YACHAI 28
Jehovatapish, Jesustapish agradicishcata ricuchishunchij
¿Cambaj amigo canman shuj sumaj regalota cujpica ima shinataj sintiringuiman? Cushillami sintiringuiman. Chai regalota canman cushcamantami agradicisha ninguiman ¿nachu? Jehovapish, Jesuspish ñucanchijmanca shuj sumaj regalotami cushca. Chai regaloca Jesús huañushcami can. Paicunata agradicingapaj imata rurana cashcata ricushun.
1. ¿Yaya Diostapish, Jesucristotapish agradicishcata ricuchingapajca imatataj rurana canchij?
Bibliapica: ‘Pipish Jesusta crijca huiñai causaitami charinga’ ninmi (Juan 3:16). ¿Jesuspi crishcataca ima shinataj ricuchinchij? Ñucanchij alli decisioncunahuan, ñucanchij alli ruraicunahuanmi paipi crishcata ricuchinchij (Santiago 2:17). Chashna rurashpami Jehová Dioshuan, Jesushuanpish ashtahuan alli amigos tucushun (Juan 14:21-ta liyipai).
2. ¿Jehovatapish, Jesustapish agradicingapajca imatataj yuyarina canchij?
Jesús manaraj huañushca tutapica, paita catijcunamanca pai huañugrishcamanta ima shina agradici tucushcatami ricuchirca. Chai tutapica Jesusca pai huañushcata yuyarichunmi shuj tandanacuita callarichirca (1 Corintios 11:20, NTW). Puntapica Jesuspaj apostolcunami Jesús huañushcata yuyaringapaj tandanacurcacuna. Pero qꞌuipaca tucui Jesusta catijcunami pai huañushcata yuyarina canchij. Jesusllatajmi: “Caitaca, ñucata yuyarishpa ruracunguichijlla” nirca (Lucas 22:19). Jehová Diosca paipaj churita ñucanchijmanta huañuchun cushpaca paipish, Jesuspish ñucanchijta achcata cꞌuyashcatami ricuchirca. Paicunata agradicishcata ricuchingapajca Jesús huañushcata yuyarina tandanacuimanmi rina canchij.
ASHTAHUAN YACHAI
Jehová Diostapish, Jesustapish agradicishcata ricuchingapaj imata ashtahuan rurana cashcata ricushun. Shinallataj Jesús huañushcata yuyarina tandanacuiman rina valishca cashcatami ricushun.
3. Agradicishca cashcata ricuchishunchij
Caipi yuyai. Can ahogaricujpi shuj runa canta salvajpica, ¿pai imata rurashcataca cungaringuimanchu o agradicinguimanchu?
Jehová Diosmi tucuicunaman causaita cushca. 1 Juan 4:8-10-ta liyipai. Qꞌuipaca cai catij tapuicunatami yachashun:
¿Jesuspaj huañuica imamantataj valishca can?
¿Diospish, Jesuspish canta quishpichingapaj imalla rurashcata yachashpaca ima shinataj sintiringui?
¿Jehová Diospish, Jesuspish tucuita rurashcamanta agradicingapajca imatataj rurana canchij? 2 Corintios 5:15; 1 Juan 4:11 y 5:3-ta liyipai. Cada versocunata liyishca qꞌuipaca cai catij tapuitami yachashun:
¿Jehovatapish, Jesustapish agradicishcataca ima shinataj ricuchinchij?
4. Jesús shina rurashunchij
Agradicishca cashcata ricuchingapajca Jesuspaj ejemplotami catina canchij. 1 Pedro 2:21-ta liyipai. Qꞌuipaca cai catij tapuitami yachashun:
¿Jesuspaj ejemplota catingapajca imatataj rurana cangui?
Jesuspajca Diospaj Shimica valishcami carca. Paica alli huillaicunata huillaj, shujtajcunatami ayudaj carca.
5. Jesús huañushcata yuyarina tandanacuiman rishunchij
Jesús pai huañushcata yuyarichun mandajpi imata rurashcata ricui. Lucas 22:14, 19, 20-ta liyipai. Qꞌuipaca cai catij tapuicunatami yachashun:
¿Jesusca chai tutapica imatataj rurarca?
¿Tandapish, vinopish imatataj ricuchin? (Lucas 22:19 y 20-ta ricui).
Jesusca paita catijcuna pai huañushcata yuyarichunmi munarca. Paita catijcunaca huatapi shuj cutinlla pai huañushca fechapimi yuyarina carca. Paicuna rurashca shinallatajmi testigo de Jehovacunaca tucui huatacuna Jesús huañushcata yuyaringapaj tandanacunchij. Jesús huañushcata yuyarina tandanacuipi imata rurashcata ashtahuan yachangapajca, VIDEOTA ricui. Qꞌuipaca cai catij tapuitami yachashun:
¿Jesús huañushcata yuyarina tandanacuipica imatataj rurancuna?
Tandaca Jesuspaj jucha illaj cuerpotami ricuchin. Vinoca Jesuspaj yahuartami ricuchin.
HUAQUINCUNACA: “Quishpiringapajca Jesuspi crinallami minishtirin” nincunami.
¿Chai mana cierto cashcata intindichingapajca ima shinataj Juan 3:16 y Santiago 2:17-taca utilizai tucungui?
YUYARISHUNCHIJ
Jesusta agradicingapajca paipimi crina canchij. Shinallataj pai huañushcata yuyarina tandanacuimanmi rina canchij.
Yuyaringapaj tapuicuna
¿Jesuspi feta charishcataca ima shinataj ricuchingui?
¿Jehovapish, Jesuspish canmanta imalla rurashcata agradicingapajca imatataj rurasha ningui?
¿Jesús huañushcata yuyarina tandanacuiman rinaca imamantataj valishca can?
CAICUNATAPISH RICUI
Jesusta agradicingapaj imata rurana cashcata yachai.
Jesusca paipaj causaita cushpami Yaya Diosta jatunyachirca (9:28)
Fe ima cashcata, feta ricuchingapaj imata rurana cashcata ashtahuan yachai.
“Dios cusha nishcacunapi tucui shunguhuan crishcata ricuchishunchij” (Huillaj, octubre de 2016)
Shuj huarmica Jesús ñucanchijmanta huañushcata yachashpami paipaj causaita cambiarca. Paimanta yachangapajca “Cunanca cushilla, tranquilami sintirini” nishcata liyi.
“Bibliata yachashpami cambiashcacuna” (Huillaj, 1 de agosto de 2011)
Jesús huañushcata yuyarina tandanacuipi imamanta huaquincunalla tandata micushcata, vinota ubyashcata ricui.