Ester
3 Chaymantam kamachiq Asueroqa Hamanta+ llapallan kamachiqkunapa kamachiqnin kananpaq churarurqa. Hamanqa karqa Agag+ kasta Hamedatapa churinmi.+ 2 Asueropa kamachisqanman hinam punkupi kaqkunaqa Hamanpa ñawpaqninpi qunqurakuqku. Mardoqueom ichaqa mana qunqurakuqchu. 3 Chaymi kamachiq Asueropa runankunaqa Mardoqueota nirqaku: “¿Imanasqataq kamachiqpa nisqantaqa mana kasukunkichu?”, nispa. 4 Sapa punchaw chaynata nipayaptinkupas Mardoqueoqa manam kasukurqachu, chayraykum Hamanman willaykurqaku.+ Mardoqueoqa ñam willakurqaña Juda kastamanta kasqantaqa.+
5 Ñawpaqninpi qunqurakuyta Mardoqueo mana munaptinmi Hamanqa llumpayta piñakururqa.+ 6 Ichaqa Juda kastamanta Mardoqueo kasqanta willaykuptinkum mana payllatañachu wañurachiytaqa munarqa, aswanqa Asueropa munaychakusqan llaqtakunapi llapallan Juda runakunatawanñam.
7 Chaymi 12 wata+ Asuero kamachichkaptin Juda runakuna imay punchaw hinaspa imay killa wañuchisqa kanankupaq Hamanpa ñawpaqninpi “pur” nisqanku suerteta chuqarqaku.+ Chayqa karqa nisan* sutiyuq killapim. Hinaptinmi tuparurqa adar* sutiyuq killaman.+ 8 Chaymantam Hamanqa kamachiq Asuerota nirqa: “Huklaw runakunam kamachisqayki llaqtakunapi yachachkanku*.+ Paykunapa kamachikuyninkunaqa manam wakin llaqtakunapa hinachu. Chaymantapas, chay runakunaqa manam kamachikuynikikunataqa kasukunkuchu. Chay runakunataqa manam saqichwanchu. 9 Chayraykuyá kamachiqlláy, chay runakuna wañuchisqa kanankupaq kamachikuyta hurquy. Ñuqam runaykikunaman qusaq 342.000 kilo* qullqita, chayqa quri-qullqikiman yapasqam kanqa”, nispa.
10 Chaymi kamachiq Asueroqa sellanan anillonta hurqukuykuspan+ quykurqa Hamanman,+ payqa karqa Juda runakunata chiqniq Agag+ kasta Hamedatapa churinmi. 11 Asuerom Hamanta nirqa: “Tantiasqaykitayá ruway, makikipim kachkan qullqipas chaynataq runakunapas”, nispa. 12 Hinaptinmi Hamanqa kamachiqpa secretarionkunata qayachirqa punta kaq killapa 13 punchawninpi.+ Paykunam cartakunata qillqarqaku+ Hamanpa imam nisqankunata, chaynapi kamachiqpa yanapaqninkunaman* hinaspa sapa llaqtapi kamachiqkunaman apachinankupaq. Qillqarqakuqa sapa llaqtapi imayna qillqasqankuman hinam hinaspa rimayninkuman hinam. Kamachiq Asueropa sutinpi qillqaspankum anillonwan sellarqaku.+
13 Chaymantam Asueropa kamachisqan llaqtakunaman chay cartakunata aparqaku. Chaypim nirqa lliw judiokunata huk punchawllapi wañuchinankupaq musu-sipaskunatapas, yuyaqkunatapas, warmikunatapas chaynataq warmachakunatapas, nirqataqmi tukuy imankuta hapikuykunankupaqpas.+ Wañuchinankuqa karqa adar sutiyuq killapa+ 13 punchawninpim. 14 Chay kamachikuytam sapa llaqtapi kaq runakunaman willananku karqa. Chaynapi chay punchaw llapallanku listo kanankupaq. 15 Asueropa kamachisqanman hinam chay cartakunataqa utqayman aparqaku.+ Susa llaqtapi+ kaqkunamanpas willaptinkum llapa runakunaqa chaqwapi tarikurqaku. Hamanñataqmi kamachiq Asuerowan tomakuchkarqa.