Noeca shuj arcatami rurarca

Tiempohuanca cai allpapi achca gentecunami causarca. Casi tucuicunami millaicuna carca. Huaquin angelcunapish millaicuna tucushpami jahua pachamanta cai allpaman shamurcacuna. ¿Imapajshi shamurcacuna? Runacuna shina aichayuj, tulluyuj tucushpami huarmicunahuan cazarangapaj shamurcacuna.

Angelcunaca huarmicunahuanmi huahuacunata charircacuna. Chai huahuacuna huiñashpaca achca fuerzayuj, millai tucushpami gentecunata llaquichijcuna carca. Chaimantami Diosca mana alli gentecunata Jatun Tamyahuan tucuchinata decidirca. Chashnami tucui allpata yacuhuan taparca.

Pero shuj runaca Diostami cꞌuyarca. Paica Noé shutimi carca. Paipaj huarmihuanmi Sem, Cam, Jafet churicunata charirca. Paicunapish huarmicunayujmi carca. Jehová Diosca Noetaca shuj arcata rurachunmi mandarca. Chai arcaca maderahuan rurashca jatun caja shinami yacupi huambuna carca. Chashnami Noepish, paipaj familiapish Jatun Tamyamanta salvari tucurcacuna. Animalitocunapish ama huañuchunmi Diosca arcaman yaicuchichun mandarca.

Noeca Jehová mandashca shinami arcataca chai rato rurai callarirca. Paipaj familiandijmi casi 50 huatacunapi arcata tucuchircacuna. Chai huatacunapica Noeca Jatun Tamya shamunatami gentecunaman huillarca. Pero chaitaca pipish mana uyasha nircacunachu.

Arcaman yaicuna punllami ña chayarca. ¿Chai qꞌuipa ima tucushcata yachasha ninguichu?