Testigo de Jehovacunahuan Bibliata yachashpami Diosta rijsishpa paipaj amigo tucushcangui. Shinallataj Diospaj Gobierno mandacujpi, paraíso Allpapi huiñaita causana esperanzatapish charishcangui. Biblia yachachishcacunapipish ashtahuanmi cringui. Testigo de Jehovacunahuan tandanacushpami Yaya Dios paita sirvijcunata ima shina ayudacushcata ricushcangui. Shujtaj bendicioncunatapish ñami charingui (Zac. 8:23).

Bautizaringapajca ancianocunahuan tandanacushpami Bibliamanta imata yachashcata repasanaraj cangui (Heb. 6:1-3). Jehová Diosmanta yachangapaj esforzarijpica paica achcatami bendicianga. Shamuj punllapipish huiñai causaitami cunga (Juan 17:3).

1. ¿Imamantataj bautizarisha ningui?

2. ¿Jehová Diosca pitaj can?

   • “Jahua pachapipish, cai pachapipish Taita Diosca Mandaj Dios cashcata yuyaringuichij. Pi shujtajca mana tiyanchu” (Deut. 4:39).

   • “Cambaj shuti Jehová cashcata gentecuna yachachun. Canllami tucui cai allpata Jatun mandaj cangui” (Sal. 83:18, NWT).

3. ¿Imamantataj Diospaj shutita nina canchij?

   • “Chaimanta cancunaca cashna mañanguichij: ‘Jahua pachapi caj ñucanchij Yaya, cambaj jucha illaj shutitaca, alli nishca cachun’” (Mat. 6:9).

   • “Jehová Diospaj shutita nijcunami tucuicuna quishpiringacuna” (Rom. 10:13, NWT).

4. ¿Bibliapica Jehová Dios ima shina cashcatataj huillan?

   • ‘Tucui cai pachata ruraj, huiñaita causaj Mandaj Dios’ (Isa. 40:28).

   • “Jahua pachapi caj ñucanchij Yaya” (Mat. 6:9).

   • “Diosca cꞌuyajmari” (1 Juan 4:8).

5. ¿Jehová Diostaca ima shinataj sirvina cangui?

   • “Cambaj Taita Diostaca tucui shunguhuan, tucui almahuan, tucui yuyaihuan, tucui fuerzahuan cꞌuyangui” (Mar. 12:30).

   • “Mandaj cambaj Taita Diosta adorangui, paipajllata rurangui” (Luc. 4:8).

6. ¿Imamantataj Jehová Diostaca tucuipi cazusha ningui?

   • “Ñuca huahualla, yachaisapa cayari. Chashna cashpamari ñucataca cushichingui. Ñucata pꞌiñashpa rimajmanpish ima cutichinata charishamari” (Prov. 27:11).

7. ¿Pitataj mañana cangui? ¿Pipaj shutipitaj Yaya Diosta mañana cangui?

   • “Imatapish ñuca shutipi ñuca Yayata mañajpica paica cungallami” (Juan 16:23).

8. ¿Imacunamantataj Diostaca mañana canchij?

   • “Chaimanta cancunaca cashna mañanguichij: ‘Jahua pachapi caj ñucanchij Yaya, cambaj jucha illaj shutitaca, alli nishca cachun. Can mandana punlla ña chayamuchun. Ima shinami jahua pachapi can munashcata ruracun, shinallataj cai pachapipish can munashcata rurachun. Cunan punlla micunata ñucanchijman cuhuai. Ima shinami shujtajcuna ñucanchijta ima mana allita rurashcacunata perdonanchij, shinallataj quiquinpish ñucanchij juchacunata perdonapai. Ima mana allipi urmachun ama saquihuangui. Tucui millaimanta huaquichihuangui. Mandanapish, tucuita rurai tucuj canapish, jatun nishca canapish cambajmi. Chaica huiñai huiñaita chashna nishca cachun. Chashnacachun’” (Mat. 6:9-13).

   • “Pai munashca shina imatapish mañajpica, paica uyashpa cujlla cashcata yachashcamantami paipi shunguta churanchij” (1 Juan 5:14).

9. ¿Jehová Diosca imamantataj mana tucui mañashcacunata uyan?

   • “Yallitaj millaita rurashpa causashcamantaca, cancuna llaquipi cashpa Mandaj Diosta caparicujpipish, paica manataj cutichingachu” (Miq. 3:4).

