1 Cronicas
28 Davidmi Israel nacionpi llapallan kamachiqkunata Jerusalen llaqtaman huñurachirqa. Huñurachirqam: Ayllukunapi kamachiqkunata, achkaman rakisqa soldadokunapa kamachiqninkunata,+ 1.000 runakunapa kamachiqninkunata, 100 runakunapa kamachiqninkunata,+ Davidpawan churinkunapa+ kapuqninkunamanta nanachikuqkunata chaynataq animalninkunamanta nanachikuqkunata.+ Huñurachirqataqmi kamachiypi yanapaqninkunatapas chaynataq kallpasapa mana manchakuq runakunatapas.+ 2 Chaymantam kamachiq Davidqa sayariykuspan nirqa:
“Runallaykuna, llaqtamasillaykuna uyariykullawaychik. Ñuqam munarqani Jehova Diospa wasin ruwayta, chaynapi chay wasi sarupakunan hina kananpaq,+ baulninpas* chaypi kananpaq. Chaypaqmi tukuy imata alistaruni.+ 3 Diosmi ichaqa niykuwan: ‘Sutiy hatunchasqa kananpaq wasitaqa manam qamchu ruwapuwanki.+ Qamqa peleaspaykim achka-achka runakunata wañuchirqanki’, nispa.+ 4 Chaywanpas Israelpa yupaychasqan Jehova Diosmi taytaypa ayllunmanta akllaykuwarqa Israel runakunata wiñaypaq kamachinaypaq.+ Diosmi Juda aylluta akllaykurqa kamachiq kananpaq,+ Juda ayllumantañataqmi akllaykurqa taytaypa ayllunta,+ taytaypa churinkunamantañataqmi ñuqata akllaykuwarqa Israel nacionta kamachinaypaq.+ 5 Chaymantapas, Jehova Diosmi achka churikunata quykuwan,+ paykunamantam churiy Salomonta+ akllaykun Jehova Diospa munaychakusqan Israel nacionpi kamachinanpaq.+
6 Diosmi niwarqa: ‘Churiki Salomonmi wasiytawan patiokunata ruwapuwanqa, paytam akllaruni churiy kananpaq, ñuqañataqmi taytan kasaq.+ 7 Sichum kamachikuyniykunatawan yachachikuyniykunata+ hinalla kasukuptinqa wiñaypaq kamachinanpaqmi yanapasaq’, nispa.+ 8 Chaynaqa kikin Jehova Dioswan Israelpi lliw runankuna uyarichkaptinmi nikichik: ‘Jehova Diospa kamachikuyninkunata riqsinaykichikpaqwan kasukunaykichikpaqyá kallpanchakuychik. Chaynapi kay sumaq allpapi hinalla yachanaykichikpaq+ hinaspa churikichikkunamanpas saqinaykichikpaq’”, nispa.
9 Churin Salomontañataqmi nirqa: “Churilláy Salomon, yupaychasqay Diosta riqsispayki tukuy sunquykiwan kasukuy,+ kusikuywan kasukuy. Jehova Diosqa lliw runakunapa sunquntam qawan,+ yachantaqmi ima munasqantapas, ima tantiasqantapas.+ Diosta maskaspaykiqa tarinkim,+ saqiruptikim ichaqa paypas wiñaypaq saqirusunki.+ 10 Ama qunqaychu, Jehova Diosmi qamta akllaykusunki wasinta ruwanaykipaq. Ama manchakuspayá ruwayña”, nispa.
11 Chaymantam Davidqa churin Salomonman quykurqa wasipa planonta.+ Chay planopim karqa corredorpa imayna kanan,+ tukuy ima waqaychana cuartokunapa imayna kanan, altuspi cuartokunapa imayna kanan, uku lawpi cuartokunapa imayna kanan, hucha pampachana cuartopa imayna kanan.+ 12 Chay planopitaqmi karqa wasipa pationkunapa imayna kananpas,+ muyuriqninpi cuartokunapa imayna kananpas, Diospa quri-qullqinta waqaychana cuartokunapa imayna kananpas chaynataq Diospaq sapaqchasqa kaqkunata waqaychana cuartokunapa imayna kananpas. Chay planotaqa Jehova Diospa yanapakuyninwanmi Davidqa ruwarqa.+ 13 Nirqataqmi Jehova Diospa sacerdotenkunawan+ Leviy ayllukuna imayna rakinasqa kaspanku Jehova Diospa wasinpi ima ruwanankumantapas chaynataq serviciokunawan ima ruwanankumantapas. 14 Davidqa nirqataqmi tukuy imapi servichikunanku serviciokunata ruwanankupaq quripawan qullqipa llasaynin hayka kananmantapas. 15 Nirqataqmi sapa candelabropaq+ hinaspa mecheronkunapaq quripa llasaynin hayka kananmantapas chaynataq qullqipa llasaynin hayka kananmantapas. Nirqaqa imapi servichikunapaq kasqanman hinam. 16 Nirqataqmi Diospaq sapaqchasqa tantata*+ churananku mesapaq quripa llasaynin hayka kananmantapas chaynataq qullqimanta mesapaq qullqipa llasaynin hayka kananmantapas. 17 Nirqataqmi qurimanta trinchepaq, tazonkunapaq+ hinaspa puyñukunapaq quripa llasaynin hayka kananmantapas. Chaynallataqmi nirqa qurimantawan qullqimanta sapa taksa tazonkunapa llasaynin hayka kananmantapas. 18 Davidqa nirqataqmi incienso* kañana altarpaq+ chaynataq rapranta mastariq querubin angelkunapaq quripa llasaynin hayka kananmantapas. Chay querubin angelkunaqa+ tupan Diospa carretanwanmi.+ Chay angelkunaqa Jehova Diospa baulnintam llanturqaku. 19 Davidqa nirqataqmi: “Jehova Diosmi yachayta quwaspan yanapaykuwan wasin imayna kananpaq planota ruwanaypaq”, nispa.+
20 Chaymantam Davidqa churin Salomonta nirqa: “Kallpanchakuspayá qarinchakuy, hinaspayá ruwayta qallariyña. Amayá manchakuychu nitaq hukmanyaychu. Yupaychasqay Jehova Diosmi qanwan kachkan.+ Payqa manam saqisunkichu, nitaqmi karunchakusunkichu.+ Jehova Diosqa qanwanmi kanqa wasin ruwayta tukuchinaykikama. 21 Sacerdotekunapas+ chaynataq Leviy ayllukunapas+ rakisqañam kachkanku Diospa wasinpi tukuy imapi yanapakunankupaq. Kachkantaqmi yanapakuy munaqkunapas, tukuy imata ruway yachaq runakunapas,+ kamachiqkunapas+ chaynataq llapallan runakunapas kamachisqaykita ruwanankupaq”, nispa.