Jesús shina causashunchij huillashunchij tandanacuipi imalla ruranata ricuchij pꞌanga nishca tandanacuipaj ayudacuna
1-7 DE ABRIL
BIBLIAPI TIYAJ VALISHCA YUYAICUNA | 1 CORINTIOS 7-9
“Soltero canaca shuj bendicionmi can”
1 Corintios 7:32, Traducción del Nuevo Mundo de las Santas Escrituras
w11 15/1 pág. 18 párr. 3
Soltero cashpaca ¿ima shinataj Diosta ashtahuan sirvi tucunchij?
3 Casi siempremi solterocunaca ashtahuan tiempota, libertadta charincuna (1 Cor. 7:32-35, NM). Chaimantami ashtahuan huillana, ashtahuan amigocunata rijsina, Jehová Diosman ashtahuan cuchuyanapish paicunapajca ashtahuan jahualla can. Chai shina bendicioncunata ricushpami, maijan solterocunaca asha tiempollatapish soltero cashpa catinata decidishcacuna. Cutin shujtaj solterocunaca, sololla saquirinata mana munashpapish solollami saquirishcacuna. Chaimantami paicunaca Diosta mañancuna, alli yuyarincuna. Shinallataj Jehová Diospaj ayudahuanca ñaupajman tranquilo catina cashcatami cuentata cuncuna. Chaimi paicuna ima shina cashcapi yuyashpa soltero canata paicunapaj shungupi decidincuna (1 Cor. 7:37, 38, NM).
w08 15/7 pág. 27 párr. 1
Corintiocunaman quillcashca cartacunamanta alli yuyaicuna
7:33, 34, NM. Diosta sirvij cazadocunaca cai mundopi tiyashca cosascunapimi preocuparin. ¿Cai mundopi tiyashca cosascunaca imataj can? Cazadocunapaj causaipi imalla minishtirishcacunami can. Por ejemplo micuna, churana ropa, maipi causana huasimi can. Cai mundopi tiyaj mana alli ruraicunataca mana nicunchu. Chaicunataca tucuicunami mana rurana canchij (1 Juan 2:15-17).
w96 15/10 pág. 12 párr. 14
Solterocunaca caita, chaita mana yuyashpami Diosta alli sirvi tucuncuna
14 Diosta sirvij solterocunaca paicunapaj munaillata rurashpa causashpaca cazadocunata ‘yalli allitaca’ mana ruranchu. Soltero saquirinata decidishpa Diospajllata mana ruracushpaca, paipaj munaita ruracushcallamanta soltero cashcami ricurin (Mateo 19:12). Chaimanta mosocuna, solteracunaca Yaya Diosta “cushichina yuyailla”, ‘paipajllata rurana yuyaillami’ cana can. Shinallataj mana shujtaj cosascunapi ‘caita chaita yuyashpami’ Jehová Diosta y Jesucristotaca sirvina can. Chashna rurashpallami Diosta sirvij solterocunaca cazadocunata ‘yalli allita’ rurangacuna.
Bibliapi curita mashcaj shina mashcashunchij
1 Corintios 7:11, NM
Notacuna
Huaquincunaca paicunapaj cusa o huarmi mana huainayajpipish separarinatami decidishcacuna (1 Corintios 7:11). Imamanta chashna decidishcata ricushun.
• Cusa manataj mantinisha nijpica familiaca hasta cullqui illaj, micuna illajmi saquirishcacuna. Chaimantami maijan huarmicunaca cusamanta separarishcacuna (1 Timoteo 5:8).
• Huaquincunaca cusa o huarmi dimastij maltratajpimi ñuca causaica peligropimi can nishpa separarishcacuna (Gálatas 5:19-21).
• Cusa o huarmi Diosta sirvichun manataj saquijpimi huaquincunaca separarishcacuna (Hechos 5:29).