   • “Jatun Diosca cashcata rurajcunataca ricuracunmi. Paipaj rinrinpish, paicuna mañashcacunataca uyaracunmi. Ashtahuanpish Jatun Diosca mana allita rurajcunatami pꞌiñan” (1 Ped. 3:12).

10. ¿Jesucristoca pitaj can?

    • ‘Simón Pedroca: “Canca causaj Diospaj Churi, Cristomari cangui” nircami’ (Mat. 16:16).

11. ¿Jesusca imapajtaj cai Allpaman shamurca?

    • “Runa Aichayujca, sirvishca cangapajca mana shamurcachu. Ashtahuanpish sirvingapaj, paipaj causaita cushpa tucuicunata randishpa cacharichingapajmi shamurca” (Mat. 20:28).

    • ‘Jesusca: “Dios mandagrin alli huillaitaca, shujtaj pueblocunapipish huillagrinami cani. Chaipajmi cachashca cani” nircami’ (Luc. 4:43).

12. ¿Jesús paipaj causaita cushcamantaca ima shinataj agradicishcata ricuchingui?

    • “Causacujcunaca ama paicunapajlla causachun, ashtahuanpish paicunamanta huañujpaj, causarijpaj causachunmi tucuicunamanta huañurca” (2 Cor. 5:15).

13. ¿Jehová Diosca imatataj Jesusmanca curca?

    • ‘Jesusca: “Jahua pachapi, cai pachapipish tucuita mandanataca ñucamanmi curca” nircami’ (Mat. 28:18).

    • “Chaimantami Diospish, tucui ima tiyajcunapaj jahuapi jatunyachirca. Tucui shuticunapaj jahuapi shuj jatun shutitapishmi curca” (Filip. 2:9).

14. ¿Testigo de Jehovacunapaj Cuerpo Gobernantepi caj huauquicunaca, Jesús agllashca “alli cazuj alli yuyaiyuj” cashcatachu cringui?

    • “¿Maijantaj alli cazuj alli yuyaiyuj runaca canga? Amoca paipaj runacunaman carana horaspi carachun, ricuchun saquijpi, chaita alli cazujmi alli runaca” (Mat. 24:45, QC, 1989).

15. ¿Espíritu santoca shuj personachu can?

    • ‘Shina nijpimi angelca: “Jucha illaj espiritumi cambaj jahuaman shamunga. Tucuipaj jahuapi caj Diosmi paipaj poderhuan llandunga. Chaimantami jucha illaj huacharigrij huahuaca, Diospaj Churi nishcapish canga” nirca’ (Luc. 1:35).

    • “Cancunaca mana allicuna cashpapish, cancunapaj huahuacunamanca imatapish allitamari cunguichij. ¿Manachu jahua pachapi caj cancunapaj Yayacarin jucha illaj espirituta cuhuai nishpa mañajcunamanca cungalla?” (Luc. 11:13).

16. ¿Jehová Diosca imallapajtaj paipaj espíritu santota utilizashca?

    • “Mandaj Diosca rimashcallahuanmi jahua pachacunataca rurarca. Chaipi imalla tiyajcunatapish pꞌucushpallami rurarca” (Sal. 33:6).

    • ‘Jucha illaj espíritu cancunapaj jahuaman shamujpimi, imatapish rurai tucuj canguichij. Chashna cashpami ñucamantaca cai pachapi tiyaj tucui llajtacunapi huillanguichij’ (Hech. 1:8).

    • “Profetacuna Quillcashcaca, maijan Quillca mana paicunapaj yuyaillamanta Quillcashcachu. Profetacunaca paicunapaj yuyaillamantaca manataj huillashcacunachu. Ashtahuanpish Diospajlla caj runacunami, Diospaj jucha illaj espíritu huillachijpi huillashcacuna” (2 Ped. 1:20, 21).

17. ¿Diospaj Gobiernoca imataj can?

    • ‘Jahua pacha Taita Diosca nunca pi mana chingachina mandanatami churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu’ (Dan. 2:44).

18. ¿Diospaj Gobierno mandacujpica imalla bendicioncunatataj charingui?

    • “Diosca paicunapaj ñahuicunamantaca, tucui huiquitami pꞌichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu” (Apoc. 21:4).

19. ¿Jesús ñalla bendicioncunata apamunataca ima shinataj yachangui?

