Josuey
4 Jordan mayuta Israelpa mirayninkuna chimpayta tukuruptillankum Josueyta Jehova Dios nirqa: 2 “Israelpa mirayninkunamantayá 12 runakunata akllay, sapa ayllumanta hukta.+ 3 Hinaspayá kamachiy: ‘Jordan mayupa chawpinpi sacerdotekunapa sayasqankumantayá+ 12 rumikunata hurqumuychik. Chayta apaspayá tutaykuspa maymi samasqaykichikpi churaychik’”, nispa.+
4 Chaymi Josueyqa Israelpa mirayninkunamanta 12 akllasqan runakunata qayamurqa, sapa ayllumantam huk runa akllasqa karqa. 5 Hinaspam paykunata Josuey nirqa: “Jordan mayupa chawpinpi Jehova Diospa baulninpa ñawpaqninman rispayá Israelpa mirayninkunapi hayka ayllu kasqanman hina huk rumita hombrorikamuychik. 6 Chaynapi chay rumikuna Diospa ruwasqankunata yuyarichisunaykichikpaq. Sichum hamuq punchawkunapi churikichik tapusunkichik: ‘¿Imanasqataq kay rumikunaqa kaypi kachkan?’, nispa.+ 7 Hinaptinqa ninkichikmi: ‘Jordan mayum sayarurqa Jehova Diospa baulninta*+ chimpachichkaptinku. Chaymi kay rumikunaqa tukuy chayta wiñaypaq yuyarinanchikpaq kachkan’”, nispa.+
8 Chaynapim Israelpa mirayninkunaqa Josueypa kamachisqanman hina ruwarqaku. Paykunaqa Jordan mayupa chawpinmantam 12 rumikunata huqarimurqaku, sapa ayllumanta kaqmi huk rumita huqarimurqa. Chaytaqa ruwarqaku Josueyman Jehova Diospa nisqanman hinam. Hinaspam maymi tutaykusqankupi churaykurqaku.
9 Josueypas 12 rumikunatam churarqa Jordan mayupa chawpinpi, chaypim baulta apaq sacerdotekunaqa sayarqaku.+ Chay rumikunaqa kunankamam hinalla kachkan.
10 Diospa baulninta apaq sacerdotekunaqa Jordan mayupa chawpinpim sayarqaku Josueymanwan Israelpa mirayninkunaman Jehova Diospa nisqankunata ruwanankukama. Chayqa karqa Josueyman Moisespa kamachisqanman hinam. Chaykamaqa utqaymanmi Israelpa mirayninkunaqa chimparqaku. 11 Llapanku chimpayta tukuruptinkum Jehova Diospa baulninta apaq sacerdotekunapas qawachkaptinku chimparqaku.+ 12 Ruben ayllupas, Gad ayllupas hinaspa Manasespa wakin ayllunpas Israelpa wakin mirayninkunapa ñawpaqnintam tropa-tropa chimparqaku.+ Chayqa karqa Moisespa kamachisqanman hinam.+ 13 Jerico lawpi chunniqmanmi Jehova Diospa baulninpa ñawpaqninta yaqa 40.000 soldadokuna chimparqaku.
14 Chay punchawmi Jehova Diosqa Israelpa lliw miraynin runakunapa qayllanpi Josueyta ancha riqsisqata ruwarqa.+ Chaymi paykunaqa Moisesta hina Josueytapas wañukunankama tukuy sunquwan kasukurqaku.+
15 Chaymantam Josueyta Jehova Dios nirqa: 16 “Kamachikuykunata waqaychana baulta+ apaq sacerdotekunatayá kamachiy Jordanmanta lluqsimunankupaq”, nispa. 17 Chaymi Josueyqa sacerdotekunata kamachirqa: “Jordanmanta lluqsimuychik”, nispa. 18 Jehova Diospa baulninta+ apaq sacerdotekuna Jordan mayupa chawpinmanta lluqsiruspa chaki allpata saruykuptillankum mayuqa kaqmanta llimpay-llimpay riyta qallaykurqa.+
19 Israelpa mirayninkunaqa punta kaq killapa chunka kaq punchawninpim Jordan mayuta chimparurqaku, hinaspam Guilgalman chayaruspanku chaypi samarqaku,+ chayqa karqa Jerico llaqtapa inti qispimunan lawpim.
20 Guilgalpim Josueyqa Jordan mayumanta hurqusqanku 12 rumikunata churarqa.+ 21 Hinaspam Israelpa mirayninkunata nirqa: “Sichu qipakunaman churikichik tapusunkichik: ‘¿Imanasqataq kay rumikunaqa kaypi kachkan?’, nispa.+ 22 Hinaptinqa paykunatam ninkichik: ‘Israelpa mirayninkunam Jordan mayuta chaki pampanta chimpamurqaniku+ 23 Jehova Diosninchik mayuta chakirachiptin. Llapayku chimpanaykukamam Jordan mayuta chakirachirqa, imaynam Puka lamar quchatapas Jehova Diosninchik chakichisqanman hina.+ 24 Chaytaqa ruwarqa kay pachapi llapallan runakuna Jehova Diosqa ancha-ancha atiyniyuq kasqanta yachanankupaqmi+ chaynataq qamkunapas Jehova Diosta haykapipas kasukunaykichikpaqmi’”, nispa.