CAPÍTULO 35

¿Diospaj amigo cangapajca imatataj rurana cani?

Gabrielca llaquicunahuan chꞌimbapuracushpaca Diospaj amigo cana importante cashcatami intindirca. Paica: “Ñuca yayaca ñuca 12 huatacunallata charijpimi ñucanchijta shitashpa rirca. Shuj tutaca ñuca cuartopi cashpami Jehová Diosta mañarcani. Ñuca yayata tigrachimupai nishpami mañarcani” ninmi.

Chashna llaquilla sintirishpami Gabrielca Bibliata liyi callarirca. Chaipimi shuj versota japirca. Chai versota quillcajca Jehová Diostaca: “Mana mitsari tucujcunaca cantami mashcan. Yaya mama illajcunamantaca canmi shayaringui” nircami (Salmo 10:14). Gabrielca: “Chai versopi tiyaj shimicunaca ñuca shungumanmi chayarca. Chai versota liyishpaca Jehová Dios ñucami canta ayudasha, ñucami cambaj Yaya cani nishpa yuyachicuj shinami carca. Jehová Diosmi tucuimanta yalli alli Yaya can” ninmi.

CANPISH Gabriel shinachari llaquicunata charishcangui. Pero ima laya cajpipish Jehová Diosca cambaj amigomi casha nin. Bibliapica: “Diosman cꞌuchuyaichij, paipish cancunapajman cꞌuchuyangami” ninmi (Santiago 4:8). Cai shimicunapi yuyai. Jehová Diosta mana ricui tucushpapish, o mashna edadta charishpapish ñucanchijca Jehová Diospaj amigomi cai tucunchij.

Pero, Jehová Diospaj amigo cangapajca canllatajmi esfuerzota rurana cangui. Por ejemplo, ¿shuj plantata charishcanguichu? Chai planta alli huiñachunca shuj alli lugarpimi churana cangui. Yacutapishmi churarana cangui. Mana maipish cachun saquinallachu cangui ¿nachu? ¿Dioshuan alli amigo cangapajpish imatataj rurana cangui?

Bibliata yachanaca minishtirishcami can

Shuj amigohuan alli apanacungapajca parlanacunami canchij. Pai ima nishcatapish allimi uyana canchij. Jehová Diospaj amigo cangapajpish chashnallatajmi rurana canchij. Pero, ¿ima shinataj Jehová Diostaca uyai tucunchij? Jehová Dios ima nishcata uyangapajca Bibliatami liyina, estudiana canchij (Salmo 1:2, 3).

Tal vez estudianataca manachari tanto munangui. Chaipaj randica televisionta ricunata, videojuegohuan pugllanata, amigocunahuan pasanatachari ashtahuan munangui. Pero, Dioshuan amigo casha nishpaca paitami uyana cangui. Chaipajca Bibliatami liyina cangui.

Bibliata liyinaca aburridomi canga nishpa ama yuyaichu. Estudianata mana munashpapish Bibliata estudiana munaitami chari tucungui. Chaipajca tiempotami surcuna cangui. Lais shuti joven shinami rurai tucungui. Paica: “Ñucaca shuj horariotami charini. Cada tutamantami Bibliapaj shuj capitulota liyini” ninmi. 15 huatata charij María shuti jovenca shujtaj horariotami charin. Paica: “Cada tutami manaraj dorminaman rishpa Bibliata liyini” ninmi.

Bibliata ima shina alli estudianata yachangapajca “Bibliata alli estudiai” nishca recuadrota ricui. Qꞌuipaca cada punlla mai horaspi Bibliata liyisha nishcata anotai. Tal vez cada punllami 30 minutocunata liyi tucungui.

․․․․․

Pero Bibliata liyingapaj shuj horariota charishpapish Bibliata liyinaca manachari jahualla canga. Canpish 11 huatacunata charij Jezreel shuti joven shinachari sintiringui. Paica: “Bibliapaj huaquin partecunata liyinaca sinchimi can” ninmi. Pero ama shaicurichu. Caita yuyari. Bibliata estudiashpami Jehová Dios ima nishcata uyangui. Paica cambaj alli amigomi can. Bibliata liyingapaj esforzarishpaca estudiana munaitami charingui. Cushillapishmi sintiringui.

