1-3. a) ¿Ñucanchij familia o amigo huañujpica ima tapuicunatataj ruranchij? b) ¿Achca religioncunaca huañushcacunamantaca imatataj yachachin?

CAPÍTULO 5-pica Jesús huañushcamanta huiñai causaita chari tucushcatami yacharcanchij. Shinallataj Apocalipsis 21:4-pica, shamuj punllacunapi ‘huañuica ña mana ashtahuan tiyangachu’ ninmi. Pero chai punlla chayangacamaca huañushpami caticunchij (Eclesiastés 9:5). Chaimantami “¿huañushca huashaca imataj tucunchij?” nishpa maipica tapurinchij.

² Ñucanchij familia o amigo huañujpica: “¿Maipishi canga? ¿Ñucanchijta ricucunchu? ¿Llaquinaitachu sufricun? ¿Ñucanchijta ayudai tucunchu? ¿Ima hora paita ricushunchu?” nishpami tapurinchij.

³ Achca religioncunaca cai tapuicunamantaca chꞌican chꞌican yuyaicunatami nin. Huaquincunaca, “allicunaca jahua pachamanmi rin, cutin mana allicunaca ucu pachamanmi rin” nincunami. Cutin shujtajcunaca, “huañushpaca shuj espíritu tucushpami ñucanchij huañushca familiahuan tupanaman rinchij” nincunami.

4. ¿Achca religioncunaca huañushcacunamantaca imatataj nincuna?

⁴ Religioncunaca huañushca qꞌuipa ima tucunamantaca diferente yuyaicunatami charincuna. Pero casi tucui religioncunami “gentecuna huañujpica cuerpoca huañuntajmi, pero alma o espirituca causashpami catin” nincuna. Paicuna nishcacunaca ¿ciertochu can?a

¿HUAÑUSHPACA IMATAJ TUCUNCHIJ?

5, 6. ¿Huañushca qꞌuipaca imataj tucunchij?

⁵ Yaya Diosmi huañushca qꞌuipa ima tucunataca alli yachan. Bibliapica gentecuna huañujpica causaica chaipimi tucurin ninmi. Huañushcacunaca mana ricui, mana uyai, mana yuyai tucuncunachu. Imalla rurashcacunapish, ima yuyashcacunapish tucuimi chingarin. Espíritu shinapish huañushcacunaca mana maipi causanchu.

⁶ Bibliapica: “Huañushcacunaca ña imata mana yachanchu” ninmi. Chaimantami huañushcacunaca cꞌuyanatapish, pꞌiñanatapish ña mana pudincuna. Shinallataj Bibliapica: “Seolman ringuillatajmi. Chaipica imata rurana mana tiyanchu. Imata yuyanallapish, imata yachanapish, alli yachaipish mana tiyanchu” ninmi (Eclesiastés 9:5, 6, 10-ta liyipai). Seol nishpaca mana shuj pushtumantachu parlacun. Seol nishpaca huañushcacuna dormicuj shina cashcata ricuchingapajllami chashna parlacun. Salmo 146:4-pica gentecuna huañujpica, ‘imata yuyarishcacunapish chingarinmi’ ninmi.

¿JESUSCA HUAÑUSHCACUNAMANTACA IMATATAJ YACHACHIRCA?

7. ¿Jesusca huañuitaca imahuantaj chꞌimbapurarca?

⁷ Lázaro huañujpimi Jesusca paipaj apostolcunamanca: “Ñucanchij cꞌuyashca Lazaroca dormicunmi. Paita rijchachinamanmi rigrini” nirca. Paita catijcuna ima nicushcata mana intindijpimi Jesusca, “Lazaroca huañushcatajmi” nirca (Juan 11:11-14). Lázaro huañujpica Jesusca, “Lazaroca jahua pachapi paipaj huañushca familiacunahuanmi can” mana nircachu. Shinallataj “Lazaroca ucu pachapimi llaquinaita sufricun” nishpapish mana nircachu. Chaipaj randica Lázaro huañushcataca huañujta dorminahuanmi chꞌimbapurarca. Bibliapi tiyaj shujtaj versocunapish huañuitaca dorminahuanmi chꞌimbapuran. Por ejemplo, Jesusca shuj huambrata manaraj causachishpami, ‘huambraca mana huañushcachu dormicunllami’ nirca (Lucas 8:52, 53).

