YACHAI 41
¿Aichapi chayarinamantaca Bibliapica imatataj yachachin?
Achca gentecunaca aichapi chayarinamanta parlangapajmi pingaita charincuna. Shinapish Bibliapica chayarinamantaca respetohuanmi parlan. Ñucanchijta ruraj Jehová Diosca chayarinamanta imata yuyashcata yachachunmi ñucanchijmanca Bibliata cushca. Paillami ñucanchijpaj ima alli cashcata yachan. Yayitu Diosca paita cushichichun, huiñai causaita charingapaj imata rurana cashcatapishmi yachachin.
1. ¿Aichapi chayarinamantaca Jehová Diosca imatataj yuyan?
Chayarinaca Jehová cushca regalomi can. Paica cazarashcacunalla chayarinacushpa cushicuchunmi munan. Chayarinacushpami cusa huarmicunaca huahuacunata chari tucuncuna. Paicunapurapishmi cꞌuyaita ricuchi tucuncuna. Bibliapica: “Huambraraj cashpa cazarashca quiquin huarmillahuan cushicungui” ninmi (Proverbios 5:18, 19). Jehová Diosca cazarashcacuna mana huainayashpa causachunmi munan. Chaimantami Diosta sirvijcunaca mana huainayana can (Hebreos 13:4-ta liyipai).
2. ¿Huainayanaca imataj can?
Bibliapica: ‘Huainayajcunaca Dios mandacujpica imata mana japingachu’ ninmi (1 Corintios 6:9, 10). Huainayana shimitaca griego rimaipica pornéia ninmi. Bibliata quillcajcunaca huainayanamanta parlangapajmi chai shimita churarcacuna. Bibliapica huainayanamanta parlashpaca manaraj cazarashpa chayarinata,a cꞌaripura huarmipura chayarinata, animalcunahuan chayarinatami nin. Huainayanamanta caruyashpaca Jehová Diostami cushichishun. Ñucanchijpish cushillami causashun (1 Tesalonicenses 4:3).
ASHTAHUAN YACHAI
¿Huainayana juchapi ama urmangapajca imatataj rurana canchij? ¿Mapa ruraicunamanta caruyashpaca ima bendicioncunatataj charishun? Ricushun.
3. Huainayanamanta caruyai
Diosta sirvij Joseca juchapi ama urmangapajmi esforzarirca. Génesis 39:1-12-ta liyipai. Qꞌuipaca cai catij tapuicunatami yachashun:
¿Joseca imamantataj juchapi mana urmarca? (Génesis 39:9-ta ricui).
¿Joseca allitachu rurarca? ¿Imamantataj chashna ningui?
José shina huainayanapi ama urmangapajca, ¿imatataj jovencunaca rurana can? VIDEOTA ricui.
Jehová Diosca huainayanamantami caruyachun munan. 1 Corintios 6:18-ta liyipai. Qꞌuipaca cai catij tapuicunatami yachashun:
¿Imata rurashpataj huainayanapi urmai tucunchij?
¿Huainayanamantaca ima shinataj caruyai tucungui?
4. Tentacioncunamantaca caruyai tucunguimi
¿Imamantataj huainayana juchamanta caruyanaca sinchi cai tucun? VIDEOTA ricui. Qꞌuipaca cai catij tapuicunatami yachashun:
¿Videopi ricurij huauquica paipaj ruraicunahuan, paipaj yuyaicunahuan paipaj huarmita traicionai tucushcata cuentata cushpaca imatataj rurarca?
Diosta alli sirvijcunapishmi chai mana alli yuyaicunamantaca jarcarina can. ¿Huainayanapi ama cutin cutin yuyacungapajca imatataj rurana cangui? Filipenses 4:8-ta liyipai. Qꞌuipaca cai catij tapuicunatami yachashun:
Filipenses 4:8-pi nishca shinaca ¿imacunallapitaj yuyana canchij?
¿Diosta sirvina, Bibliata liyinaca huainayanapi ama urmachunca ima shinataj ayudan?
5. Diospaj mandashcacunami ñucanchijtaca ayudan
Jehová Diosca ñucanchijpaj ima alli cashcataca allimi yachan. Chaimantami huainayanamanta caruyajpica llaquipi urmachun mana saquinga. Proverbios 7:7-27-ta liyipai o cai VIDEOTA ricui. Qꞌuipaca cai catij tapuicunatami yachashun:
¿Videopi parlaj jovenca huainayana juchapica ima shinataj urmarca? (Proverbios 7:8, 9-ta ricui).
Proverbios 7:23, 26-pi nishca shinaca huainayanapi urmashpaca llaquicunatami charishun. Pero ¿huainayanamanta caruyashpaca ima shinataj causashun?
¿Huiñai huiñaita cushilla causangapajca imamantataj huainayanamanta caruyana canchij?
Huaquincunaca cꞌaripura, huarmipura mana chayarina cashcata Bibliapi liyishpaca: “Diosca ñucanchijtaca mana cꞌuyanchu” nincunami. Pero Jehová Diosca cꞌuyaj cashcamantami tucuicuna huiñai huiñaita, cushilla causachun munan. Chaipajca pai munashca shinami causana canchij. 1 Corintios 6:9-11-ta liyipai. Qꞌuipaca cai catij tapuicunatami yachashun:
¿Jehová Diosca cꞌaripura, huarmipura chayarijcunallatachu mana alli ricun?
Diospaj ñaupajpi alli cangapajca tucuicunami ñucanchij causaita allichina canchij. ¿Chaita ruranaca allichu can? Salmo 19:8, 11-ta liyipai. Qꞌuipaca cai catij tapuicunatami yachashun:
¿Huainayanamanta Dios ima nishcata cazunaca allichu can? ¿Imamantataj chashna ningui?
Jehová Diosca paipaj yachachishcacunahuanmi huainayanapi ama urmachun ayudashca. Cantapishmi ayudanga.
HUAQUINCUNACA: “Cꞌuyai tiyajpica aichapi chayarinaca allimi can” nincunami.
¿Quiquinca imatataj ninguiman?
YUYARISHUNCHIJ
Jehová Diosca cazarashca cꞌari huarmicunallami chayarichun munan.
Yuyaringapaj tapuicuna
¿Huainayanaca imataj can?
¿Huainayanapi ama urmangapajca imataj ayudanga?
¿Huainayanamanta Dios ima nishcata cazunaca imamantataj alli can?
CAICUNATAPISH RICUI
Shuj cꞌari, shuj huarmi igual causangapaj imamanta Yaya Dios cazarachun munashcata yachai.
“¿Manaraj cazarashpa ishqui causanaca allichu can?” (jw.org paginapi ricui)
Cꞌaripura, huarmipura chayarinamanta Bibliapi ima nishcaca shujtajcunata pꞌiñangapajca mana canchu. Caimanta ashtahuan yachai.
¿Huainayana juchacunapi ama urmangapajca Bibliaca ima shinataj ayudan?
“¿Sexo oralca aichapi chayarinallatajchu can?” (jw.org paginapi ricui)
Shuj runaca homosexualmi carca. Pero Diosta cushichingapajmi paipaj causaita cambiarca. Paimanta yachangapajca “Respetohuanmi tratarcacuna” nishcata liyi.
“Bibliata yachashpami cambiashcacuna” (Huillaj, 1 de abril de 2011)
a Mana cazarashcapura aichapi chayarinaca huainayanami can. Cꞌaripaj huarmipaj charishcata shimipi churashpa mapata rurana, siqui ladota sexota charinapish huainayanami can. Mapa munaihuan cꞌaripaj o huarmipaj charishcata japirinapish huainayanami can.