• Tucuri punllacunapi ‘janaj ladomanta mandaj’
    Huillaj (Yachanapaj) 2020 | mayo

    • YACHAI 19

      Tucuri punllacunapi ‘janaj ladomanta mandaj’

      ‘Huatacuna ña pajtamujpimi, ura lado llajtata jatun mandajca janaj lado llajtata jatun mandajhuan macanacugringa’ (DANIEL 11:40).

      CANTO 150 Diosca ñucanchijta quishpichijmi

      CAITAMI YACHASHUNa

      1. ¿Bibliapi tiyaj profeciacunaca imata yachachuntaj ayudan?

      ¿SHAMUJ punllacunapica Diospaj pueblohuanca imataj tucunga? Bibliapi tiyaj profeciacunata liyishpami shamuj punllacunapi imalla tucunata yachashun. Por ejemplo, Daniel capítulo 11-pi tiyaj profeciaca achca poderta charij huaquin gobiernocuna imata ruranatami huillan. Chaipimi janaj ladomanta mandajca ura ladomanta mandajhuan macanacungacuna nin. Cai profeciaca ña casi tucuimi pajtaricun. Chaimantami cai profecía tucui pajtarinataca crinchij.

      2. ¿Génesis 3:15, Apocalipsis 11:7 y 12:17-pi nishca shinaca Danielpaj profeciata estudiacushpaca imatataj yuyarina canchij?

      2 ¿Daniel capítulo 11-pi parlashca profeciata alli intindingapaj imatataj yuyarina canchij? Cai profeciapica huaquin jatun mandajcunamanta parlashcatami yuyarina canchij. Paicunaca Diosta sirvijcuna causan llajtacunapimi mandashcacuna. Shinallataj huaquincunaca Diospaj pueblotami catirashpa llaquichishcacuna. Muyundij Allpapi Diosta sirvijcunaca ashallacunami canchij. Pero ¿paicunataca imamantataj cai Allpapi mandajcunaca catirashpa llaquichincuna? Diablopish paita apoyajcunapish Jehová Diosta, Jesusta sirvijcunatami tucuchinata munancuna (Génesis 3:15; Apocalipsis 11:7; 12:17-ta liyipai). Daniel libropi parlashca profeciaca caishuj profeciacunahuanca igualmi cana can. Chai profeciata alli intindingapajca Bibliapi tiyaj shujtaj versocunatapishmi alli estudiana canchij.

      3. ¿Cai yachaipi, catij yachaipica imatataj estudiashun?

      3 Cai yachaipimi Daniel 11:25 al 39-ta yachashun. 1870-manta y 1991-cama picuna janaj ladomanta mandaj cashcata, ura ladomanta mandaj cashcatami yachashun. Shinallataj cai profeciata imamanta ña mana ñaupa shina intindina cashcatami ricushun. Catij yachaipica Daniel 11:40 al 12:1-pi tiyaj profeciamantami yachashun. Cai profeciata estudiacushpaca 1991 huatamanta Armagedón chayangacama imalla tucuna cashcatami ricushun. Cai ishqui yachaicunata estudiacushpaca “Tucuri punllacunapimi ishqui mandajcuna macanacun” nishca recuadrota ricui. Pero puntapica cai profeciapi parlashca ishqui mandajcuna picuna cashcatarajmi yachashun.

      ¿JANAJ LADOMANTA MANDAJ URA LADOMANTA MANDAJCUNACA PICUNATAJ CAN?

      4. ¿Janaj ladomanta mandaj, ura ladomanta mandajca imatataj igual rurashcacuna?

      4 ¿Ñaupa punllacunapica picunatataj ‘janaj ladomanta mandaj, ura ladomanta mandaj’ nijcuna carca? Israel llajtapi mandajcunatami chashna nijcuna carca. ¿Caitaca ima shinataj yachanchij? Shuj angelca profeta Danielmanca: “Ñucaca, qꞌuipa punllacunapi cambaj llajtacuna imalla tucuna cashcatami huillaj shamurcani” nircami (Daniel 10:14). Huata 33 Pentecostés punllacamami Israel llajtaca Jehová Diospaj pueblo carca. Pero chai huatamantami Jesusta catijcunalla paipaj pueblo tucurca. Chaimantami cunanca Daniel 11-pi parlashca huaquin versocunaca ña mana Israel llajtamanta parlacun. Ashtahuanpish Jesusta catijcunamantami parlacun (Hechos 2:1-4; Romanos 9:6-8; Gálatas 6:15, 16). Ashtahuancarin huatacuna pasajpimi janaj ladomanta mandaj, ura ladomanta mandajca ña cambiarishcacuna. ¿Cai mandajcunaca imatataj igual rurashcacuna? Puntapica, Diosta sirvin llajtacunapimi mandashcacuna. Huaquincunacarin Diospaj pueblotami catirashpa llaquichishcacuna. Ishquipica, Diospaj pueblota llaquichishpami Yayitu Diosta pꞌiñashcata ricuchishcacuna. Quimsapica, ura ladomanta mandaj, janaj ladomanta mandajca paicunamanta shujlla mandasha nishpami macanacushpa catishcacuna.

      5. ¿100 huatamanta 1870 huatacamaca janaj ladomanta mandaj, ura ladomanta mandajca tiyarcachu? Ima intindishcata parlai.

      5 100 huata qꞌuipami panda yachachijcunaca Diosta alli sirvijcunata pandachircacuna. 1870 huatacamami Diosta sirvijcunaca mana tandalla sirvi tucurcacuna. Panda yachachijcunami shuj millai qꞌuihua shina mirarircacuna. Chaimantami Diosta alli sirvijcunata rijsinaca sinchi carca (Mateo 13:36-43). 100 huatamanta 1870 huatacamaca mandajcuna tiyajpipish janaj lado mandajta, ura lado mandajtaca mana ricuchincunachu. ¿Imamantataj chaita ninchij? Chai huatacunapi mandajcunaca picuna Diosta sirvijcuna cashcata mana yacharcacunachu. Chaimantami paicunataca mana llaquichircacuna.b Pero 1870 huatacuna qꞌuipami janaj ladomanta mandaj, ura ladomanta mandajcunaca cutin ricurina carca. ¿Imamantataj chashna ninchij?

      6. ¿Diospaj puebloca ima horamantataj cutin tiyai callarirca?

      6 1870 huatamantami huauqui Charles Russell paipaj compañerocunapish Bibliamanta estudiangapaj tandanacurcacuna. Bibliapi nishca shinaca chai huauquicunami Dios cachashca ‘huillaj’ shina Jesús manaraj mandajpi ñanta allichirca (Malaquías 3:1). Chaimantami Diospaj pueblo maijan cashcata ricunalla carca. ¿Chai tiempopica Diosta sirvijcunata llaquichij mandajcuna tiyarcachu? Caimanta ashtahuan yachashun.

      ¿URA LADOMANTA MANDAJCA PITAJ CAN?

      7. ¿Primera Guerra Mundial casi tucuringacamaca maijantaj ura ladomanta mandaj carca?

