Manchaita charishpapish misionera shinami sirvishcani

Austriapi saquirij Viena llajtapimi 1951 huatapi huacharircani. Ñucaca gentecunahuan parlanata manchashpapish Diostaca shungumantami punllanta mañaj carcani. Ñucapish, ñuca familiapish catolicocunami carcanchij. Shinapish ñuca nueve huatacunata charijpimi ñuca yayaca testigo de Jehovacunahuan Bibliata estudiai callarirca. Qꞌuipacarin ñuca mamapishmi Bibliamanta estudiai callarirca.

Vienapi saquirij Döbling congregacionmanmi ñuca familiahuan ri callarircanchij. Shinallataj ñuca familiahuanmi tandalla Bibliata estudiaj carcanchij. Jatun tandanacuicunapipishmi ayudajcuna carcanchij. Chashnami ñuca yayaca Jehová Diosta tucui shunguhuan cꞌuyachun ñucataca ayudarca. Ñuca yayaca ñucamantapish, ñuca ñañamantapish precursoracuna tucuchun ayudahuai nishpami Diosta mañaj carca. Shinapish chai tiempopica precursora canata manaraj munarcanichu.

PRECURSORAMI TUCURCANI

14 huatacunata charishpami 1965 huatapi bautizarircani. Shinapish gentecunaman Diosmanta huillanatami manchaj carcani. Shujtaj jovencuna shina mana cashcatapishmi yuyai callarircani. Chashna yuyashcamantami bautizarishca qꞌuipaca Diosta mana sirvij jovencunahuan tandanacui callarircani. Paicunahuan achca tiempota mana pasana cashcata yachashcamantami llaquilla sintirij carcani. Shinapish paicunamanta caruyangapaj imallata rurashcatami parlasha nini.

Diosta mana sirvij jovencunahuan apanacunata saquishpami Dorothée nishca joven huarmihuan apanacui callarircani. Paica 16 huatacunata charishpami publicadora tucurca. Dorotheeca ñucapaj qꞌuipa cashpapish huasin huasin Jehová Diosmanta huillanatami achcata munarca. Ñucaca paipaj punta cashpapish huillanamanca mana llujshijchu carcani. Paica paipaj ungushca mamata cuidana cashpapish, pailla Diosta sirvij cashpapish huillanamanca siempremi llujshij carca. Ñucapish paipaj ejemplota catishpami Jehová Diosta ashtahuan sirvinata munarcani. Ñucaca Dorotheehuan Jehová Diosta ashtahuan sirvisha nishpami precursorado auxiliarta japircanchij. Qꞌuipacarin precursoras regularesmi tucurcanchij. Paica cushicushpami huillaj carca. Ñucatapish Bibliamanta shuj yachacujta charichunmi ayudarca. Chaimi huasicunapipish, callecunapipish, shujtaj lugarcunapipish, gentecunahuan jahualla parlai tucurcani.

Ñucaca precursora regular shinami casi shuj huatata ña sirvicurcani. Chashna sirvicujpimi ñuca congregacionmanca turi Heinzca precursor especial shina sirvinaman shamurca. Paita ricushcahuanmi ñucaca paita munarcami. Turi Heinzca Canadá llajtapi paipaj testigo caj huauquita visitanaman rishpami Diosta rijsishca carca. Shinallataj Heinzca misionero canatami munarca. Pero ñucaca misionera shina sirvinata mana munashcamantami paimantaca ashata caruyarcani. Chashna rurashpapish qꞌuipaca paihuanmi llujshi callarircani. Tiempohuanca paihuanmi cazararcani. Chaimi precursorescuna shina Austriallapitaj sirvishpa catircanchij.

MISIONERA CANATAMI MUNARCANI

Ñuca cusaca misionero shina sirvina munaita charishcatami cutin cutin nij carca. Ñucaca manchaita charishpapish ñami precursora carcani. Shinapish ñucapajca misionero shina sirvinaca dimastij sinchimi carca. Chashna yuyajpipish ñuca cusaca obliganapaj randica pacienciahuanmi animashpa catirca. Paica: “Mana huahuacunata charinchijchu. ¿Manachu Jehová Diosta ashtahuan sirvi tucunchij?” nishpami tapuj carca. Shinallataj ama ñucallapi yuyachun, gentecunata ayudachunpishmi animarca. Paica ñuca minishtishca horaspimi alajata consejaj carca.