1 Corintios 7:36, NM
w00 15/7 pág. 31 párr. 2
Cai mapa mundopi pihuan mana chayarishpa limpio cai tucunchijmi
Jovencunaca chayarina munai shamujpica cazarangapaj mana apuranachu can. Matrimoniopica cazarashca punlla ari nishcata mana pꞌaquinaca importantemi can. Chaipajca runa entero o huarmi entero tucushpami pai ari nishcata alli pajtachishpa causai tucunga (Génesis 2:24). Huambraraj cajpica chayarina munaimi yallitaj shamun. Chaimi juillu illaj laya imatapish rurai tucunchij. Chaimantami cazarangapaj yallitaj chayarina munai pasangacama shuyanaca alli can (1 Corintios 7:36, NM). Shuj persona pihuan cazaranata mana charishpa, pihuanpish chayarishpa causashpaca shuj jatun juchatami ruran, mana yachaj cashcatapishmi ricuchin.
Bibliata rezashunchij
8-14 DE ABRIL
BIBLIAPI TIYAJ VALISHCA YUYAICUNA | 1 CORINTIOS 10-13
“Jehová Diosca pajtachijmi can”
Caitami Tapushcacuna
Apóstol Pabloca: ‘Diosca cancuna apai tucunalla llaquita apachunmi saquinga’ nishpami quillcarca (1 Corintios 10:13, QC, 1989). ¿Diosca maicama ahuantai tucushcata ricushpachu, ima llaquicunata o pruebacunata cachan?
▪ Chashna cajpica, ¿ima shinataj sintirinchijman? Shuj ejemplota ricushun. Shuj huauquipaj churimi paillataj huañurca. Paipaj churi huañushcamantami yallitaj llaquirido carca. Chaimantami yayaca: ¿Cai tucunataca Diosca ñachu yachashca canga? ¿Cai llaquita ahuantangacunami nishpachu Diosca cai llaquita cachashca canga? nishpami yuyarca. Cai millai mundopi causacushcamantami ima llaquipish japi tucun. Pero ¿ñucanchij causaipi ima tucunataca Diosca ñachu tucuita yachan?
Bibliapica ñucanchij maicama ahuantai tucushcata ricushpa, ima llaquicunata cachanata Dios ricujtaca mana yachachinchu. Chaipajca 1 Corintios 10:13-ta alli entendishunchij. Chuscu yuyaicunata ricushun.
Diosca imatapish ñucanchijllataj agllachunmi saquishca. Jehová Diosca imata ruranatapish ñucanchijllataj decidichunmi munan (Deuteronomio 30:19, 20; Josué 24:15). Dios munashca shina imatapish agllajpica paica ayudangami (Proverbios 16:9). Pero mana allita agllajpica ñucanchijllatajmi llaquicunapi urmashun (Gálatas 6:7). Dios ima llaquicunata cachanata ña ricushca cajpica ñucanchijca ña mana imata agllai tucunchijmanchu ¿nachu?
Huaquinpica ima llaquicunapish ñapish japinllami. Chai llaquicunamantaca Jehová Diosca mana cuidanchu (Eclesiastés 9:12). Mana yuyashca punllapi, horaspimi pitapish llaquicunaca japinlla. Jesusca shuj jatun torre 18 runacunata llapishpa huañuchishcatami parlarca. Cashna parlashpami chai runacuna huañushcamantaca Diosca mana culpata charishcata entendichirca (Lucas 13:1-5). Shinashpaca shuj llaqui tiyajpica pi huañunata o mana huañunataca Diosmi destinashca nishpaca mana yuyanachu canchij.
Cada unomi Jehová Diosllata tucui shunguhuan servishcata ricuchina canchij. Runacunaca Diosmanta imata chasquishcallamantami paita servin nishpami Diabloca juchachirca. Shinallataj llaquicuna japijpica Diostaca saquingami nishpami juchachirca (Job 1:9-11; 2:4; Apocalipsis 12:10). Huaquin llaquicunamanta Jehová Dios cuidajpica Diablo juchachishpa rimashcacunaca cierto cashca shinami ricurinman.