      7 1870 huatapajca Gran Bretañaca achca soldadocunatami charirca. Cai llajtaca achca llajtacunata mandajmi tucushcarca. Danielmanta profeciaca shuj uchilla gachu quimsa gachucunata anchuchishcatami huillan. Uchilla gachuca Gran Bretañatami ricuchin. Cutin caishuj quimsa gachucunaca Francia, España y Países Bajos nishcatami ricuchin (Daniel 7:7, 8). Primera Guerra Mundial casi tucuringacamami Gran Bretañaca ura ladomanta mandaj carca. Chai tiempopajca Estados Unidosmi tucui llajtacunamanta yalli achca cullquita charirca. Shinallataj Gran Bretañahuanca alli apanacushpami trabajai callarircacuna.

      8. ¿Cai último punllacunapica pitaj ura ladomanta mandaj cashca?

      8 Primera Guerra Mundial punllacunapimi Estados Unidos y Gran Bretañaca shujlla shina tucushpa shujtaj llajtacunamanta yalli poderyuj tucurcacuna. Shinallataj Daniel libropi nishca shinaca cai mandajcunami ‘ashtahuan cꞌari cꞌari achca soldadocunata tandachircacuna’ (Daniel 11:25).Cai último punllacunapica Estados Unidos y Gran Bretañaca ishquindijpura tandanacushpami ura ladomanta mandaj tucushcacuna.c Pero ¿janaj ladomanta mandajca pitaj cashca?

      JANAJ LADOMANTA MANDAJMI CUTIN RICURIN

      9. a) ¿Janaj ladomanta mandajca ima horataj cutin ricurirca? b) ¿Daniel 11:25-pi nishcacunaca ima shinataj pajtarirca?

      9 Yuyarishun. 1870-pimi Russellca paipaj compañerocunahuan Bibliata estudiangapaj shuj grupota callarichirca. ¿Chai huashaca imataj tucurca? 1871-pimi janaj ladomanta mandajca cutin ricurirca. Chai huatapimi Otto von Bismarckca achca llajtacunata tandachishpa Alemania llajta tucuchun ayudarca. Prusia llajtamanta Mandaj Guillermo Primeroca chai llajtata mandajmi tucurca. Chaimantami Bismarcktaca paita mandashpa ayudachun agllarca.d Achca huatacuna qꞌuipaca Alemania llajtaca huaquin África llajtacunata y Pacífico llajtacunatami mandai callarirca. Qꞌuipacarin Gran Bretaña llajtata yalli jatun mandajmi tucusha nirca (Daniel 11:25-ta liyipai). Alemania llajtata mandajca casi Gran Bretaña shinami achca soldadocunata tandachirca. Primera Guerra Mundialpica cai tucui soldadocunaca paipaj contracunahuanmi macanacurca.

      10. Daniel 11:25b y 26-pi nishcacunaca ¿ima shinataj pajtarirca?

      10 Daniel libropica Alemania llajtahuan, paipaj soldadocunahuan ima tucunamantami parlan. Chai libropica janaj ladomanta mandajca mana mishangachu ninmi. ¿Imamantataj mana mishai tucunga? Daniel huillashca profeciaca: ‘Ashtahuanpish paica paipaj soldadocunallataj umajpimi, mana mishanga. Paipaj sumaj micunata micujcunallataj llaquichijpimi, paipaj soldadocunataca mishanga’ ninmi (Daniel 11:25b, 26a). Daniel causan punllacunapica ‘sumaj micunata micujcunaca’ mandajta ayudajcunami carca (Daniel 1:5). ¿Cai profeciapica picunamantataj parlacurca? Alemania llajtapi mandajta ayudajcunamantami parlacurca. Cai ayudajcunaca soldadocunata mandajcunami carca. Paicunaca Alemania llajtata jatun mandajta apoyanata saquijpimi cai mandajca ña mana mandashpa cati tucurca.e Shinallataj cai profeciapica janaj ladomanta mandaj ura ladomanta mandajhuan macanacushpa maijan mishana cashcatami parlarca. Janaj lado mandajmanta parlashpaca: “Paipaj soldadocunataca mishanga. Achcacunami huañungacuna” nircami (Daniel 11:26b). Cai profeciapi nishca shinaca Primera Guerra Mundialpica Alemania llajtamanta soldadocunaca mana mishai tucurcacunachu. Chai jatun guerrapica achcacunami huañurca.

      11. Daniel 11:27 al 30 nishca shinaca janaj ladomanta mandaj, ura ladomanta mandajca ¿imatataj rurarcacuna?

      11 Danielpi parlashca profeciaca janaj ladomanta mandajpish ura ladomanta mandajpish manaraj Primera Guerra Mundial callarijpimi ima tucunata parlarca. Daniel 11:27, 28-pica: “Mezapi micushpa tiyacushpapish caishujpish chaishujpish llullangacunami” ninmi. Shinallataj janaj ladomanta mandajca ‘achca charinacunatami tandachinga’ ninmi. Chai nishcacunaca pajtarircatajmi. Alemaniamanta mandajcunapish Gran Bretañamanta mandajcunapish caishujmanta chaishujmantami tranquilo causanata mashcana canchij nircacuna. Pero 1914 huatapimi paicunaca macanacui callarircacuna. Achca huatacuna huashaman, manaraj macanacushpaca Alemania llajtaca shujtaj llajtacunata yallimi charij tucurca. Shinapish shuj llajtallami Alemaniata yalli charij carca. Daniel 11:29 y 30a-pi nishca shinaca Alemaniaca ura ladomanta mandajhuan macanacui callarishpapish mana misharcachu.

      MANDAJCUNACA DIOSPAJ PUEBLOTAMI LLAQUICHINCUNA

      12. ¿Primera Guerra Mundialpica janaj ladomanta mandajpish ura ladomanta mandajpish imatataj rurarcacuna?

      12 1914 huatamanta huichimanca cai ishqui mandajcunaca paicunapura macanacushpami catircacuna. Shinallataj Diospaj pueblotapishmi catirashpa llaquichircacuna. Por ejemplo, Primera Guerra Mundialpimi Alemaniata mandajpish Gran Bretañata mandajpish Diosta sirvijcunataca guerrapi mana macanacusha nishcamanta llaquichircacuna. Estados Unidos llajtata mandaj gobiernocarin Diosmanta ama huillachunmi Diospaj obrata pushaj huauquicunataca carcelpi churarca. Chashnami Apocalipsis 11:7-10-pi parlashca profeciaca pajtarirca.

      13. ¿Huata 1930 qꞌuipa y Segunda Guerra Mundialpica janaj ladomanta mandaj, ura ladomanta mandajca imatataj rurarcacuna?