8. ¿Diosca ñucanchijtaca huañuchunllachu rurarca?

⁸ Adanta, Evata Jehová Dios rurashpaca alli saludhuan, huiñaita causachunmi rurarca. Shinallataj huiñaita causana munaita charichunmi paicunata rurarca. Shuj cꞌuyaj yayaca paipaj huahuacuna ungushpa huañuchunca mana munanchu. Cai yaya layallatajmi Yayitu Diospish gentecuna ungushpa huañuchunca mana munan. Yaya Dios huiñaita causachun rurashca cajpica ¿imamantashi huañunchij?

¿IMAMANTATAJ HUAÑUNCHIJ?

9. ¿Dios mandashcata cazunaca Adanpaj, Evapajca sinchichu carca?

⁹ Edén huertapimi Jehová Diosca Adanmanca: “Cai huertapi tiyaj tucui yuracunapi pꞌucushcacunataca micunguilla. Ashtahuanpish huerta chaupipi tiyaj yuraca allita mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nircami (Génesis 2:9, 16, 17). Dios mandashcata cazunaca Adanpajca jahuallami carca. Dioslla Adanta Evata rurashcamantami ima alli cashcata ima mana alli cashcata decidi tucurca. Paicuna Diospaj mandashcacunata cazushca cashpaca Diosta respetashcata, agradicishcatami ricuchinman carca.

10, 11. a) ¿Adán Eva Diosta ama cazuchunca Diabloca imatataj rurarca? b) ¿Adán Evaca yachashca jahuapish imatataj rurarcacuna?

¹⁰ Adán Evaca Diosta mana cazurcacunachu. Diabloca Evataca cashna nishpami tapurca: “¿Cancunataca Taita Diostajchu, cai huertapi tiyaj yuracunamantaca ama micunguichij nirca?”. Chashna nijpimi Evaca cashna nishpa cutichirca: “Huertapi tiyaj yuracunapi pꞌucushca granocunataca micui tucunchijmi. Ashtahuanpish Taita Diosca: ‘Cancuna ama huañungapajca, huerta chaupipi tiyaj yurapi pꞌucushcataca amataj micunguichij, amataj tuparinguichijllapishchu nircami’” (Génesis 3:1-3).

¹¹ Diabloca Evataca: “Cancunaca mana huañunguichijchu. Ashtahuanpish chai yuramanta micushpaca cancunapaj ñahuicuna pascarijpi Taita Dios shina tucunata, allitapish, mana allitapish yachaj tucuna cashcatamari Taita Diosca yachan” nircami (Génesis 3:4-6). Diabloca ima alli cashcata ima mana alli cashcataca, canllatajmi decidi tucungui nishpami Evataca crichirca. Shinallataj, Diosta mana cazushpa chai yuramanta micushpaca mana huañunguichijchu nishpami llullarca. Evaca chaita uyashpami chai yuramanta micurca. Qꞌuipaca Adanmanpishmi cararca. Adanpish Evapish Jehová Dios chai yuramanta amataj micunguichij nishcataca allimi yacharcacuna. Chai yuramanta micushpaca Diospaj mandashcata mana valichishcatami ricuchircacuna.

12. ¿Diosca imamantataj Adanmanta Evamantaca llaquilla sintirirca?

¹² Cambaj huahuacunata alli huiñachishca jahua mana cazusha nijpica ¿manachu llaquilla sintiringuiman? Chai huahuacuna layallatajmi Adán, Evapish Diosta mana cazushpaca paita mana respetashcata ricuchircacuna. Chaimantami Diosca yallitaj llaquirirca.

13. ¿Imamantataj Diosca Adantaca “ñutu allpallatajmi tucungui” nirca?

¹³ Adán Evaca Diosta mana cazushcamantami huiñai causaita chingachircacuna. Diosca Adanmanca: “Ñutu allpallamantataj cashcamantaca ñutu allpallatajmi tucungui” nircami (Génesis 3:19-ta liyipai). Chaimantami Adán huañushpaca mana shuj espíritu shina causashpa catirca. Ashtahuanpish allpa tucushpami chingarirca (Génesis 2:7).

