‘Congregacioncunatami sinchiyachircacuna’

1-3. a) ¿Paita compañachunca Pabloca pitataj agllarca? b) ¿Timoteomantaca imatataj yachanchij? c) ¿Cai capitulopica imatataj yachashun?

PABLOCA Timoteohuan shuj ciudadmanta caishuj ciudadcama viajashpaca sinchi ñancunatami rircacuna. Timoteoca casi 20 huatacunatami charishcanga. Pai viajacushpaca paipaj causana llajta Listra, Iconio llajtacunamanta ashtahuan caruyacushcatami cuentata curca. Apóstol Pablo misionero shina punta viajeta ña rurashcamantami cai viajepipish peligrocuna, problemacuna tiyana cashcataca alli yacharca. Shinapish ¿Timoteoca cai problemacunata ahuantai tucurcachu?

² Pabloca Timoteopimi confiashcanga. Paica Bernabehuan sinchita rimanacushpa paimanta chꞌicanyarishcata yuyarishpami alli compañerota minishtishcata alli yacharca. Shinallataj Timoteohuan visitagrishca congregacioncunata sinchiyachina cashcata, shuj shinalla trabajana cashcatapishmi alli yacharca.

³ Cai capitulopica pꞌiñanacuicuna tiyajpi ima shina allichinatami ricushun. Shinallataj Pablo paita compañachun imamanta Timoteota agllashcatami intindishun. Ashtahuanpish cunan punllacunapi congregacioncunata visitaj superintendentecuna ima shina ayudashcatapishmi ricushun.

‘Huauquicunata visitanaman tigrashun’ (Hechos 15:36)

4. ¿Pabloca misionero shina imamantataj qꞌuipa viajeta ruranata decidirca?

⁴ Caishuj capitulopica Pablo, Bernabé, Judas y Silas Antioquiapi huauqui panicunaman circuncisionmanta ima decidishcata huillashpa paicunata sinchiyachingapaj rishcatami ricurcanchij. ¿Qꞌuipaca imataj tucurca? Pabloca Bernabetaca caitami nirca: “Jehová Diospaj shimimanta huillashca llajtacunapi huauquicuna ima shina cajta ricungapaj cunanca visitanaman tigrashun” (Hech. 15:36). Pabloca cunanlla bautizarishcacunata visitanaman rishpapish ashtahuantajca Jerusalenpi apostolcunapish, ancianocunapish ima decidishcata huillangapajmi qꞌuipa viajeta rurarca (Hech. 16:4). Shinallataj superintendente shina Pabloca huauqui panicunapaj feta sinchiyachingapajmi rirca (Rom. 1:11, 12). Punta siglopi cuerpo gobernantepi sirvij apostolcuna, ancianocunaca congregacioncunata ima shina pushana cashcatami ricuchircacuna. ¿Cunan tiempopi testigo de Jehovacunaca ima shinataj paicunapaj ejemplota catinchij?

5. ¿Cuerpo Gobernanteca ima shinataj congregacioncunaman instruccioncunata, animotapish cuncuna?

⁵ Cunan tiempopi Diospaj pueblota pushangapaj Jesucristoca testigo de Jehovacunapaj Cuerpo Gobernantetami utilizan. Cuerpo Gobernantepi sirvij ungidocunaca cartacunahuan, internetpi llujshishca, imprimishca publicacioncunahuan, shujtaj cosascunahuanpishmi instruccioncunata, animotapish cuncuna. Ashtahuanpish muyundij allpapi tiyaj congregacioncunata visitachunca achca ancianocunata superintendente de circuito shina sirvichunmi agllashcacuna.

6, 7. ¿Superintendente de circuito huauquicunaca imacunallatataj rurancuna?

⁶ Cunan tiempopi superintendentecunaca huauqui panicunata espiritualmente animangapajmi visitancuna. ¿Ima shina? Punta siglopi rurashca shinallatajmi Pablopaj ejemplota catincuna. Pabloca Timoteotaca: “Diospaj shimitaca alli tiempopipish, llaqui tiempopipish utca huillai. Shuj alli yachachij shina tucui pacienciahuan sinchita cunai, sinchita rimai, aconsejai”. Shinallataj “alli huillaicunata huillashpa cati” nircami (2 Tim. 4:2, 5).

⁷ Apóstol Pablopaj consejota catishpami superintendente huauquicunaca cazarashca cashpaca paipaj huarmihuan congregacionpi huillashpa apoyancuna. Paicunaca alli yachachijcuna cashcamantami huauqui panicunata animancuna (Rom. 12:11; 2 Tim. 2:15). Ashtahuanpish cꞌuyaita ricuchishpami paicunallapi mana yuyashcata ricuchincuna. Tamyapi, rupai punllacunapi, peligroso ñancunata viajashpami achcata ayudancuna (Filip. 2:3, 4). Shinallataj discursocunata cushpami huauqui panicunata yachachishpa, consejashpa animancuna. Paicuna alli rurashcacunata ricushpaca tucuicunami paicunapaj ejemplota catisha ninchij (Heb. 13:7).

