Babel llajtapi rurashca torre

Jatun Tamya tiyashca qꞌuipaca Noepaj churicunaca achca huahuacunatami charircacuna. Paicunapaj familiacuna mirarijpimi Jehová mandashca shina tucui ladocunapi causanaman rircacuna.

Pero huaquincunaca Diosta mana cazurcacunachu. Chaimantami paicunaca: ‘¡Jacuchij! Shuj llajtata shayachishunchij. Cieloman chayaj shuj torretapish shayachishunchij. Chashnami ñucanchijca rijsishca cashun’ nircacuna.

Torreta shayachichunca Diosca mana munarcachu. Chaimantami ñapish gentecunata chꞌican chꞌican shimicunapi rimachishpa jarcarca. Chaimi chai llajtataca Babel shutita shutichircacuna. Babel shimica “pandachina” nisha ninmi. Paicunapura ña mana intindinacushpami chai torreta ruranata saquircacuna. Qꞌuipaca shujtaj ladocunapimi causanaman rircacuna. Shinapish mana allita rurashpami catircacuna. ¿Chai tiempopi Diosta cꞌuyajcuna tiyashcata cringuichu? Catij yachaipimi caimanta yachashun.