14. ¿Imamantataj huañunchij?

¹⁴ Adanpish Evapish Diosta cazushca cashpaca cunancamami causashpa catinman carca. Pero mana cazushcamantami juchayujcuna tucushpa huañurcacuna. Ñucanchijpish juchataca shuj millai ungüita shinami Adán Evamanta chasquishcanchij. Juchayujcuna cashcamantami tucuicuna huañunchij (Romanos 5:12). Jehová Diosca gentecuna huañuchunca nunca mana munarcachu. Chaimantami Bibliapica, huañuica shuj enemigo shinami can nin (1 Corintios 15:26).

PANDA YACHACHISHCACUNATA ÑA MANA CRINCHIJCHU

15. ¿Huañushcacunamantaca ima llulla yachachishcacunatataj mana crina canchij?

¹⁵ Achca religioncunapica huañushcacunaca causashpami catin nishpami paicunamanta shuj misata rurancuna. Mana cashpaca paicunamanta Diosta mañachunmi cullquita pagancuna. Pero Bibliapica huañushcacunaca maipi mana sufricunchu ninmi. Shinallataj huañushcacunahuanca mana parlai tucunchijchu, paicunataca ni imapi mana ayudai tucunchijchu. Huañushcacunapish imapi ayudanata o llaquichinataca mana valincunachu. Chaimantami huañushcacunataca mana manchana canchij. Huañushcacuna ima laya cashcata yachashpaca tranquilomi sintirinchij.

16. ¿Panda religioncunaca imatataj huañushcacunamantaca yachachin?

¹⁶ Diabloca llullacunata nishpami gentecunataca Diosmanta caruyachinata munan. Cai llullacunata catishpami maijan religioncunaca, “gentecuna huañujpica paicunapaj alma o espirituca causashpami catin” nincuna. ¿Cambaj religionca caitachu yachachin o Bibliapi ima nishcatachu yachachin?

17. a) ¿Maijan religioncunaca imatataj Yaya Diosmantaca yachachincuna? b) ¿Jehová Diosca ima laya Diostaj can?

¹⁷ Achca religioncunami, “Diosca millaicunataca infiernopimi rupanaman cachanga” nishpa Diostaca yangamanta juchachincuna. Pero Jehová Diosca gentecuna chashna sufrichunca mana munanchu (1 Juan 4:8-ta liyipai). Shuj yaya paipaj huahua mana allita rurajpi, huahuapaj maquita ninapi rupachijpica ¿imatataj cai yayamantaca yuyanguiman? Millai yayata shinami ricunguiman ¿nachu? Paipaj amigopish mana tucunata munanguimanchu. Diosmantapish chashna yuyachunmi Diabloca munan.

18. ¿Huañushcacunataca imamantataj mana manchana canchij?

¹⁸ Jehová Dios tucuita rurashcamantami pai solota adorana canchij (Apocalipsis 4:11). Shinapish maijan religioncunaca: “Huañushpaca shuj espiritumi tucunchij. Espiritucunaca ñucanchij amigocuna o ñucanchij contracunami cai tucun” nishpami yachachincuna. Chaimantami achca gentecunaca huañushcacunata manchancuna, adorancunapish. Pero huañushcacunaca imata mana sintinchu, ñucanchijtapish imata mana rurai tucunchu. Chaimi huañushcacunataca mana manchana canchij.

19. ¿Huañushca qꞌuipa ima tucushcata yachashpaca ima shinataj sintirinchij?

¹⁹ Huañushca qꞌuipa ima tucushcataca ñami alli intindishcanchij. Chaimantami panda yachachishcacunataca ña mana crina canchij. Ashtahuanpish shamuj punllacunapi huañushcacunata Dios causachinatami crina canchij.

20. ¿Catij temapica imatataj yachashun?

²⁰ Ñaupa tiempopi Diosta sirvij Jobca: “¿Runaca huañushpaca, cutin causaringachu?” nishpami tapurca (Job 14:14). Cai tapuimantami catij temapica yachashun.