‘Paicunaca achcatami pꞌiñarinacurcacuna’ (Hechos 15:37-41)

8. ¿Pablo congregacioncunata cutin visitanata nijpica Bernabeca imatataj yuyarca?

⁸ Congregacioncunata cutin visitanaca Bernabepajpish allimi ricurirca (Hech. 15:36). Bernabeca Pablohuan congregacioncunata ña visitashcamantami huauqui panicunataca alli rijsircacuna (Hech. 13:2–14:28). Chaimantami ishquindij congregacioncunata cutin visitanaca alli carca. Pero Hechos 15:37-pica: “Bernabeca Marcos nishca Juantami paicunahuan pushashun nirca”. Caipi ricushca shinaca Bernabemi paipaj primo Marcosta pushangapaj ña decidishca carca.

9. ¿Pablopish, Bernabepish imamantataj pꞌiñanacurcacuna?

⁹ Apóstol Pabloca Marcostaca mana pushanata munarcachu. Bibliapica: “Panfilia llajtapi saquirishpa paicunahuan mana huillanaman rishcamantami Pabloca Marcos nishca Juantaca mana pushasha nirca” (Hech. 15:38). Marcosca Pablotapish, Bernabetapish punta viajepica mana ultimocama compañarcachu (Hech. 12:25; 13:13). Paica Panfiliapi cashpami paicunata saquishpa Jerusalenman tigrarca. Imamanta chaita rurashcataca Bibliapica mana ninchu. Chaimi Pabloca Marcos mana responsable cashcata yuyarca. Chaimantami paipi confianata saquirca.

10. ¿Pablopish, Bernabepish mana de acuerdo cashpaca imatataj rurarcacuna?

¹⁰ Bernabé Marcosta pushasha nishcamantami Pabloca pꞌiñarirca. Cutin Pablo Marcos richun mana saquisha nishcamantami Bernabeca pꞌiñarirca. Hechos 15:39-pica: ‘Paicunaca achcata pꞌiñarinacushpami cada quien paicunapaj ladota rircacuna’ ninmi. Bernabeca Marcosta pushashpami barcopi Chipre llajtaman rirca. “Cutin Pabloca Silastami paihuan richun agllarca. Chai qꞌuipami huauquicunaca Pablota cuidachun Jehová Diosta mañarcacuna. Chai huashaca Pablopish, Silaspish rircallacunami” (Hech. 15:40). “Paicunaca Siria, Cilicia llajtacunata pasashpami chaipi caj congregacioncunata sinchiyachishpa rircacuna” (Hech. 15:41).

11. ¿Shujtajcunahuan cutin alli apanacungapajca ima cualidadcunatataj minishtinchij?

¹¹ Pablohuan, Bernabehuan ima tucushcata ricushpami tucuicuna juchayujcuna cashcata yuyarinchij. Paicunaca cuerpo gobernantemanta cachashcacunami carca. Qꞌuipaca Pablopish cuerpo gobernantepimi sirvishcanga. Paicunaca alli apanacushpapish ratomi pꞌiñarinacurcacuna. Shinapish ¿pꞌiñarishcacunallachu catircacuna? Mana. Paicunaca juchayujcuna cashpapish Jesuspaj ejemplota catishpami cutin alli apanacurcacuna. Chashnami humildes cashcata ricuchircacuna (Efes. 4:1-3). Asha huatacuna qꞌuipacarin Pablopish, Marcospish cutinmi tandalla trabajarcacuna (Col. 4:10).a

12. ¿Pablomanta, Bernabemantapish ancianocunaca imatataj yachai tucuncuna?

¹² Pablopish, Bernabepish rato coleraj shina cashcataca mana rijsishcacunachu carca. Por ejemplo, Bernabeca José shutimi carca. Paica cꞌuyaj, generosomi carca. Chaimantami apostolcunaca paitaca Bernabé nishpa shutichircacuna. “Bernabé shutica ‘cushichijpaj churi’ nisha ninmi” (Hech. 4:36). Pablopish cꞌuyaj, alli trataj runami carca (1 Tes. 2:7, 8). Cunan punllacunapica ancianocunapish, superintendente de circuitocunapish Pablo, Bernabé shinallatajmi congregacionpi tucuicunata humildadhuan, cꞌuyaihuan tratangapaj esforzarina can (1 Ped. 5:2, 3).

“Timoteomantaca allicunatami parlajcuna carca” (Hechos 16:1-3)

13, 14. a) ¿Timoteoca pitaj carca? b) ¿Pabloca Timoteotaca ima shinataj rijsirca? c) ¿Pabloca Timoteo ima shina cashcatataj yachaj chayarca? d) ¿Timoteoca ima responsabilidadtataj chasquirca?