Chashna animajpimi asha asha misionera shina sirvina munaita chari callarircani. Chaimi Escuela de Galaadman ringapaj shuj solicitudta cacharcanchij. Shinapish Betelpi sirvij shuj turimi ñucataca inglesta ashtahuan yachachun consejarca. Chaimi inglesta yachai callarircani. Quimsa huatacuna qꞌuipacarin Austriapi saquirij Salzburgo llajtapi sirvichunmi cacharcacuna. Chaipica serbocroata shimipi parlaj congregacionpimi sirvircanchij. Siete huatacunatami chai shimipi huillarcanchij. Chai tiempopica ñuca cusa shuj huatatami superintendente de circuito carca. Chaimi serbocroata shimita parlaj congregacioncunata visitashpa purij carcanchij. Chai shimita rimana sinchi cajpipish Bibliamanta achca yachacujcunatami charircanchij.

1979 huatapica Betelpi sirvij turicunami Bulgaria llajtaman ñucanchijta cacharcacuna. Chai llajtapaj gobiernoca testigocuna huillachun, tandanacuchunca mana saquircacunachu. Chaimantami chai llajtapi “paseanaman ricuj shina” uchilla publicacioncunata pacalla apana carcanchij. Chai uchilla publicacioncunataca cinco ñañacunamanmi cuna carcanchij. Paicunaca Bulgariapi saquirij Sofía llajtapimi causacurcacuna. Chai publicacioncunata pacalla apacushpaca manchaihuanmi huañucurcani. Shinapish chaicunata apachunca Jehová Diosllatajmi ayudarca. Chai ñañacuna carcelpi churanata yachashpapish mana manchashpa Jehová Diosta cushicuihuan sirvicujtami ricurcani. Chaimi ñucapish mana manchashpa Dios mingashcacunata pajtachina cashcata intindircani.

Chai huashaca cutinmi Escuela de Galaadman ringapaj shuj solicitudta cacharcanchij. Chaimi chaiman richun ñucanchijta invitashcarca. Ñucanchijca chai escuela inglés shimipi cashcamanta Estados Unidos llajtapi cana cashcatami yuyarcanchij. Shinapish chai escuelataca noviembre de 1981 huatapimi Alemania llajtapipish rurarcacuna. Chai escuela alemán shimipi cashcamantami jahualla intindi tucurcani.

ACHCA MACANACUICUNA TIYAJ LLAJTAPIMI SIRVINAMAN RIRCANCHIJ

Galaadpi graduarishca qꞌuipaca Kenia llajtamanmi cacharcacuna. Kenia llajtapi saquirij Betelpi sirvij turicunaca Uganda llajtapi sirvigrichunmi nircacuna. 10 huatacuna huashamanmi chai llajtapaj soldadocunaca chai llajtapaj gobiernohuanmi macanacushca carcacuna. Chaimi soldadocunata mandaj Idi Amin runaca Uganda llajtata mandai callarishcarca. Pai mandacushcamantami achca gentecunaca huañurca. Achca llaquicunapishmi tiyarca. 1979 huatapipish shujtajcunami gobiernohuan macanacui callarircacuna. Chaipi achca llaquicuna tiyashcamantami chaipi sirvigrinataca mana munarcani. Shinapish Escuela de Galaadpimi Jehová Diospi confianata yachachircacuna. Chaimi Uganda llajtapi sirvigrinata decidircanchij.

2010-paj Anuario nishca libropica ñuca cusaca cashnami nirca: “Uganda llajtapica luzpish, yacupish, telefonocunapaj señalpish mana tiyarcachu. Shinallataj tutacunaca huasicunamanmi shuhuanaman yaicujcuna carca. Armacunahuanpishmi disparajcuna carca. Chaimi gentecunaca paicunapaj huasipi mana dormishpa tucui tuta Diosta mañashpa pasajcuna carca” nircami. Chaipi causana sinchi cajpipish turi ñañacunaca Jehová Diosta sirvinataca manataj saquircacunachu.