1-3. a) ¿Ñucanchijtaca imataj prezushcata shina charicun? b) ¿Huañuimanta quishpichingapajca Diosca imatataj ruranga?

CANTACHARI yangamanta juchachishpa prezuman cachan. Chai prezumantaca “canca nunca mana llujshinguichu” nishpachari churan. Pipish cantaca manachari ayudai tucunga. Imata mana rurai tucushpachari llaquilla cangui. Cashna llaquilla cajpi canta prezumanta llujshichishpa pi ayudajpica ¿manachu cushilla sintiringuiman?

² Ñucanchijtapish huañuimi prezushcata laya charicun. Caimantaca ni pi mana quishpiri tucunchijchu. Pero Jehová Diosca huañuimanta huatashcata shina cacharichingapajmi poderta charin. Chaimi Bibliapica, “Diosca huañuitapish tucuchingami” nin (1 Corintios 15:26, QC, 1989).

³ ¿Huañui ña mana tiyajpica manachu cushilla sintirishun? Ari. Pero Yayitu Diosca huañuillataca mana tucuchingachu. Ashtahuanpish huañushcacunata causachishpami huañuitaca libritaj chingachinga. Bibliapica Diosmi ‘huañushcacunataca causachinga’ ninmi (Isaías 26:19). Cambaj familiata Taita Dios causachijpica ¿ima shinataj sintiringuiman?

FAMILIACUNA HUAÑUJPICA LLAQUILLAMI SINTIRINCHIJ

4. a) ¿Ñucanchij familia o amigo huañujpica pitaj animai tucun? b) ¿Picunataj Jesuspaj alli amigocuna carca?

⁴ Shuj familia o amigo huañujpica imata mana rurai tucushpami dimastij llaquirinchij. Pero Bibliapica huañushcacuna causaringami nijta yachashpami llaquilla cashpapish tranquilo sintirinchij (2 Corintios 1:3, 4-ta liyipai). Yaya Diospish, Jesuspish ñucanchij huañushca familiacunata, amigocunatami causachinata munan. ¿Imamantataj shina ninchij? Lazarohuan ima tucushcata ricushun. Jesús cai Allpapi cashpaca siempremi paipaj amigo Lazarota, paipaj panicunatapish visitaj carca. Chaimantami Bibliapica: “Jesusca Lazarotapish, Martatapish, Mariatapish cꞌuyarcami” nin (Juan 11:3-5).

5, 6. a) ¿Lazaropaj familiacuna huacacujta ricushpaca Jesusca ima shinataj sintirirca? b) ¿Huañushcacunamanta Jesús ima shina sintirishcata yachashpaca ima shinataj sintirinchij?

⁵ Lázaro huañujpimi Jesusca Martata, Mariata compañanaman rirca. Jesushuan tupanacushpami Martaca: “Can caipi cashca cajpica, ñuca turica mana huañunmanchu carca” nirca. Lazarota Jesús mana ayudai tucushcata yuyashpami Martaca shina nirca. Mariapish, paipaj familiacunapish huacacujta ricushpami Jesuspish dimastij llaquirishpa huacai callarirca (Juan 11:21, 33, 35). Shuj huañui tiyajpica Jesusca ñucanchij shinallatajmi achcata llaquirin.

⁶ Jehová Diospish, Jesuspish gentecuna huañuchunca mana munanchu. Chaimantami Lázaro huañujpica Jesusca dimastij llaquirirca (Juan 14:9). Diosca huañuitaca ñallami tucuchinga. Paillami chaitaca rurai tucun.

“¡LÁZARO, CHAIMANTA LLUJSHIMUI!”

7, 8. a) ¿Martaca imamantataj rumitaca ama anchuchichij nirca? b) ¿Jesusca ima milagrotataj rurarca?

⁷ Jesusca Lázaro pambashca jutcuman rishpami, chai jutcu jatun rumihuan tapashcata ricurca. Chaimi Jesusca, “rumita anchuchichij” nirca. Pero Martaca, Lázaro pambashcaca ñamari chuscu punllacuna nishpami rumitaca ama anchuchichijchu nirca (Juan 11:39). Jesús imata ruragrijtaca Martaca mana intindircachu.