Qꞌuipa punllacunapi ima tucunata yachai tucushpapish Jehová Diosca mana tucuita yachanatami decidishca. Taita Diosca pai munashpaca ima tucunata yachai tucunmi (Isaías 46:10). Pero Bibliapica huaquinpica qꞌuipa punllacunapi ima tucunataca Diosca mana yachanatami decidishca ninmi (Génesis 18:20, 21; 22:12). ¿Imamantataj mana yachanata decidishca? Paica cꞌuyaj, cashcata ruraj Diosmi can. Chaimantami ñucanchijllataj imata ruranata decidichun saquishca (Deuteronomio 32:4; 2 Corintios 3:17).
Shinashpaca Pabloca, ¿‘cancuna apai tucunalla llaquita apachunmi Diosca saquinga’ nishpaca imatataj nisha nirca? Pabloca llaquicuna manaraj ricurijpi Dios ima llaquita cachanata yuyacushcataca mana parlacurcachu. Ashtahuanpish llaquicunahuan cajpi Jehová Dios ñucanchijta ima shina ayudaj cashcatami parlacurca. Ñucanchijcuna Taita Diospi tucui shunguhuan crijpica ima llaquicunahuan cajpipish paica ayudangami (Salmo 55:22). Cunanca apóstol Pablo imamanta cashna nishcata yachangapaj ishqui yuyaicunata ricushun.
Puntapica ima llaquicunapish problemacunapish japinllami. Cai pachata Diablo mandacushcamantami llaquicunahuan causanchij. Ima horapish tucuicunami sinchi problemacunata charishun, huaquinpicarin jatun llaquicunachari japinga. Shina cajpipish Jehová Dios ayudanata tucui shunguhuan crishpaca ima llaquicuna ricurijpipish ahuantashunmi, paimantapish mana caruyashunchu (1 Pedro 5:8, 9). 1 Corintios 10:13 huasha versocunapica, Pabloca israelitacuna charishca pruebacunamantami parlarca (1 Corintios 10:6-11). Dios ayudanata crijcunaca llaquicunata ahuantai pudircacunami, cutin Dios ayudanata mana crijcunaca Diosta mana cazushpami paimanta caruyarcacuna.
Qꞌuipaca apóstol Pabloca Jehová Dios ‘imatapish pajtachij cashcata’ yachashpami 1 Corintios 10:13-pi nishca shimicunata nishca canga. Jehová Diosca “pai mandashcacunata cꞌuyashpa chaitataj pajtachijcunataca” cuidashcami. Caita yuyarishpami Diosca paimanta mana caruyajcunataca cuidaj cashcata yachanchij (Deuteronomio 7:9). Shinallataj Diosca imata nishpapish paica tucuitami pajtachin (Josué 23:14). Chaimantami Jehová Diosca mana ahuantai tucushca llaquicunata apachunca mana saquinga. Chashnallataj llaquipi cajpica paillatajmi llujshichinga.
Diospi shunguta churajpica ¿ima shinataj Diosca llaquicunamanta llujshichinga? Diosca llaquicunata anchuchi tucunmi. Pero Pabloca: Jehová Diosca llaquicunata ahuantachunmi ayudanga nircami. ¿Caita nishpaca imatataj nicurca? Diosca paimanta ama caruyachunmi ñucanchijman fuerzasta cushpa ayudan. ¿Ima shinataj Diosca ñucanchijman fuerzasta cushpa ayudan? Ricushun.
▪ Diosca ‘tucui ñucanchij llaquicunapimi cushichin’ (2 Corintios 1:3, 4). Paica ñucanchij shungupi, yuyaipi tranquilo sintiringapajmi Bibliahuan, espíritu santohuan, alli cazuj, alli yuyaiyuj servij huauquicunahuan ayudan (Mateo 24:45; Juan 14:16; Romanos 15:4).