1982 huatapimi ñuca cusapish, ñucapish Ugandapi saquirij Kampala llajtaman chayarcanchij. Chaipica Sam y Christina cusa huarmica cinco quillacunatami paicunapaj huasipi ñucanchijta chasquircacuna. Paicunaca paicunapaj cinco uchilla huahuacunahuan, paicunapaj chuscu familiacunahuanpishmi causacurcacuna. Paicunaca achcacuna cashcamantami punllapica shuj cutinlla micujcuna carca. Chashna jahuapish paicuna imalla charishca cosascunatami ñucanchijman cujcuna carca. Shinallataj paicunamantaca achcatami yacharcanchij. Por ejemplo, ashalla yacuhuanmi armanata yacharcanchij. Qꞌuipaca chai armashca yacullatatajmi bañopi shitangapaj utilizaj carcanchij. 1983 huatapica Kampala llajtallapitajmi causangapaj shuj huasita japircanchij.

Chai llajtapica cushicushpami huillaj carcanchij. Shuj quillaca 4.000 yalli revistacunatami gentecunaman saquircanchij. Chaipi causaj gentecunaca Diospi crijcuna, Bibliamanta yachasha nijcunami carca. Chaimantami ñucanchijca 10 o 15 yachacujcunata charij carcanchij. Tucui semanacunami ñucanchij yachacujcunaca tandanacuicunaman chaquillahuan rijcuna carca. Purina cashpapish mana quejarijcunachu carca. Ashtahuanpish cushicushpami tandanacuicunaman rijcuna carca. Chaita ricushpami ñucanchijpish paicuna shina casha nircanchij.

1985 y 1986 huatacunapimi cutin Uganda llajtapica guerra callarirca. Chaimi soldadocunapish, maipica huahuacunapish armacunata apashpa ñancunapi jarcajcuna carca. Paicunata mana manchashpa, alli yuyashpa predicashpa catingapajmi Jehová Dios ayudachun cutin cutin mañaj carcanchij. Jehová Dios ayudashcamantami Bibliamanta maijan yachasha nijpica cushicushpa huillaj carcanchij.

Shujtaj llajtamanta shamujcunaman predicashpami achcata cushicujcuna carcanchij. Por ejemplo, Murat y Dilbar Ibatullin cusa huarmimanmi Bibliamanta yachachijcuna carcanchij. Paicunaca Rusiapi caj Tartaristán llajtamantami carca. Muratca doctormi carca. Paicunaca ishquindijmi bautizarircacuna. Jehová Diostami sirvishpa catincuna. Qꞌuipaca Ucrania llajtamanta Tatjana Vileyska nishca shuti huarmitami rijsircani. Paica yallitaj llaquilla cashcamantami huañunapi yuyacushcarca. Shinapish paica Diosta rijsishcamantami bautizarirca. Chai huashaca paipaj llajtaman rishpami ñucanchij publicacioncunata traducishpa trabajai callarirca.a

BULGARIA LLAJTAPIMI SIRVINAMAN RIRCANCHIJ

1991 huatapimi ashata samaringapaj Austria llajtaman rircanchij. Chaipi cajpimi Austria Betelpi caj turicunaca ñucanchijta cayarcacuna. Chaipimi Bulgaria llajtapi huillagrichun nircacuna. 1991 huatapimi Europapi caj gobiernocunaca chꞌican chꞌican llajtacunapi testigo de Jehovacuna cutin huillachun saquircacuna. Chaimantami turicunaca Bulgaria llajtapi huillagrichun nircacuna. Ña parlashca shinaca 1979 huatapimi chai llajtamanca huaquin uchilla publicacioncunata pacalla aparcanchij. Pero cunanca chai llajtapi huillagrichunmi ñucanchijtaca cachagrircacuna.