    • ‘Yachacujcunaca: “Huillahuayari can huillacushcaca ¿ima punllataj chashna tucungari? Can cutin shamunapajpish, cai shina causai tucurinapajpish  ¿ima ricunata ricushpataj tucui chaicuna pajtamucushcataca yachashun?” nishpami, paillata tapungapaj cꞌuchuyarcacuna’. ‘Chaimi  Jesusca: “Mama llajtaca caishuj mama llajtahuan macanacungacunami, shinallataj jatun mandajcunapurapish macanacungacunami. Huañuchij millai ungüicuna, yaricaicuna, chꞌican chꞌican llajtacunapi pamba chujchushpa allpa tꞌimburicunapishmi tiyanga”. “Dios mandacun alli huillaitaca, tucui cai pachapi causajcunamanmi huillashpa yachaj chayachishca canga. Chai qꞌuipami cai shina causaica tucuringa” nirca’ (Mat. 24:3, 4, 7, 14).

    • “Cai punllacuna tucurinapajca llaqui punllacunami shamunga. Chai punllacunapica quiquinlla alli canata munajcuna, quiquinpajlla charinata munajcuna, jatun tucushcacuna, valishca tucujcuna, Taita Diosta cꞌamijcuna, yaya mamata mana cazujcuna, mana pagui nijcuna, Taita  Diosta mana rijsijcuna, rumi shungucuna, pꞌiñarishpapish manataj cungarijcuna, yangamanta juchachijcuna, mana jarcari tucujcuna, pꞌiña millaicuna, allita pꞌiñajcuna, quiquinpurallatataj llaquipi churajcuna, jahualla pꞌiñarijcuna, imapish mana caipajta yuyajcuna, Taita Diosta mashcanapaj randica aicha munaipi cushicunallatami cꞌuyangacuna. Ricuipica Dios yuyailla caj shinami cangacuna. Ashtahuanpish paicuna rurashcahuanca Diosca mana tiyashca cashcatami ricuchingacuna” (2 Tim. 3:1-5).

20. ¿Diospaj Gobiernota apoyana importante cashcataca ima shinataj ricuchingui?

    • “Diospaj Gobiernotapish, Diosta cazunatapish puntapi churashpa causaichij” (Mat. 6:33, NWT).

    • ‘Jesusca, paita catijcunamanca cashnami nirca: “Maijanpish ñucata catisha nijca, quiquin causaita ama llaquichun. Llaquita apana cashpapish caspita apashpa ñucata caticuilla”’ (Mat. 16:24, NWT).

21. ¿Diabloca pitaj can? ¿Demoniocunaca picunataj can?

    • ‘Cancunapaj yayaca Diablomari. Paica callarimanta huañuchijmi’ (Juan 8:44).

    • ‘Chai jatun dragontaca, cielomantami ña shitarca. Paica ñaupa rucu culebrami. Paica Diablo, Satanás shutipishmi. Paica, allpa pachapi causajcunata umajmi. Paitami tucui paipaj millai angelcunandij allpa pachaman shitarca’ (Apoc. 12:9).

22. ¿Diabloca imata nishpataj Jehová Diostapish paita sirvijcunatapish juchachirca?

    • “Huarmica culebrataca: ‘Huertapi tiyaj yuracunapi pꞌucushca granocunataca micui tucunchijmi’. Ashtahuanpish Taita Diosca: ‘Cancuna ama huañungapajca, huerta chaupipi tiyaj yurapi pꞌucushcataca amataj micunguichij, amataj tuparinguichijllapishchu’ nircami nishpami cutichirca. Chaimi culebraca, huarmitaca: ‘Cancunaca mana huañunguichijchu. Ashtahuanpish chai yuramanta micushpaca cancunapaj ñahuicuna pascarijpi Taita Dios shina tucunata, allitapish, mana allitapish yachaj tucuna cashcatamari Taita Diosca yachan’ nircami” (Gén. 3:2-5).

    • ‘Satanasca, Mandaj Diostaca: “Runaca, carapuraca cambiangallatajmari. Mana huañusha nishpaca, tucui charishcahuanmi paipaj causaitaca quishpichisha ninman” nircami’ (Job 2:4).

23. ¿Diablo nishcacuna llulla cashcataca ima shinataj ricuchi tucungui?

    • ‘Tucui shunguhuan Diospajta rurangui’ (1 Crón. 28:9).

    • “Huañungacamami ñucaca ima pandata mana rimasha” (Job 27:5).

24. ¿Imamantataj huañunchij?

    • “Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” (Rom. 5:12).

25. ¿Huañushpaca imataj tucunchij?

    • “Causacujrajcunaca huañuna cashcallatapish yachanmi. Ashtahuanpish huañushcacunaca ña imata mana yachanchu” (Ecl. 9:5).

