Caitami tapushcacuna
¿Ima horascamataj alli huillaicunata huillashun?
Jesusca: “Ñucata catijcunaca Diospaj Gobiernomanta alli huillaicunatami, tucui llajtacunapi causajcuna yachaj chayachun muyundij allpapi huillangacuna. Chai qꞌuipami cai pachapaj ruraicunaca tucuringa” nircami (Mateo 24:6, 13, 14). Jesús nishca shinaca cai pachapaj ruraicuna tucuringacamami huillashpa catina canchij. ¿Cai pachapaj ruraicunaca ima horastaj tucuringa? Armagedón jatun macanacui callarijpimi tucuringa (Apocalipsis 16:14, 16). Chaimantami Armagedón macanacui callaringacama alli huillaicunata huillashpa catina cashcata cunanca intindinchij.
Shinapish ñaupaca jatun llaqui punllacuna callarijpi, panda religioncuna tucurijpi alli huillaicunata ña mana ashtahuan huillana cashcatami intindij carcanchij (Apocalipsis 17:3, 5, 15, 16). Shinallataj “Jehová Diosca jatun llaqui punllacuna callarijpica alli huillaicunata uyachun, quishpirichunpish oportunidadta mana cungachu. Huata 607-pi Jerusalén manaraj tucurijpica Diosta sirvijcunallami quishpirircacuna. Chai shinallatajmi jatun llaqui punllacuna manaraj callarijpica Diosta sirvijcunalla quishpiringacuna” nishpami yuyajcuna carcanchij (Isaías 61:2; Ezequiel 5:11; 9:4). Shinapish cunanca Mateo 24:14-taca allimi intindinchij. Jesús nishca shinaca gentecunaca Armagedón macanacui callaringacama alli huillaicunata uyashpa quishpirina oportunidadtachari charingacuna.
Mateo 24:14-ta alli intindishcamantami cunanca Apocalipsis 16:21-tapish alli intindinchij. Mateo 24:14-pi nishca shinaca ñucanchij huillashcacunaca quishpirigrijcunapajca mishquijllata ashnacuj shinami alli huillaicuna can. Cutin Apocalipsis 16:21-pi nishca shinaca chingarigrijcunapajca ñucanchij huillashcacunaca huañushcacunaman ashnacuj shina, llaquichij runducuna shinami mana alli huillaicuna can (2 Corintios 2:15, 16). ¿Imamantataj maijancunapajca mana alli huillaicuna can? Paicunapaj ruraicuna millai cashcata huillashcamanta, paicunapish ñalla tucuchigrishca cana cashcata huillashcamantami mana alli huillaicuna can (Juan 7:7; 1 Juan 2:17; 5:19).
Apocalipsis 16:21-pica: “Chai runduca yallitajmi llaquichirca” ninmi. ¿Chaica imatataj nisha nin? Jatun llaqui punllacunapi Jehovapaj shuti ashtahuan ashtahuan huillarina cashcamantami parlacun (Ezequiel 39:7). Shinallataj panda religioncuna tucurigrishcatapishmi huillashun. Chaimantami panda religioncuna tucurishca qꞌuipaca huaquin gentecunaca mishquijllata ashnachij shina alli huillaicunata uyasha ningacuna. Gentecunaca testigocuna achca huatacuna huashaman imallata huillashcatami yuyaringacuna o yachaj chayangacuna.
Ñaupa tiempopica Egipto llajtapi tucui laya achca gentecunapishmi Diospaj parte tucurcacuna. ¿Imamanta? Paicunaca Jehová Dios, Egipto llajtata, chaipi tiyaj yanga dioscunatapish castigashcatami ricurcacuna. Chaita ricushpami israelitacunahuan rinata decidircacuna (Éxodo 12:12, 37, 38).
Shamuj punllacunapipish Jehová Diosca panda religioncunatami tucuchinga. Chaita ricushpaca huaquin gentecunaca Diospaj parte tucunatachari munangacuna. Diospaj parte tucushpaca cai Allpapi caj ungido huauquicunata apoyana oportunidadtapishmi charingacuna (Mateo 25:34-36, 40). Shinapish Armagedón macanacui callaringapaj ashalla tiempo faltangacamallami chai oportunidadta charingacuna. Armagedón ña callarigrijpimi cai Allpapi saquirishca ungidocunaca jahua pachaman apashca cangacuna.
Caicunata intindishpami Jehová Dios achcata cꞌuyaj, llaquij cashcata ricunchij. Paica shujllapish ama chingarichun, ashtahuanpish tucuicuna arrepintirichunmi munan (2 Pedro 3:9).