      13 Huata 1930 huasha, Segunda Guerra Mundial punllacunapipish janaj ladomanta mandajca dimastij pꞌiñarishpami Diosta sirvijcunata llaquichircacuna. Nazi politicocunaca Alemaniapi mandai callarishpaca Hitler, paita apoyajcunapishmi Diospaj pueblotaca ama huillachun jarcarcacuna. Cai millai mandajcunaca Diosta sirvijcunataca casi 1.500 huauqui panicunatami huañuchircacuna. Shinallatajmi maijancunatacarin campo de concentración nishcacunamanmi cacharcacuna. Danielca cai profecía pajtarinatami parlarca. Paica: Janaj ladomanta mandajmi ‘Diospaj huasitapish yangata ruranga, Diosman cushpa rupachinatapish jarcangacunami’ nircami. ¿Caica imatataj ricuchin? Diosta sirvijcunata ama huillashpa catichun jarcanatami ricuchirca (Daniel 11:30b, 31a). Alemaniata mandaj Hitlerca Diosta sirvijcunataca tucuitami tucuchisha nirca.

      JANAJ LADOMANTA MUSHUJ MANDAJMI RICURIN

      14. ¿Segunda Guerra Mundial qꞌuipaca pitaj janaj ladomanta mandaj tucurca?

      14 Segunda Guerra Mundial qꞌuipaca Unión Sovieticapi mandajca Alemaniapi saquirij huaquin llajtacunatami dueñoyarca. Chaimi janaj ladomanta mandaj tucurca. Cai mandajca Alemania llajtata mandaj shinallatajmi Diostaraj cazujcunataca catirashpa llaquichircacuna.

      15. ¿Segunda Guerra Mundial tucurishca huashaca imatataj janaj ladomanta mandajca rurarca?

      15 Segunda Guerra Mundial qꞌuipallaca Unión Sovieticapi mandaj, paita apoyaj mandajcunapish Diosta sirvijcunatami llaquichircacuna. Apocalipsis 12:15-17-pi huillashca shinaca janaj ladomanta mandajca Diosta sirvijcunataca ama huillachunmi jarcarca. Shinallataj achca Testigocunatami caru llajtacunaman cachashpa prezupi churarca. Cai tucuri punllacunapicarin Diosta sirvijcunataca “jatun yacuta” catichishpa cachacuj shinami catirashpa llaquichicushca. Paicunata chashna llaquichishpapish Diosta sirvichunca mana jarcai tucushcacunachu.f

      16. Daniel 11:37 al 39-pi nishca shinaca ¿Unión Sovieticaca imatataj rurarca?

      16 (Daniel 11:37-39-ta liyipai). Cai profeciapi nishca shinaca janaj ladomanta mandajca ‘paipaj yayacunapaj Diostapish mana cazurcachu’. ¿Ima shinataj mana cazurca? Unión Sovieticaca tucui religioncunatami tucuchisha nirca. Chaipajca religionta pushajcuna ama imata rurachunmi jarcasha nirca. Chaimantami 1918 huatapica sovieticocunata mandajca huahuacunaman escuelacunapi Dios mana tiyashcata yachachichun decidirca. Pero ¿cai mandajca ima shinataj ‘macanacuipi ayudaj nishca diosta’ jatunyachishcata ricuchirca? Paica achca soldadocunata charingapajmi achca cullquita gastarca. Shinallataj jatun mandaj tucungapajca manchanai armacunatami rurarcacuna. Asha tiempo qꞌuipaca janaj ladomanta mandajpish ura ladomanta mandajpish achca armacunatami tandachircacuna. Chai armacunahuanca huaranga huaranga gentecunatami huañuchinman carca.

      ISHQUI MANDAJCUNAMI ISHQUINDIJ TRABAJACUN

      17. ¿Millanana chingachijca imataj can?

      17 Janaj ladomanta mandajpish ura ladomanta mandajpish ishquindij trabajashpami ‘millanana chingachijta churashcacuna’ (Daniel 11:31). Cai ‘millanana chingachijca’ Organización de las Naciones Unidas nishcami can. Cai organizaciontaca ONU nishpapishmi rijsincuna.

      18. ¿Organización de las Naciones Unidastaca imamantataj ‘millanana chingachij’ nin?

      18 Organización de las Naciones Unidasca gentecunamanmi sumaj causaita cusha nin. Pero chaitaca Diospaj gobiernollami cui tucun. Chaimantami Danielpi parlashca profeciaca chai organizaciontaca “millanana” nin. Shinallataj panda religioncunata llaquichishpa tucuchina cashcamantami cai organizaciontaca ‘chingachij’ nin (“Tucuri punllacunapimi ishqui mandajcuna macanacun” nishca recuadrota ricui).

      ¿IMAMANTATAJ CAITACA ALLI INTINDINA CANCHIJ?

      19, 20. a) ¿Cai yachaipi yachachishcacunataca imamantataj alli intindina canchij? b) ¿Catij yachaipica ima tapuimantataj yachashun?

      19 ¿Cai yachaipi yachachishcacunataca imamantataj alli intindina canchij? Mandajcuna imallata rurashcata yachashpami Danielpi parlashca huaquin versocuna pajtarishcata ricushcanchij. Janaj ladomanta mandaj, ura ladomanta mandaj 1870-manta 1991 huatacama mandajpimi cai profeciamanta parlashca shuj partella pajtarirca. Caita intindishpami Danielpi parlashca tucui profecía pajtarinata crinchij.

      20 Pero Unión Soviética nishcaca 1991 huatapimi chingarirca. Shinashpaca cunan punllacunapica ¿pitaj janaj ladomanta mandaj can? Caitaca catij yachaipimi ricushun.

      CANTO 128 Ahuantashpa catishunchij

      a Janaj lado mandajmanta, ura lado mandajmanta Daniel libropi parlashca profeciacunami pajtarishpa caticun. ¿Caitaca ima shinataj yachanchij? ¿Imamantataj cai profeciataca alli intindina canchij?

      b Roma llajtamanta mandaj Aurelianoca 270 al 275 huatacamami mandarca. Cutin Zenobia shuti mandajpish 267 al 272 huatacamami mandarca. Prestemos atención a las profecías de Daniel nishca libropimi capítulos 13 y 14-pi caimanta yacharcanchij. Pero cunanca cai profeciata ashtahuan alli intindishpami paicuna janaj ladomanta mandaj, ura ladomanta mandaj mana cashcata ni tucunchij.

      d 1890 huatapica mandaj Guillermo Segundoca Bismarcktaca gobiernopaj trabajanata saquichunmi obligarca.

      e Mandajta ayudajcunaca gobierno mandashpa ama catichunmi Alemania llajtata mandajta apoyanata saquircacuna. Paicunaca guerrapi mashna soldadocuna huañushcata mana huillana cajpipish contracunamanmi huillarcacuna. Ashtahuancarin jatun mandajtapish mandanata saquichunmi obligarcacuna.

      f Daniel 11:34-pi nishca shinaca janaj ladomanta mandajca Diosta sirvijcunatami asha tiempota catirashpa llaquichinata saquircacuna. 1991 huatapimi Unión Sovieticaca chingarirca. Chaipimi chai profeciaca pajtarirca.

  • ¿Cunan punllacunapica ‘janaj ladomanta mandajca’ pitaj can?
    Huillaj (Yachanapaj) 2020 | mayo

    • YACHAI 20

      ¿Cunan punllacunapica ‘janaj ladomanta mandajca’ pitaj can?

