Jesús shina causashunchij huillashunchij tandanacuipi imalla ruranata ricuchij pꞌanga nishca tandanacuipaj ayudacuna
3-9 DE JUNIO
BIBLIAPI TIYAJ VALISHCA YUYAICUNA | GÁLATAS 4-6
“Apóstol Pablo parlashca chꞌimbapuraimantami yachana canchij”
it-1 pág. 65 párr. 1
Agar
Apóstol Pabloca chꞌimbapuraipi parlashca Agar huarmimantami parlarca. Agarca Israel llajtatami representan. Israelitacunaca Sinaí urcupi cashpami Diosmanca cantaca tucuipimi cazushun nishpa shuj pactota rurarcacuna. Chaipi ari ninacushca Leymi paicuna juchapi, huañuipi huatashca o esclavo shina cashcata ricuchirca. Chaimantami Bibliapica Agar huarmimanta parlashpaca: “Paimi esclavocuna cachun huahuacunata cun” nin. Israelitacunaca juchasapa cashcamantami Dioshuan ari ninacushcataca mana pajtachi tucurcacuna. Chashnami juchapi condenashca, juchamantaca huañuna carcacuna. Shinallataj cacharishca shina mana libres cai tucurcacuna (Jn 8:34; Ro 8:1-3). Apóstol Pablopaj punllacunapi Jerusalén llajtapish Agartami ricuchirca. Cai capital llajtaca israelitacunatami representaj carca. Chai llajtapish, chaipi causaj israelitacunapish esclavo shinami causacurcacuna. Cutin espíritu santohuan agllashca ungidocunaca ‘jahua pachapi caj Jerusalenpaj’ huahuacuna cashcatami ricuchin. Jahua pacha Jerusalenca Diospaj huarmi shinami can. Ima shinami Sara huarmica nunca mana esclava carca, chashnallatajmi “jahua pachapi caj Jerusalenca” nunca mana esclava carca. Sarapaj churi Isaacta Ismael llaquichisha nishca shinallatajmi, ‘jahua pachapi caj Jerusalenpaj’ huahuacunatapish, esclavo shina caj Jerusalenpaj huahuacuna llaquichisha nirca. Pero Agar huarmita paipaj churindijta llujchishpa cachashca shinallatajmi Jehová Diosca israelitacunataca saquirca, ña mana pajpaj pueblo cachun munarca (Gál 4:21-31; cai Jn 8:31-40-tapish ricui).
w14 15/10 pág. 10 párr. 11
Diospaj Reinopimi tucui shunguhuan cri
11 Abrahamhuan ari ninacushca o pactoca paipaj huahua huahuacuna Dios cusha nishca Allpata chasquijpimi pajtarirca. Shinapish chai ari ninacushcaca espiritualmentepish pajtarina cashcatami Bibliapica ricuchin (Gál. 4:22-25). Apóstol Pabloca Diospaj ayudahuanmi Abrahamhuan ari ninacushca pajtarinamanta parlarca. Paica Abrahampaj huahua huahuacunapuramanta shamuj Jesucristomi ashtahuan importante can, qꞌuipaca espíritu santohuan agllashca 144.000 ungidocunami can nircami (Gál. 3:16, 29; Apo. 5:9, 10; 14:1, 4). ‘Jahua pachapi caj Jerusalén’ o jahua pacha Diospaj organización nishpaca Diosta tucuipi cazuj angelcunatami nicun. Paicunami chai huahua huahuacunapaj mama shina can (Gál. 4:26, 31). Shinaca Abrahanhuan ari ninacushcapi nishca shinami jahua pacha Jerusalenpaj huahuacunaca Diosmanta tucuicunapaj bendicioncunata apamunga.
Bibliapi curita mashcaj shina mashcashunchij
w09 1/4 pág. 13
¿Yacharcanguichu?
Jesús Diosta mañacushpaca ¿imamantataj “Abba, Yayitu” nishpa mañarca?