▪ Jehová Diosca paipaj espíritu santota cushpami ayudan (Juan 14:26). Bibliapi ima yachashcata yuyarishpa alli decisioncunata japingapajmi Yaya Diosca paipaj espirituhuan ayudan.
▪ Diosca angelcunata cachashpami ayudan (Hebreos 1:14).
▪ Diosca huauquicunahuan panicunahuanpishmi ayudan. Paicunaca ñucanchijta imapi ayudashpa, cushichij shimicunahuan parlashpami ñucanchijta ayudan (Colosenses 4:11).
¿1 Corintios 10:13-mantaca imatataj yachashcanchij? Jehová Dios llaquicunata mana agllashcata, chai llaquicunata mana cachashcatami yachashcanchij. Shinallataj ima llaquicuna ricurijpipish Diospi tucui shunguta churashpaca llaquicunata ahuantai tucushcatami yachashcanchij. Jehová Diosca paimanta ama caruyachunmi fuerzasta cushpa ayudanga.
Bibliapi curita mashcaj shina mashcashunchij
w04 1/4 pág. 29
Caitami Tapushcacuna
1 Corintios 10:8-pica 23.000 israelitacunami huainayana juchapi urmashcamanta huañurcacuna ninmi. ¿Imamantataj cutin Números 25:9-pica 24.000-mi huañurcacuna nin?
Cai ishqui versocunataca chꞌican chꞌican layami intindichincuna. Por ejemplo, huainayana juchapi urmashcamanta huañushca israelcunaca quizás 23.000 yalli, casi 24.000-mi cashcangacuna. Chaimantami 23.000-mi huañurcacuna, mana cashpaca 24.000-mi huañurcacuna ninaca alli can.
Cutin ñaupa Corinto llajtapi causaj gentecunaca imatapish rurashpa mapa cosascunata rurashpami causajcuna carca. Chai llajtapi causaj crijcunaman quillcashpaca Sitim pueblopi causaj israelitacuna ima tucushcata yuyachishpami apóstol Pabloca, “paicunamanta maijancuna shina ama huainayajcuna cashunchijchu. Chashnacunaca shuj punllallapimi, 23.000 huañurcacuna” nircami. Pabloca 23.000 gentecunata huainayana juchapi urmashcamanta Jehová Dios huañuchishcatami nirca (1 Corintios 10:8).
Cutin Números capítulo 25-pica: “Israelcunaca, Baal-peor nishca diostami catircacuna. Chaimi Mandaj Diosca israelcunahuanca nina sindirij shina yallitaj pꞌiñarirca” ninmi. Chaimantami Jehová Diosca Moisestaca, “israelcunata pushajcunata” tucuicunata japishpa huañuchichij nishpa mandarca. Chaimi Moisesca Jehová mandashcata pajtachichun juezcunata mandarca. Chai llaquica, israelitacunapaj carpa huasiman shuj israelita runa madianita huarmita pushashpa yaicujta Finehás runa ricushcahuan ishquindijtataj huañuchijpimi pararirca. Cai versocunapi nicuj último partepica: “Chai llaquipi huañujcunaca 24.000-mi carca” ninmi (Números 25:1-9).
Números libropi 24.000-mi huañurca nishpaca “israelcunata pushajcunata” juezcuna huañuchishcahuan, Jehová Diosllataj huañuchishcacunahuan contajpimi chai numeroca llujshij yuyachin. Israelcunata pushajcunata juezcuna huañuchishcacunaca mil o millarmi cashcangacuna. Chashna cashca cajpica 24.000-mi huañushcangacuna. Chai israelcunata pushajcuna huainayana juchapi urmashca cajpipish, yanga fiestacunapi participashca cajpipish o shujtaj laya juchacunapi participachun shujtajcunata apoyashca cajpipish Bibliaca, “Baal-peor nishca diostami catircacuna” ninmi. Chashnami paicunaca jatun juchata rurarcacuna.