26. ¿Huañushcacunapajca ima esperanzataj tiyan?

    • ‘Cashcata rurajcunatapish, mana cashcata rurajcunatapish Taita Diosmi causachinga’ (Hech. 24:15).

27. ¿Jesushuan mandangapajca mashna gentecunataj jahua pachaman ringa?

    • “Sión urcu jahuapi Oveja shayacujtami ricurcani. Paihuanca 144.000mi carca. Chaicunaca Ovejapaj shutitapish, paipaj Yayapaj shutitapish, frentepi quillcashcacunami carcacuna” (Apoc. 14:1).

Bibliata yachashpami Jehová Diospaj ñaupajpi alli ricuringapaj imata rurana cashcata yachashcangui. Chaita yachashcamantami cambaj ñaupa causaita saquishcangui. Cunanca Dios mandashcata pajtachishpami shujtajcunamanpish alli huillaicunata huillacungui.

Catij tapuicunata alli prepararishpaca Diospaj mandashcacunataca yuyaipimi charingui. Shinallataj Diosta sirvingapaj imata rurana cashcatami yuyaringui. Imata rurashpapish alli yuyashpa rurana cashcata, Diostapish jatunyachina cashcatami intindingui (2 Cor. 1:12; 1 Tim. 1:19; 1 Ped. 3:16, 21).

Bibliata yachashcamantami cunanca Diospaj Gobiernota apoyasha nishcata, paipaj pueblopi casha nishcata ricuchisha ningui. Cai folletopi tiyaj tapuicunata, versocunata liyishpaca Jehová Diosta tucuipi cazucushcata o mana cazucushcatami cuentata cungui. Por ejemplo, Yaya Diosca congregacionpi, familiapi o autoridadcunata cazuchunmi munan. Cai tapuicunata repasacushpaca Jehová Dios ñucanchijtayachachishcamanta, cuidashcamanta paita pagui nina cashcatapishmi intindingui. Shinallataj tandanacuicunaman mana faltashpa, chaipi participanatami ashtahuan munangui.

Cai tapuicunata alli analizashpaca shujtajcuna Jehová Diosta rijsichun, gentecunamanta pai imata ruracujta predicashpa catina cashcatami yuyaipi charingui (Mat. 24:14; 28:19, 20). Chashnallataj imamanta Diosman mingarina, bautizarina cashcatami alli intindingui. Tucui shunguhuan Jehová Diosta sirvijpica paica achcatami cushicunga.

1. ¿Bibliapica cazaranamantaca imatataj nin? ¿Bibliapica imata rurajpitaj divorciari tucushcata ricuchin?

   • “Diosca callaripi tucuita ruracushpaca, ‘Shuj cꞌari shuj huarmillata rurashcataca’ ¿manachu rezashcanguichij? nishpaca, cashnapishmi nirca: ‘Chaimanta cꞌarica, yaya mamata saquishpa, paipaj huarmihuan tandanacushpa, ishquindijmanta shuj aichallami tucunga’ nircami. Chaimanta ña mana ishquichu, shuj aichallami. Dios tandachishcataca, ni pi amataj chꞌicanyachichun”. “Maijanpish paipaj huarmita manapish huainayajpi shitashpa shujtajhuan cazarajca, huainayanmi. Shinallataj cusa shitashca huarmihuan cazarajpish huainayanmi” (Mat. 19:4-6, 9).

2. ¿Shuj cꞌari shuj  huarmi apanacushpalla causacushpaca imamantataj civilpi cazarana can? ¿Cazarashca cashpaca cambaj matrimonio autoridadcunapaj ñaupajpi legal cashcata segurochu cangui?

   • “Llajtata mandajcunata, pueblopi mandajcunatapish cazujcuna cachun” (Tito 3:1).

   • “Cazaranaca tucuicuna alli nishca cachun. Paicuna chayarinacunapish chuya cachun.  Ashtahuanpish apanacushpa causajcunata, huainayajcunataca Diosmi paicuna ima shina cashcataca ricuchinga” (Heb. 13:4).

3. ¿Familia ucupica imataj cangui?

   • “Ñuca huahualla, alli causanata cambaj yaya yachachishcataca alli uyayari. Cambaj mama yachachishcatapish ama mana uyasha nichu” (Prov. 1:8).

   • “Tandanacushca crijcunapajca, Cristoca umami. Chai shinallataj cusapish huarmipajca umami”. “Cristoca tandanacushca crijcunata cꞌuyashpami, paillataj curirca. Chai shinallataj cusacunapish, quiquin huarmicunata cꞌuyaichij” (Efes. 5:23, 25).