Hebreo o arameo rimaipi ʼabbáʼ shimitaca “ñuca yaya” o “Yayitu” nishpami traducishcacuna. Bibliapica quimsa cutinmi cai shimica ricurin. Cai shimitaca jahua pachapi caj Yayitu Jehová Diosta mañangapajmi utilizashca. Jesuspish cai shimita nishpami mañarca. ¿Cai shimica imatataj nisha nin?¿Imamantataj importante can?
Shuj libropica: “Jesús causashca punllacunapica ʼabbāʼ shimica tucuicuna maipipish parlangapaj shimimi carca. Ashtahuanca huahuacunami familiapi parlaj shina paicunapaj yayata cꞌuyaihuan, respetohuan ningapaj utilizajcuna carca” ninmi (The International Standard Bible Encyclopedia). Uchilla huahuacuna rimai callarishpaca cai uyanayaj shimitami paicunapaj yayata nijcuna carca. Jesusca paipaj importante horaspimi chai shimita utilizarca. Huañungapaj ashalla horascuna illajpimi, Getsemaní nishca jardinpi carca. Chaipimi paipaj Yayaman mañacushpaca: “Abba, Yayitu” nishpa mañarca (Marcos 14:36, Traducción del Nuevo Mundo de las Santas Escrituras).
Ñajaman nishca libropica: “Griegocuna, romanocuna mandacui punllacunapi judío quillcashcacunapica Diosta ʼabbāʼ shimihuan ningapajca ashalla cutinmi quillcashca ricurin. Familiapurapi parlana shimi cashcamantami, chai shimita Diosman ningapajca mana alli cashcata ricushcangacuna” ninmi. Shinallataj: “Jesús paipaj Yayata “abba” nishpa mañashpaca, paipaj Yayahuan alli amistadta charishcata o achcata cꞌuyanacuj cashcatami ricuchin” ninmi. Bibliapi caishuj ishqui cutin ʼabbáʼ shimica apóstol Pablo quillcashca cartacunapimi ricurin. Chaimi apostolcunapaj punllacunapipish Jesusta punta catijcunaca cai shimita utilizajcuna cashcata yachanchij (Romanos 8:15; Gálatas 4:6).
w10 1/11 pág. 15
¿Yacharcanguichu?
¿Imamantataj apóstol Pabloca: “Ñuca aichapica, Mandaj Jesusmanta chugrichishcacuna alliyashcatami charini” nirca? (Gálatas 6:17).
▪ Primer siglopi Jesusta catijcunapajca Pablo rimashca shimicunaca huaquin yuyaicunatami intindichirca. Por ejemplo, ñaupa tiempopi guerrapi mishashpa preso apamushcacunata, templomanta shuhuajcunata, pacatucushpa risha nij esclavocunataca shuj rupacuj hierrohuanmi cuerpopi rupachishpa marcata o señalta churajcuna carca. Paicunapaj aichapi saquirij señalca pingaitami ricuchij carca.
Shinapish mana tucui señaltachu mana allita shina ricuj carcacuna. Achca gentecunami maijan tribumanta o religionmanta cashcata ricuchingapaj marcata o señalta cuerpopi apajcuna carca. Cai temamanta yachachij libroca: “Siriamanta cajcunaca Hadad y Atargatis nishca dioscunata adorajcuna cashcata ricuchingapajmi maqui mucupi, cunga tullupi señalta apajcuna carca. Cutin Dionisio nishca diosta adorajcunaca hiedra nishca hojatami paicunapaj cuerpopi dibujachishpa señalta churachijcuna carca” ninmi (Theological Dictionary of the New Testament).
Cai yuyaimanta huaquincunaca, ‘Yaya Diosmanta huillashpa purijpi contracuna macashpa chugrichishca alliyashca marca o señaltami Pabloca nicushcanga’ nincunami (2 Corintios 11:23-27). Pero apóstol Pablo Jesusta catij cashcata ricuchij señalcuna o “chugrichishcacuna alliyashcatami charini” nishpaca, Jesusta catij shina ima shinalla causashcatami nicushcanga. Mana paipaj cuerpopi chugrichishcacuna alliyashcamantachu parlacushcanga.