      ‘Ashtahuanpish pai tucurinaca chaipimi canga. Paita ayudajca pi mana tiyangachu’ (DANIEL 11:45).

      CANTO 95 Jehová Diosmi punllanta achijyachicun

      CAITAMI YACHASHUNa

      1, 2. ¿Cai yachaipica imallatataj yachashun?

      CUNAN punllacunapica ña tucuri punllacunapi causacushcatami yachanchij. Ñallami Jehová Diospish Jesuspish Diospaj gobiernota mana apoyaj mandajcunataca tucuchingacuna. Caita manaraj rurajpica janaj ladomanta mandaj, ura ladomanta mandajca paicunapurami macanacushpa catingacuna. Diospaj pueblotapishmi llaquichingacuna.

      2 Cai yachaipica Daniel 11:40-manta 12:1-cama huillashca profeciatami yachashun. Cunan punllacunapi janaj ladomanta mandaj maijan cashcatapishmi ricushun. Shinallataj ima llaquicunata charishpapish Jehová Diospi confiashpa mana manchanatami yachashun.

      JANAJ LADOMANTA MUSHUJ MANDAJMI RICURIN

      3, 4. a) ¿Janaj ladomanta mandajca maijantaj can? b) ¿Chaitaca ima shinataj yachanchij?

      3 1991 huatapi Unión Soviética tucurijpimi Diosta sirvijcunaca ‘asha ayudata’ chasquircacuna. Chaimi paicunaca tranquilo causaita charircacuna (Daniel 11:34). Chaimantami paicunaca gentecunaman jahualla predicai tucurcacuna. Ñapishmi Unión Soviética mandashca llajtacunapica achca publicadorcuna tiyai callarirca. Pero huaquin huatacuna qꞌuipaca Rusia, paita apoyajcunaca janaj ladomanta mandajmi tucushcacuna. Pasaj yachaipi ricushca shinaca shuj gobiernoca janaj ladomanta mandaj, ura ladomanta mandaj tucungapajca quimsa ruraicunatami rurancuna. Puntapica, cai mandajcunaca Diosta sirvin llajtacunapimi mandancuna. Diospaj pueblotapishmi catirashpa llaquichincuna. Ishquipica, Jehová Diostapish, paita sirvijcunatapish pꞌiñashcatami ricuchincuna. Quimsapica, cai mandajcunaca paicunapurami macanacuncuna.

      4 ¿Rusia, paita apoyaj mandajcunapish janaj ladomanta mandaj cashcataca ima shinataj yachanchij? Puntapica, cai mandajcunaca Diosta sirvijcunatami ama predicachun jarcashcacuna. Shinallataj chai llajtacunapica Diosta sirvijcunatami catirashpa llaquichishcacuna. Ishquipica, paicunapaj ruraicunahuanmi Jehová Diostapish, paita sirvijcunatapish pꞌiñashcata ricuchishcacuna. Quimsapica, janaj ladomanta mandajca ura ladomanta mandajhuanmi macanacucushca. Ura ladomanta mandajca Gran Bretaña y Estados Unidosmi can. Cunanca janaj ladomanta mandaj Rusia, paita apoyajcunapish imallata rurashcata yachashun.

      JANAJ LADOMANTA MANDAJCA URA LADOMANTA MANDAJHUANMI MACANACUSHPA CATICUNCUNA

      5. ¿Daniel 11:40 al 43-pi tiyaj versocunaca ima tiempomantataj parlan?

      5 (Daniel 11:40-43-ta liyipai). Cai versocunapi tiyaj profeciaca tucuri punllacunamantami parlan. Chai tiempomanta parlashpaca Danielca: ‘Ura lado llajtata jatun mandajca janaj lado llajtata jatun mandajhuan macanacugringa’ nircami (Daniel 11:40).

      6. ¿Ishqui mandajcuna macanacushpa caticushcataca ima shinataj yachachij?

      6 Janaj ladomanta, ura ladomanta mandajcunaca cai pachata mandasha nishpami paicunapura macanacucuncuna. Por ejemplo, Segunda Guerra Mundial huashaca Unión Soviética, paita apoyajcunapish Europapi tiyaj huaquin llajtacunatami mandai callarircacuna. Chaita ricushpami ura ladomanta mandajpish shujtaj mandajcunahuan achca soldadocunata tandachirca. Chashnami OTAN nishca organización tucurca. Cai ishqui jatun mandajcunaca ashtahuan soldadocunata, armacunata charisha nishpami achca cullquita gastashcacuna. Shinallataj ura ladomanta mandajpaj contracunataca janaj ladomanta mandajmi guerracunapi apoyan. Cutin janaj ladomanta mandajpaj contracunataca ura ladomanta mandajmi guerracunapi apoyan. Cai contracunaca África, Asia y América Latina llajtacunamantami can. Cai huatacunapica Rusia, paita apoyajcunaca tucui llajtacunamanta yalli jatun mandajmi tucushca. Janaj ladomanta mandajca ura ladomanta mandajhuanmi paicunapura pꞌiñanacushpa: “Cancunaca computadoracunapi tiyaj programacunata utilizashpami ñucanchij cullquita perdichinguichij. Ñucanchij mandana derechotapishmi llaquichinguichij” nincuna. Daniel nishca shinaca janaj ladomantami Diosta sirvijcunataca llaquichishpa catincuna (Daniel 11:41).

      JANAJ LADOMANTA MANDAJCA ‘SUMAJ LLAJTAMANMI’ YAICUN

      7. ¿‘Sumaj llajtaca’ imataj can?

      7 Daniel 11:41-pica janaj ladomanta mandajmi ‘sumaj llajtaman’ yaicunga ninmi. Ñaupa punllacunapica Israel llajtami ‘tucui llajtacunamanta yalli sumaj llajta’ carca (Ezequiel 20:6). Chai llajtapi Jehová Diosta adorashcamantami ‘sumaj llajta’ nishpa rijsijcuna carca. Pero huata 33-pi tiyaj Pentecostés punllamanta huichimanmi cai sumaj llajtaca mana shuj lugar cashcata ricuchin. Diosta sirvijcunaca muyundij Allpapimi causancuna. Chaimantami cunan punllacunapica chai ‘sumaj llajtaca’ Diosta alli sirvijcuna ima shina causashcata ricuchin. Paicunaca tandanacuiman rishpa, huillanaman llujshishpami Jehová Diosta adorancuna.

      8. ¿Janaj ladomanta mandajca ima shinataj ‘sumaj llajtamanca’ yaicushca?

      8 Cai tucurimui punllacunapica janaj ladomanta mandajca achca cutinmi ‘sumaj llajtaman’ yaicushca. Por ejemplo, Alemania nazi janaj ladomanta mandaj cajpica ‘sumaj llajtaman’ yaicuj shinami Diosta sirvijcunataca catirashpa llaquichishpa huañuchircacuna. Segunda Guerra Mundialpimi ashtahuantajca chaita rurarca. Chai qꞌuipaca Unión Sovieticapish janaj ladomanta mandaj tucushpami sumaj llajtaman yaicuj shina Diosta adorajcunata catirashpa llaquichirca. Paicunapaj huasicunamantapish llujchishpa caru llajtaman richunmi obligarca.