Chaimi chai turicunaca Uganda llajtaman ña ama tigrachun nircacuna. Chashna nishcamantami Uganda llajtapi caj ñucanchij cosascunata apanaman mana tigrai tucurcanchij. Ñucanchij turi ñañacunamantapish mana despidi tucurcanchij. Chai huashaca Alemaniapi saquirij Betelmanmi rircanchij. Chaipimi Bulgaria llajtaman richun shuj carrota curcacuna. Bulgariaman chayajpimi Sofía nishca ciudadpi sirvigrichun cacharcacuna. Chaipica 20 publicadorescuna tiyaj uchilla grupomi tiyarca.

Bulgaria llajtapica chꞌican chꞌican jarcaicunami tiyarca. Por ejemplo, ñucanchijca mana búlgaro shimita yacharcanchijchu. Shinallataj chai shimipica ishqui publicacioncunallami tiyarca. “La verdad que lleva a vida eterna” y “Mi libro de historias bíblicas” nishcacunami carca. Chaimantami Bibliamanta yachajcunata charinaca sinchi carca. Chashna laya jarcaicuna tiyajpipish ñucanchijcunaca ashallacuna cashpapish cushicuihuanmi huillajcuna carcanchij. Chaita ricushpami iglesia catolicata pushajcunaca yallitaj pꞌiñarishpa ñucanchijta catirashpa llaquichisha nircacuna.

1994 huatapimi Bulgariapaj gobiernoca cutin testigo de Jehovacuna ama tandanacuchun, ama predicachun jarcai callarirca. Noticiacunapipish ñucanchijmantaca jatun llullacunatami nijcuna carca. Paicunaca ñucanchij huahuacunata huañuchunlla saquijllacuna cashcata, shujtaj turi ñañacunatapish paicunallataj huañuchun animajcuna cashcatami nircacuna. Chaimantami achca gentecunaca millai, panda religioncuna nishpa ñucanchijta achcata llaquichi callarircacuna. Ñucanchijcuna huillacujpimi achca gentecunaca ñucanchijta caparishpa, policiacunata cayashpa, ima ricurishca cosascunahuan shitashpa mana alli tratajcuna carca. Ñucanchij turi ñañacunatapish carcelpimi churajcuna carca. Bulgaria llajtamanca publicacioncunatapish mana cachai tucurcacunachu. Maipi tandanacunatapish mana chari tucurcanchijchu. Shuj cutinca ñucanchij jatun tandanacuita ruracujpimi policiacuna chayamushpa chai tandanacuita ama rurachun jarcarcacuna. Ñucapish, ñuca cusapish cai laya llaquicunataca mana nunca ricushca carcanchijchu. Uganda llajtapi sirvicujpica gentecunaca cꞌuyaj, Bibliamanta yachasha nijcunami carca. Shinapish ¿Bulgaria llajtapica chai tucui llaquicunata aguantangapajca imatataj rurarcanchij?

Turi ñañacunahuanmi tandalla caishujmanta chaishujmanta cuidanacushpa pasaj carcanchij. Paicunaca Jehová Diosta rijsishcamantami cushilla sintirircacuna. Ñucanchij paicunahuan cashcamantapishmi achcata pagui nircacuna. Ñucanchijca llaquicunallapi yuyarinapaj randica gentecunata ayudana yuyailla cana cashcatami yacharcanchij.

1998 huatapica Bulgariapaj gobiernoca cutin Testigocuna tandanacuchun, predicachunmi saquirca. Turi ñañacunaca achca publicacioncunatapishmi búlgaro shimipi traduci callarircacuna. 2004 huatapimi Bulgaria llajtapica Betelta shayachircacuna. Cunanca Bulgaria llajtapica 57 congregacioncunami tiyan. Chaipica 2.953 turi ñañacunami tandanacuncuna. Shinallataj 2024 huatapica Jesús huañushcata yuyarina tandanacuipica 6.475 gentecunami tandanacurcanchij. Sofía llajtapica 5 ñañacunallami tiyashcarca. Pero cunanca 9 congregacioncunami tiyan. Chaita ricushpami Isaías 60:​22-pi ima nishcacuna pajtarishcata ricushcanchij. Chaipica: “Uchillaca huaranga huarangami tucunga” ninmi.

