¿Pꞌiñarinamantaca Bibliapica imatataj yachachin?

Bibliaca caitami yachachin

Bibliapica yallitaj pꞌiñarijlla runaca shujtajcunata llaquichinllami ninmi (Proverbios 29:22). Maipica ima razón tiyashcamantami pꞌiñarinchij. Pero Bibliapica imamantapish jahualla pꞌiñarijcunaca jatun llaqui punllapica mana quishpiringacunachu ninmi (Gálatas 5:​19-​21). Ama dimastij colerangapajca Bibliapi tiyaj consejocunami ayudanga.

• ¿Pꞌiñarinaca allichu can?

• ¿Maipica imamantataj coleranaca mana alli can?

• ¿Ama yallitaj pꞌiñaringapajca imatataj rurana canchij?

• Pꞌiñarinamanta parlaj versocuna

¿Pꞌiñarinaca allichu can?

Maipica allimi can. Huaquinpica ima razón tiyashcamantami pꞌiñarinchij. Por ejemplo, Diosta sirvij Nehemías runaca contracuna Diosta sirvijcunata llaquichicushcamantami colerarca (Nehemías 5:6).

Maipica Yaya Diosllatajmi pꞌiñarin. Por ejemplo, ñaupa tiempopica israelitacunaca Yaya Diosllata adorashun nishpami ari nircacuna. Pero chaita ruranapaj randica yanga dioscunatami adorarcacuna. Chaimantami Mandaj Diosca nina sindirij shina pꞌiñarirca (Jueces 2:​13, 14). Jehová Diosca ima razón tiyashcamantami pꞌiñarin. Pero pꞌiñarishpapish controlarinataca allimi yachan (Éxodo 34:6; Isaías 48:9).

¿Maipica imamantataj coleranaca mana alli can?

Yallitaj colerana o deganallamanta coleranaca mana allichu can. Achca cutincunami ñucanchijca juchayuj cashcamantaca chaita ruranchij. Ishqui ejemplomanta yachashun:

• Cainca Yaya Dios paipaj ofrendata mana chasquijpimi achcata colerarca. Yallitaj pꞌiñarishca cashcamantami paipaj huauquita huañuchirca (Génesis 4:​3-8).

• Nínive llajtapi causajcuna millaita rurashcamanta arrepintirijpica Yaya Diosca perdonarcami. Chaimi Jonasca mana jahuallata pꞌiñarirca. Mandaj Diosca Jonastaca deganallamanta coleranapaj randica arrepintirishcacunata llaquinami cangui nircami (Jonás 3:​10–​4:​1, 4, 11).a

Cai ejemplocunaca yallitaj pꞌiñarishpa mana controlarishpaca Diospaj munaita mana pajtachi tucushcatami ricuchin (Santiago 1:​20).

¿Ama yallitaj pꞌiñaringapajca imatataj rurana canchij?

• Mana utca pꞌiñarishpaca sinchi runa shina cashcatami yuyarina canchij. Huaquincunaca imamantapish rato colerashpaca sinchi runa cashcatami ricuchinchij nincunami. Pero mana chashnachu can. Bibliapica: “Jahualla pꞌiñarinata yuyaipi mana jarcarij runaca, muyundij pirca urmashca pueblo shinami” ninmi (Proverbios 25:28; 29:11). Cutin mana utca pꞌiñaringapaj esforzarishpaca alli yuyaj, sinchi runa shina cashcatami ricuchinchij (Proverbios 14:29). Bibliapica: “Mana utca pꞌiñarij runaca, pitapish jahualla mishajta yalli allimari” ninmi (Proverbios 16:32).

• Pꞌiñarishca horas imatapish rurashcamanta llaquiri tucushcatami yuyarina canchij. Salmo 37:8-pica: “Pꞌiñarinata saqui. Pꞌiñarinata cungari. Ima mana allita ruranataca ama chai yuyailla caichu” ninmi. Cai verso nishca shinaca ñucanchij rimaicunahuan, ruraicunahuan shujtajcunata llaquichinapaj randica pꞌiñarinamantami jarcarina canchij. Efesios 4:​26-pica: “Pꞌiñarishpapish ama juchallichijchu” ninmi.

• Manaraj pꞌiñarishpami anchurina canchij. Bibliapica: “Pꞌiñanacuita callarichijca, jatun yacuta cacharij shinami. Pꞌiñanacui manaraj callarijpi anchuringui” ninmi (Proverbios 17:14). Pꞌiñanacui tiyajpi utca allichinaca allimi can. Pero manaraj allichishpa ashata calmarinatachari minishtishun.

• Tucuitami alli uyana canchij. Proverbios 19:11-pica: “Alli yuyaiyuj runaca, pꞌiñarishpapish jarcarinmi” ninmi. Cai verso nishca shinaca puntaca tucui ima pasashcatami alli yachana canchij. Tucuitami alli uyana canchij. Chaimi mana deganalla pꞌiñarishun (Santiago 1:​19).

• Tranquilo yuyaita cuchunmi Diosta mañana canchij. Chashnami yuyaipipish shungupipish mana pꞌiñarishca sintirishun (Filipenses 4:7). Yaya Diosta mañacushpaca paipaj espíritu santota cuchunmi mañana canchij. Diospaj espirituta chasquishpami pacienciata ricuchishun, jarcarinata yachashun (Lucas 11:13; Gálatas 5:​22, 23).

• Pihuan amigo canatami alli agllana canchij. Pihuan yalli apanacushpaca pai shinami comportarishun (Proverbios 13:20; 1 Corintios 15:33, Biblia en Quichua Chimborazo, 1989). Chaimantami Proverbios 22:24, 25-pica: “Jahualla pꞌiñarijhuanca, amataj apanacunguichu. Chashna pꞌiñarijllahuanca, ama tandalla puringuichu. Ñataj paicunahuan tandanacushpa, paicuna shina purinata yachanguiman. Chaita yachashpaca canllatajmari huascata cungapi churaringui” nin.