ÑUCANCHIJ YUYAITA MUSHUJYACHISHUNCHIJ

7. ¿Ucu shungumanta cambiangapajca imatataj rurana canchij?

⁷ ¿Ucu shungumantaca cambiai tucunchijchu? Ari. Bibliapica: “Cancunapaj shungupish, yuyaipish mushujyachishca caichij. Mushuj causaita churarichij. Mana llullapi nishca shina, cashcata rurachun, jucha illaj cachun, Diosman rijchaj cachun mushujyachishcami canguichij” ninmi (Efesios 4:23, 24). Ña ricushca shinaca sinchi cajpipish cambiai tucunchijmi. Chaimantami ñucanchij shungupi mapa munaicuna, millai yuyaicuna tiyashpa catichunca mana saquina canchij. Ashtahuanpish ucu shungumanta cambiangapajca tucui mana alli munaicunata, mana alli yuyaicunatami anchuchina canchij.

8, 9. ¿Shuj huauquica imamantataj paipaj yuyaita cambiana carca?

⁸ Cunanca shuj huauquipaj causaimanta yachashun. Paica Diosta manaraj rijsishpaca machadormi carca. Shinallataj rato pꞌiñarishpami pihuanpish macanacudor carca. Pero paica Diosmanta yachai callarishpaca huaquin cambiocunata rurashpami bautizarirca. Chaita ricushpami paipaj comunidadpi causajcunaca cushilla sintirircacuna. Shinapish bautizarishca qꞌuipallami shuj machashca runaca paihuan macanacusha nishpa paipaj huasiman chayarca. Callaripica cai huauquica mana macanacusha nircachu. Pero cai machashca runaca Jehová Diosmantami mana allita rimai callarica. Chaimi paica mana jarcari tucushpa, achcata colerashpa machashca runata macarca. ¿Imamantataj chaita rurarca? Paipaj ucu shungucamaca Diospaj yachachishcacunaca manaraj chayashcachu carca. Chaimantami yallitaj colerashpa chai runataca macarca.

⁹ Cai huauquica paipaj yuyaita cambiangapajmi esforzarirca (Proverbios 24:16). Huauqui ancianocunapaj ayudahuanmi cambiai tucurca. Chai huashaca paipish ancianomi tucurca. Shuj tutaca cai huauquica Tandanacuna Huasi canllapimi shayacurca. Chaipica cutinmi shuj machashca runaca shuj huauquita macasha nishpa cꞌuchuyarca. ¿Chaita ricushpaca cai huauquica imatataj rurarca? Cai huauquica mana colerashpami machashca runahuan parlarca. Qꞌuipacarin paipaj huasiman chayachunmi ayudarca. ¿Imamantataj chashna rurarca? Diospaj yachachishcacuna paipaj ucu shunguman chayajpimi mana rato colerana cashcata, humilde cana cashcata, cꞌuyaj cana cashcata intindirca. Chaita rurashpaca Yayitu Diostami cushichirca.

10. ¿Imata rurangapajtaj esforzarina canchij?

¹⁰ Huaquin cambiocunata rurangapajca achca huatacunami minishtirin (2 Pedro 1:5). Jehová Diostaca achca huatacunatachari sirvicunchij. Pero shungupi, yuyaipi cambiashpa catingapajmi esforzarina canchij. ¿Ima shinataj cambiai tucunchij? Ricushun.

¿ÑUCANCHIJ YUYAITA CAMBIANGAPAJCA IMALLATATAJ RURANA CANCHIJ?

11. ¿Imamantataj Diosta mañana canchij?

¹¹ Salmo librota quillcaj runa shinami Jehová Diosta mañana canchij. Paica: “¡Taita Dioslla, ñucapica chuya shunguta callarichihuai. Ñuca ucupica ima pandata mana ruraj espirituta cutin churahuai!” nishpami mañarca (Salmo 51:10). Mana alli yuyaicunata saquingapajca Jehová Diostami mañana canchij. ¿Yaya Dios ayudanataca imamantataj crinchij? Ezequielpaj punllacunapica sinchi shungu israelitacunami tiyarca. Chaita yachashpami Diosca: “Paicunamanca mushuj yuyaita, mushuj shungutami cusha. Rumi shunguta anchuchishpami, mushuj shunguta churasha” nirca (Ezequiel 11:19). Yayitu Diosca paicunapaj yuyaicunata cambiachunmi israelitacunata ayudasha nirca. Chashnallatajmi ñucanchijtapish ayudasha nin. ¿Manachu cai shimicunaca ñucanchijta animan?

12, 13. a) Salmo 119:59-pi nishca shinaca ¿imapitaj yuyana canchij? b) ¿Imatataj cada uno tapurina canchij?

¹² Tucui punllacunami Bibliata liyina canchij. Liyishcapipish cutin cutinmi yuyana canchij. Shinallataj mana alli munaicunata ima shina cambianatami yuyana canchij (Salmo 119:59-ta liyipai; Hebreos 4:12; Santiago 1:25). “Ñami tucuita alli ruracuni” nishpaca mana yuyanachu canchij. Ashtahuanpish Diablo pandachicushcata cuenta japishpaca utca cambiangapajmi esforzarina canchij.

¹³ Cashna nishpa tapurishunchij: ¿Envidiosochu cani? (1 Pedro 2:1). ¿Shujtaj llajtamanta cashcamanta, alli escuelacunapi estudiashca cashcamanta, cullquiyuj cashcamantachu jatun tucushca sintirini? (Proverbios 16:5). ¿Shujtaj llajtamanta gentecunata, pobrellacunataca imapaj mana valishcata shinachu ricuni? (Santiago 2:2-4). ¿Diablopaj ruraicunahuan chagrurishca cosascunatachu munani? (1 Juan 2:15-17). ¿Huainayanahuan, macanacuicunahuan chagrurishca peliculacunatachu ricunata munani? (Salmo 97:10; 101:3; Amós 5:15). Cai tapuicunapi yuyashca qꞌuipaca ñucanchij yuyaita cambiana cashcatachari cuenta japishun. Pero “jarcacuj pirca” shina mana alli yuyaicunata saquishpaca Jehová Diostami cushichishun (Salmo 19:14).

14. ¿Imamantataj alli amigocunata agllana canchij?

¹⁴ Alli amigocunatami agllana canchij. Huaquinpica pihuanmi yalli apanacunchij, paicuna shinami imatapish rurai, yuyai callarinchij (Proverbios 13:20). Trabajopi, escuelapica Jehová Dios shina yuyachunca mana ayudancunachu. Pero Tandanacuna Huasipica alli amigocunami tiyan. Paicunami cꞌuyajcuna cachun, Diostapish alli sirvichun ayudancuna (Hebreos 10:24, 25).