Bibliata rezashunchij
10-16 DE JUNIO
BIBLIAPI TIYAJ VALISHCA YUYAICUNA | EFESIOS 1-3
“Diosca pai munashcata pajtachingapajmi tucuita ruracun”
it-2 pág. 981 párr. 2
Pi mana yachashca
Jesucristo Mandanamanta. Apóstol Pabloca Cristomanta pi mana yachashcata ima nisha nishcatami tucuita quillcarca. Efesios 1:9-11-pica Diosca pi mana yachashcata pai munashca shina rurasha nicushcatami ricuchin ninmi. Cai versopica: “Ñaupamanmi paillataj rurasha nishca carca. Pai yuyarishca punllacuna pajtajpimi, jahua pachacunapi cajcunata, cai pachapi cajcunata, tucui ima tiyajta tandachishpa Cristopaj ucupi churanga. Ñaupaman agllashca cashcamantami, Cristomantaca japina cashcata charircanchij. Tucui imatapish rurajca, pai munashpa yuyarishca shinallatajmi pajtachicun” nircami. “Pi mana yachashca” nishpaca Diospaj Gobiernopi Jesucristo mandanatapishmi nicun. Pablo, “jahua pachacunapi cajcunata” nishpaca Jesucristohuan jahua pachapi mandagrijcunatami nicun. “Cai pachapi cajcunata” nishpaca cai Allpapi causagrijcunatami nin. Jesús paipaj discipulocunaman: “Taita Dios mandagrin pi mana yachashca pacalla cajtaca, paimari cancunamanca yachachishca” nishpaca Diospaj Mandanamanta parlacushcatami intindichirca (Mr 4:11).
w12 15/7 págs. 27, 28 párrs. 3, 4
Jehová Diosca paipaj familiatami tandachicun
3 Diospaj ruraicunaca siempremi paipaj munaita pajtachingapaj can. Chaimi Jehová Diosca, ‘pai yuyarishca punllacuna pajtajpi’ pai rurasha nicushcata o tucui paita sirvijcunata ‘tandachi’ callarishca (Efesios 1:8-10-ta liyipai). Puntaca paicunapaj Uma shina caj Jesucristohuan jahua pachapi causagrij ungidocunatami tandachin. Cai grupotaca huata 33-pi Pentecostés punllapimi, Jesús huañushca qꞌuipa, Jehová Diosca tandachi callarirca (Hech. 2:1-4). Jesús juchacunamanta huañushcamantami ungidocunaca Diospaj ñaupajpi cashcata ruraj shina ricurishpa huiñai huiñaita causai tucungacuna. Chaimantami paicunaca cushicushpa Diospaj “quiquin huahuata shina” chasquishcami canchij nincuna (Rom. 3:23, 24; 5:1; 8:15-17).
4 Qꞌuipaca Jesús mandacujpi cai Allpa paraíso cajpi chaipi causagrijcunatami tandachin. Chai grupopica “pi mana yupaipaj yallitaj achcacunami” can (Apo. 7:9, 13-17; 21:1-5). Shinallataj huaranga huatata Jesús mandacujpi miles, millones huañushcacuna causarijcunapish chai grupopimi can (Apo. 20:12, 13). Chashnami huañushpa causarishcacunahuanpish tandalla causana opurtunidadta charishun. Chai huaranga huata tucurigrijpica, ‘cai pachapi cajcunapajca’ shuj tucuri pruebami tiyanga. Chai pruebapi Yaya Diosta tucui shunguhuan cazushpa catishpaca, Diospaj huahuacuna shinami cai pachapi causangacuna (Rom. 8:21; Apo. 20:7, 8).
