Exodo

11 Jehova Diosqa Moisestam nirqa: “Egipto nacionta kamachiqtaqa* hinaspa Egiptopi runakunataqa huktawanmi ñakarichisaq. Chayñam Egiptota kamachiqqa kacharisunkichik,+ kacharisuspaykichikpas qarqusunkichikraqmi.+ 2 Israelpa miraynin runakunatayá nimuy hichpanpi yachaq* Egipto runakunamanta qullqimanta hinaspa qurimanta kaqta imakunatapas sapakama mañakunankupaq”, nispa.+ 3 Jehova Diosqa Israel runakunatam yanaparqa, chaymi Egipto runakunaqa manaña chiqnirqakuchu. Chaymantapas Moisesqa Egiptopim ancha riqsisqa rikurirurqa, chaymi Moisestaqa kamachiqpa wasinpi kaqkunapas chaynataq Egiptopi runakunapas allinpaq qawarqaku.

4 Chaymantam Moisesqa kamachiqta nirqa: “Jehova Diosmi nin: ‘Yaqa chawpi tutatam Egiptopi purisaq.+ 5 Hinaptinmi Egiptopi lliw piwi* churikuna wañunqa,+ wañunqamá kamachiqpa piwi churinpas chaynataq maraypi kutaq warmikunapa piwi wawanpas. Wañunqataqmi punta naceq animalkunapas.+ 6 Chaymi Egiptopiqa hatun llaki kaptin llumpayta waqanqaku, chayna waqasqankuqa manam ñawpaqtaqa uyarikurqachu, nitaqmi hamuq punchawkunapipas uyarikunqachu.+ 7 Israelpa mirayninkunatawan animalninkutam ichaqa allqullapas mana manchachinqachu. Chaywanmi yachankichik ñuqa Jehova Diosqa Egipto runakunamanta Israelpa mirayninkunata waqaychay atisqayta’”, nispa.+ 8 Moisesqa nirqataqmi: “Hinaptinmi llapallan runaykikuna ñuqaman hamuwaspa ñawpaqniypi qunqurakunqaku, hinaspam ninqaku: ‘Qampas chaynataq kastamasikikunapas ripukuychikyá’, nispa.+ Hinaptinmi ñuqaqa pasakusaq”, nispa. Chayta niruspanmi Moisesqa piñasqallaña kamachiqpa kasqanmanta pasakurqa.

9 Chaymantam Jehova Diosqa Moisesta nirqa: “Egiptopi tukuy ima milagrokunata hinalla ruwanaypaqmi+ Egiptota kamachiqqa mana uyarisunkichikchu”,+ nispa. 10 Moiseswan Aaronqa Egiptota kamachiq qawachkaptinmi Diospa atiyninwan achka milagrokunata ruwarqakuña.+ Kamachiqtam ichaqa Jehova Diosqa manaraq imanarqachu rumi sunqu kachkaptinpas, chaymi Egiptota kamachiqqa Israelpa mirayninkunata mana kacharirqaraqchu.+