   • “Yayacuna, cancunapaj huahuacunata ama pꞌiñachichijchu. Chaipaj randica cunashpa, Jehová Diosmanta yachachishpa huiñachichij” (Efes. 6:4, NWT).

   • “Huahuacuna, cancunapaj yaya mamacunata tucuipi cazuichij. Mandaj Jesusca chaitami munan” (Col. 3:20).

   • “Huarmicuna cancunapaj cusacunata cazuichij” (1 Ped. 3:1).

4. ¿Causaitaca imamantataj respetana canchij?

   • “Paica causaitapish, samaitapish tucui imatapish cuj Taita Diosmi”. “Ñucanchijca Taita Dios causaita cujpimi causanchij, purinchij, paillamantatajmi tiyanchij” (Hech. 17:25, 28).

5. ¿Imamantataj mana pita huañuchina canchij? ¿Manaraj huacharishca huahuatapish imamantataj mana huañuchina canchij?

   • ‘Maijan cꞌaricuna macanacucushpa chichu huarmita panda macajpi, maijanpish huañujpica, chai runapish huañuchishca cachun’ (Éx. 21:22, 23, NWT).

   • “Mamapaj huijsapi tiyarishca pachamanta ñuca cuerpopi imalla tiyaj tucui ajushtaricujtami ricucurcangui. Chaicunataca  ñuca manaraj tiyajpimi libropi quillcashcata ña charicurcangui. Chaitami ñuca cuerpopica shujllapish mana illajta tucuita churashcangui” (Sal. 139:16).

   • ‘Mandaj Diosca yallitajmi pꞌiñan, manapish ima millaita rurajpi yanga huañuchijta’ (Prov. 6:16, 17).

6. ¿Yahuarhuanca imatataj Diosca ama rurachun nin?

   • “Yahuartapish, sipishpalla huañuchishca aichatapish ama micunguichij” (Hech. 15:29).

7. ¿Huauqui panicunataca imamantataj cꞌuyana canchij?

   • “Ñucaca cancunataca manaraj mandashcatami mandani. Cancunaca caishuj chaishuj cꞌuyanacuichij. Ima shinami ñuca cancunata cꞌuyarcani, chashnallataj cancunapish caishuj chaishuj cꞌuyanacuichij. Chashna caishuj chaishuj cꞌuyanacujpimi, cancunataca ñuca yachacujcunataj cashcata tucuicuna rijsingacuna”  (Juan 13:34, 35).

8. Huaquin ungüicunaca contagianllami o huañuimanmi apan. Chashna ungüita charijca: a) ¿Imamantataj shujtajcunata mana ugllarina, mana muchana can? b) Ungushca cashcamanta ¿shujtajcuna paicunapaj huasiman mana invitajpica imamantataj mana pꞌiñarina can? c) Contagiaj millai ungüita charishcata yuyashpaca, ¿imamantataj manaraj novio o novia tucushpa exámen de sangreta rurana can? d) Contagiaj ungüita charishpaca, ¿imamantataj manaraj bautizarishpa ancianocunata pushaj huauquiman huillana can?

   • ‘Piman ama imata dibichijchu, ashtahuanpish caishuj chaishuj cꞌuyanacunallata dibinguichij. Quiquin cꞌuyarij shinallataj shujtajcunatapish cꞌuyangui. Cꞌuyajca, shujtajtaca ima millaita mana ruranchu’ (Rom. 13:8-10).

   • “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” (Filip. 2:4).

9. ¿Imamantataj Yaya Diosca shujtajcunata perdonachun shuyan?

   • ‘Maijan caishujta pꞌiñashpa juchachijpica, caishuj chaishuj ahuantanacushpa, ima shinami cancunata [“Jehová”, NWT ] perdonarca, chai shinallataj caishuj chaishuj perdonanacuichij’ (Col. 3:13).

10. ¿Shuj huauqui o pani llullacunahuan canta umajpi o llaquichijpica imatataj rurana cangui?

    • “Cambaj huauqui canta llaquichishpa juchallijpica, paillahuan parlashpa chai mana allita rurashcata yuyachishpa rimangui. Can rimashcata pai uyajpica, canmi paitaca Diospajman tigrachingui. Ashtahuanpish can rimashcata mana uyajpica, shujta cashpa, ishquita cashpa pushashpa cutin paipajman ringui. Paicunami imallata uyashcata alli huillajcuna canga. Paicuna rimashcatapish mana uyajpica, tandanacushca crijcunaman huillangui. Tandanacushca crijcunatapish mana uyajpica, Diosta mana rijsij, millai runallataj cashcata yuyangui” (Mat. 18:15-17).

