Gólgota nishcapimi Jesusca huañurca

Sacerdotecunata mandajcunaca Judea llajtata mandaj Pilatopajmanmi Jesusta pusharcacuna. Chaipimi Pilatoca: ‘¿Imatataj cai runaca rurashca?’ tapujpi paicunaca: ‘Reymi cani ninmi’ nircacuna. Chaimi Pilatoca Jesustaca: ‘¿Judiocunata mandajchu cangui?’ nishpa tapurca. Jesusca: ‘Ñuca Gobiernoca mana cai pachamantachu’ nircami.

Qꞌuipaca Pilatoca Galileata mandaj Herodes juzgachunmi Jesusta paipajman cacharca. Alli runa cashcata ricushpaca Herdodesca Pilatopajmanmi tigra cacharca. Chaipimi Pilatoca gentecunataca: ‘Herodespish, ñucapish cai runa ima mana allita rurashcataca mana japinchijchu, richun saquigrinillami’ nirca. Pero gentecunaca caparishpami: ‘¡Huañunatajmi can!’ nircacuna. Chashna nijpimi soldadocunaca Jesustaca macashpa, azotishpa chꞌucarcacuna. Paipaj umapipish casha coronata churachishpami: ‘Judiocunata mandaj, ¿allillachu cangui?’ nishpa burlarircacuna. Cutinmi Pilatoca: ‘Cai runa ima mana allita rurajtaca mana ricushcanichu’ nirca. Chashna nijpipish gentecunaca: ‘¡Caspipi clavaichij!’ nishpami caparircacuna. Chaimi Pilatoca Jesusta huañuchichun entregarca.

Chai qꞌuipaca Gólgota nishca pushtumanmi Jesusta pusharcacuna. Chaipimi paitaca shuj caspipi clavashpa huarcurcacuna. Jesusca: ‘Yayitu, paicunaca imata ruracushcataca mana yachancunachu. Paicunata perdonapailla’ nircami. Gentecunaca: ‘¡Diospaj Churitaj cashpaca chai caspimanta uricushpa quishpiriyari!’ nishpami burlarircacuna.

Jesuspaj ladopi huarcushca shuj huañuchij runaca: ‘Can mandacushpaca ñucata yuyaripangui’ nircami. Chaimi Jesusca: ‘Canca paraisopimi causangui’ nirca. Chishiyajpica ñapishmi quimsa horasta amsayarca. Jesusta catijcunapuramanta huaquincunaca paipaj cꞌuchupimi saquirircacuna. Paipaj mama Mariapish chaipimi carca. Jesusca: ‘Cambaj mamata shina ñuca mamitata cuidashpa convidai’ nishpami Juanmanca mingarca.

Ña huañugricushpami Jesusca: ‘Ñami pajtarishca’ nirca. Chashna nishpaca paipaj umata huarcushpami huañurca. Chaipimi ñapish allpaca chujchurca. Diospaj huasi ucupi tiyaj cortinapish jahuamanta urimanmi chaupirirca. Chai cortinaca Diospajlla chꞌicanyachishca ucutaca Diospajlla ashtahuan chꞌicanyachishca ucumantami separaj carca. Chaimi soldadocunata mandajca: ‘Paica Diospaj Churitajmari cashca’ nirca.