Cai Allpapica mana yanga tiyanchijchu

GENTECUNALLAMI ESCRIBINATA, PINTANATA YACHANCHIJ. SHINALLATAJ ALLI YUYASHPAMI IMATAPISH RURANCHIJ. ASHTAHUANCARIN ÑUCANCHIJLLAMI: “¿Universoca ima shinataj tiyai callarirca? ¿Maimantataj shamunchij? ¿Imamantataj causanchij? ¿Shamuj punllacunapica imashi tucushun?” nishpa tapurinchij.

Achca gentecunaca “chai tapuicunamanta yachanaca sinchimi can” nincunami. Cutin shujtajcunaca, “monomantami shamunchij, chaimantami chai tapuicunataca mana yachana canchij” nincunami. Historia, Biologiata yachachij William Provine runaca: ‘Gentecunaca cai Allpapica yangamanta tiyangapajllami huacharishcanchij. Ima diospish mana tiyanchu’ nircami.

Cai Allpapish, shujtaj planetacunapish universopica mana maipish cachun cuyurincunachu. Shinallataj cai Allpapi tiyashcacunaca mana intindipaj, yallitaj sumajcunami can. Caicunata charishcamantami sumaj causaita charinchij. Cientificocunacarin animalitocunata, plantacunata ricushpami huaquin aparatocunata rurancuna. Caita ricushpami achca gentecunaca: “Cai tucui mancharina cosascunataca shuj rurajmi rurashca canga” nincuna. Shinallataj: “Gentecunaca yangamanta tiyangapajllaca mana huacharishcanchijchu” nincunami.

Huaquin gentecuna evolucionpi imamanta mana crishpa catijta ricushun.

ALEXEI MARNOV, NEUROCIRUJANO runaca: “Escuelapica, ‘Diosca mana tiyanchu, mana yachajcunallami Diospica crincuna. Evolucionpimi crina canguichij’ nishpami yachachirca” nircami. Pero, 1990 huatapimi Alexeica Dios tiyashcata cri callarirca.

Alexeica: ‘Ñucanchij cuerpopaj partecuna ima shina funcionaj cashcatami yachanata munarcani. Por ejemplo, uma ñutcuca mana intindipaj, sumajta rurashcami can. Ñutcupimi ñucanchij yuyaicuna, munaicunaca huaquichishca tiyacun. Shinallataj ñutcuta charishcamantami imatapish jahualla rurai valinchij. Caita ricushpami, “¿chashna ñutcuta charishpapish imamantataj huañunchij? ¿imapajtaj causanchij?” nishpa yuyai callarircani. Cai tapuicunata alli yachashpami shuj uma ñutcuta ruraj tiyashcata cuentata curcani’ nircami.

Imapaj causashcata ashtahuan yachanata munashpami Alexeica Bibliata estudiai callarirca. Alexeipaj huarmica Dios tiyashcataca mana crijchu carca. Chaimantami paipaj cusa yachashcacuna panda cashcata ricuchingapaj paipish Bibliata yachai callarirca. Pero Bibliata yachashpaca paipish Dios tiyashcatami cri callarirca. Cunanca, Alexei paipaj huarmipish Dios tiyashcatami alli yachancuna. Chashnallataj gentecuna cai Allpapi imapaj causacushcatapishmi alli intindincuna.

HUABI YIN, CIENTÍFICA huarmica Fisicatami estudiarca. Qꞌuipaca Inti ima shina cajtami achca huatacunata yacharca.

Paica: “Cientificocuna cai Allpapi tiyashcacunata, jahua pachapi tiyashcacunata estudiashpaca mana maipish cachun cuyurij o funcionaj cashcatami ricunchij. Caita ricushpami, “¿caicuna chashna cuyurichun o funcionachunca pishi rurashca canga?” nishpa tapurij carcani. Por ejemplo, yanungapajca ñucanchijmi ninataca achcata rupachinchij o ashallata rupachinchij. Cutin, Intipaj calor ñucanchijta ama rupachichunca ‘¿pishi chai calortaca controlanga?’ nishpami tapurij carcani. Génesis 1:1-ta leyishpami chai calorta pi controlaj cashcata alli intindircani. Chaipica: ‘Jahua pachata, cai pachata callarichijca Taita Diosmi’ ninmi” nircami.

Cientificocunaca neurona nishcacuna ima laya funcionaj cashcatami huillashcacuna. Shinallataj Intipaj luz, calor ima shina cashcatami alli intindichishcacuna. Shinapish Bibliaca cai Allpapi tiyashcacuna, jahua pachapi tiyashcacunapish imapaj tiyashcatami huillan. Shinallataj Bibliaca gentecuna imapaj causashcatami alli intindichin. Caita yachashpami Alexei runapish Huabi huarmipish dimastij cushicurcacuna.

Por ejemplo, Allpamanta parlashpaca Bibliapica: “Diosca cai pachataca mana yanga tiyachun rurarcachu, runacuna causachunmi rurarca” ninmi (Isaías 45:18). Shinaca, ¿Diosca cai Allpataca imamantashi rurashca canga? Chaitaca shamuj yachaipimi yachashun.