3. Cambaj saludta cuidai

Jesusta catijcunaca Jehovapaj munaita rurasha nishcamantami pai munashca shina causancuna. Paicunapaj cuerpota shuj sacrificiota shina Diosman cushcamantami paicunapaj saludtaca cuidana can. Romanos 12:1, 2-ta liyipai. Qꞌuipaca cai catij tapuicunatami yachashun:

• ¿Cambaj saludtaca imamantataj cuidana cangui?

• ¿Cambaj saludtaca ima shinataj cuidana cangui?

Bibliata estudiashcamantami Jehová Diosmantaca ña achcata yachashcangui. Ima yachashcata cambaj causaipi pajtachingapajca huaquin cambiocunatachari rurashcangui. Pero ¿imamantataj Jehová Diosman mingarishpa manaraj bautizarishcangui? Cai yachaipica Bibliamanta yachacujcuna bautizaringapaj ima jarcaicunata mishana cashcatami yachashun. Shinallataj canpish bautizaringapaj imata rurana cashcatami ricushun.

1. ¿Bautizaringapajca Bibliamanta tucuitachu yachana cangui?

Bautizaringapajca Bibliamanta ‘mana llullatami’ alli yachana cangui (1 Timoteo 2:4). Shinaca Bibliamanta tapuicunata cutichingapajca manaraj bautizarishpaca, ¿tucuitachu yachana cangui? Mana, mana tucuitachu yachana cangui. Achca huatacunata bautizarishcacunapishmi Bibliamanta yachashpa catincuna (Colosenses 1:9, 10). Bibliamanta mana tucuita yachashpapish minishtirishca yachaicunatami yachana cangui. Chaipajca congregacionta pushaj ancianocunami cantaca ayudanga.

2. ¿Manaraj bautizarishpaca imatataj rurana cangui?

Bibliapica: “Arrepintirichij, cancunapaj mana alli ruraicunamanta tigrarichij” ninmi (Hechos 3:19-ta liyipai, NWT). Chaipajca can rurashca juchacunamantami arrepintirina cangui. Jehová Diostapish perdonachunmi mañana cangui. Shinallataj Dios munashca shina causangapajmi cambaj tucui mana alli ruraicunata saquina cangui. Ashtahuanpish tandanacuicunamanmi rina cangui. Huauqui panicunahuanpishmi huillanaman llujshina cangui.

3. ¿Diosman mingarishpa bautizarinataca imamantataj mana manchana cangui?

Huaquincunaca Jehová Dios munashcata mana rurai tucushachu nishpami mana bautizarincuna. Pero ima shinami ñaupa tiempopi Diosta sirvijcuna pandarirca, canpishmi huaquinpica pandaringui. Diosca ñucanchij pandarijlla cashcatami yachan (Salmo 103:13, 14-ta liyipai). Can esforzaricujta ricushpaca Diosca cushillami sintirin. Paica allita rurachunmi cantaca ayudanga. Bibliapica: ‘Diospaj cꞌuyaimantaca mana ima anchuchi tucungachu’ ninmi (Romanos 8:38, 39-ta liyipai).

ASHTAHUAN YACHAI

4. Jehová Diosta ashtahuan rijsi

Manaraj bautizarishpaca, ¿Jehová Diosmantaca tucuitachu yachana cangui? Mana. Diosta cꞌuyangacama, paita cazuna munaita charingacamami yachana cangui. Bibliamanta yachacujcuna caita pajtachingapaj imata rurashcata ricushun. VIDEOTA ricui. Qꞌuipaca cai catij tapuitami yachashun:

VIDEO: ¿Bautizarisha ninguichu? (3:56)

• Cai videopi ricushca shinaca ¿bautizaringapajca huaquincunataca imataj ayudashca?

Romanos 12:2-ta liyipai. Qꞌuipaca cai catij tapuicunatami yachashun:

• ¿Biblia yachachishcacunapi crinaca sinchichu can? ¿Testigo de Jehovacuna verdadta yachachishcataca segurochu cangui?

