Uyajcunapaj shunguman chayashunchij
1. ¿Jesusca ima shinataj paita catijcunata yachachirca?
1 Jesusca paita uyajcunapaj shungumanmi chayarca. Chaimantami Bibliapica Jesusta catijcunamanca shunguta “rupachij” shina yuyachishpa yachachirca nin (Luc. 24:32). Diostaca shungumantami cazuna canchij. ¿Bibliamanta yachacujcuna paicunapaj causaita cambiachunca ima shinataj ayudai tucunchij? (Rom. 6:17.)
2. ¿Gentecuna imata yuyashcata entendina, cꞌuyaita ricuchinaca ima shinataj shunguman chayangapaj ayudan?
2 Paicuna imata yuyashcata entendishpa cꞌuyaita ricuchishun. Gentecunaman ima alli cashcata o ima mana alli cashcata nijllapica mana cazusha nincunachu. Shinallataj paicunapaj crishcacunata achca versocunahuan panda cashcata ricuchijpica manachari uyasha ningacuna. Paicunata ayudangapajca, puntapica imamanta chaita crishcata, imamanta chashna rurashcatami alli entendina canchij. Paicunapaj shungupi ima tiyashcata parlachunmi alli yuyashpa tapuicunata rurana canchij (Prov. 20:5). Shungupi imata charishcata yachashpallami Bibliapi alli versocunata agllashpa shunguman chayashun. Chaimantami paicunapi yuyashpa mana pꞌiñarishpa cꞌuyaihuan ayudana canchij (Prov. 25:15). Tucuicuna mana ñapish cambiocunata ruraj cashcatapish entendinami canchij. Jehová Diospaj ayudahuan paicunapaj yuyaita, ruraicunatapish cambiachunca tiempomi minishtirin (Mar. 4:26-29).
3. ¿Bibliamanta yachacujcuna Jehová Dios shina cꞌuyaj, llaquij tucuchunca ima shinataj ayudai tucunchij?
3 Jehová Dios shina cꞌuyaj llaquij tucuchun ayudashun. Bibliapi huaquin versocunahuan Dios cꞌuyaj cashcata, llaquij cashcata ricuchijpica paicunapish Jehová Dios shina canatami munanga. Salmos 139:1-4-ta, Lucas 12:6, 7-ta rezashpami Jehová Dios ñucanchijta cꞌuyashcata entendichi tucunchij. Jehová Dios cꞌuyashcamantami shungupi cushilla sintirishpa Diostaca ashtahuan cꞌuyanga (Rom. 5:6-8; 1 Juan 4:19). Paipaj causaihuan Jehová Diosta ima shina sintichishcata yachashpaca, cushichingapaj jatunyachingapajmi imatapish rurasha ninga (Sal. 78:40, 41; Prov. 23:15).
4. ¿Shujtajcunaman Diosmanta yachachicushpaca ima shinataj Jehová Dios shina yachachishun?
4 Jehová Diosca paipaj mandashcacunata cazuchunca mana obliganchu, ashtahuanpish pai yachachishcata catina imamanta alli cashcatami ricuchin (Is. 48:17, 18). Jehová Dios shinami ñucanchijca Bibliamanta yachacujcunatapish paicunallataj shungumanta Diosta cazuchun ayudana canchij. Chashnami causaipi ima cambiocunata rurajpipish mana chai ratollapaj canga (Rom. 12:2). Shinami ‘runacunapaj shunguta ricuj’ Diospajman ashtahuan cꞌuchuyanga (Prov. 17:3).