Jeremias
33 Guardia sutiyuq patiopi+ Jeremias wichqasqa kachkaptinmi Jehova Diosqa kaqmanta rimapayaspan nirqa: 2 “Allpa pachata unanchaq ñuqa Jehova Diosmi, allpa pachata allinta takyachiq ñuqa Jehova Diosmi nini, ñuqa Jehova sutiyuqmi nini: 3 ‘Mañakamuwaptikiqa uyarisqaykim, hatun kaqkunatawan mana entiendesqayki kaqkunatam willasqayki, mana yachasqayki kaqkunatam willasqayki’”, nispa.+
4 Israelpa yupaychasqan Jehova Diosmi nirqa kay llaqtapi wasikunamanta chaynataq Judata kamachiqkunapa tuñisqa wasinkumanta. Tuñisqaqa karqa peleaspanku pirqapa waqtanman allpata muntusqankuraykum.+ 5 Diosmi nirqa Caldea runakunawan peleaq hamuqkunamanta, Diosqa nirqataqmi llumpay piñakuyninpi wañuq runakunapa ayanwan manaña rikuy llaqta kananmantapas. Kay llaqtapi runakuna mana allinta ruwasqankuraykum Diosqa saqirurqa. 6 Chaymi Diosqa nin: ‘Hampispaymi allinyachisaq,+ sanoyachisaqmi, hawkañam kawsakunqaku, pipapas mana imanasqanmi kawsakunqaku.+ 7 Huklawmantam kutichimusaq Juda runakunatawan Israel runakunata,+ qallariypi hinam bendecisaq.+ 8 Tukuy ima huchankutam chuyanchasaq,+ huchankumantawan mana allin ruwasqankumantam pampachasaq,+ 9 chaynapim kay llaqtapa sutinqa kusichiwanqa. Paykunapaq allin kaqkuna ruwasqayta uyarispankum kay pachapi llapallan nacionkuna ñuqata hatunchawanqa, ancha riqsisqatam ruwawanqa.+ Allin kaqkunata qusqayraykum hinaspa hawkallata kawsachisqayraykum+ nacionkunaqa manchakuymanta katkatatanqaku’, nispa.+
10 Jehova Diosqa nintaqmi: ‘Kay llaqtamantam ninkichik: “Mana runayuqmi hinaspa mana animalniyuqmi chunnichkan”, nispa. Arí, Judapi llaqtakunawan Jerusalen llaqtaqa chunnichkanmi, chay llaqtakunaqa kachkan mana runayuq chaynataq mana animalniyuqmi. Ichaqa kay llaqtapim kaqmanta uyarikunqa 11 kusikuymanta qaparisqanku hinaspa kusisqallaña kasqanku.+ Noviopawan noviapa rimasqanmi uyarikunqa, uyarikunqataqmi kayna nisqankupas: “¡Angelkunata kamachiq Jehova Diostayá agradecekuychik, Jehova Diosqa allin Diosmi,+ imaña kaptinpas wiñaypaq kuyakuqmi!”’, nispa.+
Jehova Diosqa nintaqmi: ‘Ñuqa Jehova Diospa wasiymanmi apamunqaku agradecekusqankumanta ofrendakunata.+ Qallariypi hinam huklawman apasqakunata kutichimusaq’, nispa.
12 Angelkunata kamachiq Jehova Diosmi nin: ‘Runakunapa mana kanan, animalkunapa mana kanan chunniqpim hinaspa llapallan llaqtankunapim pasto kakunqa ovejankutawan cabrankuta michinankupaq’, nispa.+
13 Jehova Diosmi nin: ‘Michiqkunam ovejankuta kaqmanta yupanqaku urqukunapi kaq llaqtakunapi, wayqukunapi kaq llaqtakunapi, sur lawpi kaq llaqtakunapi, Benjamin allpapi, Jerusalenpa muyuriqninkunapi,+ Judapi kaq llaqtakunapi’, nispa.+
14 Jehova Diosmi nin: ‘Hamuchkanmi punchawkuna Israel runakunapaqwan Juda runakunapaq imam nisqayta ruwanaypaq.+ 15 Chay punchawkunapim hinaspa chay tiempopim Davidpa ayllunmanta huk mirayta rikurichisaq*,+ paymi allin ruwaytawan allin kaqta allpa pachaman apamunqa.+ 16 Chay punchawkunapim Juda nacion salvasqa kanqa+ Jerusalenpipas hawkam kawsakunqaku,+ chayraykum sutichanqaku: “Jehova Diosqa allinninchikpaq ruwaqmi”’, nispa.+
17 Jehova Diosmi nin: ‘Davidpa miraynillanmantam Israelpa mirayninpiqa haykapipas kamachinqa,+ 18 Leviy ayllupi sacerdotekunamanta huk runam ofrendakunata ñuqapaq kañapuwanqa, kawsaykunamanta kaq ofrendakunata kañapuwanqa hinaspa animalkunata nakapuwanqa’, nispa.
19 Jehova Diosmi kaqmanta rimapayaspan Jeremiasta nirqa: 20 “Ñuqa Jehova Diosmi nini: ‘Tutawan punchaw tiempollanpi chayamunanpaq contrato* ruwasqaytaqa manam yanqachayta atiwaqchikchu.+ 21 Chaynam yupaychaqniy Davidwan contrato ruwasqaytapas mana yanqachayta atiwaqchikchu,+ nitaqmi churin kamachiq kanantapas harkakuyta atiwaqchikchu.+ Manataqmi pipas yanqachanmanchu Leviy ayllupi yupaychaqniy sacerdotekunawan contrato ruwasqaytapas.+ 22 Imaynam cielopi lucerokunapas mana yupay atina, imaynam lamar quchapi aqukunapas mana yupay atina, chaynatam yupaychaqniy Davidpatawan Leviy ayllukunapa miraynintapas mirachisaq’”, nispa.
23 Jehova Diosmi kaqmanta rimapayaspan Jeremiasta nirqa: 24 “¿Manachu kay runakunapa nisqanta uyarirqanki? Paykunam nichkanku: ‘Jehova Diosqa qipanchanqam kay akllasqan iskay ayllukunataqa’, nispa. Runaykunataqa manañam respetankuchu, manam nacionta hinañachu qawankupas.
25 Ñuqa Jehova Diosmi nini: ‘Imaynam tutapaqwan punchawpaq contratota ruwarqani,+ imaynam cielopaqwan allpa pachapaq kamachikuyta qurqani,+ 26 chaynam mana haykapipas qipanchasaqchu Jacobpa miraynintaqa nitaq yupaychaqniy Davidpa miraynintapas. Aswanqa paypa mirayninmantam kamachiqkunata hinalla akllasaq Abrahanpa, Isaacpa hinaspa Jacobpa mirayninkunata kamachinanpaq. Huklawman apasqa kaqkunata kutichimuspaymi+ llakipayasaq’”, nispa.+