Ester
2 Kamachiq Asuerom+ piñakuynin pasaruptin yuyaymanarqa Vastipa+ mana kasukusqanpi hinaspa manaña asuykunanpaq kamachikuy hurqusqanpi.+ 2 Chayna kachkaptinmi yanapaqninkuna nirqaku: “Kamachiqllayku, qampaqyá manaraq qarita riqsiq kuyayllapaq sipaskunata maskamusaqku. 3 Chaypaqyá kamachiy llapallan llaqtakunapi+ kuyayllapaq sipaskunata huñumunankupaq. Hinaspayá Susa llaqtapi warmikunapa kanan wasiman pusamuchunku. Chaypim paykunamanta Egai*+ cuentallikunqa. Chaypitaqmi sumaq allichasqa kanqaku. 4 Hinaptinmi sunquykita suwaq sipas Vastipa rantinpi warmiki kanqa”, nispa.+ Chayna nisqanku Asueropaq allin rikchakuptinmi chayman hina ruwarqa.
5 Juda kastamanta Mardoqueom+ Susa llaqtapi+ kamachiq Asueropa wasinpi yacharqa*. Payqa karqa Jairpa churinmi, Jairñataqmi Simeipa, Simeiñataqmi karqa Benjamin ayllumanta Quispa churin.+ 6 Paymi Juda nacionta kamachiq Jeconiaswan*+ riq runakunapiwan Jerusalen llaqtamanta pusasqa karqa. Paykunataqa pusarqa Babilonia nacionta kamachiq Nabucodonosormi. 7 Mardoqueom uywakurqa tionpa churin Adasa* sutiyuq sipasta. Paypa huknin sutinmi karqa Ester.+ Payqa kuyayllapaq sipasmi karqa, tayta-maman wañukuptinmi Mardoqueoña churichakurqa. 8 Asueropa kamachisqanta willaruptinkum achka sipaskunata wasinman pusarqaku. Pusarqakutaqmi Estertapas, hinaptinmi paykunamanta Egai+ cuentallikurqa.
9 Esterqa Egaiwanmi kuyarachikurqa. Paymi yanaparqa sumaq allichasqa kananpaq+ hinaspa mikunanpaq. Quykurqataqmi kamachiqpa wasinpi kaq akllasqa qanchis sipaskunatapas Esterta yanapanankupaq. Hinaspanmi Estertawan yanapaqninkunata warmikunapa kanan wasipi allinnin cuartoman pusarqa. 10 Mardoqueo+ yachachisqanraykum Esterqa mana willakurqachu maylaw llaqtayuq kasqanmantapas+ nitaq pipa ayllunmanta kasqantapas.+ 11 Mardoqueoqa sapa punchawmi warmikunapa kanan wasipa punkunta pasaq Esterpa imayna tarikusqanta yachananpaq.
12 Sipaskunaqa kamachiqpa qayllanmanmi tupasqanman hina yaykuqku, chaypaqqa sapa sipastam 12 killapuni allichaqku. Suqta killam mirramanta aceitewan+ llusiqku, suqta killañataqmi balsamo sutiyuq aceitewan,+ llusiqkutaqmi huk miski asnaqkunawanpas. 13 Chayta ruwachikuspallankum kamachiqpa kasqanmanqa riqku. Rinanpaq imatapas sipas mañakuptinqa quqkum. 14 Kamachiqpa kasqanman inti siqaykuyta yaykuspanmi paqarintinqa sapaq wasimanña pusasqa karqaku. Chay wasipim karqaku kamachiqpa warminkuna, paykunamantam cuentallikurqa Saasgaz*.+ Chaymantaqa manañam mayqanninkupas kamachiqmanqa kutiqñachu. Kutispaqa kutiq kamachiq qayachimuptillanñam.+
15 Warmikunapa kanan wasipi kaspanmi Esterqa+ lliw runakunawan kuyarachikurqa. Kamachiqpa qayllanman rinanpaq tuparuptinmi warmikunamanta cuentallikuq Egaipa nisqallanta mañakurqa. Esterqa karqa Abiailpa churinmi. 16 Tebet* sutiyuq chunka kaq killapim Asueropa kasqanman Esterta pusarqaku. Chayqa karqa qanchis wata+ Asuero kamachichkaptinmi. 17 Kamachiq Asueroqa llapallan sipaskunamantapas astawanmi Esterta kuyarurqa. Chaymi Asueroqa umanman churakunan warminpa adornonta Esterpa umanman churaykurqa.+ Chaynapim Esterqa Vastipa rantinpi kamachiqpa warminña karqa.+ 18 Chayraykum Esterpa sutinpi achka mikuyta Asuero ruwachirqa kamachiqkunapaq chaynataq runankunapaq. Nirqataqmi llaqtakunapi imam qunankuta amaña qunankupaqpas. Kamachiq Asueroqa aypurqataqmi llapallan runakunaman imapas quy munasqanta.
19 Chaymantam huktawan huñuchirqaku manaraq qari riqsiq sipaskunata.+ Mardoqueoñataqmi kamachiqpa wasin punkupi tiyachkarqa. 20 Esterqa Mardoqueopa yachachisqanman hinamá mana willakurqachu pipa ayllun kasqantapas nitaq maylawmanta kasqantapas.+ Esterqa paypa uywasqan kasqanraykum Mardoqueotaqa kasukurqa.+
21 Chay punchawkunapim kamachiqpa wasin punkupi Mardoqueo tiyachkaptin Bigtanwan Teres piñakuruspanku kamachiq Asuerota wañurachinankupaq rimanakurqaku. Paykunaqa karqaku punku cuidaqkunam. 22 Chayta yacharuspanmi Mardoqueoqa Esterman willaykurqa. Esterñataqmi kamachiqman willaykurqa Mardoqueopa sutinpi. 23 Chaymantam tapukuspanku yacharurqaku chiqaptapuni kamachiqta wañuchiy munasqankuta. Chaymi chay iskay runakunaqa qirupi* warkusqa karqaku. Tukuy chay pasasqanmantam kamachiq Asueropa qayllanpi qillqasqa karqa.+