SINCHI LLAQUICUNATAMI CHARISHCANCHIJ

Ñucaca tauca tumorcunatami charishcani. Shuj tumorca umapimi llujshirca. Chaimi doctorcunaca ñucataca radioterapiata rurarcacuna. Qꞌuipacarin shuj operacionta rurangapajmi India llajtaman aparcacuna. Chaipica 12 horascunata operashpami casi tucui tumorta umamanta llujchircacuna. Alli tucungacamami Indiapi caj Betelpi saquirircani. Chai qꞌuipami Bulgariaman tigrarcanchij.

Ñuca cusatapish shuj millai ungüimi japirca. Chaimantami paica purinata, rimanata, cuyurinatapish ña mana valirca. Anchayashpa catishcamantami ñucaca paita ayudana carcani. Maipica ñucaca fuerza illaj, achca preocuparishcami carcani. Shinapish Bobi shuti shuj joven turica ñuca cusa purinata, rimanata, cuyurinata mana valijpipish paita cuidashpami ayudarca. Shinallataj ñuca cusataca huillanamanmi pushaj carca. Ñuca cusahuanca huahuacunata mana charinatami decidircanchij. Shinapish Bobimi ñucanchij churi shina tucurca (Marcos 10:​29, 30).

Ñuca cusitoca cancerta charishcamantami 2015 huatapi huañurca. Ñuca sololla saquirinataca mana yuyarcanillapishchu. Chaimantami dimastij llaquilla sintirircani. Cunancamami paillapi yuyashpa catini (Lucas 20:38). Pai alajata parlashcapi, alaja consejocunata cushcapimi achcata yuyarini. Paihuan achca huatacunata Jehová Diosta tandalla sirvishcamantami achcata agradicini.

JEHOVÁ DIOS AYUDASHCAMANTAMI AGRADICINI

Tucui ñuca llaquicunapimi Jehová Diosca ayudashca. Manchaita charijpipish gentecunaman cꞌuyaita ricuchichun, misionera cachunpishmi ayudashca (2 Timoteo 1:7). Jehová Dios ayudashcamantami ñucapish, ñuca qꞌuipa ñañapish tiempo completopi sirvi tucushcanchij. Ñuca cuñadoca superintendente shinami sirvin. Paica ñuca ñañahuanmi Europa llajtapi saquirij serbia shimita parlaj congregacioncunata visitashpa purincuna. Ñucanchij huahuaraj cajpi, ñucanchij Yayitu Diosta mañashcaca tucuimi pajtarishca.

Bibliata estudiashpaca tranquilami sintirini. Llaquicunahuan cashpapish Jesús shinami Jehová Diostaca tucui shunguhuan mañanata yachashcani (Lucas 22:44). Paiman mañashcatapish cutichishcatami ricushcani. Jehová Diosca ñuca congregacionpi caj turi ñañacunahuanmi cꞌuyaita ricuchishca. Shinallataj paicunahuan pasachun invitashcamantami cushilla sintirini.

Ama llaquilla sintiringapajca ñuca cꞌuyashca familia causarinapimi siempre yuyani. Ñuca yaya mamapish cazarashca punllapi shina jovencuna, sumajcuna cana cashcapimi yuyani. Ñuca cusapish paipaj caballo cꞌuchupi shayacushcapimi yuyani. Ñuca ñañapish shuj mishqui micunata yanucushcapimi yuyani. Chaicunapi yuyashpami cushillami sintirini. Jehová Diostapish shungumantami agradicini.

Ñuca causaipi Jehová Dios ima shina ayudashcapi yuyarishpa, shamuj punllacunapi sumaj causaita charinapi yuyarishpaca David shinami sintirini. Paica: “¿Causajcunapaj allpapi Jehová Dios llaquij cashcata ricungapaj feta mana charishca cashpaca maipishi caiman carcani? Canca Jehová Diospi shuyailla. Mana manchaj sinchi shungu cayari. Ari, Jehová Diospi shuyayari” nircami (Salmo 27:​13, 14).