Yaya Diosta mañai

Diosta mañashpami paihuan parlanchij. Mañanaca Dios cushca sumaj regalomi can. Diostaca ima horaspish mañanallami canchij. Jehová Diosca ñucanchij mañashcacunata uyangapaj listomi can. Paica ñucanchij mañashcacunata uyanatami munan. Bibliapica: “Diosta mañacushpaca paiman tucuita huillaichij. Tucui imamantapish Diosta mañashpaca pagui nichij” ninmi (Filipenses 4:6).

Yaya Diosmanca imatapish parlanallami canchij. Ñucanchij llaquicunata, imamanta sustarishca cashcata huillanallami canchij. Shinallataj paita agradicinataca mana cungarinachu canchij. Amigocuna ñucanchijmanta imata rurajpica siempremi agradicinchij. Ñucanchij alli amigo Jehová Dioscarin tucuitami ñucanchijmanta rurashca. Chaimantami paitaca pagui nina canchij (Salmo 106:1).

Jehová Diosta imacunallamanta agradicishcata anotai.

․․․․․

Imamantapish yallitaj sustarishca cashpa o manchaihuan cashpaca ¿imatataj rurana cangui? Bibliapica: “Cambaj llaquitaca, Mandaj Diosman apachi. Paica canta charirangami. Cashcata rurajtaca, llaquita apacuchunllaca mana saquingachu” ninmi (Salmo 55:22).

Imamanta sustarishca cashcata Yaya Diosman parlasha nishcata anotai.

․․․․․

Dios canta ima shina ayudashcata yuyari

¿Dioshuan alli amigo cangapajca imatataj ashtahuan rurana cangui? Rey Davidca: “Mandaj Dios chashna alli cajtaca, cancunataj ricuichigri” nircami (Salmo 34:8, Biblia en Quichua Chimborazo, 1989). Davidca shuj jatun llaquitami charishca carca. Paitaca rey Saulmi casi huañuchishca carca. Chaimantami Filistea llajtapi miticunaman rirca. Pero chai llajtapica paipaj contracunami causarca. Chaimantami paitaca huañuchinman carcacuna. Pero ¿ima shinataj quishpirirca? Davidca loco shina comportarishpami quishpiri tucurca (1 Samuel 21:10-15).

Pero Davidca yachaisapa cashcamantami quishpirini nishpaca mana yuyarcachu. Ashtahuanpish Yaya Dios ayudashcamanta quishpirishcatami intindirca. Chaimantami paica: “Mandaj Diostami mashcarcani, paica ñucata uyahuarcami. Tucui ñuca manchaimantami ñucataca quishpichirca” nirca (Salmo 34:4). Davidca Yaya Dios paipaj tucui causaipi ima shina ayudashcata yuyarishpami cashna nirca: “Jehová Dios alli cajtaca, cancunallataj munaichijyari, ricuichijyari”.

Canpish Jehová Dios cambaj causaipi ima shina ayudashcata yuyarishpa anotai. Jehová Dios canman shuj jatun bendicionta cushcata yuyarinaca mana minishtirinchu. Ashtahuanpish cada punlla Yayitu Dios ima shina canta ayudashcata, ima shina bendiciashcatami yuyari tucungui.

․․․․․

Ñucanchij yaya mamacuna uchillamantapacha ñucanchijman Diosmanta yachachishca cajpipish Jehová Dioshuan alli amigo cangapajca cada unomi esforzarina canchij. ¿Canpish Dioshuan alli amigo cangapaj esforzaricunguichu? Chaita manaraj rurashca cajpica cai yachaipi tiyaj consejocunami canta ayudai tucun. Can esforzarijpica Jehová Diosmi bendicianga. Mateo 7:7-pica: “Mañaichij, paica cungami. Mashcaichij, japinguichijmi” ninmi.

CAIMANTA ASHTAHUAN YACHANGAPAJCA LOS JÓVENES PREGUNTAN VOLUMEN 1 LIBROPI CAPÍTULO 38 Y 39-TA RICUI

TEXTO BÍBLICO CLAVE

“Espiritupi huajcha cajcunaca cushichishcami” (Mateo 5:3).

CAITA RURAI

Bibliamanta cuatro paginacunata cada punlla liyishpaca shuj huatapimi Biblia enterota liyishpa tucuchingui.