11. ¿Cai juchacunataca Jehová Diosca ima shinataj ricun?

    • ▪ Huainayanata

    • ▪ Santocunata adoranata

    • ▪ Cꞌaripura huarmipura chayarinata

    • ▪ Shuhuanata

    • ▪ Apostashpa pugllanata

    • ▪ Machanata

    • “Ama umarichijchu: Apanacushpa causajcuna, rurashcalla dioscunata adorajcuna, huainayajcuna, huarmi shina casha nijcuna, cꞌaripurallataj siririjcuna, shuhuacuna, quiquinpajlla charinata munajcuna, machajcuna, llaqui tucushca canman nijcuna, umashpa shuhuajcunapish Dios mandanapica imata mana japingacunachu” (1 Cor. 6:9, 10).

12. Huainayanaca tucui laya mapa ruraicunami can. ¿Chaipi ama urmangapajca imatataj rurana cangui?

    • “Huainayanataca ama yuyaichijllapishchu” (1 Cor. 6:18, QC, 1989).

13. Huaquin jambicunaca ñucanchij umata cuerpotami muspachin, viciopipish urmachin. ¿Chai jambicunataca imamantataj doctorcuna ubyachun nijllapi ubyana canchij?

    • “Cancunapaj cuerpocunataca, ima jucha illajllata, causaj sacrificiota Diosman cuichij. Chashna cashpami Dios munashca shina paita yuyarijcunataj canguichij. Cai pachapaj cajcuna shina rurashpa ama cushicuichijchu. Ashtahuanpish cancunapaj yuyaita mushujyachirashpa, shujtaj causaita causaichij. Chashna cashpami Diospaj munai ima cashcata, ima mana paipaj munai cashcata, ima shina cashcatataj alli agllai tucunguichij” (Rom. 12:1, 2).

14. ¿Demoniocunapaj ima ruraicunamantataj Diosca caruyachun nin?

    • ‘Cancunapuramanta adivinaj canata, brujo canata, yumbu canata, muspachij canata yachashpa rurajcunaca ama tiyachun. Muspachij yumbupish, adivinajpish, ima shinapish muspachijpish, huañushcacunata tapujpish ama tiyachun’ (Deut. 18:10, 11).

15. ¿Jatun juchapi urmashca cashpaca Yaya Dios perdonachunca imatataj utca rurana cangui?

    • “Mandaj Dios ñuca juchataca tucuitami quiquinman huillarcani. Millaita rurashcacunataca imata mana pacarcanichu. Ñuca mana cazushcacunataca Mandaj Diosmanmi huillarcani” (Sal. 32:5).

    • “¿Pi cancunapurapi ungushca tiyanchu? Congregacionmanta ancianocunata cayaichij. Paicuna Jehová Diospaj shutipi aceitehuan llihuishpa paimanta mañachuncuna. Paicuna crishpa mañashcamantami Jehová Diosca chai ungushcataca  alliyachishpa jatarichinga. Pai ima juchata rurashca cajpipish perdonashcami canga” (Sant. 5:14, 15, NWT).

16. ¿Shuj huauqui o pani jatun juchapi urmashcata yachaj chayashpaca imatataj rurana cangui?

    • “Maijanpish imata ricushca cajpi, uyashca cajpi tapujpi mana huillashpaca juchallisha nishpataj juchallishcami tucunga” (Lev. 5:1).

17. ¿Shuj huauqui o shuj pani ña mana testigo de Jehovachu can nijpica ima shinataj paita tratana canchij?

    • ‘Crijmi cani nishpapish, huainayaj, quiquinpajlla charinata munaj, rurashcalla dioscunata adoraj, llaqui tucushca canman nij, machaj, shuhua, chashna millai causacujhuanca ama tandanacunguichij, ama micunguichijllapish’ (1 Cor. 5:11).

    • “Maijanpish cancunapajman shamushpa, cai yachachina shinallatataj mana apamujpica, ama huasipi chasquinguichij: ‘¡Allimi shamushcangui!’ nishpallapish ama ninguichij” (2 Juan 10).

18. ¿Imamantataj Jehová Diosta cꞌuyajcunallahuan alli amigo cana canchij?

