta catijcunaca paicunapaj rijsishcacunamanmi alli huillaicunata huillajcuna carca. Pero mana paicunallamanchu huillarcacuna. Jesusca paicunataca “pueblocunamanmi ishqui ishquita ñaupachishpa cacharca” (Lucas 10:1). Chashna huillajpimi achca gentecunaca alli huillaicunata uyai tucurcacuna. Shinallataj tandalla huillashcamantami cushilla sintirircacuna (Lucas 10:17). Canpish huauqui panicunahuanmi predicai tucungui.
ASHTAHUAN YACHAI
Cushilla, mana manchashpa huillangapaj imata rurana cashcata ricushun.
3. Jehová Diosmi ayudanga
Huaquincuna huillanaman llujshisha nishpapish gentecunaca, “ñucamantaca imatataj yuyangacuna” nishpami preocuparincuna.
¿Shujtajcunaman Bibliamanta yachachinataca manchanguichu? ¿Imamantataj chashna ningui?
VIDEOTA ricui. Qꞌuipaca cai catij tapuitami yachashun.
¿Videopi ricushca jovencunaca manchaita ama charingapajca imatataj rurarcacuna?
Isaías 41:10-ta liyipai. Qꞌuipaca cai catij tapuitami yachashun:
¿Predicanata manchashpaca imamantataj Yaya Diosta mañana cangui?
¿Caita yacharcanguichu?
Achca testigo de Jehovacunaca, “mana nunca Diosmanta predicai tucushachu” nishcacunami. Por ejemplo, Sergey shuti runaca mana imapaj valishca shinami sintirirca. Chaimantami shujtajcunahuan parlanaca sinchi carca. Pero shuj punllaca Bibliamantami yachai callarirca. Paica: “Gentecunahuan parlanata manchaita charishpapish imalla yachacushcata yachachingapajmi esfuerzota rurarcani. Chaita ruranami alli sintirichun, Bibliapi yachachishcacuna ñuca shungupi huaquichishca saquirichun ayudarca” ninmi.
4. Respetohuan parlai
Manaraj huillashpaca ima nigrishcapi, ima shina nigrishcapimi alli yuyana cangui. 2 Timoteo 2:24 y 1 Pedro 3:15-ta liyipai. Qꞌuipaca cai catij tapuicunatami yachashun:
¿Gentecunaman predicacujpica ima shinataj cai versocunaca ayudan?
¿Huaquin familiacuna o amigocuna canhuan mana de acuerdo cajpica imatataj rurai tucungui?
Caitami crina cangui ninapaj randica ¿imamantataj respetohuan parlana cangui?
5. Alli huillaicunata predicashpaca cushillami sintirinchij
Jehová Diosca Jesustami alli huillaicunata huillachun mandarca. ¿Caita ruranamantaca Jesusca imatataj yuyarca? Juan 4:34-ta liyipai. Qꞌuipaca cai catij tapuicunatami yachashun:
Sano micunata micushpaca allimi sintirinchij. Jesusca Diospaj munaita rurangapajmi predicarca. ¿Caitaca imamantataj micunahuan chꞌimbapurarca?
¿Alli huillaicunata predicashpaca ima bendicioncunatataj chasquingui?
Huaquin yuyaicuna
Entre semana tandanacuipi ima shina predicanata yachai.
Entre semana tandanacuipi participangapaj imata rurana cashcata yachangapajca canta yachachijhuan parlai. Chai tandanacuipi asignacioncunata cushpaca shujtajcunaman yachachingapajmi ayudanga.
Cai libropi tiyaj “Huaquincunaca nincunami” o “Huaquincunaca nishpami tapuncuna” nishca parteta ricui. Caita ricushpaca gentecuna rurashca tapuicunatami ima shina cutichinata yachangui.
HUAQUINCUNACA: “Imanalla, ¿allillachu cangui?” nishpami tapuncuna.
Chashna tapujpica Bibliamanta ima yachashcata huillangapajca, ¿ima shinataj aprovechai tucungui?
YUYARISHUNCHIJ
Bibliamanta yachachishpaca cushillami sintirishun. Chaita ruranaca mana sinchichu can.
Yuyaringapaj tapuicuna
¿Imamantataj alli huillaicunata predicana canchij?
¿Ima shinataj respetohuan huillai tucungui?
¿Mana manchashpa huillangapajca imatataj rurai tucungui?
CAICUNATAPISH RICUI
JW.ORG tarjetahuan ima shina huillai tucushcata ricui.
Predicanata munaj, yachaj, mana manchaj, tucuita ruraj cangapaj imata rurana cashcata yachai.
“Pescadocunata japij shina gentecunata mashcashunchij” (Huillaj, septiembre de 2020)
Jovencuna cashpapish mana manchashpa huillangapaj Bibliamanta shuj ejemplota ricui.
Cambaj familiaman Bibliamanta ima shina yachachi tucushcata liyi.
“¿Familiapaj shunguman chayangapajca ima shinataj predicana canchij?” (Huillaj, 15 de marzo de 2014)