Isaias
58 “¡Kallpawanyá qapariy, amayá upallaychu!
Pukusqanku waqra hinayá qapariy.
Runaykunapa mana kasukusqantayá willay,+
Jacobpa mirayninkunapa huchallikusqantayá willay.
2 Sapa punchawmi maskawanku,
ñanniykunata riqsiy munasqankutam ninku,
allin ruwaq nacion hinaraqmi chaynata ninku,
Diosninkupa kamachikuyninkunata mana saqiq hinaraqmi chaynata ninku.+
Diosman asuykuyta munaq hinaraqmi chaynata ninku,+
allin kaqta ruwanaypaqraqmi paykunaqa niwan:
3 ‘Ayunaptiykupas, ¿imaynanpitaq mana qawamunkichu?+
Huchaykurayku llakisqa kaptiykupas, ¿imaynanpitaq mana qawamunkichu?’.+
Manaqa qawarinichu ayunaspaykichik kikikichikpa munasqaykichikta maskasqaykichikraykum,
llamkapuqnikichikkunata ñakarichisqaykichikraykum.+
4 Qamkunaqa ayunaspaykichikpas peleayllapim kankichik, qaqchanakuyllapim kankichik,
qamkunaqa takanakuyllapim kankichik.
Ayunaspaykichik chaykunata ruwachkaspachu hanaq pachapi uyarinaytaraq munankichik.
5 ¿Ayunaspaykichik chaykuna ruwanaykichiktachu ñuqaqa munani?
¿Huchaykichikmanta llakisqa kanaykichiktachu ñuqaqa munani?
¿Tutura hina umaykichikta kumuykachinaykichiktachu ñuqaqa munani?
¿Qachqa pachapa hawanpi hinaspa uchpapa hawanpi puñunaykichiktachu ñuqaqa munani?
¿Chaychu qampaqqa ayunay? ¿Chaychu ñuqa Jehova Diosta kusichiwan?
6 Manam. Munasqayman hina ayunoqa:
Yanqamanta cadenasqakunata kachariymi,
yugupa kuyundankunata paskaymi,+
ñakariqkunata kachariymi,+
yugukunata chawpimanta pakiymi,
7 yarqaymanta kaqkunaman mikuykachiymi,+
wakchakunata samaykachiymi,
mana wasiyuqkunata samaykachiymi,
mana pachayuqkunata pachaykachiymi,+
aylluykikunata mana saqiymi.
8 Ayunaspayki chaynata ruwaspaykiqa achikyaq hinam kancharinki,+
chayllam allinyanki.
Mana huchayuqmi purinki,
ñuqa Jehova Diospa kanchayniypas qipaykitam hamunqa.+
9 Qayakuptikiqa ñuqa Jehova Diosmi uyariykamusqayki,
yanapaykunaypaq qayakamuptikipas ‘¡kaypim kachkani!’ nimusqaykim.
Qam ukupi kaq yuguta chinkachispaykiqa,
makikiwan pitapas mana tuqpispaykiqa, hukkunamanta imatapas mana rimaspaykiqa,+
10 yarqaymanta kaqkunaman munasqayki kaqkunata quspaykiqa+
hinaspa ñakariqkunata yanapaspaykiqa
tutayaypipas kanchankim,
tutayaypi kaspapas chawpi punchawpi hinam kanki.+
11 Ñuqa Jehova Diosmi haykapipas pusasqayki,
chaki allpapipas pisipusuqnikikunatam qusqayki,+
kallpanchasqaykim,
parqupayasqa* huerta hinam kanki,+
mana chakiq pukyu hinam kanki.
12 Ñawpaqmantaraq raqayllanña llaqtakunapas qamraykum kaqmanta pirqasqa kanqa,+
qanmi ñawpaq pirqakunapa cimientonta kaqmanta hatarichinki.+
Tuñichisqa murallakunata allichaqwanmi sutichasqa kanki,+
yachananku* sitiokunapi ñankunata allichaqwanmi sutichasqa kanki.
13 Samana punchawpi ñuqapaq akllasqa punchawrayku imapas munasqaykita mana maskaptikiqa,+
samana punchawpi kusikuptikiqa, samana punchawpi ñuqa Jehova Diospa munasqayman hina ruwaptikiqa, samana punchawta respetana punchawta hina qawaptikiqa,+
samana punchawpi munasqayki kaqkunata mana maskaptikiqa hinaspa samana punchawpi yanqakunata mana rimaptikiqa
14 ñuqa Jehova Diosraykum kusisqa kanki,
urqukunapim sillasqata altonta purichisqayki.+
Ñawpaq abueloyki Jacobpa herencianmantam mikunki,+
ñuqa Jehova Diosmi chaynata nini”.