• ¿Seguro cashpaca imatataj rurai tucungui?

5. Jarcaicunata mishai

Tucuicunami Jehová Diosman mingarishpa bautizarinata decidishcamanta jarcaicunata charishcanchij. Jarcaicunata mishangapaj shuj huarmi imata rurashcata ricushun. VIDEOTA ricui. Qꞌuipaca cai catij tapuicunatami yachashun:

VIDEO: Jehovata cꞌuyashpami jarcaicunata mishashcani (5:22)

• ¿Videopi ricurij huarmica bautizaringapajca ima jarcaicunatataj mishana carca?

• ¿Jehová Diosta cꞌuyashcamantaca jarcaicunataca ima shinataj misharca?

Proverbios 29:25 y 2 Timoteo 1:7-ta liyipai. Qꞌuipaca cai catij tapuitami yachashun:

• ¿Jarcaicunata mishangapajca ima shinataj Diosca ayudan?

6. Jehová Diosmi ayudanga

Jehová Diosmi cantaca paipaj munaita rurachun ayudanga. VIDEOTA ricui. Qꞌuipaca cai catij tapuicunatami yachashun:

VIDEO: Cantapish Jehovami ayudanga (2:50)

• ¿Cai videopi ricurij runaca imamantataj mana bautizarinata munarca?

• ¿Jehová Diospi ashtahuan confiachunca paitaca imataj ayudarca?

Isaías 41:10, 13-ta liyipai. Qꞌuipaca cai catij tapuitami yachashun:

• ¿Tucui cambaj causaipi Diospaj munaita rurai tucushcataca imamantataj seguro cai pudingui?

7. Jehová Dios canta cꞌuyashcamanta agradici

Jehová Dios canta achcata cꞌuyashcata yachashpaca paita agradicinatami munangui. Shinallataj tucui vidami paita sirvinata munangui. Salmo 40:5-ta liyipai. Qꞌuipaca cai catij tapuitami yachashun:

• ¿Jehová Dios cushca bendicioncunamantaca maijantataj ashtahuan munangui?

Profeta Jeremiasca Jehová Diostapish, paipaj Shimitapishmi cꞌuyarca. Paipajca Diospaj shutita charinaca valishcami carca. Paica: “Cambaj shimicunaca ñuca shungutami cushichirca. Jehová Dioslla ñucaca cambaj shutitami charini” nircami (Jeremías 15:16, NWT). Cunanca cai catij tapuicunata cutichi:

• ¿Imamantataj testigo de Jehová canaca valishca can?

• ¿Testigo de Jehová cangapajca bautizarisha ninguichu?

• ¿Bautizaringapajca ima jarcaicunatataj charingui?

• ¿Bautizaringapajca imatataj rurana cangui?

YUYARISHUNCHIJ

Jehová Diospaj ayudahuanmi jarcaicunata mishashpa bautizari tucungui.

Yuyaringapaj tapuicuna

• ¿Bautizaringapajca Bibliamantaca tucuitachu yachana cangui?

• ¿Manaraj bautizarishpaca imatataj rurana cangui?

• ¿Bautizarinataca imamantataj mana manchana cangui?

CAICUNATAPISH RICUI

Imamanta bautizarina cashcata ricui.

“¿Bautizaringapajca ñachu listo cangui?” (Huillaj, marzo de 2020)

Bautizaringapaj ima jarcaicuna tiyashcata ricui.

“¿Manachu ñucaca cunanllataj bautizari tucuni?” (Huillaj, marzo de  2019)

Shuj runa bautizaringapaj ima jarcaicunata mishashcata ricui.

¿Ima nishpataj manaraj bautizarishcangui? (1:10)

Shuj runaca bautizaringapajmi dudasta charirca. Pai bautizaringapaj imata rurashcata ricui.

Dios cushca bendicioncunataca mana mericinichu (7:21)