Mana allita juzganaca tucuringami

Achca gentecunami cai revistapi ricushca versocunata catishpa mana allita juzganata saquishcacuna. Pero, mana allita juzganataca mana ñucanchijllatajchu saqui tucunchij. ¿Ima horaca chashna yuyanata saquishunchu?

Shuj alli gobiernotami minishtinchij

Cai tucui huatacunatami gentecuna mana allita juzganata saquichunca gobiernocunaca mana imata rurai tucushcacuna. Pero ¿maijan gobiernotaj chaita pajtachinga?

Gentecuna caishuj chaishuj mana allita juzganata saquichun ayudangapajca shuj gobiernoca caicunatami rurana can:

1. 1. Gentecuna shujtajcunamanta allita yuyachun, allita sintichunmi ayudana can.

2. 2. Shujtajcuna llaquichishcata yuyarishpa paicunata tigra llaquichina yuyaicunamanta jarcarichunmi ayudana can.

3. 3. Tucuicunata igualta trataj pushajcunatami churana can.

4. 4. Mundo enteromanta gentecunatami shuj familia shina cachun ayudana can.

Bibliapimi Yaya Diosca caicunata pajtachingapaj shuj mandanata churashcata yachachin. Chai mandanaca Diospaj Gobiernomi can (Lucas 4:43).

Chai gobiernoca ¿ima bendicioncunatataj cunga?

1. Alli yachaitami cunga

‘Tucui cai pachapi causajcunaca cashcata rurashpa causanatami yachangacuna’ (ISAÍAS 26:9, QC, 1989).

“Cashcata ruraj mandaj mandashcamantami sumaj causai tiyanga. Cashcata rurashpa mandacujpimari samarinapish, ima manchai illajlla canapish huiñaita canga” (ISAÍAS 32:17).

¿Imatataj nisha nin? Diospaj Gobiernomi gentecunamanca ima alli cashcallata yachachinga. Ima alli cashcata, ima mana alli cashcata, o ima justo cashcata, ima mana justo cashcata intindishpami shujtajcunamanta mana allita yuyanata saquishun. Tucuicunami shujtajcunata cꞌuyaihuan tratanaca alli cashcata yachangacuna.

2. Tucui llaquicunami tucuringa

“Diosca paicunapaj ñahuicunamantaca, tucui huiquitami pꞌichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu” (APOCALIPSIS 21:4).

¿Imatataj nisha nin? Diospaj Gobierno mandacujpica llaquichishca gentecunaca ña mana ashtahuan sufringachu. Paicunata ña mana pi yanganchijpimi paicunapaj shungupica ña mana pita pꞌiñangacuna.

3. Shuj alli mandajmi tiyanga

“Paica mandanapica mana ñahuita ricushpalla, imatapish ningachu. Ima shina allichina cajpipish, mana shujtajcuna nishcallata uyangachu. Ashtahuanpish mana mitsari tucujcunapajmi cashcata ruranga. Llajtapi llaquita apacuj huajchacunatami mitsanga” (ISAÍAS 11:3, 4, QC, 1989).

¿Imatataj nisha nin? Jesusmi Diospaj Gobiernopi mandaj can. Paimi jahua pachamanta cai Allpata mandanga. Paica cashcata rurashpami, mana gentecunapaj ñahuita ricushpalla mandanga. Jesuspajca tucuicunami igual canchij. Shinallataj paica tucui gentecuna paipaj mandashcacunata cazuchunmi ayudai tucun.

4. Tucuicuna tandalla cachunmi ayudanga

Diospaj Gobiernoca gentecuna “chai shinallataj cashcata yuyashpa, chai cꞌuyaillahuantaj cꞌuyanacushpa, shuj munailla, shuj shinalla yuyashpa” causachunmi ayudanga (FILIPENSES 2:2).

¿Imatataj nisha nin? Diospaj Gobierno mandacunpi causaj gentecunaca mana jahua shimillachu tandallami canchij ningacuna. Paicunaca caishuj chaishuj de verdad cꞌuyanacushcamantami shuj shinalla cangacuna.