¿CAITA YACHARCANGUICHU?

Jehová Diosmi cantaca paipaj amigo cachun munan. Chaimantami canca cai librota liyicungui. Caipi tiyaj Bibliamanta consejocunatapishmi pajtachi tucungui (Juan 6:44).

IMATA RURAGRISHCATA ANOTAI

Bibliata estudiashpa alli beneficiaringapajca caitami ruragrini:

Yaya Diosta ashtahuan mañashpa catingapajca caitami ruragrini:

¿Cai temamantaca imatataj ñuca yayata, ñuca mamata tapui tucuni?

¿CANCA IMATATAJ YUYANGUI?

● ¿Bibliata liyishpa ama aburrido sintiringapajca imatataj rurai tucungui?

● ¿Imamantataj Jehová Diosca juchayuj runacunapaj mañashcacunata uyanata munan?

● ¿Diosta shungumanta mañangapajca imatataj rurai tucungui?

[Comentario]

“Ñaupaca chaillatataj repitishpami Diosta mañaj carcani. Cunanca punllapi imalla pasashcatami Yaya Diosman parlani. Cada punlla diferente cashcamantami chꞌican chꞌican cosascunamanta mañani” (Eva).

[Ilustración y recuadro]

Bibliata alli estudiai

1. Bibliamanta can munashca historiata agllai. Chaipi ima nicushcata alli intindingapajca Jehová Diosta alli yachaita cuchun mañai.

2. Allimanta liyi. Bibliata liyicushpaca chaipi parlashca gentecunata ricucuj shina, uyacuj shina, chai tiempopi micunata probacuj shinami liyina cangui. Chashnami chaipi cashcata shina sintingui.

3. Tapuicunata rurari. Shuj historiata liyishca Qꞌuipaca cashna tapuri:

● ¿Imamantataj Jehová Diosca paipaj Shimipi caita quillcachishca canga?

● ¿Bibliapi parlashca maijan personapaj ejemplotataj catina cani? ¿Maijancunapaj ejemplotataj mana catina cani?

● ¿Cai historiamantaca imatataj yachai tucuni?

● ¿Cai historiaca imatataj Jehová Diosmanta yachachin?

4. Diosta mañai. Bibliapi imata yachashcata Yaya Diosman parlai. Ima shina practicapi churagrishcatapish paiman huillai. Shinallataj Bibliata cushcamanta diosolopagui ni.

[Ilustración]

“Quiquinpaj shimica ñuca chaqui sarunata achijyachijmi. Ñuca ñanta achijyachijmi” (Salmo 119:105).

[Ilustración y recuadro]

Ima ashtahuan importante cashcata agllai

¿Bibliata liyingapaj, Diosta mañangapaj tiempota mana charishcatachu yuyangui? Pero ¿imatataj rurai tucungui? Puntapica ima ashtahuan importante cashcatami yachana cangui.

Caita rurai. Shuj baldepi jatun rumicunata churai. Qꞌuipaca baldepi jundangacama arena allpata churai. ¿Ima shinataj saquirin? Baldepica rumicunapish, arena allpapishmi yaicun.

Cunanca rumicunatapish, arena allpatapish llujchi. Pero cunanca puntaca arena allpata baldepi churai. Qꞌuipaca rumicunata churai. ¿Ima shinataj saquirin? Ña mana tucui rumicuna yaicunchu ¿nachu? ¿Imamantataj chashna tucun? Puntaca arena allpata churashcamantami chashna tucun.

¿Imatataj yachai tucunchij? Cambaj causaipi yallica divirtiringapajlla tiempota ocupashpaca Diosmanta yachangapaj, paita adorangapajca ña mana tiempota charinguichu. Chaimantami Bibliapica Diosta sirvijcunataca: “Imacuna ashtahuan importante cashcata ama cungarichun” nin (Filipenses 1:10, La Biblia. Traducción del Nuevo Mundo). Cai consejota catishpaca Diosta sirvingapaj ashtahuan tiempota charishcata, divirtiringapajpish tiempota charishcatami ricungui. Pero yuyari, chaipajca ima ashtahuan importante cashcatami agllana cangui.

[Ilustración]

Shuj plantita alli huiñachunca alli cuidangapajmi esforzarina cangui. Dioshuan alli amigo cangapajpish esforzarinami cangui.