Bibliapi curita mashcaj shina mashcashunchij
w13 15/2 pág. 28 párr. 15
Diospaj ñaupajpi alli ricurinata ima jarcachun ama saquishunchij
15 Diospaj munaita mana shaicushpa ruracushpaca shujtajcunapaj allipajpishmi ruranchij. Éfeso llajtapi tiyaj congregacionmanca apóstol Pabloca: “Chaimi cancunamanta llaquicunata ñuca apacujpipish, ama llaquirichun rogani. Chaicunaca cancunapaj allipajmi” nishpami quillcarca (Efes. 3:13). ¿Imamantataj ñuca apacuj llaquicunaca “cancunapaj allipajmi” nirca? Apóstol Pabloca llaquicunata apacushpapish paipaj huauquicunata ayudashpami catirca. Chashnami Diospajta ruranaca tucuimanta yalli valishca cashcata ricuchirca. Llaquicuna ricurijpi Diosmanta caruyashpaca paipaj amigo cana, Diosmanta huillana, imata shuyacushcapish yangalla cashcatami ricuchinman carca. Shinaca apóstol Pabloca llaquicunata ahuantashpami Jesusta catij canaca valishca cashcata ricuchirca. Shinallataj Cristota catingapaj ima sacrificiotapish ruranaca alli cashcata ricuchirca.
cl pág. 299 párr. 21
“Cristopaj cꞌuyaita rijsina”
21 Jesucristo shina shujtajcunata cꞌuyashpaca ñucanchij tucui pudishcata rurashpa, llaquishpa imata minishticujpica ayudashpa, shungumanta perdonanacushpami pai laya cꞌuyashcata ricuchishun. Chashnami Jesús ima laya cashcata yachai tucunchij. Shinallataj ñucanchij causaipi, experienciapi, “Cristopaj cꞌuyaita rijsinaca tucui yachaitapish yalli jatun” cashcatami intindishun. Jesusca ñucanchij cꞌuyaj Yayitu Jehová Dios shinami carca. Shinaca amataj cungarishunchijchu, Jesús shina cangapaj esforzaricushpaca Diospajmanmi ashtahuan cꞌuchuyashun.
Bibliata rezashunchij
17-23 DE JUNIO
BIBLIAPI TIYAJ VALISHCA YUYAICUNA | EFESIOS 4-6
“Dios cushca tucui macanacunata churarichij”
Jovencuna, Diablota mishai tucunguichijmi
APÓSTOL Pabloca ñucanchijtaca shuj macanacuj soldadohuanmi chꞌimbapurarca. Ñucanchijca gentecunahuanca mana macanacucunchijchu. Ashtahuanpish Diablohuan, millai angelcunahuanmi macanacucunchij. Paicunaca achca huatacunata macanacucushcamantami alli macanacujcuna can. Chaimantami ñucanchijpajca chai macanacuita mishanaca sinchi ricuringa. Ashtahuantajca jovencunapajmi mishanaca sinchi ricurin. ¿Jovencunaca Diablota, millai angelcunatapish mishai pudingachu? Ari mishai pudincunami. Jehová Dios fuerzata cujpimi mishashpa caticuncuna. Ashtahuanpish alli soldadocuna shinami jovencunaca “Dios cushca tucui macanacunata” churarishcacuna (Efesios 6:10-12-ta leyipai).
w18.05 págs. 22-23 párrs. 4, 7, 10
Jovencuna, Diablota mishai tucunguichijmi
4 Cai cinturonta churarij shinami ñucanchijpish Diospaj Shimita yachashpaca panda yachachishcacunahuan llaquichichunca mana saquishun (Juan 8:31, 32; 1 Juan 4:1). Biblia yachachishcacunata cꞌuyashpaca Diosta cazunaca jahuallami canga. Chashnami ‘pechopi fierro churanata’ churarishca shina cashun (Salmo 111:7, 8; 1 Juan 5:3). Ashtahuancarin Bibliata alli intindishpaca contracuna ima nijpica mana manchashpami difindiri tucushun (1 Pedro 3:15).
7 Pechopi fierro churarinaca Dios mandashcacunatami ricuchin. Cai mandashcacunata pajtachishpallami shungutaca alli cuidashun (Proverbios 4:23). Shuj soldadoca pechopi fierro churarinata ladoman saquishpa shujtaj materialhuan rurashca churanataca mana churarijchu carca. Chashnallataj Diospaj mandashcacunata ladoman saquishpa ñucanchij yuyashcacunallataca mana catinachu canchij. Ñucanchij yuyaicuna Diospaj yuyaicunahuan mana igual cashcamantami shungutaca mana cuidai tucunchij (Proverbios 3:5, 6). Chaimantami pechopi fierro churana ñucanchij shunguta cuidacushcata o mana cuidacushcata ricurayana canchij.