⁸ Rumita anchuchijpimi Jesusca: “¡Lázaro, chaimanta llujshimui!” nishpa caparirca. Chaimi Lázaro causarishpaca, “chaquicunandij, maquicunandij maitushca llujshimurca”. Chai milagrota ricushpami Martapish Mariapish mancharircacuna (Juan 11:43, 44). Lázaro causarijpimi paipaj familiacuna, amigocunaca paita ugllarishpa paihuan parlanacurcacuna.

“HUAMBRA, CANTAMI JATARI NINI”

9, 10. a) ¿Huañushcacunata Jesús causachichunca pitaj poderta curca? b) ¿Yaya Dios gentecunata ima shina causachishcataca imamantataj Bibliapi liyina canchij?

⁹ Jesusca Yayitu Dios poderta cujpimi huañushcacunata causachirca. Chaimantami Lazarota causachingapajca Jesusca Yaya Diosta mañarca (Juan 11:41, 42-ta liyipai). Pero Jesusca mana Lazarollatachu causachirca.a Bibliapica 12 huatata charij shuj huambrata causachishcatapishmi parlan. Cai huambrapaj yayaca Jairo shutimi carca. Paica ‘shujlla huahuatami charini, ñuca ushushillata jambihuai nishpami’ Jesusta rogarca. Chashna rogacujpimi shujtajcuna shamushpaca: “Cambaj ushushica ñami huañun. Yachachijtaca ama ashtahuan pꞌiñachichu, saquilla” nircacuna. Chaita uyashpami Jesusca Jairotaca, “ama manchaichu, alliyachina cashcata crilla” nirca. Jairopaj huasiman ña chayacushpami gentecuna dimastij huacacujta Jesusca uyarca. Chaipimi, “¿imamantataj yallitaj bullashpa huacacunguichij? Huambraca mana huañushcachu, ashtahuanpish dormicunllami” nirca. Jairopish, paipaj familiacunapish Jesús nicushcataca mana intindircacunachu. Jesusca huambrapaj yaya mamahuan huasi ucuman yaicushpami huambrapaj maquita japishpaca, “huambra, cantami jatari nini” nishpa causachirca. Huambra jatarishpa purijta ricushpami paipaj yaya mamaca dimastij cushicurcacuna (Marcos 5:22-24, 35-42). Jairopish paipaj huarmipish paipaj ushushita ricushpaca Jehová Dios, Jesús paicunata ima shina ayudashcatami siempre yuyarijcuna cashcanga.

¹⁰ Jesús causachishca gentecunaca tigrami huañurcacuna. Pero Jesús ima shina causachishcata yachashpami shamuj punllacunapi huañushca gentecuna causarinata crinchij. Ashtahuantajca Jehová Diosmi huañushcacunata chashna causachinga.

DIOSMI HUAÑUSHCACUNATACA CAUSACHINGA

11. ¿Eclesiastés 9:5-pica imatataj yachachin?

¹¹ Bibliapica: “Huañushcacunaca ña imata mana yachanchu, imata ashtahuan mana japincunapishchu” ninmi (Eclesiastés 9:5). Chaimantami Lázaro huañushpaca imata ña mana sintirca. Jesús nishca shinami Lázaro huañushpaca dormicuj laya carca (Juan 11:11).

12. ¿Lázaro causarishcataca imamantataj crinchij?

¹² Achca gentecunami Jesús Lazarota ima shina causachijtaca ricurcacuna. Jesuspaj contracunapish Lázaro causarishcataca allimi yacharcacuna (Juan 11:47). Lazarota causachishcata ricushpami gentecunaca Jesuspi cri callarircacuna. Chaimantami Jesuspaj contracunaca Jesustapish Lazarotapish huañuchinata yuyarircacuna (Juan 11:53; 12:9-11).

13. ¿Huañushcacunata Dios causachinataca imamantataj crinchij?