Shuj libropica cai “catina” nishca shimitaca “shuj persona caishuj personahuan tandalla cashcatami nisha nij yuyachin” ninmi. Israelcunaca Diospaj agllashca llajtami carcacuna. Pero ‘Baal-peor nishca diostami catircacuna’. Chashnami Jehová Diosmanta caruyarcacuna. Setecientos huatacuna qꞌuipami Jehová Diosca israelcunataca: “Baal-peor diospajmanmi rircacuna. Pingaichishca cangapajmi ñucamantaca anchurircacuna. Chashna tucushpaca, paicunapaj cꞌuyashca diosta ñuca millanachishca shinallatajmi, paicunapish ñucapajca millanana tucurcacuna” nircami (Oseas 9:10). Mana allita ruraj israelcunaca Dios castigashcami cana carcacuna. Asha tiempo huashaca israelcunataca Moisesca: “Baal-peor diosmanta Mandaj Dios imata rurajtaca cancunapaj ñahuihuantajmi ricurcanguichij. Baal-peor diosta catijcunataca tucuicunatami, Mandaj Dios cancunapaj Taita Diosca cancunapaj chaupimantaca tucuita chingachirca” nishpami yuyachirca (Deuteronomio 4:3).
w15 15/2 pág. 30
Caitami Tapushcacuna
¿Shuj panica manaraj bautizarishca huauquipaj ñaupajpi Bibliamanta yachachicushpaca umata taparinachu can?
▪ La Atalaya del 15 de julio de 2002 revistapi “Caitami Tapushcacuna” nishca seccionpica: “Panicunaca bautizarishca o manaraj bautizarishca huauquipaj ñaupajpi Bibliamanta yachachicushpaca umata taparinami can” ninmi. Pero cai temata ashtahuan alli investigashpami chai revistapi nishcata cambiana cashcata yachashcanchij.
Shuj panica shuj bautizarishca huauquipaj ñaupajpi, paihuan unita yachacujman Bibliamanta yachachicushpaca umata taparinami can. Panica huauquicuna rurana trabajota ruracushcamantami chashna rurana can. Pai umata taparishpaca congregación ucupi Yaya Dios mandashcata respetashcatami ricuchin (1 Cor. 11:5, 6, 10). Chai pani munashpaca paihuan caj huauqui pudijpica pai yachachichunmi mañai tucun.
Cutin shuj panica manaraj bautizarishca huauquipaj ñaupajpi paihuan unita yachacujman yachachicushpa, chai huauqui mana paipaj cusa cajpica umata taparina cashcataca Bibliapica mana ninchu. Chashna cashpapish huaquin panicunaca umata taparinatami decidincuna. Paicunapaj conciencia chashna nijpimi chaita decidincuna.
Bibliata rezashunchij
22-28 DE ABRIL
BIBLIAPI TIYAJ VALISHCA YUYAICUNA | 1 CORINTIOS 14-16
“Diosmi tucuipi, tucuicunata mandanga”
w98 1/7 pág. 21 párr. 10
“Diosca huañuitapish tucuchingami”
10 Bibliapi “tucurimi canga” nishpaca huaranga huatacunata Jesucristo mandacushca tucurinatami nicun. Chaimi Jesusca Mandanataca humilde shunguhuan paipaj Yaya Diosman cunga (Apocalipsis 20:4). Shinaca Jehová Dios munashca shinami “tucui ima tiyajta tandachishpa Cristopaj ucupi churanga” nishcaca tucui pajtaringa (Efesios 1:9, 10). Pero puntaca Cristoca tucui Diosta ‘pꞌiñajcunata mandajcunata, tucui poderyujcunatami chingachinga’. Chaica Armagedón punllatapish yallimi canga (Apocalipsis 16:16; 19:11-21). Apóstol Pabloca: “Cristota tucui pꞌiñajcunata paipaj chaqui sarunapi churangacamaca, paillatajmi mandacunga. Tucui pꞌiñajcunata tucuchishca qꞌuipaca, Diosca huañuitapish tucuchingami” nircami (1 Corintios 15:25, 26). Shinaca Adanmanta chasquishca juchapish huañuipish ña mana tiyangachu. Chai tiempopajca Diosca huañushcacunataca ñami tucui causachinga (Juan 5:28).
