YACHAI 51
¿Ñucanchij rimashcahuanca ima shinataj Jehová Diosta cushichi tucunchij?
Jehová Diosca ñucanchijtaca rimai tucuchunmi rurashca. Chaica shuj sumaj regalomi can. Paica ñucanchij ima shina rimashcatami alli uyacun (Santiago 1:26-ta liyipai). Pero ¿ñucanchij rimashcahuanca ima shinataj Diosta cushichi tucunchij?
1. ¿Dios cushca regalohuanca imatataj rurana canchij?
Bibliapica: “Caishuj chaishujta animachichij caishuj chaishujta sinchiyachichij” ninmi (1 Tesalonicenses 5:11). ¿Pi animota minishtishcata yachanguichu? ¿Paita animachingapajca imatataj rurana cangui? Allita rurashcamantami felicitana cangui. Shinallataj paita cꞌuyashcatami ricuchina cangui. ¿Animachingapajca ima versotataj liyinguiman? Animachingapajca achca versocunami tiyan. Pero can ima shina rimashcaca shujtajcunata animachi tucushcata o llaquichi tucushcatami yuyarina cangui. Chaimantami siempre cꞌuyaihuan, alli shimicunahuan parlana cangui (Proverbios 15:1).
2. ¿Ima laya rimaicunamantataj jarcarina canchij?
Bibliapica: “Cancunapaj shimimantaca, ima mapa shimicuna ama llujshichun” ninmi (Efesios 4:29-ta liyipai). ¿Cai shimicunaca imatataj nisha nin? Ñucanchijca shujtajcunata llaquichina munaihuanca mapa shimicunata, millai shimicunata, llaquichij shimicunataca mana ninachu canchij. Shinallataj huashalla rimanata, shujtajcunamanta llullacunataca mana ninachu canchij (Proverbios 16:28-ta liyipai).
3. ¿Allicunallata parlangapajca imatataj rurana canchij?
Ñucanchij rimashcacunaca ñucanchij imata yuyashcata, shungupi imata charishcatami ricuchin (Lucas 6:45). Chaimantami ñucanchij yuyaica cashcata ruraj, cꞌuyaj, chuya, alli nishca cana can (Filipenses 4:8). Caita rurangapajca alli diversioncunata, alli amigocunatami agllana canchij (Proverbios 13:20). Shinallataj manaraj rimashpami alli yuyanaraj canchij. Shujtajcuna can nishca shimicunata uyashpa ima shina sintirishcapi yuyai. Bibliapica: “Maijancunaca imata rimashpapish, espadahuan chugrichishca shinami saquincuna. Ashtahuanpish yachaisapacunaca sumaj shimicunahuan jambincunami” ninmi (Proverbios 12:18).
ASHTAHUAN YACHAI
Jehová Diosta cushichingapaj, shujtajcunata animangapaj ima shina rimana cashcata yachashun.
4. Ima nigrishcapi alli yuyai
Tucuicunami maipica mana allita rimashcamanta arrepintirinchij (Santiago 3:2). Gálatas 5:22, 23-ta liyipai. Qꞌuipaca cai catij tapuicunatami yachashun:
¿Imata nigrishcata, ima shina nigrishcata alli yuyangapajca Gálatas 5:22, 23-pi tiyaj yuyaicunamantaca maijantataj Jehová Diosman mañanguiman? ¿Cai yuyaicunaca ima shinataj canta ayudai tucun?
1 Corintios 15:33-ta liyipai, NWT. Qꞌuipaca cai catij tapuicunatami yachashun:
Mana alli amigocunahuan tandanacushpa, mana allicunata cutin cutin uyashpa o ricushpaca canpishmi mana allicunata rurai o rimai callaringui. ¿Cai cierto cashcataca ima shinataj yachanchij?
Mana allicunata ricushpa, uyashpaca mana allicunatami rimai callarishun. Cutin allicunata rurashpami sumajta rimai callarishun.
Eclesiastés 3:1, 7-ta liyipai. Qꞌuipaca cai catij tapuicunatami yachashun:
¿Ima horastaj rimana cangui? ¿Ima horastaj upalla saquirina cangui?
5. Shujtajcunamanta allita parlai
¿Shujtajcunata ama llaquichij shimicunahuan rimangapajca imatataj rurana canchij? VIDEOTA ricui. Qꞌuipaca cai catij tapuicunatami yachashun:
¿Videopi ricurishca huauquica shujtajcunamanta mana allita parlanataca imamantataj saquisha nirca?
¿Chaipajca imatataj rurarca?
Eclesiastés 7:16-ta liyipai. Qꞌuipaca cai catij tapuitami yachashun:
¿Shujtajcunamanta mana allita rimana yuyaicuna shamujpica imatataj yuyarina canchij?
Eclesiastés 7:21, 22-ta liyipai. Qꞌuipaca cai catij tapuicunatami yachashun:
Shujtajcuna canmanta mana allita nishca cajpica can ama pꞌiñarichunca, ¿ima shinataj cai versocunaca ayudanga?
6. Cambaj familiahuan cꞌuyaihuan parlai
Jehová Diosca familiahuan cꞌuyaihuan, alli parlachunmi munan. VIDEOTA ricui. Qꞌuipaca cai catij tapuitami yachashun:
¿Familiahuan cashpa cꞌuyaihuan parlachunca imataj ayudanga?
Efesios 4:31, 32-ta liyipai. Qꞌuipaca cai catij tapuitami yachashun:
¿Familia ucupi cushilla cangapajca ima shinataj parlana canchij?
Jehová Diosca paipaj Churi Jesusmanta imata yuyashcatami nirca. Mateo 17:5-ta liyipai. Qꞌuipaca cai catij tapuitami yachashun:
¿Familiahuan parlacushpaca ima shinataj Jehová Diospaj ejemplota cati tucungui?
Shujtajcuna allita rurashcamanta felicitai.
HUAQUINCUNACA: “Ñuca ima yuyashcatami nini. Shujtajcuna mana munajpica paicunapaj problemami” nincunami.
¿Cashna nijcunahuanca de acuerdochu cangui? ¿Imamanta?
YUYARISHUNCHIJ
Ñucanchij rimashcacunaca shujtajcunata cushichi tucunmi o llaquichi tucunmi. Chaimantami imata ninata, ima horas ninata, ima shina ninatapish alli yuyanaraj canchij.
Yuyaringapaj tapuicuna
¿Shujtajcunata cushichingapajca ima shinataj rimana cangui?
¿Shujtajcunata ama llaquichingapajca ima shinataj mana rimana cangui?
¿Cꞌuyaihuan, allicunallata parlangapajca imataj ayudanga?
CAICUNATAPISH RICUI
¿Allita parlangapajca imataj ayudanga?
¿Malas palabrasta ama ningapajca imataj ayudanga?
“¿Malas palabrasta rimanaca allichu can?” (jw.org paginapi ricui)
Shujtajcunamanta ama huashalla parlangapaj imata rurai tucushcata ricui.
Jehová Dios shuj runata mana alli rimaicunata saquichun ima shina ayudashcata liyi.
“Ñuca ima laya causacushcapimi yuyai callarircani” (Huillaj, 1 de agosto de 2013)