Pꞌiñarishca cashcamantami Abelta huañuchirca

Edén huertamanta llujshishca qꞌuipaca Adán, Evaca achca huahuacunatami charirca. Punta churi Cainca allpapi trabajajmi carca. Qꞌuipa churi Abelca ovejacunata michijmi carca.

Shuj punllaca Cainpish, Abelpish Jehová Diosmanmi ofrendata curcacuna. ¿Shuj ofrendaca imashi can? Diosman cuna regalomi can. Diosca Abel cushca ofrendataca cushicushpami chasquirca. Cutin Cainpaj ofrendataca mana chasquircachu. Chaimi paica yallitaj pꞌiñarirca. Jehová Diosca: ‘Pꞌiñarishpalla catishpaca mana allitami rurangui’ nircami. Pero Cainca mana cazurcachu.

Ashtahuanpish Cainca Abeltaca: “Campoman jacu” nircami. Ña paicunalla cashpaca Cainca Abeltaca macashpami huañuchirca. Chaipica, ¿Diosca imatashi rurarca? Caintaca paipaj familiamanta llujshichishpami caruman cacharca. Ña manataj tigrai pudircachu.

¿Caimantaca imatataj yachanchij? Huaquinpica imapish ñucanchij munashca shina mana llujshijpica pꞌiñarinchijchari. Pero pꞌiñarishca cashcata cuentata cushpaca ñucanchij yuyaita, shungutapish utcami cambiana canchij. Mana cambiashpaca mana allicunatami rurai tucunchij.

Abelca Diostaca achcatami cꞌuyarca. Paica allita rurajmi carca. Chaimantami Diosca paita yuyaipi charishcamanta paraíso allpapi causachinga.