      9. ¿Cai último punllacunaca Rusia y paita apoyajcunaca ima shinataj ‘sumaj llajtaman’ yaicushcacuna?

      9 Cai último punllacunaca Rusia y paita apoyajcunapishmi ‘sumaj llajtaman’ yaicushcacuna. 2017 huatapica cai janaj ladomanta mandajca testigo de Jehovacunatami Diosmanta ama huillachun jarcarcacuna. Shinallataj huaquin huauqui panicunatapishmi carcelpi churashcacuna. Publicacioncunata, Traducción del Nuevo Mundo Bibliatapish ama utilizachunmi obligarcacuna. Rusia llajtapi tiyaj sucursalta, tandanacuna huasicunatapishmi dueñoyarcacuna. Caita ricushpami Cuerpo Gobernante huauquicunaca 2018 huatapi Rusia llajta, paita apoyajcunapish janaj ladomanta mandaj cashcata intindircacuna. Pero mandajcuna ñucanchijta chashna llaquichijpipish cai mandajcunahuanca mana macanacunchijchu. Shujtajmi mandana can nishpapish mana yuyanchijchu. Ashtahuanpish Bibliapi tiyaj consejocunata catishpami ‘jatun mandajcunamantaca Taita Diosta mañanchij’. Jehová Diosta sirvishpa catichun o mana catichun gobiernocuna decidicujpicarin paicunamantaca Diostami ashtahuan mañashpa catinchij (1 Timoteo 2:1, 2).

      ¿JANAJ LADOMANTA MANDAJCA URA LADOMANTA MANDAJTACA TUCUCHINGACHU?

      10. ¿Imata yachashpataj janaj ladomanta mandajca ura ladomanta mandajta mana tucuchinata yachanchij?

      10 Daniel 11:40 al 45-pi parlashca profeciaca janaj lado mandajmantami ashtahuan parlan. Shinashpaca ¿paichu ura ladomanta mandajtaca tucuchinga? Mana. Jehová Dios, Jesushuan cai Allpapi tiyaj gobiernocunata Armagedón macanacuipi tucuchinaman shamujpica ura ladomanta mandajca tiyangarajmi. Pero Armagedón macanacuipimi tucuchishca canga (Apocalipsis 19:20). ¿Chaitaca ima shinataj yachanchij? Daniel libropi, Apocalipsis libropi tiyaj profeciacuna ima nishcata ricushunchij.

      Urcumanta shuj rumi shamushpami runaman rijchajta rurashcapaj chaquicunata ñutucun.

      Diospaj gobiernotaca shuj rumihuanmi chꞌimbapuran. Cutin cai Allpapi mandaj gobiernocunataca shuj runaman rijchajta rurashcahuanmi chꞌimbapuran. Diospaj gobiernomi Armagedón macanacuipica cai tucui gobiernocunata tucuchinga. (Párrafo 11-ta ricui).

      11. ¿Daniel 2:43 al 45-pica imamantataj parlan? (Página 1-pi tiyaj dibujota ricui).

      11 (Daniel 2:43-45-ta liyipai). Profeta Danielca shuj jatun runaman rijchajta chꞌican chꞌican metalcunahuan rurashcatami ricurca. Jatun runaman rijchajpaj cada partecunaca Diosta sirvijcuna causacun llajtacunata mandajtami ricuchin. Cai runapaj fierrohuan, lodohuan rurashca chaquicunaca tucuri gobiernotami ricuchin. Cai gobiernoca Gran Bretaña y Estados Unidosmi can. Danielpi parlashca profeciaca Jehová Dios pai churashca mandanahuan cai Allpapi tiyaj gobiernocunata tucuchinaman shamujpica Gran Bretaña y Estados Unidosca tiyanaraj cashcatami intindichin.

      12. a) ¿Animalpaj canchis umaca imatataj ricuchin? b) ¿Imamantataj caita yachanaca importante can?

      12 Apóstol Juanpish Diosta sirvijcuna causan llajtacunata mandashca gobiernocunamantami parlan. Paica chai gobiernocunataca canchis umacunayuj jatun animalhuanmi chꞌimbapuran. Animalpaj canchis umaca Gran Bretaña, Estados Unidostami ricuchin. Caita yachanaca importantemi can. ¿Imamanta? Cai canchis umapaj qꞌuipaca shujtaj umaca mana tiyanchu. Jesús, angelcunahuan jatun animalta tucui tucuchinaman shamujpica chai punllacamami cai canchis umaca tiyangaraj (Apocalipsis 13:1, 2; 17:13, 14).b

      ¿JANAJ LADOMANTA MANDAJCA IMATATAJ ÑALLA RURANGA?

      13, 14. a) ¿‘Magog llajtata mandaj Gogca’ pitaj can? b) ¿Mandaj Gogca imamantataj Diosta sirvijcunataca llaquichisha ninga?

      13 Ezequiel libropica janaj ladomanta mandaj, ura ladomanta mandaj manaraj tucuchishca cajpi ima tucunamantami tal vez parlan. Ezequiel 38:10 al 23; Daniel 2:43 al 45; 11:44 al 12:1 y Apocalipsis 16:13 al 16 y 21-pica chai yuyaillamantataj parlashcatami yuyachin. Chashna cajpica catij yuyaicunapish pajtarinatami shuyanchij.

      14 Jatun llaqui punlla callarishca qꞌuipallami ‘tucui Allpa pachapi mandajcunaca’ tandanacungacuna (Apocalipsis 16:13, 14; 19:19). Bibliapica cai tandanacushcacunataca ‘Magog llajtata mandaj Gog’ nishpami shutichin (Ezequiel 38:2). Paicunami Diospaj pueblotaca llaquichishpa tucuchisha ningacuna. ¿Imamantataj llaquichisha ningacuna? Apóstol Juanca shuj muscuipi ricushpaca Diosta chanzata rurajcunapaj jahuapi jatun rundu urmajtami ricurca. Tal vez cai runduca Jehová Dios ñalla millaicunata tucuchinga nishpa predicanami canga. Chashna huillajpimi Magog llajtata mandaj Gogca Diospaj pueblotaca tucui chingachinata yuyanga (Apocalipsis 16:21).

      15, 16. a) ¿Daniel 11:44, 45-pica imacunamantataj parlacuj yuyachin? b) ¿Janaj ladomanta mandajhuan, Mandaj Goghuanca imataj tucunga?

      15 Daniel 11:44, 45-pipish Dios millaicunata tucuchinata huillana cashcata, Diospaj contracuna paipaj pueblota llaquichina cashcatami parlacuj yuyachin (Daniel 11:44, 45-ta liyipai). Daniel libropica janaj ladomanta mandajca, ‘inti llujshin ladomantapish, janaj ladomantapish huillanacuna shamujpimi mancharinga. Chaita uyashpaca jatunta pꞌiñarishpami achcacunata chingachingapaj huañuchingapaj llujshinga’ ninmi. Cai ‘achcacunaca’ Diosta sirvijcunatami ricuchij yuyachin.c Caipica Danielca Diosta sirvijcunata ña ultimota llaquichinamantachari parlacun.