10 Chai soldadocuna shinami Diosta sirvijcunapish cai zapatocunata churarishca laya cushichij huillaita huillanaman rinchij (Isaías 52:7; Romanos 10:15). Chashna churarishca cashpapish gentecunaman mana manchashpa huillangapajmi esforzarina canchij. 20 huatacunata charij Robertoca: “Escuelapica ñuca amigocunaman huillanataca achcatami mancharcani. Pingaisiqui cashcamantachari chashna sintirircani. Pero cunanca ñuca edadta charij jovencunaman Diosmanta huillanataca achcatami munani” ninmi.
w18.05 págs. 25-26 párrs. 13, 16, 20
Jovencuna, Diablota mishai tucunguichijmi
13 Diablo ñucanchijta llaquichingapajca Yaya Diosmantami llullacunata nin. Paica: ‘Diosca ñucanchijta mana cꞌuyanchu, paipajca imapajpish mana valinchijchu’ nishpa yuyachunmi munan. 19 huatacunata charij Aidaca: “Yayitu Diosca carupi cashcatami sintini, mana ñuca amigo casha ninchu” ninmi. Pero chashna ama sintiringapajca ¿imatataj ruran? Paica: “Tandanacuicunaman rishpami ñuca crishcacunata sinchiyachini. Ñaupaca tandanacuicunapica ñuca comentariocunata pi mana uyanachijta laya sintishpami maquita mana alzaj carcani. Pero cunanca alli prepararishpami comentariota cungapajpish esforzarini. Caita rurana mana jahuallachu can. Pero chaita rurashpami cushilla sintirini. Ashtahuancarin turi ñañacunami ñucataca achcata animan. Tandanacuicunamanta tigrashpaca Jehová achcata cꞌuyashcatami sintini” ninmi.
16 Ima shinami ricushcanchij cascoca uma ama ima tucuchunmi jarcan. Chai layallatajmi ‘quishpichishca canata shuyanapish’ ñucanchij yuyaicunata cuidan (1 Tesalonicenses 5:8; Proverbios 3:21). Chaimantami Dios cusha nishcacunapi siempre yuyana canchij. Chashnami llaquicuna ricurijpipish mana desanimarishun (Salmo 27:1, 14; Hechos 24:15). Cascotaca maquipi aisashpaca mana purinachu canchij. Ashtahuanpish cascota umapi churarij shinami Dios cusha nishcacuna pajtarinata tucui shunguhuan crina canchij.
20 Pabloca cai espadataca Diospaj Shimihuanmi chꞌimbapurarca. Ñucanchij crishcacunata difindingapaj, ñucanchij yuyaicunata cambiangapajmi Diospaj Shimita alli utilizanata yachana canchij (2 Corintios 10:4, 5; 2 Timoteo 2:15). ¿Canpish Bibliata alli utilizanata ima shinataj yachai tucungui? 21 huatacunata charij Sebastián jovenmanta yachashun. Paica: “Bibliata leyicushpaca cada capitulomantami shuj versota anotani. Chashnami ñuca munashca versocunata tandachishpa shuj listata rurani. Chaita rurashpami Jehová yuyashca shina yuyani” nircami. Cutin párrafo 8-pi parlashca Danielca: “Bibliata leyicushpaca huaquin versocuna huillanapi ima shina ayudaj cashcatami ricuni. Gentecunaca ñuca Bibliamanta yachanata munajtami ricuncuna. Ashtahuancarin paicunata tucui shunguhuan ayudanata munajta ricushpami ñuca huillashcata alli uyan” ninmi.