    • “Yachaisapacunahuan tandanacujca, yachaisapami tucun. Ashtahuanpish rumi shungucunahuan tandanacujca, jatun llaquipimi urman” (Prov. 13:20).

    • “Ama pandaringuichijchu. Mana allicunahuan tandanacujpica, cancuna alli causacushcataca pandachingami” (1 Cor. 15:33, QC, 1989).

19. ¿Testigo de Jehovacunaca imamantataj politicapi mana chagrurincuna?

    • “Ima shinami ñucaca mana cai pachapaj cani, chashnallatajmi paicunapish mana cai pachapaj” (Juan 17:16).

20. ¿Imamantataj autoridadcunata cazuna cangui?

    • “Jatun mandajcunataca tucuicuna cazuchun. Mandajca Dios churashcamantami tiyan. Dios mana churashca mandajca, mana tiyanchu” (Rom. 13:1).

21. ¿Gobiernocunapaj leycuna Diospaj mandashcacunahuan contra cajpica imatataj rurana cangui?

    • “Runacunata cazunapaj randica, Taita Diostami cazuna canchij” (Hech. 5:29).

22. ¿Shuj trabajota agllagricushpaca, cai mundopaj ruraicunahuan ama chagruringapajca ima versocunapitaj yuyana cangui?

    • “Shuj llajtahuan, caishuj llajtahuan jatun macanacuipish mana tiyangachu. Macanacunata yachanapish mana tiyangachu” (Miq. 4:3).

    • “¡Ñucapaj cajcunaca, paicunapaj juchacunapi ama chagruringapaj, paicuna shina ama llaquita apangapajca chai pueblomanta [o Babilonia jatun pueblomanta] llujshichij!” (Apoc. 18:4).

23. ¿Divertiringapajca imatataj agllanguiman, imatataj mana agllanguiman?

    • ‘Mandaj Diosca millaita ruranata cꞌuyajtaca pꞌiñanmi’ (Sal. 11:5).

    • “Millaitaca pꞌiñaichij, allitaca catichij” (Rom. 12:9).

    • “Tucui imapipish mana llulla canata, tucuipi alli canata, tucuipi cashcata ruraj canata, tucuipi chuya canata, tucuipi cꞌuyashca canata, tucuipi allimi nishca canata yuyaichij. Chashna imapipish alli nishca, alabashca cashca cashpaca, chashna cana yuyailla caichij” (Filip. 4:8).

24. ¿Imamantataj testigo de Jehovacunaca shujtaj religioncunahuan mana chagrurincuna?

    • “Jehová Diospaj mesamantapish, supaicunapaj mesamantapish mana micui tucunguichijchu” (1 Cor. 10:21, NWT).

    • “‘Paicunapaj chaupimanta llujshimuichij, chꞌicanyarichij’ ninmi Jatun Diosca. Shinallataj: ‘Ima mapata ama japirichijchu. Chashna rurajpica, cancunataca chasquishami’” (2 Cor. 6:17).

25. ¿Fiestacunapi manaraj chagrurishpaca ima versocunapitaj yuyana cangui?

    • “Taita Dios ama chagruringuichij nishca llajta gentecunahuanmi chagrurircacuna. Paicuna rurashca shina ruranatami yacharcacuna. Chaicunapaj rurashcalla dioscunapajtami rurarcacuna. Chaimi jatun llaqui tucurcacuna” (Sal. 106:35, 36).

    • “Huañushcacunaca ña imata mana yachanchu” (Ecl. 9:5).

    • “Ima shinami ñucaca mana cai pachapaj cani, chashnallatajmi paicunapish mana cai pachapaj” (Juan 17:16).

    • “Diosta mana rijsijcuna munashcata ruranataca, ñami sarunman yallitaj rurarcanguichij. Aicha munashcata rurashpa, aichata cushichishpa, machashpa, maipish cachun fiestacunata rurashpa, mana alli yuyaicunallahuan cushicushpa, millanayaj rurashcalla dioscunata adorashpami purircanguichij” (1 Ped. 4:3).

26. ¿Cumpleañosta celebrana cashcata o mana celebrana cashcata yachangapajca picunamantataj Bibliapi yachai tucungui?

    • ‘Quimsa punllapica jatun mandaj faraonca pai huacharishca punlla pajtajpimi, pai churashca mandajcunahuan micungapaj sumaj micuita rurarca. Tucui chaipi cajcuna ricucujpimi, copacunata pasachijcunata mandajtapish, tandata rurajcunata mandajtapish carcelmanta llujshichinaman cacharca. Copacunata pasachijcunata mandajtaca, pai maipi cashcallapitaj churajpimi, paica faraonpaj maquipi copata churashpa catirca. Tandata rurajcunata mandajtaca, huañuchishpami huarcurca’ (Gén. 40:20-22).