kr pág. 237 párr. 21
Diospaj Reinoca cai Allpatami bendicianga
21 Juchayuj cashcamanta, ungushca cashcamantami tucuicunami huañunchij. Pero huañuica ¿imashi tucunga? Huañuica tucuicunapajmi shuj enemigo laya can (1 Cor. 15:26). Pero ¿Diosta mishai tucunchu? Profeta Isaiasca: “Mandaj Jatun Diosca, huañuitapish huiñaipajmi chingachinga. Tucuicunapaj ñahuimantami huiquicunata chaquichinga” nircami (Is. 25:8). Shinaca ima entierrocuna, cementeriocuna yallitaj llaquimanta huacashca huiquicunapish ña mana tiyangachu. Ashtahuancarin Yayitu Dios pai munashca shina huañushcacunata causachijpimi dimastij cushicushpa de cushicui huacashun (Isaías 26:19-ta liyipai). Chaipica cꞌuyashca familia huañujpi shungu nanarishpa chugri shina cashcapish alliyangami.
w12 15/9 pág. 12 párr. 17
Huaranga huatacunatapish, huiñaitapish sumajta causashun
17 Jesús Mandacushca ña tucurishca qꞌuipa ima tucunamanta parlashpaca apóstol Pabloca: “Chashnami Diosca tucuipi, tucuicunata mandanga” nircami. ¿Cai shimicunaca imatataj nisha nin? Manaraj juchapi urmashpaca Adán Evaca, Yaya Diospaj familia ucupimi tandalla sumajta causarcacuna. Jatun Mandaj, tucuita ruraj Jehová Diosmi angelcunatapish, gentecunatapish mandaj carca. Chaimi paicunaca Diosta adoranata, paihuan parlanacunata pudircacuna. Cutin Jehová Diosca paicunatami bendiciaj carca. “Chashnami Diosca tucuipi, tucuicunata” mandaj carca.
Bibliapi curita mashcaj shina mashcashunchij
w12 1/9 pág. 9, recuadro
¿Apóstol Pabloca huarmicuna ama rimachun nircachu?
Apóstol Pabloca “huarmicunaca tandanacuicunapica upalla cachun” nircami (1 Corintios 14:34). Chashna nishpaca ¿imatataj nisha nirca?¿Huarmicunaca shujtajcunaman yachachingapaj yuyaita o intilegenciata mana charishcatachu nisha nirca? Mana. Pabloca Diosmanta huillaj huarmicunataca allitami rurashcangui nijmi carca (2 Timoteo 1:5; Tito 2:3-5). Shinallataj corintocunaman cartata quillcashpaca Pabloca, shujtajcuna yachachicujpi upalla cachun nishpaca mana huarmicunallata mandarcachu. Shujtaj shimipi rimajcunata, profeta shina yachachijcunatapishmi upalla cachun mandarca (1 Corintios 14:26-30, 33). Huaquin huarmicunaca Diosmanta cushicuihuan yachacushpami ñaupajman yachachij huauquicunata tapuicunata rurashpa yachachichun mana saquijcuna cashcanga. Chai lugarpica chashna costumbremi tiyarca. Chaimantami congregacionpi orden tiyachunca apóstol Pabloca panicunataca, “paicunapaj huasipi cusacunata tapuchun” mandarca (1 Corintios 14:35).