Bibliapi curita mashcaj shina mashcashunchij
it-2 pág. 938 párr. 5
Tucuipi chuya cana
Paipaj espíritu santo. Jehová Diosca paipaj fuerzata o espíritu santotami controlan. Shinallataj cai espirituca Diospaj munaitami siempre pajtachin. Diospaj fuerzaca limpio, chuya, jucha illaj, allita rurangapaj Diosllataj chꞌicanyachishcami can. Chaimantami Bibliapica espíritu santoca “jucha illaj”, y ‘jucha illajta rurajmi’ nin (Sl 51:11; Lu 11:13; Ro 1:4; Ef 1:13). Cai espirituta charijcunaca jucha illajta, chuyata rurangapajmi fuerzata charincuna. Cutin ima laya cashpapish mana allicunata o mapacunata rurashpaca, ‘Diospaj jucha illaj Espiritutami llaquichin’ (Ef 4:30). Espíritu santoca Diospaj munai maijan cashcatami ricuchin. Chaimantami cai espíritu mana shuj persona cajpipish llaquichi tucunchij. Mana allicunata ruracushpaca Diospaj espíritu ‘ima nishcata mana uyasha’ nij layami can (1Te 5:19). Chai mana alli ruraicunata, mapa ruraicunata mana saquijpica jucha illaj espirituta pꞌiñachi o chugrichi tucunchij. Chashna rurashpaca Diospaj contra tucushcatami ricuchishun (Isa 63:10). Shinaca pipish espíritu santota llaquichishpaca chai espiritutami pꞌiñashpa cꞌamij tucuncuna. Chaica jatun juchami can. Jesusca chai juchataca, cunanpish ni shamuj punllapipish manataj perdonashcachu canga nircami (Mt 12:31, 32; Mr 3:28-30; ESPÍRITU nishca temata ricui)
it-1 pag. 255 párr. 5
Ashtahuan ashtahuan charinallata munana
Ruraicunahuanmi ricuchin. Ashtahuan ashtahuan charinallata munaj gentecunaca paipaj ruraicunahuanmi chai mana alli munaita, mitsa cashcatapish ricuchincuna. Apóstol Santiagoca, “millai munaicunata chichushca qꞌuipami, juchaca huacharin” nircami (Snt 1:14, 15). Shinaca charinallata munajcunaca paicunapaj ruraicunahuanmi ricuchin. Apóstol Pabloca quiquinpajlla ashtahuan charinata munashpa mitsa canaca, “rurashcalla diosta” catij layallatajmi nircami (Ef 5:5). Charinallata munaj gentecunaca paicuna imata munashcatami paicunapaj diosta shina ricuncuna. Shinallataj charina yuyai solohuan cashcamantami ñucanchijta Ruraj Yaya Diosta adoranata, sirvinata ladoman saquishpa imata munashcataraj mashcancuna (Ro 1:24, 25).
Bibliata rezashunchij
24-30 DE JUNIO
BIBLIAPI TIYAJ VALISHCA YUYAICUNA | FILIPENSES 1-4
“Imamantapish ama llaquilla canguichij”
“Pipish mana yachaipaj Diospaj sumaj causaica huaquichinmi”
10 ¿Llaquicunahuan cashpapish Diospaj ‘sumaj causaita’ charingapajca imatataj rurana canchij? Pabloca Filipospi causaj huauqui panicunamanca, ama preocuparingapajca Diosta mañanguichij nircami. Ñucanchijpish llaquicunamanta preocupados cashpaca Jehová Diostami mañana canchij (1 Pedro 5:6, 7-ta leyipai). Jehová Dios ayudanata crishpa, pai cushca bendicioncunamanta pagui nishpami tucui shunguhuan mañana canchij. Shinallataj ‘ñucanchij imata mañashcatapish, yuyashcatapish ashtahuan yallita ruraj’ cashcatami tucui shunguhuan crina canchij (Efesios 3:20).
“Pipish mana yachaipaj Diospaj sumaj causaica huaquichinmi”
7 Pablo escribishcata leyishpaca Filiposmanta huauqui panicunaca Pablotapish Silastapish ima shina llaquichishcata, paicuna mana yuyashca shina Jehová Dios ayudashcatapishmi yuyarishca cangacuna. ¿Pabloca imatataj yachachirca? Llaquicuna japijpi mana preocuparina cashcatami yachachirca. Shinallataj Diosta mañajpica paillataj tranquilo sintirichun ayudanatami intindichirca. Pabloca ‘pipish mana yachaipaj Diospaj sumaj causaimantapishmi’ parlarca. ¿Chaita parlashpaca imatataj nisha nicurca? Jehová Diosca ñucanchij mana yuyashca shina rurashpa ayudai tucushcatami nisha nicurca. Huaquinpica llaquicunahuan cashpaca mana imata rurai tucushca layami sintirinchij. Pero Jehová Diosca ñucanchijta ima shina ayudanataca allimi yachan. Chaimantami ñucanchijta ayudangapajca imatapish rurai tucun (2 Pedro 2:9-ta leyipai).
