Apocalipsis
11 Tupuna suqusta+ hina quwaspanmi niwarqa: “Rispaykiyá tupumuy Diospa wasinta*, altarta hinaspa chaypi yupaychaqkunata. 2 Diospa wasinmanta hawapi kaq patiota ichaqa ama tupuychu, aswanqa saqiruy. Chay patioqa huklaw nacionniyuqkunaman qusqam kachkan, paykunam chuya llaqtata sarutyanqaku+ 42 killa.+ 3 Ñuqam iskay testigoykunata kamachisaq 1.260 punchaw qachqa pachawan pachakuykuspanku willakunankupaq”, nispa. 4 Chay iskay testigokunaqa iskay aceitunas sachakunawanmi+ hinaspa iskay candelabrokunawanmi+ tupachisqa kachkan, paykunaqa sayachkanku llapa runapa señorninpa ñawpaqninpim.+
5 Pipas paykunata mana allinta ruwayta munaptinmi, paykunapa siminmanta nina lluqsiramuspan enemigonkunata ruparun, pipas paykunata mana allinta ruway munaqpas chaynam wañunan. 6 Paykunaqa atiyniyuq kasqankuraykum cielotapas wichqarunmanku+ willakusqanku punchawkuna mana paramunanpaq,+ atiyniyuqtaqmi kanku yakuta yawaryarachinankupaqpas+ chaynataq kay pachapi tukuy mana allinkunata hayka kutikama ruwanankupaqpas.
7 Chay iskay testigokuna willakuyta tukuruptinmi uku-uku uchkumanta lluqsimuq manchakuypaq animal paykunapa contranpi peleanqa, hinaspam paykunata venceruspan wañurachinqa.+ 8 Hinaptinmi chay iskay testigokunapa ayanqa riqsisqa suma-sumaq llaqtapa callenpi chutarayanqa, chay llaqtapim paykunapa señorninpas qirupi* warkusqa karqa. Chay llaqtaqa tupan Sodomawan hinaspa Egiptowanmi. 9 Chaymi llaqtakunamanta, kastakunamanta, tukuy rikchaq rimayniyuqkunamanta hinaspa nacionkunamanta runakuna chay iskay willakuqkunapa ayanta kimsa punchaw parten qawanqaku,+ hinaspam pampanankuta harkakunqaku. 10 Hinaptinmi paykuna wañurusqanmantaqa kay pachapi yachaqkuna* kusikunqaku, hinaspapas regalokunatam apachinakunqaku. Diosmanta chay iskay willakuqkunaqa* kay pachapi yachaqkunatam ñakarichirqa.
11 Kimsa punchaw partenmantañataqmi kawsachikuq samayta Dios quykuptin+ kawsariruspa sayarirurqaku, chaymi rikuqninkunaqa anchallataña mancharikurqaku. 12 Chay willakuqkunam uyarirurqaku hanaq pachamanta “kayman qispimuychik” nispa kallpawan nimuqta. Chaymi paykunaqa enemigonkuna qawachkaptin puyupi hanaq pachaman huqarikurqaku. 13 Hinaptinmi chaylla nisyu-nisyu terremoto karuptin llaqtapa huknin parten* tuñirurqa. Chay terremotowanmi 7.000 runakuna wañururqa, wakinñataqmi llumpayta mancharikuspanku hanaq pacha Diosta hatuncharqaku.
14 Iskay kaq ñakariyqa+ pasarunñam. Kimsa kaq ñakariypas hamuchkanñam.
15 Qanchis kaq angel cornetillanta tocaykuptinñataqmi+ hanaq pachapi kallpawan qayakuy uyarikurqa: “Kay pachapi runakunataqa Diosninchikñam+ hinaspa Cristoñam*+ kamachichkan. Diosñam kamachinqa wiña-wiñaypaq”, nispa.+
16 Hinaptinmi Diospa qayllanpi tronopi tiyaq 24 kamachiqkuna*+ qunquranpa kumuykuspanku Diosta yupaycharqaku, 17 hinaspam kaynata nirqaku: “Tukuy atiyniyuq Jehova* Diosllayku, agradecekuykikum. Qanmi kanki ñawpaq kaqpas hinaspa kunan kaqpas,+ qamqa atiynikiwanmi kamachichkankiña.+ 18 Nacionkunam ichaqa piñakurunku, qampas piñakurunkim, chayaramuntaqmi señalasqa tiempo wañusqakuna juzgasqa kananpaq chaynataq qanmanta willakuq servisuqnikikunaman,+ runaykikunaman hinaspa sutiki respetaq riqsisqa kaqman chaynataq mana riqsisqa kaqmanpas pagonta qunaykipaq,+ chayaramuntaqmi tiempo kay pacha qanrachaqkunata* chinkachinaykipaqpas”, nispa.+
19 Hinaptinmi Diospa wasin hanaq pachapi kichakuykurqa, chay wasipim kachkasqa Diospa baulninpas*.+ Hinaptinmi karurqa llipyaykuna, qapariykuna hinaspa rayopa tuqyasqan. Karqataqmi terremotowan llumpay runtu parapas.