¹³ Jesusca, ‘tucui pambashcacunami causaringacuna’ nircami (Juan 5:28). Chashna nishpaca Diospaj yuyaipi cajcunalla causarina cashcatami Jesusca nirca. Chai gentecunata causachingapajca Diosca paicuna ima shina cajtami alli yuyaringa. Pero ¿Diosca huañushcacuna ima shina cajta yuyari tucungachu? Ari. Yuyashun, jahua pachapica achca estrellacunami tiyan. Bibliapica, Diosca tucui estrellacunatami shutipi cayan ninmi (Isaías 40:26-ta liyipai). Yaya Dios cada estrellacunapaj shutita yachaj cashpaca, ¿manachu causarigrij gentecuna ima shina cashcataca jahualla yuyaringa? Ashtahuantajcarin Yayitu Diosca tucui podertami charin. Chaimantami huañushcacunatapish causachinga.

14, 15. ¿Jobca huañushcacunamantaca imatataj nirca?

¹⁴ Diosta sirvij Job runapish Yaya Dios huañushcacunata causachinatami crirca. Jobca: ‘¿Runa huañushpaca, cutin causaringachu?’ nishpami tapurirca. Shinallataj Jobca Diosmanca, ‘can ñucata cayajpica, ñucaca cutichishami’ nircami. Cai versopi nishca shinaca Jehová Diosmi huañushcacunata causachinga (Job 14:13-15).

¹⁵ Jehová Dios huañushcacunata causachina munaita charijta yachashpami cushilla sintirinchij. Pero “¿ñuca familiacunapish amigocunapish causaringachu?” nishpachari tapuringui. Bibliapica picunalla causarinata, causarishpa maipi causanatami yachachin. Caimanta ashtahuan yachashpa catishun.

‘ÑUCA RIMASHCATA UYASHPAMI CAUSARINGACUNA’

16. ¿Huañushcacuna causarishpaca cai Allpapica ima shinataj causangacuna?

¹⁶ Ñaupa tiempopi huañushcacunata Dios causachijpica cai Allpallapitajmi paicunapaj familiacunahuan, amigocunahuan cutin tuparcacuna. Chashnallatajmi shamuj punllapi huañushcacuna causarishpaca paicunapaj familiacunahuan cai Allpapi tupangacuna. Shinallataj cai Allpapi huiñaita causana oportunidadta charingapajmi paicunaca causaringacuna. Cai Allpapi macanacuicuna, huañuicuna, ungüicuna ña mana tiyajpimi sumajta causangacuna.

17. ¿Picunataj causaringacuna?

¹⁷ Jesusca: “Tucui pambashcacuna ñuca rimashcata uyashpami causaringacuna” nircami (Juan 5:28, 29, NM). Shinallataj Apocalipsis 20:13-pica: “Mama cuchapish paipi caj huañushcacunata tigrachircami. Huañuipish, Hadespish paicunapi caj huañushcacunata tigrachircami” ninmi. Hades nishpaca mana shuj lugarmantachu parlacun. Ashtahuanpish casi tucui huañushcacuna dormicuj shina cashcata ricuchingapajllami can. Shamuj punllacunapica achca huañushcacunami causaringacuna. Apóstol Pabloca: ‘Cashcata rurajcunatapish, mana cashcata rurajcunatapish Taita Diosmi causachinga’ nircami (Hechos 24:15-ta liyipai).

18. ¿Bibliapica “cashcata rurajcunami” causaringa nishpaca picunamantataj parlacun?

¹⁸ Jesús cai Allpaman manaraj shamujpica achcacunami Diosta alli sirvishpa huañurcacuna. Hebreos 11-pica huaquin cꞌari huarmicuna Diosta ima shina sirvishcatami parlan. Por ejemplo, Noé, Abraham, Sara, Moisés, Rut, Esterpish Diostaca tucui shunguhuanmi sirvishpa huañurcacuna. Cunan tiempopipish achcacunami Diosta alli sirvishpa huañushcacuna. Cai tucui gentecunatami Bibliapica “cashcata rurajcuna” nin. Paicunami shamuj punllacunapica causaringacuna.

19. a) ¿Bibliapica “mana cashcata rurajcuna” nishpaca picunamantataj parlacun? b) ¿Chai gentecunamanca Yaya Diosca ima oportunidadtataj cunga?