    • “Herodesca, pai huacharishca huatacuna pajtashca fiestatami ruracurca. Chaipimi Herodiaspaj ushushica, tucuicunapaj ñaupajpi tushushpa Herodesta cushichijpi, Herodesca can tucui ima mañashcata cushatajmi nirca. Paipaj mama yachachijpimi chai ushushica: ‘Bautizaj Juanpaj umata shuj platopi cunantaj cuhuai’ nirca”. ‘Herodesca Juanpaj umata carcelpi pꞌitimuchunmi cacharca’ (Mat. 14:6-8, 10).

27. ¿Imamantataj  pushaj huauquicunapaj consejocunata cazusha ningui?

    • “Cancunata michijcunata cazuichij. Paicuna mandashcatapish uyaichij. Diosman imalla rurashcata ricuchina cashcamantami, paicunaca cancunapaj almataca ricuracun. Imalla rurana cashcata cushicuihuan ama llaquirishpa rurachunmi chashna cazuna canguichij. Paicuna llaquirishca rurajpica ima allita mana japinguichijchu” (Heb. 13:17).

28. ¿Imamantataj canpish cambaj familiapish Bibliata estudiangapaj tiempota surcuna canguichij?

    • “Paica tutapish punllapish Mandaj Dios mandashca ima nisha nishcata umanarina yuyaillami, chai mandashcata pajtachina yuyaillami. Chai runaca yacu uripi tarpushca yura shinami canga. Pꞌucuna punllacunapitaj pꞌucuj shinami canga. Chai yuramantaca pꞌangacunapish mana urmanchu. Tucui imata pai rurashcapish allimi llujshinga” (Sal. 1:2, 3).

29. ¿Imamantataj tandanacuicunaman rinata, chaipi participanata munangui?

    • “Ñuca huauquicunaman quiquinpaj shutita huillashami. Tandanacushcacunapaj chaupipi quiquinta alabashami” (Sal. 22:22).

    • “Caishujmanta chaishujmanta ayudanacushpa, allicunata rurangapaj cꞌuyaihuan yuyachinacushunchij. Ñucanchij tandanacuiman rina cashcallamanta puricujcuna, ña mana rij shinaca ama rurashunchijchu. Chaipaj randica, Jesucristo shamuna punlla ñalla chayamucushcata yachashcamantacarin, ashtahuan yuyachinacushunchij” (Heb. 10:24, 25).

30. ¿Jesusca paita catijcunataca imata rurachuntaj mandarca?

    • ‘Tucui cai pachata richij, ñuca yachacujcunata ruraichij. Paicunataca bautizaichij. Cancunata ñuca tucui imalla mandashcacunata paicunapish rurachun yachachinguichij’ (Mat. 28:19, 20).

31. Muyundij Allpapi yachachishpa catingapaj, huauqui panicunatapish ayudangapajmi imalla charishcacunata cunchij. Pero, ¿Yaya Diosca ima munaihuan cuchuntaj munanga?

    • “Can imalla charishcacunahuanpish, Mandaj Diosta jatunyachingui”(Prov. 3:9).

    • “Tucuicuna quiquin shungupi yuyarishca shina cuichij. Ama llaquirishpa, ama cuichij nishcallamanta cuichijchu. Cushicushpa cujtamari, Diosca cꞌuyan” (2 Cor. 9:7).

32. ¿Diosta sirvijcunaca ima llaquicunatataj charingacuna?

    • “Cashcata ruraj cashcamanta llaquichina yuyailla llaquichishcacunaca cushichishcami. Jahua pachamanta mandanaca ñami paicunapi mandacun. Ñucata caticushcamanta tucui laya millai shimicunata rimashpa, llullashpa, cꞌamishpa, llaquichina yuyailla llaquichijpi llaquita apajcunaca cushichishcami. Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish, chashnallatajmi llaquichircacuna” (Mat. 5:10-12).

33. ¿Testigo de Jehová shina bautizarinaca imamantataj shuj bendición can?

    • “Tucuita Mandaj Dioslla, ñucaca canhuanmi casha nihuarcanguimari. Chaimantamari cambaj shimicunata ñucaman cujpica, cushicushpa ñuca shungupi chasquij carcani” (Jer. 15:16).