it-1 pág. 1221
Mana ismuj
Jesús shina causarishpa paihuan tandalla jahua pachapi mandagrijcunataca mana espíritu cuerpollahuan causachingachu. Ashtahuanpish mana huañuj, mana ismuj cuerpohuanpishmi causachishca canga. Ima shinami apóstol Pablo 1 Corintios 15:42-54-pi nin, paicunapaj causaipi tucui shunguhuan Diosta sirvishpa ismujlla aichahuan huañushca qꞌuipaca espíritu cuerpota mana ismuj cuerpotami chasquincuna. Shinaca mana huañuj cuerpota nishpaca mana nunca tucurij, pi mana tucuchij causaitami nicun. Shinallataj mana ismuj aicha nishpaca Diosmanta chasquishca espíritu cuerpotami nicun. Chai cuerpoca manataj tucurij, maita mana tucuchipaj, nunca mana ismuna cuerpomi canga. Shinaca Diosca runacunamanta, angelcunamantaca paicunamanmi paicunallataj causai tucuchun poderta cugrij yuyachin. Chashna rurashpaca Jehová Diosca paicunapi shungumanta confiashcatami ricuchin. Shinapish paicunalla causai tucuna, mana huañuj, mana ismuj aichata charinaca mana nisha ninchu Dios mandashcacunata mana cazuna cashcata. Ashtahuanpish paicunapaj uma Jesucristo shinami Yaya Diospaj munaita rurashpa, paipaj yachachishcacunata cazushpa causana can (1Co 15:23-28; alma, inmortalidad nishca temata ricui).
Bibliata rezashunchij
29 DE ABRIL A 5 DE MAYO
BIBLIAPI TIYAJ VALISHCA YUYAICUNA | 2 CORINTIOS 1-3
“Jehová Diosca tucuipi cushichij Diosmi”
“Huacajcunahuanca huacaichij”
4 Jehová Diosca llaquij Yayami can. Chaimantami Abraham, Isaac, Jacob, Moisés, Davidpish huañujpica paica llaquilla sintirirca (Números 12:6-8; Mateo 22:31, 32; Hechos 13:22). Bibliapica paicunata causachina hora ña chayamuchunmi Diosca shuyacun ninmi (Job 14:14, 15). Paicuna causarishpaca mana ungungacunachu, cushillami causangacuna. Shinallataj Jehová Diosca Jesustaca achcatami cꞌuyan. Jesús huañujpica Diosca yallitajmi llaquirirca (Juan 5:20; 10:17).
“Huacajcunahuanca huacaichij”
14 Shuj familia o amigo huañushcamanta llaquilla cajcunataca huaquinpica ima shina cushichinataca mana yachanchijchu. Shinapish Bibliapica: ‘Yachaisapacunaca sumaj shimicunahuanmi jambincuna’ ninmi (Proverbios 12:18). Huañui tiyajpi ayudangapajmi maijancunaca Cuando muere un ser querido folletopi huaquin alli yuyaicunata tarishcacuna. Shinapish huaquinpica Romanos 12:15-pi nishcata ruranami ashtahuan alli can. Chaipica: “Huacajcunahuanca huacaichij” ninmi. Gaby shuti panica viudami saquirirca. Paica: “Huaquinpica huacashpami ima shina sintirishcata ricuchini. Amigocuna ñucahuan huacajpica mana ñucalla sintirinichu” ninmi.
Bibliapi curita mashcaj shina mashcashunchij
w16.04 pág. 32
Caitami Tapushcacuna
“Paipajta rurashpa sellarca”, “japina cashcata ricuchij” nishca yuyaicunaca ¿imatataj nisha nin? (2 Cor. 1:21, 22).