¹⁹ Achca gentecunami Diosta mana rijsishpa huañushcacuna. Paicunatami Bibliapica “mana cashcata rurajcuna” nin. Paicuna huañushca cajpipish Jehová Diosca mana cungarishcachu. Chaimantami Diosca paicunata causachishpa paita rijsichun shuj oportunidadta cunga.

20. ¿Yaya Diosca picunatataj mana causachinga?

²⁰ ¿Tucui huañushcacunachu causaringacuna? Mana. Jesusca huaquin gentecunaca mana causaringachu nircami (Lucas 12:5; nota19-ta ricui). Millaita rurashpa mana cambiasha nij gentecunami mana causaringacuna. Pi causarinata o mana causarinataca Jehovallami decidi tucun. Paillami tucuimanta yalli alli Juez can. Shinallataj Diosca, ‘causajcunapajpish huañushcacunapajpish juez cachunca Jesustami churarca’ (Hechos 10:42).

JAHUA PACHAPI CAUSARIJCUNAMANTA

21, 22. a) ¿Jahua pachapi causagrijcunaca ima shinataj causaringacuna? b) ¿Pitaj puntapica jahua pachaman ringapaj causarirca?

²¹ Bibliapica agllashca gentecunaca jahua pachapi causanaman ringapajmi causaringacuna ninmi. Paicunaca mana aichayuj tulluyujchu causaringacuna. Ashtahuanpish shuj espíritu shinami causaringacuna.

²² Jehovami Jesustaca quimsa punlla huañushca huasha causachirca. Paitaca mana aichayuj tulluyujtachu causachirca (Salmo 16:10; Hechos 13:34, 35). Jesusca achca poderta charij shuj espíritu shinami causarirca (1 Corintios 15:3-6). Chaimantami apóstol Pedroca: ‘Jesusca aichapica huañurcami, ashtahuanpish espiritupica causachishcami carca’ nirca (1 Pedro 3:18). Jahua pachapi causanaman ringapajca Jesusmi puntapica causarirca (Juan 3:13). Pero Bibliapica, shujtajcunapish jahua pachapi causangapajmi causaringacuna ninmi.

23, 24. a) ¿Jesusca ‘ashalla ovejacuna’ nishpaca picunamantataj parlacurca? b) ¿Cai ‘ashalla ovejacunaca’ mashnacunataj can?

²³ Jesusca huaquincuna jahua pachapi causanaman rina cashcatami yacharca. Chaimantami manaraj huañushpaca paita catijcunamanca, “cancuna causanata allichingapajmi rigrini” nirca (Juan 14:2). Shinallataj Jesusca jahua pachapi ashalla gentecuna causarinata yachashpami paicunaca ‘ashalla ovejacunami’ can nirca (Lucas 12:32). Apóstol Juanpish shuj muscuipi shinami jahua pachapi Jesushuan mashna gentecuna causagrijta ricurca. Paica ‘Jesusta, 144 mil gentecunatami Sión urcu jahuapi’ ricurca (Apocalipsis 14:1).

²⁴ ¿Ima horamantataj 144 mil gentecunaca jahua pachapi causarina carca? Bibliapi nishca shinaca Jesús jahua pachapi mandai callarishca huashami chai gentecunaca causarina carca (1 Corintios 15:23). Jesusca ñami jahua cielopi mandacun. Chaimantami chai 144 mil gentecunamantaca casi tucuicuna Jesushuan cangapaj causarishcacuna. Pero chai 144 mil gentecunamantaca huaquincunaca cai Allpapirajmi causacuncuna. Paicuna huañushpaca jahua pachapimi chai rato causaringacuna. Cutin achcacunaca cai Allpapi huiñaita causangapajmi causaringacuna.

25. ¿Shamuj capitulopica imatataj yachashun?

²⁵ Yayitu Diosca ñallami huañuitaca para siempre chingachinga. Chashnami huañuimantaca ñucanchijta quishpichinga (Isaías 25:8-ta liyipai). Pero 144 mil gentecunaca jahua pachapica ¿imatataj rurangacuna? Bibliapica, paicunaca Jesushuanmi mandangacuna ninmi. Catij capitulopimi caimantaca yachashun.