¹³ Pabloca qꞌuipa viajepica Romapi Galacia llajtamanmi rirca. Chaipica achca congregacioncunami ña tiyarca. Hechos 16:1-pica: “Pabloca Derbe llajtaman, qꞌuipaca Listra llajtamanmi chayarca. Listra llajtapica Jesusta catij Timoteo shuti jovenmi causarca. Paica Jesusta catij judía huarmipaj churimi carca. Cutin paipaj yayaca griegomi carca” ninmi.b

¹⁴ Pabloca punta viajepimi Timoteotapish, paipaj familiatapish rijsirca. Chaica huata 47-pimi cashcanga. Shinapish ishqui o quimsa huatacuna huashami Timoteotaca ashtahuan rijsirca. Listra congregacionmanta, Iconio congregacioncama 30 kilometrocuna carupi cashpapish “Timoteomantaca allicunatami parlajcuna carca” (Hech. 16:2). Espíritu santo ayudajpimi ancianocunaca Timoteomanca, Pablotapish, Silastapish ayudachun shuj jatun responsabilidadta curcacuna (Hech. 16:3).

15, 16. ¿Timoteoca ima cualidadcunatataj ricuchirca?

¹⁵ ¿Timoteo joven cajpipish paimantaca imamantataj allicunata parlajcuna carca?, ¿yachaj cashcamanta, alli ñahuita charishcamanta? Huaquin gentecunaca ñahui ricushcallatami ricuncuna. Profeta Samuelpish shuj cutinca ñahui ricushcallatami ricurca. Chaimantami Jehová Diosca: “Mandaj Diosca runacuna ricuj shinallaca mana ricunchu. Runaca paipaj ñahui ricushcallatami ricun. Ashtahuanpish Mandaj Diosca shungu ima shina cashcatami ricun” nishpa yuyachirca (1 Sam. 16:7). Timoteoca alli cualidadcunata charishcamantami huauqui panicunapaj ñaupajpi alli ricurirca.

¹⁶ Huaquin huatacuna qꞌuipa Pabloca Timoteo sinchita trabajaj, cꞌuyaj, mana paillapi yuyaj, responsabilidadcunata alli pajtachij cashcatami parlarca (Filip. 2:20-22). Ashtahuanpish “mana nij tucushpalla feta” charishcatami ricuchirca (2 Tim. 1:5).

17. ¿Jovencunaca ima shinataj Timoteopaj ejemplota cati tucuncuna?

¹⁷ Cunan punllacunapish achca jovencunaca Timoteopaj ejemplota catishpami Jehová Diospaj ñaupajpi alli ricurincuna (Prov. 22:1; 1 Tim. 4:15). Timoteo shinami sinchi feta charishcata, mana nij tucujcuna cashcata ricuchincuna (Sal. 26:4). Chashnami jovencunaca congregacioncunapi achcata ayudancuna. Cai jovencuna publicadorcuna tucushpa bautizarijta ricushpami cushilla sintirinchij.

‘Crishcapi sinchiyarishpa, punllanta mirarishpami catircacuna’ (Hechos 16:4, 5)

18. a) ¿Pabloca Timoteohuan ima asignacioncunatataj pajtachirca? b) ¿Congregacioncunaca ima bendicioncunatataj chasquircacuna?

¹⁸ Pabloca Timoteohuan achca huatacunatami huillarca. Paicunaca cuerpo gobernantemanta asignacioncunatami alli pajtachircacuna. Por ejemplo, “paicunaca llajtan llajtan ricushpami apostolcuna, ancianocuna Jerusalenpi imata decidishcata cazuchun huauqui panicunaman huillashpa rircacuna” (Hech. 16:4). Congregacioncunaca chai mandashcacunata chasquishpami “crishcapi sinchiyarishpa, punllanta mirarishpa catircacuna” (Hech. 16:5).

19, 20. ¿Ñucanchijta pushajcunataca imamantataj cazuna canchij?

¹⁹ Cunan punllacunapish testigo de Jehovacunaca congregacionpi “ñaupajman pushajcunata” cazushpami achca bendicioncunata charishcanchij (Heb. 13:17). Cai pacha cambiashpa caticushcamantami ‘alli cazuj, alli yuyaiyuj sirvij’ huauquicunata alli uyashpa cazuna canchij (Mat. 24:45; 1 Cor. 7:29-31). Chashnami sinchi feta charishpa, cai pachapaj mana alli ruraicunamantapish caruyashun (Sant. 1:27).

²⁰ Cai tiempopi Cuerpo Gobernante huauquicuna, ancianocunaca, punta siglopi causashca apóstol Pablo, Bernabé, Marcos, shujtaj ungidocuna shinallatajmi juchayujcuna can (Rom. 5:12; Sant. 3:2). Chashna cashpapish Bibliapi yachachishcacunata catishcamanta, apostolcuna shina rurashcamantapishmi paicunapi confiana canchij (2 Tim. 1:13, 14). Chashnami congregacioncunaca “crishcapi sinchiyarishpa, mirarishpa” catingacuna.