Josuey
3 Chaymantam Josueywan Israelpa lliw mirayninkuna tutapayta hatarispanku Sitim lawmanta+ Jordan mayuman rirqaku. Chaypim manaraq chimpachkaspanku chay tuta puñurqaku.
2 Kimsa punchawmantañataqmi kamachiqkuna+ Israelpa mirayninkunaman asuykurqaku. 3 Hinaspam paykunata kamachispa nirqaku: “Jehova Diosninchikpa baulninta* Leviy ayllumanta sacerdotekunapa* apasqanta rikuspaykichikqa,+ chayllayá maymi kasqaykichikmanta hatarispa qatiychik. 4 Ichaqa yaqa huk kilometro* qipantam qatinkichik, amam tumpallatapas asuykunkichikchu, chaynapi maynin rinaykichikta qawanaykichikpaq. Chay ñannintaqa manam haykapipas purirqankichikchu”, nispa.
5 Josueyñataqmi Israelpa mirayninkunata nirqa: “Listollayá suyaychik,+ paqarinmi Jehova Diosqa mana haykapipas rikusqanchik kaqkunata ruwanqa”, nispa.+
6 Chaymantam Josueyqa sacerdotekunata nirqa: “Diospa baulninta+ apaspayá Israelpa mirayninkunapa ñawpaqninta riychik”, nispa. Chaymi paykunaqa Diospa baulninta apaspanku runakunapa ñawpaqninta rirqaku.
7 Hinaptinmi Josueyta Jehova Dios nirqa: “Kunan punchawmi Israelpa mirayninkunapa qayllanpi ancha riqsisqata ruwasqayki,+ chaynapi qanwanpas Moiseswan hina kuskalla kasqayta yachanankupaq.+ 8 Baulniyta apaq sacerdotekunatapas kamachiyá: ‘Jordan mayupa patanman chayaruspaykichikmi mayuman yaykuspa chaypi sayankichik’”, nispa.+
9 Chaymi Israelpa mirayninkunata Josuey nirqa: “Kayman hamuspayá Jehova Diosninchikpa nisqankunata uyariychik”, nispa. 10 Hinaspam Josueyqa paykunata nirqa: “Kunanmi yachankichik kawsaq Dios qamkunawan kasqanta.+ Paymi qamkunapa qayllaykichikmanta qarqunqapuni Canaan runakunata, Het runakunata, Hev runakunata, Perizita runakunata, Guirgas runakunata, Amorreo runakunata hinaspa Jebus runakunata.+ 11 ¡Qawaychik! Llapallan kamachiq taytapa baulnintam qamkunapa ñawpaqnikichikta Jordan mayuman apachkanku. 12 Kunanqa Israelpa mirayninkunamantayá 12 runakunata akllaychik, sapa ayllumantayá hukta akllaychik.+ 13 Llapallan kamachiq Jehova Diospa baulninta apaq sacerdotekuna Jordan mayuta saruykuptillankum mayuqa sayaruspan qucharunqa”, nispa.+
14 Chaynapim Israelpa mirayninkuna Jordan mayuta chimpanankupaq maymi kasqankumanta puriyta qallaykuptinku, Diospa baulninta+ apaq sacerdotekuna ñawpaqninkuta rirqaku. Paykunaqa sacerdotekunam karqaku. 15 Kawsaykuna huñuy ukuqa llimpay-llimpaymi Jordan mayuqa riq.+ Ichaqa Diospa baulninta apaq sacerdotekuna Jordan mayuman chayaruspanku yakuta saruykuptillankum 16 mayuqa sayarurqa. Sayaruspanmi qucharurqa Zaretan llaqtapa hichpan Adan llaqtapi, chayqa karqa karu hanaypiraqmi. Uray Araba lawpi Kachi quchaman* riq yakum chakirurqa. Chaynata mayu qucharuptinmi Israelpa mirayninkunaqa chimparqaku Jerico llaqta lawmanña. 17 Jehova Diospa baulninta apaq sacerdotekunaqa Jordan mayu chakiruptinmi+ chawpinpi sayarqaku Israelpa lliw mirayninkuna chimpanankukama.