Salmos
Takiqkunata yachachiqpaq. Amanqaymanta takiman hina taki. Yuyarinapaq. Asafpa takisqan.+
80 Israel runakunapa michiqnin uyariykuy.
Ovejata hina Joseyta pusaq Diosnilláy, uyariykuyá.+
2 Efrainpa, Benjaminpa, Manasespa ñawpaqninpiyá
atiyniki sutilla kachun.+
Hamuspayá yanapaykullawayku.+
3 Taytalláy, kaqmantayá sayariykachillawayku.+
Yanapasqa kanaykupaqyá uyayki kancharimullawachunku.+
4 Angelkunata kamachiq Jehova Dioslláy. ¿Haykapikamataq piñasqa kanki? ¿Haykapikamataq qayakamusqaykuta mana uyariwankikuchu?+
5 Qamqa wiqinkutam tantata hina quykunki.
Qamqa wiqinkutam millpuykachinki.
6 Qamqa huklaw runakuna qichunakuwanankupaqmi saqiruwankiku.
Chiqniwaqniyku runakunam munasqankuta ruwawanku. Chiqniwaqniyku runakunam ñuqaykumanta asikunku.+
7 Angelkunata kamachiq taytalláy, kaqmantayá sayariykachillawayku.
Yanapasqa kanaykupaqyá uyayki kanchariykamullawachunku.+
8 Egiptomantam uvasta lluqsichimurqanki.+
Manaraq plantachkaspaykim huklaw runakunata qarqurqanki.+
9 Chay allpapi tukuy kaqkunata hurquruspam sumaqta qallpayachirqanki.
Chaypi sapichakuspam enteron allpapi mastarikurqa.+
10 Llantuyninmi urqukunatapas pampaykurqa.
Diospa cedro sachankunatapas kallmankunam llantuykurqa.
11 Lamar quchakamam kallmankunaqa chayarqa.
Eufrates mayukamam ikllipankunapas* chayarqa.+
12 ¿Imaynanpitaq uvasnikikunapa murallanta tuñirachinki?+
Tuñisqata qawaspankum chaynin puriq runakunapas uvasnikita pallakunku.+
13 Purunpi wiñaq kuchikunam uvasnikita mikukunku.
Purun animalkunam uvasnikita mikukunku.+
14 Angelkunata kamachiq taytalláy, ama hina kaspayá kutirimuy.
Hanaq pachamanta qawarimuy.
Qawarimuspaykiyá kay uvasnikita sumaqta waqaychaykuy.+
15 Plantasqayki raku tulluntayá alliq* makikiwan waqaychaykuy.+
Qawarimuyá kallmankunata, qampaqmi mana pakikuqta wiñachirqanki.+
16 Ninawanmi kañarunku,+ takaparunkum.
Qaqchaptikim runakuna wañuchkanku.
17 Makikiyá hapichun alliqnikipi kaq runataqa.
Makikiwanyá hapiykuy runapa churinta. Qampaqmi kallpasapata ruwaykurqanki.+
18 Chayta ruwaptikiqa manam qanmantaqa karunchakusaqkuchu.
Wañuymantayá harkaykuwayku, chaynapi sutikipi qayakamunaykupaq.
19 Angelkunata kamachiq Jehova Dioslláy, kaqmantayá sayariykachillawayku.
Yanapasqa kanaykupaqyá uyayki kancharimullawachunku.+