“Pipish mana yachaipaj Diospaj sumaj causaica huaquichinmi”
16 ¿Diospaj “sumaj causaita” charishpaca ima shinataj sintirishun? Bibliapica: ‘Diosca cancunapaj shungucunata, cancunapaj yuyaicunatapish Cristo Jesuspimi huaquichinga’ ninmi (Filipenses 4:7). Ñaupa punllacunapica enemigocuna ama yaicuchunmi soldadocunaca muyundij llajtata cuidaj carca. Chai soldadocunamanta parlashpami, paicunami “huaquichinga” nijcuna carca. Filipos llajtata soldadocuna cuidacujta yachashpami tucui chaipi causajcunaca tranquilo dormijcuna carca. Filipospi causajcuna shinallatajmi “Diospaj sumaj causaita charishpaca” tranquilo sintirishun. Jehová Dios ñucanchij causaipi cuidanata, ayudanataca tucui shunguhuanmi crina canchij (1 Pedro 5:10). Chashna tucui shunguhuan crishpaca mana yallitaj preocuparishunchu.
Bibliapi curita mashcaj shina mashcashunchij
Filipenses 2:17, Traducción del Nuevo Mundo de las Santas Escrituras
it-2 pág. 525 párr. 9
Ofrendacuna
Vinota tallina. Moisesman cushca Leypi mandashca shinaca, israelitacunaca Diosman sacrificiocunata cucushpaca vinotapishmi tallijcuna carca. Ashtahuantajca Dios cusha nishca Allpapi ña cashpami chashna sacrificiocunataca cujcuna carca (Nú 15:2, 5, 8-10). Diosman sacrificiocunata cucushpaca alli vinotami altar jahuapi tallijcuna carca (Nú 28:7, 14-taca Éx 30:9; Nú 15:10-huan comparai). Apóstol Pablo Filipos crijcunaman quillcashpaca: “Diosta sirvicushcamanta, cancuna crishcamantapish, Diosman sacrificiota cushca jahuapi, vinota tallicushca shinami ñucaca cashcani. Chaimantami tucui cancunahuan cushicuni” nircami. Apóstol Pabloca tucui paipaj causaihuan huauqui panicunata sirvicushcamantami Diosman sacrificiota cushca jahuapi vinota tallicushca shinami cashcani nirca (Flp 2:17). Pai huañuna ñaupallami Timoteoman quillcashpaca: “Ñucaca Taita Diosman cushpa rupachinapaj animal jahuapi vinota tallicushca shinami cani. Ñuca rina punllapish cꞌuchullapimi” nircami (2Ti 4:6, NM).
Filipenses 3:11, NM
w07 1/1 pág. 26 párr. 5
Punta causarinaca ñami callarishca
5 ‘Diospaj Israelpurapi’ caj ungidocunami Apunchij Jesushuan jahua pachapi tupashpa paihuan tandalla “huiñaita” causangacuna (Gálatas 6:16; 1 Tesalonicenses 4:17). Caitami “utca causarinapi” o “punta causarinapi causarijcuna” nin (Filipenses 3:10, 11, NM; Apocalipsis 20:6). Chai shina causarina pajtarishca qꞌuipaca, cai Allpapi millones gentecuna causarina punllami chayamunga. Paicunaca cai Allpapi huiñaita causana munaihuanmi causaringacuna. Shinaca jahua pachapi causagrinata shuyacushpapish o cai Allpapi causanata shuyacushpapish, cai punta causarinapi causarijcuna nishca temamanta yachanatami munanchij ¿nachu? Chai causarinaca ¿ima shinataj can? ¿Ima horataj chaica pajtan?
Bibliata rezashunchij