      16 Janaj ladomanta mandaj, cai Allpapi tiyaj gobiernocuna Diospaj pueblota llaquichi callarijta ricushpami Jehová Diosca achcata pꞌiñaringa. Chaimi Armagedón macanacuitaca callarichinga (Apocalipsis 16:14, 16). Chai ratomi janaj ladomanta mandajta ‘ayudajca pi mana tiyanga’ (Daniel 11:45). Chashnallatajmi Mandaj Gog nishca tandanacushca llajtacunatapish tucuchinga.

      Jesusca shuj caballopi tiyarishca shamushpami shuj flechahuan apuntacun. Shujtaj angelcunapish caballopi shamushpami espadacunata charicuncuna.

      Armagedón macanacuipimi Jesuspish angelcunapish Diablota apoyajcunataca tucuchinga. Chashnami Diosta sirvijcunataca quishpichinga. (Párrafo 17-ta ricui).

      17. a) ¿Daniel 12:1-pi parlashca ‘mandaj Miguelca’ pitaj can? b) ¿Cunanca paica imatataj ruracun? c) ¿Shamuj punllacunapica imatataj ruranga?

      17 Daniel 12:1-pica janaj ladomanta mandajta, shujtaj gobiernocunata ima shina tucuchinamantami ashtahuan parlan. Shinallataj Diosta sirvijcunatapish ima shina ayudanamantami parlan (Daniel 12:1-ta liyipai). ¿Cai versopi nishcacunaca imatataj nisha nin? Cai versopi Miguelmanta parlashpaca mandaj Jesusmantami parlacun. Paica 1914 huatapimi Diospaj gobiernopi mandai callarirca. Chai huatamantami Diospaj pueblotaca cuidacushca. Shamuj punllacunapica Armagedón macanacuipimi paipaj contracunata tucuchinga. Chaipimi Daniel parlashca ‘jatun llaqui’ punllacunaca tucuringa. Apocalipsis libropica Armagedón manaraj callari punllacunatami ‘jatunta llaquichicun’ punllami nin (Apocalipsis 6:2; 7:14).

      ¿ÑUCANCHIJ SHUTICUNACA ‘LIBROPI QUILLCASHCACHU’ TIYACUN?

      18. ¿Shamuj punllacunapi ima tucunamantaca imamantataj mana manchana canchij?

      18 Daniel, Juan nishca shinaca Jehová Diosta, Jesusta sirvijcunaca jatun llaqui punllacunapimi quishpiringacuna. Chaimantami shamuj punllacunapi ima tucunamanta mana manchana canchij. Daniel nishca shinaca ‘libropi quillcashca’ shuticunata charijcunami quishpiringacuna (Daniel 12:1). Ñucanchij shuticuna chai libropi quillcashca tiyachunca Jesuspimi tucui shunguhuan crina canchij (Juan 1:29). Shinallataj Diosman mingarishpami bautizarina canchij (1 Pedro 3:21). Ashtahuancarin Jehová Diosmanta gentecunaman huillashpami paipaj gobiernota apoyana canchij.

      19. a) ¿Cunan punllacunapica imallatataj rurana canchij? b) ¿Imamantataj chaita rurana canchij?

      19 Cunan punllacunami Jehová Diospi, paipaj organizacionpipish ashtahuan confiana canchij. Paipaj gobiernotapish apoyanami canchij. Chaita rurashpaca Jehová Dios paipaj gobiernohuan janaj ladomanta mandajta, ura ladomanta mandajta tucuchijpica quishpirishunmi.

      CANTO 149 Jehová Diosca tucuita mishajmari

      a ¿Cunan punllacunapica ‘janaj ladomanta mandajca’ pitaj can? ¿Cai mandajca ima shinataj tucuringa? Caicunamanta yachanami ñucanchij feta sinchiyachinga. Shinallataj shamuj punllacunapipish llaquicunata chꞌimbapurangapajmi ayudanga.

      b Daniel 2:36-45 y Apocalipsis 13:1, 2-pi tiyaj profeciacunamanta ashtahuan yachasha nishpaca La Atalaya del 15 de junio de 2012, páginas 7 al 19-pi Jehová es “un Revelador de secretos”; Los ocho reyes; Jehová revela “las cosas que tienen que suceder dentro de poco”; Preguntas de los lectores nishca temacunata españolpi ricui.

      c Caimanta ashtahuan yachasha nishpaca La Atalaya del 15 de mayo de 2015, páginas 29, 30-ta españolpi ricui.

  • Tucuri punllacunapimi ishqui mandajcuna macanacun
    Huillaj (Yachanapaj) 2020 | mayo

    • Tucuri punllacunapimi ishqui mandajcuna macanacun

      Catij chuscu paginacunapimi huaquin profeciacunamanta ricugrinchij. Cai profeciacunamantaca maijancunaca chai tiempollapitajmi pajtarin. Caicunaca ‘tucuri punllacunapi’ causacushcatami ricuchin (Daniel 12:4).

      Cai recuadropica janaj lado mandajmanta, ura lado mandajmanta huaquin profeciacunatami ricuchin. 1870-manta cunan punllacama cai mandajcuna picuna cashcatami ricuchin.
      • Punta recuadro: Caipica tucurimui punllacunapi huaquin profeciacuna chai punllallapitaj pajtaricushcatami ricuchin. 1870-manta 1918-cama cai profeciacuna ima shina pajtarishcatami ricuchin. 1914 huatamantami tucuri punllacunaca callarirca. Profecía 1: 1870 huatapaj achca huatacuna faltajpimi canchis umacunayuj manchanana animal ricurin. Primera Guerra Mundialpimi cai animalpaj canchis umata chugrichin. 1917 huatamantami cai animalpaj canchis umaca alliyan. Chaimi paica jatarin. Profecía 2: 1871 huatapimi janaj ladomanta mandajca cutin ricurin. Chai mandajca Alemaniami carca. 1870 huatapimi ura ladomanta mandajtaca pi cashcata rijsincuna. Ura ladomanta mandajca puntapica Gran Bretañami carca. Cutin 1917 huatamantami Gran Bretaña y Estados Unidosca ura ladomanta mandaj can. Profecía 3: 1870 huatamantami Charles Russell, paipaj compañerocunapish Dios cachashca ‘huillaj’ carcacuna. 1880 huatamantami ‘Zion’s Watch Tower’ nishca revistaca alli huillaicunamanta huillachun animarca. Profecía 4: 1914 huatamantami cozichana punlla callarin. Trigoca mana alli qꞌuihuacunamanta chꞌicanyachishcami can. Profecía 5: 1917 huatamantami fierrohuan, lodohuan rurashca chaquicuna ricurin. Shinallataj cai recuadropica: 1914 huatamanta 1918 huatacama Primera Guerra Mundial tiyashcatami ricuchin. Diosta sirvijcunatapish ima shina llaquichishcatami ricuchin: 1914-manta 1918-camaca Gran Bretaña y Alemania llajtacunapimi Bibliamanta yachacujcunata o punta Testigocunataca carcelpi churarcacuna. 1918 huatapica Estados Unidos llajtapimi Central mundialpi trabajaj huauquicunataca carcelpi churarcacuna.
        Profecía 1.

