Cambaj familiahuan cushilla causai (parte 1)

Recienlla cazarashcacunaca boda punllapi cushilla cashca shina tucui vida cushilla causanatami munancuna. ¿Cazadocunaca chashna causai tucuncunachu? Achca huatacunata cazarashca Diosta sirvijcunaca Bibliapi tiyaj consejocunata pajtachingapaj esforzarishpaca cushilla causai tucushcatami yachancuna.

1. ¿Cusacunamanca Bibliaca ima consejocunatataj cun?

Jehová Diosca cusacunataca familiapaj uma cachunmi mingashca (Efesios 5:23-ta liyipai). Chaimantami cusacunaca familiacunata cuidangapaj alli decisioncunata agllana can. Bibliapica cusacunamanca: “Cancunapaj huarmicunata cꞌuyashpa catichij” ninmi (Efesios 5:25, NWT). Cusaca paipaj huarmitaca tucui tiempopimi cꞌuyana can. Paicunalla cashpapish, shujtajcunapaj ñaupajpi cashpapish allimi tratana can. Shinallataj huarmita cuidashpa, ima minishtishcata cushpami cuidana can (1 Timoteo 5:8). Ashtahuantajca cusami huarmimanca Yaya Diosmanta yachachishpa ayudana can (Mateo 4:4). Por ejemplo, paihuanmi Diosta mañana, Bibliata liyinapish can. Cusa huarmita cꞌuyaihuan cuidashpaca Jehová Diospaj alli amigomi cashpa catinga (1 Pedro 3:7-ta liyipai).

2. ¿Huarmicunamanca Bibliapica ima consejocunatataj cun?

Diospaj Shimipica huarmica “paipaj cusatami shungumanta respetana can” ninmi (Efesios 5:33, NWT). ¿Cusata respetangapajca huarmica imatataj rurana can? Paipaj alli cualidadcunatami ricuna can. Paipaj cusa paita, paipaj huahuacunata cuidangapaj achcata esforzaricujtami ricuna can. Ashtahuanpish cusa ima decisioncunata agllajpica respetashcata, apoyashcatami ricuchina can. Huarmica cusataca cꞌuyaihuanmi tratana can, paimanta allicunallatami parlana can. Cusa mana Diosta sirvijpipish allimi tratana can.

3. ¿Cusa huarmica shuj shinalla causangapajca imatataj rurana can?

Cusa huarmimanta parlashpami Bibliapica: “Ishquindijmanta shuj aichallami tucunga” nin (Mateo 19:5). Chaimantami cusa huarmica ama chꞌicanyarinacungapaj cuidarina can. Paicunaca ishquindij tiempota pasashpa ima shina sintirishcata, imata yuyashcata cꞌuyaihuanmi parlanacuna can. Jehová Diosta puntapi churashca qꞌuipaca cambaj cusa, cambaj huarmi importante cashcatami yuyarina can. Shinallataj cazadocunaca shujtaj huarmita o shujtaj cꞌarita mana munangapajmi cuidarina can.

ASHTAHUAN YACHAI

4. Cusa cambaj huarmita cꞌuyashcata, cuidashcata ricuchi

VIDEO: Cusacuna cancuna cꞌuyarij shinallataj cancunapaj huarmita cꞌuyaichij (9:53)

• ¿Cusaca huarmita cꞌuyashcata, intindishcataca ima shinataj ricuchi tucun?

Colosenses 3:12-ta liyipai. Qꞌuipaca cai catij tapuitami yachashun:

• ¿Cusaca llaquij, humilde, paciente cashcataca ima shinataj ricuchi tucun?

5. Huarmi cambaj cusata cꞌuyashcata, respetashcata ricuchi

Bibliapica huarmicunataca cusata respetachunmi mandan. Cusa Jehová Diosta mana sirvijpipish respetanami can. 1 Pedro 3:1, 2-ta liyipai. Qꞌuipaca cai catij tapuicunatami yachashun:

• Cambaj cusa Diosta mana sirvijpica paipish Diosta sirvichunmi munangui ¿nachu? ¿Paita ayudangapajca imatataj ruranguiman? ¿Tucui tiempochu Bibliamanta yachachinguiman? ¿O paita respetashpa, allita rurashpachu ayudanguiman? ¿Imamanta chashna yuyangui?

Cusa huarmica ishquindijmi alli decisioncunata agllai tucun. Huarmica manachari tucuipi de acuerdo canga. Shina cajpica huarmica imata yuyashcataca mana pꞌiñarishpa, respetohuanmi parlai tucun. Shinapish huarmica Jehová Dios cusacunaman familiata cuidachun, paicunapaj allipaj decidichun mandashcatami yuyarina can. Chaimantami huarmi paipaj cusa imata decidijpica apoyana can. Chashnami familiapica cushilla causangacuna. 1 Pedro 3:3-5-ta liyipai. Qꞌuipaca cai catij tapuitami yachashun:

• ¿Huarmi paipaj cusata respetajpica Jehová Diosca ima shinashi sintiringa?

6. Cusa huarmica ishquindijmi problemacunata allichi tucuncuna

VIDEO: Cazadocuna cushilla causangapajca ¿imatataj rurana canchij? (5:44)

• ¿Videopi ricushca cusa huarmica imamantataj chꞌicanyaricurcacuna?

• ¿Ishquindij ñaupajman catingapajca imatataj rurarcacuna?

1 Corintios 10:24 y Colosenses 3:13-ta liyipai. Cada versota liyishca qꞌuipaca cai catij tapuitami yachashun:

• ¿Cusa huarmica cai consejota cazushpaca imamantataj alli apanacuncuna?

Bibliapica paicunapura respetanacuchunmi mandan. Chaimantami caishujmanta chaishujmanta cꞌuyaita, respetota ricuchishpa causana can. Romanos 12:10-ta liyipai. Qꞌuipaca cai catij tapuicunatami yachashun:

• ¿Cazadocunaca huarmiraj o cusaraj respetota ricuchichunchu shuyana can? ¿Imamantataj chashna yuyangui?

YUYARISHUNCHIJ

Cusa huarmica cꞌuyaita ricuchishpa, respetanacushpa, Bibliapi tiyaj consejocunata cazushpaca cushillami causangacuna.

Yuyaringapaj tapuicuna

• ¿Cusaca familia cushilla causachunca imatataj rurai tucun?

• ¿Huarmica familia cushilla causachunca imatataj rurai tucun?

• ¿Can cazado cashpaca Bibliamanta maijan consejotataj cazunguiman?

CAICUNATAPISH RICUI

Familiahuan cushilla causangapaj huaquin consejocunata ricui.

Cambaj familiaca cushillami causai tucun (folleto)

Cusa huarmi Diospaj consejocunata cazushcamanta ima bendicioncunata charishcata shuj video musicalpi ricui.

Shungumantami cantaca cꞌuyani (4:26)

Cusata imamanta cazuna cashcata yachai.

“¿Huarmica imamantataj paipaj cusataca cazuna can?” (Huillaj, 15 de mayo de 2010)

¿Shuj cusa huarmica divorciarishpapish ima shinataj paicunapaj problemacunata allichircacuna?

Diospaj ayudahuanmi cutin tandalla canchij (5:14)