Jesusca causarircami

Jesús ña huañujpica achcata charij José shuti runami Pilatotaca: ‘Jesuspaj cuerpota caspimanta uriyachingapaj permisota cuhuai’ nirca. Joseca linohuan rurashca telahuan, mishquijlla qꞌuihuacunahuanmi Jesuspaj cuerpota pilluchishpa shuj mushuj jutcupi churarca. Qꞌuipaca jatun rumihuan jutcuta tapachunmi mandarca. Sacerdotecunata mandajcunaca Pilatomanca: ‘Discipulocuna Jesuspaj cuerpota shuhuashpaca: “Paica causarircami” ninatami manchanchij’ nircacunami. Chaimi Pilatoca: ‘Jutcupi rumita alli sellashpa, soldadocunata churaichij’ nirca.

Quimsa punlla pasashca huasha ña pacaricujpimi huaquin huarmicunaca jutcuta ricunaman rirca. Chaiman chayashpaca rumita anchuchishcatami ricurcacuna. Chai pambana jutcu ucupica shuj angelmi tiyacurca. Paica huarmicunataca: ‘Ama manchaichijchu. Jesusca causarishcami. Galileapi paihuan tupanacuchun discipulocunaman huillagrichij’ nircami.

Chaicamaca María Magdalenaca Pedrota, Juantapish mashcanamanmi rishca carca. Paicunamanca: ‘Jesuspaj cuerpotaca apashcacunamari’ nircami. Chaimi Pedropish, Juanpish jutcuman callpashpa rircacuna. Jutcu chushajlla cajta ricushpami huasiman tigrarcacuna.

Qꞌuipaca Mariaca jutcumanmi tigrarca. Jutcu ucupi ishqui angelcunata ricushpami: ‘Ñuca amitota maimanchari aparcacuna’ nirca. Chai huashaca shuj cꞌaritami ricurca. Huertata cuidaj runa cashcata yuyashpami: ‘¿Jesustaca maipitaj churarcangui? Huillahuai’ nirca. Paica: ‘¡María!’ nircami. Shina nijpimi Jesús cashcata cuentata curca. Chaimi: ‘¡Yachachij!’ nishpa ugllarirca. Jesusca: ‘Ñuca huauquicunaman ñucata ricushcata huillagri’ nircami. Chai ratomi Mariaca callpashpa rirca. Chayashpaca Jesusta ricushcatami discipulocunaman huillarca.

Chai punllallatajmi ishqui discipulocunaca Jerusalenmanta Emaús puebloman ricurcacuna. Chaipimi shuj runa paicunahuan puri callarirca. Imata parlanacucushcata tapujpimi discipulocunaca: ‘¿Manachu uyashcangui? Quimsa punllacuna huashamanmi sacerdotecunata mandajcunaca Jesusta huañuchichun mandarca. Cunanca huaquin huarmicunaca: “Jesusca causarishcamari” nincunami’ nircacuna. Shina nijpimi chai runaca: ‘Profetacunaca Cristo huañuna cashcata, causarina cashcatami huillarcacuna. ¿Chaitaca manachu cringuichij?’ nirca. Shinallataj Quillcashcacunapi imalla nicushcatapish parlashpami catirca. Ña Emaús puebloman chayashpaca chai runataca ñucanchijhuan saquirilla nircacunami. Qꞌuipaca chai runaca micungapajmi Diosta mañarca. Chaipimi discipulocunaca Jesús cashcata cuentata curcacuna. Jesusca chai ratomi paicunapaj ñaupajmanta chingarirca.

Chai ishqui discipulocunaca Jerusalenmanmi callpashpa rircacuna. Apostolcuna tandanacushca huasimanmi chayarcacuna. Paicunamanca imalla tucushcatami huillarcacuna. Paicuna huasi ucupi cajpirajmi Jesusca ricurirca. Pai cashcataca mana crircacunachu. Shinapish Jesusca: ‘Ñuca maquita japishpa ricuichij. Quillcashcacunapica Cristoca huañushcacunapaj chaupimanta causarinatami huillarca’ nircami.