        Versocuna: Apocalipsis 11:7; 12:13, 17; 13:1-8, 12.

        Profecía: Achca huatacunatami “manchanana animalca” gentecunata mandacushca. Tucuri punllacunapimi cai animalpaj canchis umataca chugrichin. Uma alliyajpimi “allpa pachapi causajcunaca” manchanana animalta catincuna. Diabloca cai animalta utilizashpami “huarmipaj saquirishca huahua huahuacunata” jatunta llaquichin.

        Cashnami pajtarin: Yacu juillu tiyashca qꞌuipamantami Diospaj contra gobiernocunaca tiyai callarirca. Achca huatacuna qꞌuipaca Primera Guerra Mundial punllacunapimi Gran Bretañaca mandana poderta casi chingachin. Pero Estados Unidoshuan tandanacushpami cutin alli tucun. Tucuri punllacunapica Diabloca gobiernocunatami Diosta sirvijcunata llaquichingapaj utilizashca.

      • Profecía 2.

        Versocuna: Daniel 11:25-45.

        Profecía: Tucuri punllacunapica, janaj ladomanta mandaj, ura ladomanta mandajca shujlla mandasha nishpami paicunapura macanacun.

        Cashnami pajtarin: Alemaniaca Gran Bretañahuan, Estados Unidoshuanmi macanacurca. 1945 huatapimi Unión Soviética, paita apoyajcunapish janaj ladomanta mandaj tucurcacuna. Cutin 1991 huatapimi Unión Sovietica llajtaca chingarirca. Tiempohuanca Rusiapish paita apoyajcunapish janaj ladomanta mandajmi tucurcacuna.

      • Profecía 3.

        Versocuna: Isaías 61:1; Malaquías 3:1; Lucas 4:18.

        Profecía: Jehová Diosca ‘paipaj huillajtami’ cachan. Cai huillajca ñanta pascaj shinami Jesús manaraj mandajpi ñanta allichin. Paica alli huillaicunatami manso shungu gentecunaman huillai callarin.

        Cashnami pajtarin: 1870 huatamantami Charles Russellpish paipaj compañerocunapish Bibliata estudiangapaj tandanacurcacuna. 1881 huatapimi Diosta sirvijcunaca predicana cashcata intindircacuna. Chaimanta “Mil publicadorcunami minishtirin”, “Huillangapaj agllashcacuna” nishca yachaicunatami llujchircacuna.

      • Profecía 4.

        Versocuna: Mateo 13:24-30, 36-43.

        Profecía: Shuj runaca paipaj allpapimi trigota tarpun. Pero paipaj enemigo shamushpami mana alli qꞌuihuata chagrapi tarpushpa rin. Mana alli qꞌuihua huiñashpami trigota tapan. Cozichana punlla chayajpica trigota tandashpami mana alli qꞌuihuataca anchuchin.

        Cashnami pajtarin: 1870 huatamantami Diosta alli sirvijcunata, Diosta mana alli sirvijcunataca rijsinalla carca. Tucuri punllacunapimi Diosta alli sirvijcunataca Jesusta catinchij nijcunamanta chꞌicanyachishpa tandachin.

      • Profecía 5.

        Versocuna: Daniel 2:31-33, 41-43.

        Profecía: Daniel muscuipi ricushca jatun runaman rijchajca fierrohuan, lodohuan rurashca chaquicunatami charin.

        Cashnami pajtarin: Lodoca Gran Bretaña, Estados Unidos mandashca gentecunatami ricuchin. Paicunaca cai mandajcunapaj contrami tucuncuna. Cai gentecuna paicunapaj contra tucujpimi mandajcunaca mana shuj sinchi fierro shina mandai tucuncuna.

      • Ishqui recuadro: Caipica tucurimui punllacunapi huaquin profeciacuna chai punllallapitaj pajtaricushcatami ricuchin. 1919-manta 1945-cama cai profeciacuna ima shina pajtarishcatami ricuchin. 1945 huatacamaca Alemania llajtami janaj ladomanta mandaj carca. Cutin Gran Bretaña y Estados Unidosmi ura ladomanta mandaj can. Profecía 6: 1919 huatapica cieloman rigrijcunatami panda religionmanta anchuchishpa tandachin. 1919 huatamantami ashtahuan huillancuna. Profecía 7: 1920 huatamanta, Segunda Guerra Mundial callaringacamami Sociedad de Naciones nishcaca tiyarca. Shinallataj cai recuadropica: Profecía 1-pi ricushca canchis umacunayuj animal tiyashpa catishcatami ricuchin. Profecía 5-pi ricushca fierrohuan, lodohuan rurashca chaquicuna tiyashpa catishcatapishmi ricuchin. 1939 huatamanta 1945 huatacama Segunda Guerra Mundial tiyashcatapishmi ricuchin. Diosta sirvijcunatapish ima shina llaquichishcatami ricuchin: Alemania llajtapica 1933-manta 1945-camaca 11.000 yalli Testigocunatami carcelpi churancuna. Gran Bretañapica 1939-manta 1945-camaca casi 1.600 Testigocunatami carcelpi churancuna. Estados Unidospica 1940-manta 1944-camaca 2.500 yalli cutincunami Testigocunata llaquichincuna.
        Profecía 6.

        Versocuna: Mateo 13:30; 24:14, 45, QC, 1989; 28:19, 20.

        Profecía: ‘Trigota’ tandashpaca granocunata huaquichinapimi churan. ‘Alli cazuj alli yuyaiyuj sirvijmanmi’ ‘amopaj huasipi cajcunata’ cuidachun paiman mingan. “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga”.

        Cashnami pajtarin: 1919 huatapimi Diospaj pueblotaca alli cazuj alli yuyayuj sirvij huauquicunaman mingarca. Chai punllamanta huichimanmi Bibliamanta yachacujcunaca ashtahuan predicashpa caticushca. Cunan punllacunapica testigo de Jehovacunaca 200 yalli llajtacunapimi huillacuncuna. Shinallataj chꞌican chꞌican publicacioncunatapishmi 1.000 yalli shimicunaman traducishcacuna.

      • Profecía 7.

        Versocuna: Daniel 12:11; Apocalipsis 13:11, 14, 15.

        Profecía: Ishqui gachuta charij animalmi ‘manchanana animalman rijchajta ruraichij’ nin. Qꞌuipaca ‘manchanana animalman rijchajta rurashcalla animalmanmi causaita cun’.

        Cashnami pajtarin: Gran Bretaña y Estados Unidosca Sociedad de Naciones nishcatami callarichircacuna. Shujtaj llajtacunami cai Sociedad de Naciones nishcataca apoyarcacuna. Qꞌuipaca janaj ladomanta mandajpishmi 1926-manta 1933-cama paicunahuan tandanacurca. Gentecunaca, “Sociedad de Nacionesmi sumaj causaita cunga” nishpami chaita jatunyachircacuna. Cunanpish gentecunaca ONU-mantami chashnallataj yuyancuna. Pero sumaj causaitaca Diospaj gobiernollami cui tucun.