▪ Japina cashcata ricuchij o prenda. Shuj libropica cai 2 Corintios 1:22-pi “japina cashcata ricuchij” o “prenda” nishca griego shimitaca “leycunamanta nicushpa, shujtajcunahuan ima shina negociota rurana cashcapimi utilizancuna” ninmi. Shinallataj chai shimitaca “punta pago, depositana, ñaupashpa cuna, paganataj cashca promesatami nisha nin. Chaicunaca shuj contratota valichin o imata randicushpa shuj valishca prendata saquishca shinami can. Chashnallataj chai japina cashcata ricuchij o prendaca qꞌuipata leypi nishca shina imata randishcata reclamangapajmi valishca can” ninmi. Diosta sirvijcunamanta espíritu santohuan ungido shina agllashca cashpaca shuj prendata saquishcatami chasquincuna. Pero 2 Corintios 5:1-5-pi nishca shinaca jahua pachapi mana ismuj cuerpohuan causarishpami paicunapaj tucui pagotaca chasquincuna. Paicunaman cuna parte pagoca mana huañuj cuerpota chasquinami can (1 Cor. 15:48-54).
Recienlla llujshishca griego shimipica cazarangapaj ari nishcata ricuchij anillomanta parlangapajmi japina cashcata ricuchij o prenda nishca shimita utilizan. Cai shimica allimi ungidocunapica chayan. Paicunaca Cristopaj sumajta allichirishca novia shinami cancuna (2 Cor. 11:2; Apo. 21:2, 9).
▪ Sello. Ñaupa tiempopica shuj propiedadta randishpaca chai documentota, mana cashpaca shujtajpaj ari nishcata ricuchij hojacunata valichingapajmi firmata churanapaj randica sellajcuna carca. Jehová Dios paipaj jucha illaj espirituhuan ungidocunata sellashpaca paipajlla cashcata ricuchingapajmi marcahuan churaj shina can (Efes. 1:13, 14). Diosta tucuipi cazuj ungidocunaca paicuna ña huañugrijpi o gran tribulación ñalla callarigrijpimi huiñaipaj sellashca cangacuna (Efes. 4:30; Apo. 7:2-4).
w10 1/8 pág. 23
¿Yacharcanguichu?
¿Diosca tucui imapipish mishachishpa pushacunlla nishpaca apóstol Pabloca imatataj nisha nicurca?
▪ Bibliapi 2 Corintios 2:14-16-pica apóstol Pabloca: “Diosca ñucanchijtaca tucui imapipish mishachishpa pushacunlla. Chaimantami Diostaca pagui nicunchij. Quishpichishcacunapurapipish, chingarinaman ricujcunapurapipish Cristomantami Diospajca mishquiman ashnajlla canchij. Shinallataj chingarinaman ricujcunataca chai ashnaica huañuiman chayachijmi, ashtahuanpish quishpichishcacunataca causaiman chayachijmi” nircami.
Shinaca Diosca “tucui imapipish mishachishpa pushacunlla” nishpaca ¿imatataj apóstol Pabloca nisha nicurca? Romanocunaca macanacuicunapi mishashpaca soldadocunata mandajcunata alli ningapajmi jatun desfilecunata rurajcuna carca. Chai desfilecunapica macanacuipi imallata japimushca cosascunata, enemigocunata prezu japimushcatami ricuchijcuna carca. Gentecunapish soldadocunata mandajcunataca sinchita caparishpami alabajcuna carca. Chai desfilecunataca huagracunata sacrificiota rurashpa, enemigocunata huañuchishpami tucuchijcuna carca.
Apóstol Pablo: “Cristomantami Diospajca mishquiman ashnajlla canchij. Chingarinaman ricujcunataca chai ashnaica huañuiman chayachijmi, ashtahuanpish quishpichishcacunataca causaiman chayachijmi” nishpaca ¿imatataj nisha nirca? Shuj enciclopedia libropica: “Romanocunaca tucui desfilecunapimi inciensotaca rupachijcuna carca. Chai rupachishca inciensoca macanacuipi mishajcunapajca mishashcatami ricuchij carca. Cutin macanacuipi pirdijcunapajca paicunata huañuchinatami ricuchij carca” ninmi (The International Standard Bible Encyclopedia).
Bibliata rezashunchij