Caitami tapushcacuna
Apóstol Pabloca, “ñucaca manaraj huacharina horaspi huacharishca huahua shinami cani” nishpaca ¿imatataj nisha nirca? (1 Corintios 15:8)
1 Corintios 15:8-pica Pabloca: “Ultimopica ñucamanmi ricurirca. Chaimantami ñucaca manaraj huacharina horaspi huacharishca huahua shina cani” nircami. Ñucanchijca: “Apóstol Pabloca Jesús causarishcatami ricurca. Chaimi Pabloca huacharij shina jahua pachapi causarishcata sintishcanga” nishpami yuyarcanchij. Shinapish cunanca cai versotaca ashtahuan allimi intindinchij.
Apóstol Pabloca pai Jesuspaj discípulo tucuna horasmantami parlacurca. Pero “manaraj huacharina horaspi huacharishca huahua shinami cani” nishpaca ¿imatataj nisha nirca? Caimanta yachashun.
Manaraj horaspi shuj huahua ñapish huacharij shina apóstol Pabloca pai mana yuyashcapi Jesuspaj discípulo tucushcatami nisha nishcanga. Pabloca Saulomi carca. Paica Jesusta catijcunata llaquichingapajmi Damasco llajtaman ricurca. Pero mana yuyashcapimi Jesusta ricurca. Shinallataj shujtajcunaca paicuna mana yuyashcapi Pablo ñapish Jesuspaj catij tucushcatami ricurcacuna. Apóstol Pabloca Jesusta ricushpaca mancharishcami saquirishcanga. Chaimantami huaquin punllacunata mana ricui tucurca (Hechos 9:1-9, 17-19).
Jesús cai Allpapi cana tiempo tucurijpipish apóstol Pabloca mana horaspi huacharij shina Jesusta ricui tucushcatami nisha nishcanga. Apóstol Pablo Jesuspaj discípulo tucui horasca Jesusca ñami jahua pachapi carca. Apóstol Pabloca shujtaj discipulocuna shinaca Jesús ña causarishcataca mana ricushcachu carca (1 Corintios 15:4-8). Pero Pabloca pai mana yuyashcapimi Jesusta ricui tucurca.
Apóstol Pabloca manaraj huacharina horaspi huacharishca huahua shinami cani nishpaca apóstol canata mana chasquipaj cashcatami nisha nishcanga. Chaimantachari paica: “Ñucaca tucui apostolcunamanta último apostolmi cani. Diospaj congregacionta catirashpa llaquichishcamantaca apóstol nishcallapish mana caipajmi cani. Shinapish Dios yallitaj llaquij cashcata ricuchishcamantami ñucaca apóstol cani” nirca (1 Corintios 15:9, 10).
Shinaca apóstol Pabloca pai mana yuyashcapi Jesuspaj discípulo tucushcata, pai mana yuyashcapi Jesusta ricushcatami nisha nishcanga. Mana cashpaca Jesuspaj apóstol canata mana chasquipaj cashcatami nisha nishcanga. Ima shina cashpapish Jesusta ricunaca paipajca shuj alaja experienciami carca. Chaimantami Jesús causarishcataca seguro carca. Shujtajcunaman predicashpacarin Jesús causarishcatami huillaj carca (Hechos 22:6-11; 26:13-18).