      • Quimsa recuadro. Caipica tucurimui punllacunapi huaquin profeciacuna chai punllallapitaj pajtaricushcatami ricuchin. 1945-manta 1991-cama cai profeciacuna ima shina pajtarishcatami ricuchin. 1991 huatacamaca Unión Soviética, paita apoyajcunapish janaj ladomanta mandajmi carcacuna. Chai huashaca Rusia, paita apoyajcunapishmi janaj ladomanta mandaj tucurca. Gran Bretaña y Estados Unidosmi ura ladomanta mandaj can. Profecía 8: Manchanana bombata shitashcamantami jatun cushni llujshicun. Chaica Gran Bretaña y Estados Unidos ima shina llaquichishcatami ricuchin. Profecía 9: 1945 huatapica Sociedad de Nacionespaj randica ONU nishcami tiyai callarin. Shinallataj cai recuadropica: Profecía 1-pi ricushca canchis umacunayuj animal tiyashpa catishcatami ricuchin. Profecía 5-pi ricushca fierrohuan, lodohuan rurashca chaquicuna tiyashpa catishcatapishmi ricuchin. Profecía 6: 1945 huatapica 156.000 yalli publicadorcunami tiyarca. 1991 huatapajca 4.278.000 yalli publicadorcunami tiyarca. Ashtahuanpish cai recuadropica Diosta sirvijcunata ima shina llaquichishcatami ricuchin: 1945 huatamanta 1951 huatacamaca Unión Soviética llajtapimi achca Testigocunataca Siberia llajtaman richun obligancuna.
        Profecía 8.

        Versocuna: Daniel 8:23, 24.

        Profecía: Shuj millai mandajmi ‘jatunta llaquichin’.

        Cashnami pajtarin: Gran Bretaña y Estados Unidosca achcatami llaquichishcacuna. Por ejemplo, Segunda Guerra Mundialpica Estados Unidospaj, Gran Bretañapaj contra llajtata tucuchisha nishpami Estados Unidosca ishqui jatun bombacunata shitarca. Caica nunca mana tiyashca jatun llaquimi carca.

      • Profecía 9.

        Versocuna: Daniel 11:31; Apocalipsis 17:3, 7-11.

        Profecía: Chunga gachucunayuj ‘pucanicuj jatun animalca’ ucu jutcumantami llujshin. Paica pusaj mandajmi can. Daniel libropica cai mandajmanta parlashpaca ‘millanana chingachij’ nishpami shutichin.

        Cashnami pajtarin: Segunda Guerra Mundialpimi Sociedad de Naciones nishcaca ña mana imata rurai tucun. Chai qꞌuipami ONU nishca organizacionta callarichircacuna. Diospaj gobiernota jatunyachinapaj randica gentecunaca ONU nishcatami Sociedad de Nacionesta shina jatunyachircacuna. Cai ONU nishcaca tucui religioncunatami llaquichinga.

      • Chuscu recuadro. Caipica tucurimui punllacunapi huaquin profeciacuna chai punllallapitaj pajtaricushcatami ricuchin. Cunan punllacunamanta Armagedón chayangacama cai profeciacuna ima shina pajtarishcatami ricuchin. Rusia, paita apoyajcunapishmi janaj ladomanta mandaj can. Gran Bretaña y Estados Unidosmi ura ladomanta mandaj can. Profecía 10: Llajtacunata pushajcunaca allitaj, sumajtami causacunchij ningacunami. Chai qꞌuipami jatun llaqui punllaca callaringa. Profecía 11: Llajtacunaca panda religioncunatami llaquichingacuna. Profecía 12: Cai Allpata mandajcunaca Diospaj pueblotami llaquichi callaringa. Cai Allpapi saquirij agllashcacunatami jahua pachapi tandachinga. Profecía 13: Armagedón. Yuraj caballopi montashcami paipaj contracunata mishanga. Canchis umacunayuj manchanana animalca tucuchishcami canga. Runaman rijchajta rurashcatapishmi chaquipi cushpa ñutuchishpa chingachin. Shinallataj cai recuadropica: Profecía 1-pi ricushca manchanana animalca Armagedón chayangacamalla tiyana cashcatami ricuchin. Profecía 5-pi ricushca fierrohuan, lodohuan rurashca chaquicunaca Armagedón chayangacamalla tiyana cashcatapishmi ricuchin. Profecía 6: Cunan punllacunapica 8.680.000 yalli publicadorcunami tiyan. Ashtahuanpish cai recuadropica Diosta sirvijcunata ima shina llaquichishcatami ricuchin: 2017 huatapica Rusia llajtapimi autoridadcunaca huaquin Testigocunata carcelpi churashpa sucursalta quichurcacuna.
        Profecías 10 y 11.

        Versocuna: 1 Tesalonicenses 5:3; Apocalipsis 17:16.

        Profecía: Llajtacunaca “allitaj, sumajtami causacunchij” nincunami. Chai qꞌuipami ‘jatun animalpish’ paipaj ‘chunga gachucunapish’ ‘huainayashpa causaj huarmitaca’ llaquichishpa tucuchin. Chai huashaca Diablota apoyaj llajtacunapishmi tucuchishca canga.

        Cashnami pajtarin: Llajtacunaca allitaj, sumajtami causacunchij ningacunami. Chai qꞌuipami ONU nishca organizacionta apoyaj llajtacunaca panda religioncunata tucuchingacuna. Chashnami jatun llaqui punllacunaca callaringa. Diablopaj ruraicunata, millai gentecunata Jesús tucuchijpimi jatun llaqui punllacunaca tucuringa.

      • Profecía 12.

        Versocuna: Ezequiel 38:11, 14-17; Mateo 24:31.

        Profecía: Mandaj Gogmi Diospaj pueblota llaquichi callarin. Chai huashaca angelcunami jahua pachapi causangapaj ‘agllashcacunata’ tandachincuna.

        Cashnami pajtarin: Janaj ladomanta mandajca cai muyundij Allpapi tiyaj mandajcuna apoyajpimi Diospaj pueblotaca llaquichi callarin. Chai huashaca cai Allpapi saquirij agllashcacunatami jahua pachapi tandachin.

      • Profecía 13.

        Versocuna: Ezequiel 38:18-23; Daniel 2:34, 35, 44, 45; Apocalipsis 6:2; 16:14, 16; 17:14; 19:20.

        Profecía: Yuraj caballopi montashcami Mandaj Gogta, paipaj soldadocunatapish mishan. ‘Jatun animaltaca’ azufrehuan rupacuj nina cuchapimi shitan. Runaman rijchajta rurashcatapishmi ñutuchishpa chingachin.

        Cashnami pajtarin: Diospaj gobiernopi mandaj Jesusca Jehovapaj pueblota difindingapajmi llujshin. Jesuspish 144 milcunapish, angelcunapishmi Diospaj pueblota llaquichisha nijcunataca tucuchinga. Chashnami Diablota apoyaj tucui mandajcunaca chingaringa.